A nzere na ala mingi ti sara ye so bê ti Nzapa aye

JÉSUS azia mbeni tapande na aChrétien kue tongana lo sambela Babâ ti lo, lo tene: “Mo sara tongana Mbi ye pëpe, me Mo sara tongana Mo ye.” (Luc 22:42). Tënë ti tâ be-ti-molenge so afa dutingo nduru ti mä yanga ti Jéhovah, na laso awakua ti Nzapa kutu mingi asara legeoko. Na popo ti ala ayeke a-élève 52 ti klase 120 ni ti Ekole ti Galaad ti Mandango Bible ti Société Watchtower. Na lango 11 ti mars 2006, tënë ti guengo ti sara ye so bê ti Nzapa aye na akodoro nde nde, atâa akpale so ala lingbi ti wara, amû ngia mingi na a-élève ti klase so awara diplôme ti ala.

Nyen la apusu a-élève so ti zia ye so bê ti Jéhovah aye afa lege na fini ti ala? Chris na wali ti lo Leslie, so a tokua ala na Bolivie, afa tënë ni tongaso: “Teti so e ke tere ti e mveni awe, e ye ti duti nduru ti sara ye kue so bungbi ti Jéhovah ahunda.” (Marc 8:34). Jason na Chere, so a tokua ala na Albanie, atene nga: “Kusala kue so bungbi ti Jéhovah amû na e ayeke na akpale ti lo. Ye oko, e bâ so Jéhovah ayeke lo so a lingbi e zia bê ti e kue na lo.”

Wango ti sara ye so bê ti Jéhovah aye

George Smith, membre ti sewa ti Béthel so ayeke na Ndokua ti sarango dessin na ti lekengo ambeti ti e pendere, azi yanga ti kapa ni na sambela. Stephen Lett, ti Wabatango Bungbi ti aTémoin ti Jéhovah so amû li ti kapa ni, ayamba azo kue so aga. Agene so alondo na akodoro 23 aga na Ndo ti mandango ye na Patterson, na New York, ti duti na yâ nzoni matanga so. Ita Lett atene na a-élève ni so ala yeke gue ti sara mbeni ngangu kusala. Lo gboto lê na ndo “gbada ti bira”, aye tongana afango ye ti wataka, so afini missionnaire ni ayeke gue ti kinda ande na lege ti ngangu ti Mbeti ti Nzapa (2 aCorinthien 10:4, 5). Lo hunzi tënë ti lo tongaso: “So ngia si ala yeke wara ti tene Jéhovah asara kusala na ala ti kinda aye so alï ngangu na bê ti azo ti nzobe so ayeke na ndo ti kusala ti ala!”

Harold Jackson, so asara kua na kota ndokua, amû tënë na ndo li ti tënë so: “Ambeni ye ti dabe na ni.” Lo tene a lingbi afini missionnaire agirisa lâ oko pëpe ti ‘gi royaume na mbilimbili ti Nzapa kozoni’. (Matthieu 6:33). A yeke nzoni ala girisa nga pëpe so “ndoye asara si zo akpengba” na a zi lege lakue na ye ti ga nzoni (1 aCorinthien 8:1). Lo tene: “Zia ndoye akomande sarango ye ti ala na mbage ti azo.”

Na pekoni, Geoffrey Jackson ti Wabatango Bungbi, so a sara kua ti missionnaire ti londo na ngu 1979 ti si na ngu 2003, ahunda a-élève ni: “Ala hinga so kungba ayeke na ndo ti ala?” Lo gboto lê na ndo nene ti tene zo aduti na nzoni bango ndo na ndo lo mveni nga na ndo kusala ti fango tënë. A yeke kungba ti aChrétien ti sara kua ngangu na lungo nga na ziango ngu na ndo alê ti tâ tënë. Me, a yeke kungba ti Jéhovah ti sara si ye amaï na lege ti yingo, teti lo yeke “Nzapa so asara si a maï.” (1 aCorinthien 3:6-9). Ita Jackson akiri atene: “Ti Jéhovah, a yeke kungba ti ala ti ngbâ ti kpengba na lege ti yingo. Me tâ kota kungba ti ala ayeke so wa? A yeke ti ndoye Jéhovah na ti ndoye azo so ala yeke gue ti sara na ala.”

Lawrence Bowen, mbeni wafango mbeti na Galaad, amû tënë na ndo tënë so li ni ayeke “Hinga tongana nyen ti tambela.” Lo dabe ti a-élève so, na lege ti ye ti kpene, Jéhovah afa lege na abata azo ti Israël na yando (Exode 13:21, 22). Laso lo fa lege na lo bata e, na mbeni oko lege ni ayeke kongregation ti aChrétien so a sa yingo na ndo ala, “pilier na gere ti tene-biani.” (1 Timothée 3:14, 15). A lingbi afini missionnaire agbu tâ tënë ngangu, ye so ayeke fa lege na ayeke bata azo ti tâ be-ti-molenge.

Wallace Liverance, mbeni wafango mbeti na Galaad, awa a-élève ni ti girisa pëpe tënë ti Nzapa so ayeke “na peko ti” ala. Tënë ti Nzapa ayeke na peko ti e na lege so a hunzi ti sû Bible a sara ngu ngbangbo mingi awe. Legeoko tongana mbeni wabatango nyama so na peko ti ataba ti lo ayeke dekongo na ala, Jéhovah ayeke na peko ti azo ti lo, lo yeke fa lege na ala na lege ti “ngbâa be-ta-zo na ti ndara”. (Esaïe 30:21; Matthieu 24:45-47, NW ). Ekole ti Galaad akiri apusu a-élève ni ti mû singila mingi teti ngbâa so. “Ngbâa” ni amû même Les Saintes Écritures — Traduction du monde nouveau. Wamungo diskur ni awa a-élève ni tongaso: “Ala mû kota mosoro so ti fa ye dä na azo.”​—Matthieu 13:52.

