Tâ lege ti wara ngia

JÉHOVAH, “Nzapa so ayeke na ngia,” nga Jésus Christ, “Gbia so ayeke na ngia na so ayeke gi oko”, ahinga nzoni mingi ahon azo kue ye so alingbi ti sala si zo aduti na ngia (1 Timothée 1:11; 6:15, NW ). Tongaso, a yeke ye ti dongo bê pëpe so a yeke wara tâ kelele ti dutingo na ngia na yâ Mbeti ti Nzapa, Bible.​—Apocalypse 1:3; 22:7.

Na yâ lisoro ti lo so azo kue ahinga tënë ni nzoni, lisoro so lo sala na ndo hoto, Jésus afa aye so alingbi ti mû lege na zo ti duti na ngia. Lo tene: Ngia ayeke na azo so (1) ahinga ye ti yingo amanke ala, (2) atoto na vundu, (3) ayeke na tâ be-ti-molenge, (4) nzara ti mbilimbili asala ala legeoko tongana nzara ti kobe na ti ngu asala zo, (5) asala be-nzoni, (6) bê ti ala ayeke na sioni oko pëpe, (7) ayeke awasalango songo, (8) a sala ngangu na ala teti kusala ti mbilimbili na (9) a sala ngangu na ala ngbanga ti mbi.​—Matthieu 5:3-11.a

Atënë ti Jésus so ayeke tâ na lege ni?

A hunda ti fa gi kete tongana nyen ambeni tënë ti Jésus so ayeke tâ tënë. Zo wa ayeke ke ande so ngia ti zo so ayeke na tâ be-ti-molenge wala so asala ye na ngangu pëpe, so asala be-nzoni, so aye siriri na so bê ti lo ayeke na sioni kete pëpe ahon ngia ti lo so aye ngonzo, tiri na so aye ti sala be-nzoni pëpe?

Ye oko, e lingbi ti hunda tele ti e, na lege wa azo so nzara ti mbilimbili asala ala legeoko tongana nzara ti kobe na ti ngu asala zo wala azo so ayeke toto na vundu alingbi ti duti na ngia? Mara ti azo tongaso ayeke na mbeni nzoni bango ndo na ndo ti aye so ayeke si na sese ti laso. Ala yeke “azo so abima, ala so atoto teti ye kue ti sioni mingi so azo asala” ni na ngoi ti e laso (Ezéchiel 9:4). A yeke pëpe gi ye so mveni la asala si ala duti na ngia. Ye oko, na ngoi so ala yeke manda aye so Nzapa aleke ti ga na dutingo ti mbilimbili na ndo sese na nga ti ga na mbilimbili na azo so ayeke sala ngangu na ala, bê ti ala ayeke na kota ngia mingi.​—Esaïe 11:4.

Ndoye teti mbilimbili apusu ambeni zo ti toto nga ngbanga ti so ala manke lakue ti sala ye so ayeke mbilimbili. Ni la, ala hinga so ye ti yingo amanke ala. Mara ti azo tongaso ayeda na bê kue ti gi ti wara fango lege ti Nzapa, ngbanga ti so ala bâ so gi lo oko alingbi ti mû maboko na ambeni zo ti hon ndo ti awokongo ti ala.​—aProverbe 16:3, 9; 20:24.

Azo so ayeke toto na vundu, so nzara ti mbilimbili ayeke sala ala legeoko tongana nzara ti kobe na ti ngu asala zo, nga ala so ahinga so ye ti yingo amanke ala abâ so a yeke kota ye ti duti na mbeni nzoni songo na Wasalango ye kue. Ti lë mbeni nzoni songo na azo ti mitele ayeke ga na zo ngia, me ngia ni ayeke duti kota mingi tongana zo alë nzoni songo na Nzapa. Biani, azo so ayeke tâ na ndoye ti salango ye ti mbilimbili, azo so aye na bê ti ala kue fango lege so alondo na Nzapa, a lingbi biani ti di iri ti ala azo so ayeke na ngia.

Ye oko, peut-être a yeke ngangu na mo ti bâ so mbeni zo so a sala ngangu na lo wala so a zonga lo alingbi ti duti na ngia. Me a lingbi biani ti duti tâ tënë ngbanga ti so a yeke Jésus si atene tongaso. Ni la, a lingbi a gbu nda ti tënë ti lo so tongana nyen?

Ala yeke na ngia atâa salango ngangu: Tongana nyen?

