Ala yeke ndulu ti mû tele ti ala na kua ni
“AZO ti Mo amû ala mveni na nzobe.” (Psaume 110:3). Nda ti atënë so ane mingi na lê ti a-élève 46 ti klase 118 ni ti Ekole ti Galaad ti Mandango Bible ti Société Watchtower. Tongana nyen si ala leke tele ti ala kozoni ti gue na ekole so, so ayeke leke amissionnaire ti mû aye ti yingo na azo ti kodoro wande? Mike na Stacie, so ayeke na yâ ti klase 118 ni, atene: “Desizion ti e ti duti na aye mingi pëpe na yâ fini ti e amû maboko na e si aye agboto lê ti e mingi pëpe na e zia lê ti e kozoni gi na ndo aye ti yingo. E leke lani na bê ti e ti zia si nzoni duti ti e na yâ dengo buze ti sese so akanga lege na e pëpe ti gi aye ti yingo.” Na tapande ti Mike na Stacie, tanga ti a-élève ni ayeda na bê ti ala ti mû tele ti ala na ti sala kua fadeso tongana awafango tënë ti Royaume na ambage nde nde ti sese.
Na samedi lango 12 ti mars 2005, azo 6 843 na ngia na bê amä lani programme ti mungo diplôme ni. Theodore Jaracz, ti Wabatango Bungbi, amû li ni na yâ bungbi ni. Na peko ti so lo tene gango nzoni na agene ti akodoro 28 so aga, lo gboto lê na ndo nene ti fango ye so ayeke na yâ ti Bible. Na fango peko ti atënë ti William Lyon Phelps, mbeni wafango ye ti kodoro ti Amerika, lo tene: “A lingbi ti tene so zo kue so ahinga Bible mingi ahinga ye biani.” Atâa mandango mbeti ayeke nzoni tongana nyen, fango ye ti Bible ayeke kota ahon ni. A mû maboko na azo ti wara hingango ye na ndo Nzapa so ague na zo na fini ti lakue lakue (Jean 17:3). Ita Jaracz agonda a-élève ni teti so ala yeda na bê ti ala ti mû mbage mingi na yâ kapa ti fango Tënë ti Nzapa na ndo lê sese kue so a yeke sala ni na yâ akongregation ahon 98 000 ti aTémoin ti Jéhovah na ndo sese kue.
Ala wara awango so alingbi na ngoi ni
Na peko ti akozo tënë ti lo so amû li ni na yâ programme ni, William Samuelson amû diskur na ndo Psaume 52:10, so li ni atene “Tongana nyen mo lingbi ti duti tongana keke ti olive na yâ da ti Nzapa?” Lo fa so, Bible asala tënë ti keke ti olive tongana fä ti ye so alë, ti ye so ayeke pendere na ti ye so ane (Jérémie 11:16). Na hakango a-élève ni na akeke ti olive, wamungo diskur ni atene: “Fade Jéhovah ayeke bâ i tongana ye ti pendere na ti nengo tongana i sala kua ti fango tënë ti Royaume na bê ti i kue na ndo so a tokua i dä tongana amissionnaire.” Legeoko tongana keke ti olive ayeke na bezoin ti tene gere ti lo alï sese mingi si lo hule pëpe na ngoi ti buru, a-élève ni nga ayeke na bezoin ti tene ala kpengba gere ti ala ti yingo ti gbu ngangu tongana azo ake ti mä tënë, akanga lege na ala, wala tongana ala tingbi na ambeni tara na yâ fango tënë ti ala na kodoro wande.—Matthieu 13:21; aColossien 2:6, 7.
John E. Barr, mbeni oko ti ala ota ti Wabatango Bungbi so amû lani mbage na kapa ni, asala tënë na ndo kota li ti tënë so ayeke “I yeke ingo ti sese so.” (Matthieu 5:13). Lo tene so, legeoko so ingo abata kobe si a buba pëpe, fango tënë ti Royaume ti Nzapa so amissionnaire ayeke fa ayeke sö ande fini ti azo so amä ni, nga ayeke bata ala si tambela ti ala abuba pëpe na lege ti yingo. Na pekoni, tongana ti so mbeni babâ ayeke sala tënë na amolenge ti lo, Ita Barr awa mingi a-élève so awara adiplôme ni ti “duti na siriri” na azo (Marc 9:50). Lo wa ala lo tene: “I lë lengo ti yingo, na i gi ti hinga so salango ye ti i na tënë ti yanga ti i ayeke lakue na lege ti nzobe na mbage ti azo.”
Wallace Liverance, mbeni oko ti awafango ye na ekole ti Galaad, amû li ti tënë “I ngbâ na yâ mangboko na ndo so ngu alï.” Legeoko tongana mbeni mangboko so ayeke hon na ndo so ngu alï mingi alingbi ti mû nzoni lege, gbungo “tâ nda ti ye ti Nzapa mveni” (atâ tënë na ndo ye so Nzapa aleke ti sala na tongana nyen si lo yeke sala ande ni) alingbi ti mû maboko na mbeni zo ti maï na lege ti yingo (1 aCorinthien 2:10). Ti ngbâ gi na ndo akete ngu ti tâ tënë ti yingo na lege ti tengo gi ‘akozo tënë ti tënë ti yanga ti Nzapa’ ayeke kiri na e na peko, na a lingbi même ti “futi mabe ti [e] legeoko tongana ngö so afuti na yâ ngu.” (aHébreu 5:12, 13; 1 Timothée 1:19). Ita Liverance ahunzi diskur ni na tenengo: “Zia ‘mosoro na ndara na hingango ye ti Nzapa so ayeke kota mingi’ akpengba i na yâ kua ti i ti missionnaire.”—aRomain 11:33.