Sarango ye so Jéhovah aye na yâ fango tënë

Na yâ mbage ti kapa so li ni atene “Na nzara ti fa Tene-nzoni”, wafango mbeti na Galaad, Mark Noumair, aluti na ndo aye so asi na a-élève ni na yâ fango tënë ti ala na ngoi so ala ngbâ na Ekole ti Galaad (aRomain 1:15). Hundango tënë na a-élève ni afa so biani ala yeke na kota nzara ti fa tënë na ngoi kue.

A-élève ni awara mbeni wango na lege ti atënë so Kenneth Flodin ahunda na asurveillant so ague na ndo nde nde so asara kua fadeso na Amerika. Richard Keller na Alejandro Lacayo, so kozoni asara kua na mbage ti Amerika ti Mbongo nga na ti Bê ni, afa tongana nyen ala luti na gbele atara nde nde nga na ambeni ye ti nzoni so ala wara na ngoi so lani ala yeke amissionnaire. Moacir Felisbino asara tënë ti fango ye so lo wara na ngoi so lo sara kua na tere ti amissionnaire na Brésil, ndo so lo kono dä.

David Schafer ahunda tënë na amissionnaire ota so aninga na yâ kusala ni, Robert Jones, Woodworth Mills na Christopher Slay. Aita-koli ota so afa tongana nyen ala manda ti sara ye na ziango bê na Jéhovah na ngoi so aye ti ngangu asi na ala. Ala fa na a-élève ni so fango ye so ala wara na mbage ti bungbi ti Jéhovah aleke ala nzoni teti kusala ti ala ti missionnaire. Na nduru tënë, Ita Mills afa nda ni tongaso: “A yeke pëpe aye na ndo hingango ndo so Galaad afa na mbi si amû maboko na mbi mingi, me a yeke ye so ekole afa na mbi na ndo dutingo na tâ be-ti-molenge na ndoye.”

Guy Pierce, ti Wabatango Bungbi, amû kota diskur ni so li ni ayeke “Fade Jéhovah atï na yâ kusala ti lo lâ oko pëpe.” Lani Adam atï, me so aye ti tene Nzapa atï na yâ kusala ti lo? Nzapa atï na yâ akusala ti lo na lege so lo sara Adam mbilimbili-kue pëpe, tongana ti so ambeni zo atene? Oko pëpe, teti “Nzapa asara zo mbilimbili”. (Zo-ti-fa-tene 7:29). Wamungo diskur atene so dutingo be-biani ti Jésus na gbele kota tara na sese afa so “Adam ayeke na raison oko pëpe ti tï”. Tara ti mango yanga ti Adam na yaka ti Eden ayeke ngangu pëpe tongana a haka ni na tara so Jésus ahon ni na ngangu. Ye oko, Adam atï. Me, fade Jéhovah atï na yâ kusala ti lo lâ oko pëpe. Ye so lo leke ti sara ayeke ga tâ tënë (Esaïe 55:11). Ita Pierce atene na afini missionnaire ni: “Ala yeke na pasa ti gonda Jéhovah ndali ti so ala yeke nduru ti zia yamba ambeni ye ti ala. Zia Jéhovah aduti na ala oko oko na ndo kue so ala yeke gue dä ti sara na lo tongana amissionnaire.”

Na peko ti so Ita Lett so amû li ti kapa ni amû bara ti afiliale nde nde ti aTémoin ti Jéhovah, lo mû na a-élève ni diplôme ti ala na mbeti ti ndo so a tokua ala dä. Na nda ni, Vernon Wisegarver, ngbene zo na yâ sewa ti Béthel, asambela na iri ti azo kue.

Azo 6 872 so aga na matanga ti mungo diplôme so abâ so ala kiri awara nzara ti sara ye so bê ti Nzapa aye (Psaume 40:9). Ambeni élève ni, Andrew na Anna, atene: “E mû fini ti e na Jéhovah awe. E mû zendo na lo ti sara ye kue so lo hunda na e. Ni la ye so Jéhovah ahunda na e ayeke ti gue na Cameroun, na Afrika.” Ala na atanga ti élève ni ayeke na nzara mingi ti to nda ti mbeni kusala so ayeke mû ande na ala nzerengo tere na kota ngia. Biani, a nzere na ala mingi ti sara ye so bê ti Nzapa aye.

[Encadré na lembeti 17]

AYE TI HINGA NA NDO KLASE NI

Wungo ti akodoro so a-élève ni alondo dä: 6

Wungo ti akodoro so a tokua ala dä: 20

Wungo ti a-élève ni: 52

Ngu ti ala oko oko angoro na tere ti ngu: 35,7

Ngu ti mingi ti ala na yâ tâ tënë: 18,3

Ngu ti mingi ti ala na yâ kusala ti ngoi kue: 14,5

[Kete tënë na lembeti  18]

Klase 120 ni ti Galaad, Ekole ti Mandango Bible ti Société Watchtower

Na yâ bungbi ti a-iri so a fa na gbe ni ge, a fa numéro ti amolongo ni ti londo na dawa ti kiri na peko, nga na ndo molongo oko oko, a fa iri ti azo ni ti londo na gati ti gue na koti.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.