Bâ so Jésus atene lani pëpe so zonga na salango ngangu gi ala mveni ayeke ga na zo tâ ngia. Lo tene: “Ngia ayeke na azo so azo asala ngangu na ala teti kusala ti mbilimbili, . . . tongana azo azonga [ala], na ala sala ngangu na [ala], . . . ngbanga ti Mbi.” (Matthieu 5:10, 11). Tongaso, zo ayeke wara ngia gi tongana a sala ngangu na lo ngbanga ti so lo mû peko ti Christ, na so asalango ye ti lo ague legeoko na akpengba-ndia ti mbilimbili so Jésus afa ni.

Tapande ti ye so asi na aChrétien ti ngoi ti abazengele afa tâ tënë ti ye so. Amembre ti Sanhédrin, kota da-ngbanga ti aJuif, “[a]hiri abazengele ni ti ga, ala apika ala, ala zingo na ala ti sala tënë na iri ti Jésus pëpe, na ala zia lege na ala ti gue.” Salango ye ti abazengele lani ayeke tongana nyen? ‘Tongaso ala sigigi na tribunal, na ala yeke na ngia teti A bâ ala alingbi na hungo pono ti ye ti kamene teti Iri so. Lakue, na yâ Temple, nga na yâ da ti azo, ala zia pëpe ti fa nda ti tënë, na ti fa Tene-nzoni ti Jésus, Lo so ayeke Christ.’​—Kusala 5:40-42; 13:50-52.

Bazengele Pierre akiri afa polele kamba so ayeke na popo ti zonga na ngia. Lo sû na mbeti: “Ngia ayeke na i, tongana ala sala tënë ngangu na li ti i teti iri ti Christ, teti Yingo ti Gloire na ti Nzapa aduti na ndo i.” (1 Pierre 4:14). Biani, ti bâ pasi tongana Chrétien ngbanga ti salango ye so ayeke nzoni, atâa so bango pasi tongaso anzere na zo pëpe, ayeke ga na zo ngia, ngia so zo awara ni na hingango so lo yeke na yingo vulu ti Nzapa. Ngbanga ti nyen a tene so kamba ayeke na popo ti yingo vulu na ngia?

Akusala ti mitele wala alengo ti yingo?

Nzapa ayeke mû yingo vulu ti lo gi na azo so ayeke mä yanga ti lo tongana gbia (Kusala 5:32). Jéhovah ayeke mû pëpe yingo ti lo na azo so  ayeke sala “[a]kusala ti mitele”. Akusala ti mitele ni ayeke “lango-sioni, sioye, ye ti pitan, sambelango ayanda, tënë ti yorö, kengo tele, gingo tënë, salango mbanda, ngonzo, papa, tënë ti kangbi, tënë ti secte nde nde, bê, nyongo sämba, pumba kirikiri, na mbeni ye tongaso.” (aGalate 5:19-21). Biani, na yâ sese ti laso, akusala ti mitele amû ndo kue. Ye oko, ala so ayeke sala akusala so ayeke duti na tâ ngia pëpe. Nde na so, ala so ayeke sala ni ayeke buba songo ti ala na asewa ti ala nga na akamarade ti ala. Na ndo ni, Mbeti ti Nzapa atene so azo so ayeke sala akusala so “fade ala ga ahéritier ti royaume ti Nzapa pëpe.”

Nde na azo so ayeke sala akusala ti mitele, Nzapa ayeke mû yingo ti lo na ala so ayeke lë “lengo ti Yingo.” Lengo ti yingo so ayeke “ndoye, tâ ngia, siriri, be-nze-pepe, nzobe, bê ti sala nzoye, be-biani [“mabe”, NW ], tâ be-ti-molenge, na ngangu ti kanga nzara ti tele”. (aGalate 5:22, 23). Tongana e yeke fa na gigi alengo so, e yeke leke lege ti lë songo ti siriri na ambeni zo nga na Nzapa, na ye so ayeke ga na e tâ ngia. (Bâ li ti tënë “Aye so alingbi ti sala si zo awara ngia.”) Kota ye ni mingi ayeke so na fango na gigi nzobe, nzoye nga na ambeni mbage ti lengo ti yingo, e yeke nzere na lê ti Jéhovah na e yeke wara pendere beku ti fini ti lakue lakue na yâ fini sese ti Nzapa so mbilimbili ayeke duti dä.

