Ekole ti Guiléad: Angu 60 ti fango lege na azo ti ga amissionnaire
“GBÂ ti aye so e manda na yâ Bible asala si e ga ndulu mingi na Jéhovah ahon ti kozo, na e manda aye mingi nga so andu bungbi ti lo. Ye so aleke tâ e teti kusala so e yeke gue ti sala na kodoro wande.” Tënë so alondo na yanga ti mbeni ita-wali so ayeke élève lani na kozo klase ti Guiléad; lo tene tongaso ti fa peko ti aye so lo manda na Guiléad, Ekole ti Mandango Bible ti Société Watchtower. Ngbele ye na ngoi so a zia ni na sese a sala fadeso angu 60 awe, Ekole ti Guiléad angbâ lakue ti tokua amissionnaire. Ti si na lango 8 ti mars ngu 2003, na ndokua ti fango ye ti Société Watchtower na Patterson na New York, a mû kota mbeti na a-élève ti klase 114 ti Guiléad. Azo 6 404 kue so aga abungbi na yâ kota da ni so, nga na yâ ambeni ndo nde nde so a zia televizion dä ti mû lege ti bâ programme ni. Ala kue adengi mê ti ala nzoni na atënë ti programme ni so na yâ ni, a yeke wara adiskur, ahundango tënë na ambeni ita, nga na mbeni lisoro na popo ti ambeni ita.
Théodore Jaracz, mbeni oko ti Wabatango Bungbi, ayeke lani président ni. Na yâ atënë ti lo ti tongo nda ni, lo gboto lê na ndo azo ti mara nde nde so abungbi na ngoi ni so, teti na popo ti ala, a yeke wara agene so alondo na Asie, na a-Antilles, na Be-Amerika, na Amerika ti mbongo, nga na Poto. Na fango peko ti 2 Timothée 4:5, Ita Jaracz afa so tâ kusala so ayeke ku na mbage ti mbeni missionnaire so awara fango lege na Guiléad ayeke ti “sala kusala ti évangéliste”. Amissionnaire ayeke sala tënë ti témoin ti tâ tënë na fango Bible na azo.
Ndangba wango na a-élève ni
John Larson, mbeni oko ti Komite ti filiale ti Amerika, amû li ni na yâ molongo ti ambeni ndulu diskur; lo sala tënë na ndo mbeni li ti tënë so akpengba mabe ti zo, so ayeke: “Tongana Nzapa ayeke na e, zo nyen alingbi ke e?” (aRomain 8:31). Ita Larson afa na yâ Bible ye so ayeke mû lege na a-élève ni ti zia bê ti ala kue na ngangu ti Jéhovah ti mû maboko na ala ti hon ndo ti ye kue so ayeke gi ti kanga lege na ala na ndo so a yeke tokua ala dä. Na salango kusala na aRomain 8:38, 39, Ita Larson amû wango so na a-élève ni: “I luti na i gbu li na ndo ngangu so Nzapa ayeke sala na kusala teti i, na i dabe i so ye oko pëpe alingbi ti fâ yâ ti tâ ndoye so Jéhovah ayeke na ni na mbage ti i.”
Na pekoni, a yeke Guy Pierce, mbeni oko ti Wabatango Bungbi si amû diskur. Lo soro li ti tënë so: “I sala si lê ti i aduti na ngia lakue!” (Luc 10:23). Lo fa so ti wara tâ ngia a hunda ti hinga Jéhovah na ti gbu nda ti ye so lo leke ti sala teti lakue lakue, nga ti bâ gango tâ tënë ti aprophétie ti Bible. Na ndo kue so ala gue dä, a-élève ni alingbi ti bata tâ ngia ti ala na batango lê ti ala si a duti lakue na ngia. Ita Pierce awa a-élève ni ti gbu li ngangu na ndo ti nzobe ti Jéhovah, na ti bata li ti ala nga na bê ti ala na ndo salango ye so bê ti Lo aye (Psaume 77:13). Na dutingo na nzoni bango ndo, a-élève ni alingbi ti hon ndo ti akpale kue so alingbi ti si na ala.
