Azo wa ayeke mû gloire na Nzapa laso?

“Seigneur na Nzapa ti e, Mo lingbi ti wara gloire, na yango-iri, na ngangu.”​—APOCALYPSE 4:11.

MBENI lâ, na yâ ti ngu 1940 ti ga na 1949, George de Mestral, wakode-kua ti Suisse, afono legeoko na mbo ti lo. Na kiringo ti ala na yanga-da, lo bâ akete kete ye so akpa kî agbu bongo ti lo nga na kuä ti tele ti mbo ni. Lo ye ti hinga ye na ndo akete kete kî so. Lo mû mbeni masini ti bâ na ni, na bê ti lo adö ti bâ so aye so agbu akete kete kî so na tele ti mba ayeke tongana lê ti yango. Na nda ni, lo sigigi na mbeni ye so a yeke zia ka ni na tele ti aporo so ayeke na boucle nga na kamba pëpe, so tongana mo mû ti nduzu mo pete na ndo ti lo ti gbe ni a yeke gbu tele. Nde na de Mestral, ambeni zo ayeke nga dä so asigigi na aye so akpa ati so Nzapa aleke. Na kodoro ti Amerika, aita Wright asigigi na mbeni lapara na peko ti so ala manda ye na ndo akota ndeke na hulungo ni. Na salango kusala na akpengba-ndia so amû lege na bio ti gere ti zo ti yô nengo ti lo, Alexandre-Gustave Eiffel, wakode-kua ti kodoro ti France, aleke Tour Eiffel na gbata ti Paris.

² Atapande so afa tongana nyen lege mingi azo ayeke haka peko ti aye so Nzapa aleke ti sigigi na aye. Ye oko, a yeke na lege ni ti hunda tënë so: Lege oke azo so ayeke sigigi na aye amû gonda na Lo so aleke akete kete kî so akpa lê ti yango, akota ndeke, bio ti gere ti zo nga na ambeni ye so a leke ni na kode na so ayeke na gunda ti aye so azo mingi asigigi na ni? Ye ti mawa ni, so e kue e hinga, ayeke so a yeke ngangu ti tene azo amû na Nzapa gonda wala gloire so lo lingbi na ni.

³ Ambeni zo alingbi ti hunda tele ti ala: ‘Ngbanga ti nyen a yeke tâ kota ye ti mû gloire na Nzapa? Nzapa ayeke na gloire awe pëpe?’ Biani, Jéhovah ayeke Zo so ayeke na gloire ahon tanga ti azo kue na yâ ti dunia, me a yeke azo kue pëpe si ayeke bâ lo tongana zo so ayeke na gloire. Na yâ ti Bible, gunda ti tënë ti yanga ti Hébreu so a kiri pekoni na “gloire” aye ti tene “nengo ti mbeni ye”. Na a ye ti fa aye kue so ayeke sala si mbeni zo ane, wala lo yeke kota na lê ti azo. Tongana a ndu Nzapa, tënë ni so aye ti fa ye so asala si Nzapa ayeke kota mingi na lê ti zo.

⁴ Laso, a yeke azo mingi pëpe si ahinga ye so asala si Nzapa ayeke kota mingi (Psaume 10:4; 14:1). Biani, même tongana ala mä na bê na Nzapa, fani mingi, azo so ayeke na kota ndo ayeke pusu azo ti ne pëpe Wasalango dunia so asi singo na gloire. Ala yeke sala ni tongana nyen?