Mark Noumair, mbeni oko ti awafango ye na ekole ti Galaad, amû tënë so: “Fade i fa so i lingbi biani na ye so a mû na i?” Ahon ngu 60 awe, ekole ti Galaad awara pendere iri alingbi na nda ti iri ti lo so ayeke “kundu so ayeke témoin”. (Genèse 31:48). Senge pëpe ndali ti so a-élève so ahon kozo afa tënë mingi. A yeke fadeso ti a-élève ti klase 118 ni ti zia nga fango tënë ti ala na ndo ni. Ita Noumair awa a-élève ni ti mû tapande ti angbele wakodoro ti Tekoa ti ngoi ti Néhémie, na ti duti na bê ti molenge ti sala kua maboko na maboko na kongregation so ala yeke gue dä nga na afon ala amissionnaire. Lo wa ala ti duti pëpe na mara ti bê ti “akota zo” ti azo ti Tekoa so Néhémie asala lani tënë ti ala, me ti duti ndulu ti sala kua kpô sân ti gi ti gboto lê ti azo na ndo ala.—Néhémie 3:5.
Anzoni ye so asi na ala na fango tënë, nga ahundango tënë
Li ti tënë ti mbage ti kapa ni so aga na pekoni ayeke “Tënë ti Nzapa awu”. (Kusala 6:7). Na lege ti Ita Lawrence Bowen (wafango ye na ekole ni) so amû li ni, a-élève ahaka peko ti aye so asi na ala na fango tënë na ngoi so ala ngbâ ti sala ekole ni. Aye so asi na ala afa polele so ala fa lani Tënë ti Nzapa na wâ, nga Jéhovah ahiri gbä ti deba nzoni na ndo ngangu ti ala.
Richard Ashe ahunda tënë na amembre ti sewa ti Béthel so asala kua maboko na maboko na ekole ni. Atënë so ala tene amû lege ti hinga maboko so sewa ti Béthel amû na a-élève ti Galaad ti manda mbeti ti ala nzoni. Na pekoni, Geoffrey Jackson asala lisoro na ambeni missionnaire so awara diplôme ti ala ti Galaad ândö. Ala sala tënë ti alege mingi mingi so kusala ti missionnaire amû ti sepela na ti gonda Jéhovah. Mbeni oko atene: “Lê ti azo ayeke na ndo ye kue so mo yeke sala tongana missionnaire. Ala yeke mä ni, ala yeke bâ ni na ala yeke girisa ni pëpe.” Tongaso, a wa a-élève ni ti girisa pëpe ti duti na nzoni tapande lakue lakue. Kite ayeke pëpe so wango ti ndara so ayeke mû ande maboko na ala mingi na yâ ti angoi so ayeke ga.
Stephen Lett, so ayeke ti Wabatango Bungbi, amû diskur ti nda ni, so li ni ayeke “I gue na azo ‘ngu so amû fini’.” (Jean 7:38). Lo tene so na yâ ti anze oku so ahon, a-élève ni awara aye ti nzoni mingi na nyongo ngu ti tâ tënë ti Bible. Me ye wa fade afini missionnaire so ayeke sala ande na ye so ala wara ni? Ita Lett awa ala ti kangbi angu so na nzobe na azo tongaso si ala wara “lingu na yâ [ala] si a si na fini ti lakue lakue.” (Jean 4:14). Nga lo kiri lo tene: “Zia i girisa lâ oko pëpe ti mû na Jéhovah, ‘Lingu ti ngu so amû fini,’ gonda na gloire so lo lingbi na ni. I kanga bê ti i tongana i yeke fa ye na ala so asigigi na yâ Babylone ti Kota so ngu ahule dä kue.” (Jérémie 2:13). Ita Lett ahunzi atënë ti lo na wango a-élève ni ti duti na mara ti wâ so yingo na fini wali ayeke na ni, na ti tene lakue: “Ga! Na zo so ayeke na nzara ti nyon ngu, zia lo ga; zo so aye, zia lo nyon ngu so amû fini, zia lo nyon senge senge.”—Apocalypse 22:17.
Ita Jaracz ahunzi programme ni na salango tënë ti abalao ti akodoro nde nde so ala wara. Na pekoni, mbeni oko ti a-élève so awara diplôme ni adiko mbeni lettre ti kiri singila na iri ti ala kue.
Mo lingbi ti duti ndulu ti mû tele ti mo ti gue ti sala na mbeni ndo so bezoin ayeke dä? Tongana mo yeda, zia aye ti yingo na gbele mo, na gi ti si dä tongana ti so a-élève so asala. Wara ngia nga na nzerengo tele so mbeni zo ayeke wara tongana lo mû tele ti lo na bê ti lo na yâ kusala ti Nzapa: atâa tongana mbeni missionnaire na kodoro wande wala tongana mbeni wafango tënë na kodoro ti lo.
[Encadré na lembeti 13]
AYE TI HINGA NA NDO KLASE NI
Wungo ti akodoro so a-élève ni alondo dä: 8
Wungo ti akodoro so a tokua ala dä: 19
Wungo ti a-élève ni: 46
Ngu ti ala oko oko angoro na tele ti ngu: 33
Ngu ti mingi ti ala na yâ tâ tënë: 16,5
Ngu ti mingi ti ala na yâ kusala ti ngoi kue: 12,9
[Foto na lembeti 15]
Klase 118 ni ti Galaad, Ekole ti Mandango Bible ti Société Watchtower
Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na koti.
(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.