Na pekoni, use na popo ti ala so afa ye lani na a-élève ni lâ na lâ amû andangba tënë ti ala na a-élève ni ti kpengba ala. Na yâ li ti tënë ti diskur ti lo ni, Lawrence Bowen ahunda tënë so: “I yeke gi ti wara gloire?” Tongana a sala tënë ti gloire, azo mingi apensé na warango gonda, yango-iri, nga mungo iri ti ala mveni na nduzu. Ye oko, wasungo psaume Asaph awara lege ti yekia tâ ye ti gloire ni: a yeke tâ mosoro ti ngele mingi ti lë nzoni songo na Jéhovah (Psaume 73:24, 25). A wa a-élève ni ti bata mbeni kpengba songo na Jéhovah na ngbango lakue ti manda ye ngangu na yâ Bible. A-ange “aye mingi ti bâ nda ti” anzene nzene ye ni kue na ndo gango tâ tënë ti aye so Jéhovah aleke na lege ti Christ (1 Pierre 1:12). Ala ye ti manda ye mingi mingi na ndo Babâ ti ala ti wara lege ti fa na gigi gloire ti lo. Na pekoni, Ita Lawrence awa a-élève ni ti mû gloire na Jéhovah na yâ kusala ti ala ti missionnaire na mungo maboko na ambeni zo ti wara mosoro ti tâ ngele ngangu so.
Wallace Liverance, secrétaire ti Ekole ni, amû tënë na nda ni na yâ kozo molongo ti adiskur so, na li ti tënë ti lo ayeke: “Sala tënë ti ndara ti Nzapa na yâ tënë ti ndagigi so a honde”. (1 aCorinthien 2:7). Ndara ti Nzapa, so bazengele Paul asala tënë ni na yâ kusala ti lo ti missionnaire, ayeke so wa? A yeke aye so Jéhovah aleke na ndara nga na ngangu, ti sala si azo kue awara siriri na aduti beoko. Ndara so aluti mbilimbili na ndo Jésus. A hon ti fa gi nzoni tënë tongaso na ndo nzoni dutingo ti azo, Paul amû maboko na azo ti bâ tongana nyen Nzapa ayeke lungula ande aye ti sioni ti peko ti siokpari ti Adam (aEphésien 3:8, 9). Ita ni amû wango so na ala so ayeke mä lo, lo tene: “I sala kusala na matabisi ti i ti kusala tongana ti Paul so abâ lani kusala ti lo ti missionnaire tongana mbeni lege ti mû maboko na azo ti bâ tongana nyen Jéhovah ayeke sala si aye so lo leke ti sala aga tâ tënë.”
Na peko ti ye so, Mark Noumair, mbeni wafango ye ti Guiléad ni nde, amû li ni na yâ mbeni pendere lisoro na ambeni élève ti klase ni. A luti lani na ndo li ti tënë “Mandango Tënë ti Nzapa ayeke leke awakua so ayeke na wâ”. A luti na ndo tënë ti Paul na aRomain 10:10. A-élève ti klase ni afa peko ti aye mingi so asi na ala na yâ fango tënë na ngoi so ala yeke ga na ekole ni. Atapande so ala mû afa na gigi so tongana e manda Tënë ti Nzapa na e gbu li dä, aye ti nzoni na ndo Jéhovah Nzapa nga na Royaume ti lo ayeke si ande yâ ti bê ti e, na tongana e zi yanga ti e, a yeke ni si ayeke sigigi. Na yâ anze oku so ala sala na Ndokua ti fango ye ti Société Watchtower, a-élève ni ato nda ti amandango Bible ahon 30 na azo so asala nzara ti tënë ni na yâ aterritoire so a yeke fa ka tënë dä lakue ti akongregation so ayeke na tele ni.
Abiazo azi yanga ti sala tënë
Na ngoi so ala manda ye na ekole ti Guiléad, a-élève ni awara ngia ti bungbi oko na azo ti sewa ti Béthel ti Amerika. Aita use ti filiale ni, Robert Ciranko na Robert P. Johnson ahunda atënë na ambeni wakua be-ta-zo ti Jéhovah nde nde so aninga na bungbi mingi; na popo ti ala, a yeke wara asurveillant so ague na ndo nde nde so na oko ngoi ni nga ayeke wara fango lege na Ndokua ti fango ye ti Watchtower. Ala so kue a hunda atënë so na ala ayeke angbele élève ti Guiléad so asala kusala na mbeni ngoi tongana missionnaire. A yeke lani ye ti dengo bê mingi teti a-élève ni nga na azo ti sewa ti ala na akamarade ti ala ti mä atënë ti ndara so alondo na akoli biazo tongaso na lege ti yingo, so ahinga aye mingi.