“Ala yeke na tënë ti kiri pëpe”

⁵ Mingi ti awasenda-ye angbâ ti tene so Nzapa ayeke dä pëpe. Tongaso, tongana nyen ala yeke fa nda ti apendere ye so e yeke bâ, so na popo ni azo? Ti ala, apendere ye so kue aga gi tongaso. Na tapande, Stephen Jay Gould, mbeni wasenda-ye so amä na bê so zo aga na lege ti nyama, asû na mbeti: “E yeke na fini ndali ti mbeni bungbi ti asusu so ayeke na agere so ayeke nde mingi. Agere so agbian ti ga agere ti anyama so ayeke tambela na ndo sese . . . E lingbi ti ku kungo ti wara mbeni kiringo tënë so ayeke ‘kota mingi’, me a yeke dä pëpe.” Legeoko nga, Richard E. Leakey na Roger Lewin asû na mbeti: “Peut-être azo abâ gigi gi na lege ti mbeni ngangu ndao tongaso.” Même ambeni wasenda-ye so ayeke gonda aye ti dunia ndali ti nzoni tambela ni, pendere ni nga na kode so a leke na ni ayeke mû gonda ni na Nzapa pëpe.

⁶ Tongana azo so ahinga ndo atene biani so aye aga tâ gi na bê ti ala mveni, ala ye ti fa so ala so ake ni ayeke azo so ahinga ndo pëpe. Mingi ti azo atene ti ala nyen na ndo tënë so? A sala ngu kete awe, mbeni koli so ahinga ye mingi na ndo tënë so a tene aye aga gi tongaso ahunda tënë na azo so ayeda na ni. Lo tene: “Mbi bâ so mingi ti azo so amä na bê na tënë so ayeda na ni ngbanga ti so a tene na ala so azo kue so ahinga ndo ayeda na ni.” Biani, tongana azo so ahinga ndo afa abango ndo ti ala so afa atene Nzapa ayeke dä pëpe, ye so ayeke sala si ambeni zo ake ti mû na Nzapa gonda so lo lingbi na ni ndali ti so lo yeke Wasalango ye.​—aProverbe 14:15, 18.

⁷ Awasenda-ye ayeke na aye nga na afä so amû lege na ala ti tene so aye aga gi tongaso? Oko pëpe! Aye so angoro e afa so mbeni Wasalango ye ayeke dä. Na ndo lo, bazengele Paul asû na mbeti: “A komanse na lâ ni so Nzapa acréé sese so, azo ahinga ye ti Lo so lê abâ pëpe, ngangu ti Lo ti lakue lakue na ye ti Nzapa ti Lo, azo ahinga ye so mbilimbili na lege ti ye so Lo sala awe. Tongaso ala [azo so amä na bê pëpe a]yeke na tënë ti kiri pëpe.” (aRomain 1:20). E lingbi ti bâ afä ti Wasalango ye na lege ti aye ti maboko ti lo. Ni la, Paul atene so a komanse na ngoi so azo abâ gigi, azo alingbi ti ‘hinga’ wala ti bâ aye so afa atene Nzapa ayeke dä na lege ti aye ti maboko ti lo so lê abâ. Aye ni ayeke na ndo wa?

⁸ E yeke bâ afä so afa atene Nzapa ayeke dä na lege ti atongoro so ayeke na lê ti nduzu. Psaume 19:2 atene: “Ayayu asala tënë ti gloire ti Nzapa.” “Ayayu”, so ti tene lâ, nze na atongoro afa ngangu nga na ndara ti Nzapa. Gbâ ti atongoro so ayeke za zango ayeke sala si bê ti e adö. Nga, ala kue ayeke tambela na lê ti nduzu gi tongaso pëpe, me na lege ti ambilimbili ndia so ayeke fa lege na ala (Esaïe 40:26).a A yeke tâ na lege ni ti tene so aye so aga gi tongaso? A yeke senge ye pëpe so mingi ti awasenda-ye atene so dunia ayeke na tongo nda ni. Ti fa kota ti tënë so, mbeni wafango ye asû na mbeti: “Ti tene so dunia ayeke gi dä lakue ayeke tâ ye so alingbi na [bango ndo] ti zo so atene Nzapa ayeke dä pëpe wala zo so ayeke na kite na ndo Lo. Legeoko nga, ti tene so dunia ayeke na tongo nda ni, a bâ so a hunda ti tene lingu ni aduti dä; ndali ti so zo wa si alingbi ti yeda so mbeni ye ato nda ni gi tongaso sân ti tene mbeni ye ayeke na gunda ni?”