A hunda ti soro lege so ayeke ga na zo ngia

Na ngoi so Wolfgang na Brigitte, mbeni koli na wali so ayeke na kodoro ti Zamani, ato nda ti manda Bible na bê ti ala kue, ala yeke lani na gbâ ti aye ti mitele, ye so azo abâ ti ala ni tongana ye so ayeke ga na zo ngia. Ala de lani maseka na ala yeke na nzoni seni. Ala yeke yü abongo ti nginza, ala yeke lango na yâ ti mbeni da so ayeke pendere mingi nga ala yeke dë mbeni buze so ayeke ga na ala nginza mingi. Ala yeke mû mingi ti angoi ti ala ti tomba peko ti aye ti mitele me ye so aga na ala tâ ngia pëpe. Ye oko, na pekoni, Wolfgang na Brigitte amû mbeni kota desizion. Ala to nda ti mû angoi mingi nga angangu ti ala ti tomba peko ti aye ti yingo na ala yeke gi lege ti ga ndulu na Jéhovah. Desizion so ala mû aga na ala ti gbian bango ndo ti ala, ye so apusu ala ti zi ambeni ye so ayeke ne ala senge senge na yâ fini ti ala, na ala sala kusala tongana apionnier, iri so a mû na awafango tënë ti ngoi kue. Laso, ala yeke sala kusala tongana aBéthelite na filiale ti aTémoin ti Jéhovah na Zamani. Nga, ala yeke manda mbeni yanga ti kodoro ti azo ti Asie ti tene ala wara lege ti mû maboko na awande ti hinga atâ tënë so ayeke na yâ Mbeti ti Nzapa, Bible.

Koli na wali so awara biani tâ ngia? Wolfgang atene: “Ngbele ye so e bi tele ti e mingi na tombango peko ti aye ti yingo, e wara ngia mingi. Ti sala na Jéhovah na bê kue akpengba nga mariage ti e. Giriri, e duti na mbeni mariage so aga na e ngia, me e yeke na aye so a lingbi e sala ni nga anzara ti bê ti e ague lani legeoko pëpe. Me fadeso, e kue e bungbi beoko na e yeke gi mbeni ye oko so e zia ni na gbele e use kue.”

A hunda nyen ti wara ngia?

Na ndulu tënë: Kpe “[a]kusala ti mitele” na lë “lengo ti Yingo” ti Nzapa. Ti wara ngia, a hunda na mbeni zo ti tene lo duti na kota nzara ti wara mbeni nzoni songo na Nzapa. Zo so asala ngangu ti duti na mara ti songo tongaso, fade dutingo ti lo ayeke lingbi biani na ti zo so ayeke na ngia, so Jésus asala tënë ni.

Ni la, tene hio pëpe so mo lingbi pëpe ti wara ngia so. Biani, laso mo lingbi ti duti na nzoni seni pëpe wala mo yeke na akpale na yâ mariage ti mo. Peut-être mo dü molenge pëpe wala mo yeke tiri ti wara mbeni nzoni kua ti nginza. Peut-être mo yeke na nginza tongana ti kozo pëpe. Ye oko, gbu ngangu, nda ti tënë ayeke dä oko pëpe ti tene mo sala vundu. Royaume ti Nzapa ayeke zi ande akpale so kue nga ambeni mingi. Biani, na yâ ngoi kete fade Jéhovah Nzapa ayeke sala si zendo ti lo aga tâ tënë; wasungo psaume afa peko ti zendo so tongaso: “Royaume ti Mo angbâ lakue lakue . . . Mo lungula maboko ti Mo, na Mo mû ye alingbi na nzara ti ye kue so ayeke na fini.” (Psaume 145:13, 16). Legeoko tongana ti so awakua ti Jéhovah kutu mingi na ndo lê sese kue alingbi ti tene, batango na li beku so Jéhovah amû zendo ni ayeke mû maboko mingi na mo ti wara ngia laso.​—Apocalypse 21:3.

[Kete tënë na gbe ni]

[Kete tënë/Foto na lembeti 6]

Aye so alingbi ti sala si zo awara ngia

Ndoye ayeke pusu ambeni zo ti ndoye mo nga.

Ngia ayeke mû ngangu na mo ti luti na gbele akpale nga na atara.

Siriri ayeke mû maboko na mo ti duti na nzoni songo na azo.

Be-nze-pepe ayeke mû lege na mo ti bata ngia ti mo même na gbele atara.

Nzobe ayeke pusu azo ti ga ndulu na mo.

Bê ti sala nzoye so mo yeke fa ayeke pusu azo ti mû maboko na mo na ngoi so mo yeke na bezoin ni.

Mabe ayeke mû lege ande na mo ti hinga so biani Nzapa ayeke fa lege na mo na ndoye.

Salango ye na ngangu pëpe ayeke sala si bê ti mo, bibe ti mo nga na tele ti mo ayeke duti kpô.

Ngangu ti kanga nzara ti tele ayeke sala si agirisango lege ti mo ayeke duti ande mingi pëpe.

[Afoto na lembeti 7]

Ti wara ngia, a lingbi mo kaï nzara ti aye ti yingo