Ambeni wango so ala mû ni ayeke so: “Ngbâ lakue na ye mingi ti sala na yâ kusala ti fango tënë nga na yâ kongregation”. “Bâ tele ti mo kota ahon ndo ni pëpe. Zia lê ti mo na ndo ye so ayeke ku na mbage ti mo tongana missionnaire, na sala si ndo so a tokua mo dä aga tongana kodoro ti mo mveni.” Ambeni tënë ni so amû maboko mingi afa tongana nyen fango lege so a mû ni na Guiléad amû na zo ye kue so alingbi na lo teti nzo kusala, atâa ndo ni so a tokua lo dä ayeke tongana nyen. Ambeni tënë ti ala ni ayeke so: “E manda ti sala kusala maboko na maboko.” “Ekole ni amû maboko na e ti yeda na afini ngobo ti salango ye ti ambeni zo ti kodoro wande.” “A fa na e ti sala kusala na Mbeti ti Nzapa na mbeni lege so ayeke nde.”
John E. Barr, so aninga mingi tongana oko ti Wabatango Bungbi, amû kota diskur ti programme ni. Li ti tënë ti lo so alondo na yâ Bible ayeke so: “Go ti ala asi na ndo lê ti sese kue”. (aRomain 10:18). Lo hunda tënë so: ‘Azo ti Nzapa awara lege ti sala ngangu kusala so laso? Biani, ala wara lege ti sala ni. Ngbele ye lani na ngu 1881, a yeke hunda tënë so na awadikongo Tour ti Ba Ndo: “Mo yeke fa tënë?” Na pekoni, Ita Barr adabe azo kue so aga, na ndo tisango ndo so a mû lani na kota bungbi ti Cédar Point na Ohio na ngu 1922; a yeke tisango ndo so: “Fa tënë ti Gbia ni na ti Royaume ti lo!” Tongana ngoi ayeke hon, wâ ti awakua be-ta-zo ti Nzapa apusu ala ti fa apendere tâ tënë ti Royaume na azo ti amara kue. Na lege ti ambeti nga na ti tënë ti yanga, nzo tënë asi na anda ti sese kue, na ye so kue amû gloire nga na gonda na Jéhovah. Ita Barr ahunzi tënë ti lo na wâ, na tenengo na a-élève ni ti bi bê ti ala na adeba nzoni so ala yeke wara; lo tene: “Lâ oko oko, tongana i yeke sambela Jéhovah na yâ ndo so a tokua i dä, i kiri singila na lo na bê ti i kue teti mbage so i mû na gango tâ tënë ti atënë ti lo so: ‘Go ti ala asi na ndo lê ti sese kue’.”
Na peko ti diskur so, a diko atënë ti balao so alondo na afiliale nde nde ti sese. Na pekoni, président ni amû kota mbeti na élève oko oko, na a yeke na bibe ti ngia nga na ti vundu na bê teti so ala yeke zia ekole ni so ala ndoye mingi ti hon, si mbeni élève oko amû tënë na place ti atanga ni ti diko na gbele Wabatango Bungbi nga na ti sewa ti Béthel kue, mbeni kpengba tënë so alondo na bê ti ala ti fa na gigi so ala leke na bê ti ala kue ti sepela Jéhovah “fadeso, na lakue.”—Psaume 115:18.
Sambela ti e ayeke ti tene a-élève so aleke dutingo ti ala si a lingbi na afini ndo so ala yeke gue dä, na ti tene ala mû mbage nzoni na guengo na li ni ti kusala ti fango tënë na ndo sese kue, legeoko tongana ti so amissionnaire so a tokua ala kozoni na ala asala ni teti angu 60 tongaso.
[Kete tënë na lembeti 23]
AYE TI HINGA NA NDO KLASE NI
Wungo ti akodoro so a-élève ni alondo dä: 12
Wungo ti akodoro so a tokua ala dä: 16
Wungo ti a-élève ni: 48
Ngu ti ala oko oko angoro na tele ti ngu: 34,4
Ngu ti mingi ti ala na yâ tâ tënë: 17,6
Ngu ti mingi ti ala na yâ kusala ti ngoi kue: 13,5
[Foto na lembeti 24]
Ala so awara kota mbeti na klase 114 ti Guiléad, Ekole ti Mandango Bible ti Société Watchtower
Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na mbage ti koti.
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martinez, L.; Millar, D.; Festré, Y.; Nutter, S. (3) Martinez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.