⁹ E yeke bâ nga aye so afa atene Nzapa ayeke dä na ndo sese ge. Wasungo psaume atene: “O L’Eternel, kusala ti Mo ayeke mingi! Na lege ti ndara ti Mo, Mo sala kusala ni kue; sese so asi singo na mosoro ti Mo.” (Psaume 104:24). “Mosoro” ti Jéhovah andu nga anyama so ayeke fa ndara ti lo. Tongana ti so e bâ na tongo nda ni, awasenda-ye ayeke haka gi peko ti kode so a leke na aye tongana andeke nga na anyama. Bâ ambeni kete tapande so. Azo ayeke manda aye na ndo adidi ti tagba ti leke na acasque so akpengba ngangu; ala yeke manda ye na ndo amara ti ngungu so mê ti ala aza mingi ti sala si amasini so azo ayeke yü na mê ti ala ti mä na ndo aga nzoni ahon ti kozo; nga, ala yeke manda ye na ndo akuä ti kpangbi ti ahibou na bibe ti leke si a kiri a ga ngangu na tatara ti bango na ye, so a hiri ni radar, ti bâ ambeni avion. Me, atâa ngangu wa zo asala ti haka peko ti aye so Nzapa aleke, lo lingbi pëpe ti leke ni tâ gi tongana ti so Nzapa aleke. Buku Hakango peko ti aye ti dunia ti leke na afini ye (Angl.) atene: “Aye tongana anyama na andeke ayeke sala ye kue so e ye ti sala, sân ti hunzi amosoro ti gbe ti sese [tongana pétrole], wala ti sala si sese ti e aga sioni, wala ti buba gigi ti ala ti kekereke.” So tâ ndara!

¹⁰ Tongana mo yeke bâ ndo na nduzu wala mo bâ ndo nzoni na sese ge, aye so afa atene mbeni Wasalango ye ayeke dä asigigi polele (Jérémie 10:12). E lingbi ti yeda na bê kue na acréature ti yayu so ayeke dekongo: “Seigneur na Nzapa ti e, Mo lingbi ti wara gloire, na yango-iri, na ngangu, teti Mo sala ye kue giriri.” (Apocalypse 4:11). Ye oko, atâa so bê ti mingi ti awasenda-ye alingbi ti dö ndali ti kode ti aye so ala bâ na lê ti ala, ‘lê ti bê ti ala’ ayeke bâ fä ti Wasalango ye pëpe (aEphésien 1:18). E lingbi ti mû mbeni tapande ti fa ni: Ti bâ pendere ti aye so angoro e nga na kode so a leke na ni na ti ke so mbeni Kota Wasalango ye ayeke dä ayeke na lege ni oko pëpe, legeoko tongana ti so mo bâ mbeni pendere dessin na mo ke ti yeda so zo ti salango dessin ni ayeke dä. A yeke ye ti dongo bê pëpe so ala so ake ti mä na bê na Nzapa ayeke na “tënë ti kiri pëpe” wala a lingbi ti pardone ala pëpe.

Awafango lege so ayeke “awaziba” ahanda azo mingi

¹¹ Mingi ti azo so ayeke gue na da ti Nzapa amä na bê biani so ala yeke mû gloire na lo na lege ti kode so ala yeke voro na lo (aRomain 10:2, 3). Ye oko, tongana a bungbi anzapa so azo ayeke sala ni oko, a lingbi biani ti tene so a yeke na popo ti aye so akanga lege na azo kutu mingi ti mû gloire na Nzapa. Na lege wa? Zia e bâ alege use.

¹² Kozoni, na lege ti afango ye ti wataka, abungbi ti vorongo asala si azo amû gloire na Nzapa pëpe. Na tapande, fango ye so atene Nzapa adiko ye oko oko kue kozoni si asi. Fango ye so aluti na ndo bango ndo so azo ayeke na ni so atene tongana Nzapa ayeke na ngangu ti hinga ye so ayeke si kekereke, lo lingbi ti hinga nda ti ye kue. Tënë ni so aye ti fa so tâ gi na tongo nda ni, Nzapa adiko ye so ayeke si ande na zo oko oko awe, wala a yeke nzoni wala sioni. Na lege ti tënë ni so, a mû Nzapa tongana zo so ayeke na gunda ti apono nga na aye ti sioni kue so ayeke si laso. Tâ zo so ayeke na gunda ti aye ti sioni so ayeke Satan, kota wato ti Nzapa, so Bible ahiri lo “mokonzi ti sese so”. Tongana a bi tënë ni na li ti Nzapa, so amû gloire na lo oko pëpe.​—Jean 14:30; 1 Jean 5:19.

¹³ Tënë so atene Nzapa adiko ye oko oko kozoni si asi ayeke mbeni fango ye so ayeke na yâ ti Bible pëpe, nga ayeke bi zonga na ndo Nzapa. A yeke sala si azo ahinga li ti ala pëpe na ye so Nzapa alingbi ti sala nga ye so lo yeke sala biani. Bible atene biani so Nzapa alingbi ti hinga aye so ayeke si kozoni (Esaïe 46:9, 10). Me, a yeke tâ na lege ni pëpe ti tene so lo lingbi pëpe ti gbanzi tele ti lo ti hinga ye so ayeke si kekereke, wala lo si lo yeke na gunda ti ye oko oko kue so ayeke si. Bâ mbeni tapande: Mo yeke na ngangu mingi. Ngangu ni so ayeke pusu mo ti yô nene ye kue so mo yeke bâ? Oko pëpe! Legeoko nga, Nzapa ayeke na ngangu ti hinga ye so ayeke si kekereke, me ngangu ni so ayeke pusu lo pëpe ti leke ye ni kue kozoni. Lo yeke sala kua na ngangu ni so gi na yâ ti ambeni ye.b Biani, afango ye ti wataka, so na popo ni tënë so atene Nzapa adiko ye oko oko kozoni si asi, amû gloire na lo oko pëpe.

¹⁴ Use lege so a-église ayeke bi zonga na ndo Nzapa ayeke na lege ti salango ye ti azo ti yâ ni. A hunda na aChrétien ti mû peko ti afango ye ti Jésus, so na popo ni lo fa na adisciple ti lo ti ‘ndoye tele na popo ti ala’ na ti duti mbage ti “sese so pëpe.” (Jean 15:12; 17:14-16). Ka ti amokonzi-nzapa ti a-église so atene ala yeke aChrétien ayeke tongana nyen? Ala mû peko ti afango ye so biani?

¹⁵ Na ndo tënë ti bira, bâ ye so amokonzi-nzapa asala. Ala yeke mû maboko, ala yeke kanga lê nga ala yeke mû li ni na yâ mingi ti abira so ayeke na popo ti amara. Ala yeke hiri deba nzoni na ndo aturugu ni, nga ala yeke bâ fango azo ni tongana mbeni ye so ayeke na lege ni. Ye so apusu e ti hunda tënë so: ‘Mara ti amokonzi-nzapa so ahinga pëpe so amba ti ala amokonzi-nzapa ayeke sala nga legeoko teti ambeni turugu ni?’ (Bâ “Nzapa ayeke na mbage ti azo wa?”) Amokonzi-nzapa ayeke mû gloire na Nzapa pëpe tongana ala tene na bê ti ala so lo yeke mû maboko na ala na yâ ti abira so a fâ azo mingi dä. Nga, ala yeke mû gloire na lo pëpe tongana ala yeke fa akpengba-ndia ti Bible tongana ngbele ye, na ala yeke kanga lê na ndo ye ti pitan nde nde kue. Salango ye ti ala adabe ti e na amokonzi-nzapa so Jésus ahiri ala “azo so asala siokpari” nga “awaziba so afa lege” na azo (Matthieu 7:15-23; 15:14). Salango ye ti amokonzi-nzapa asala si ndoye so azo kutu mingi ayeke na ni na mbage ti Nzapa adë.​—Matthieu 24:12.

Azo wa ayeke mû gloire na Nzapa biani?

¹⁶ Tongana azo so ayeke na kota ndo nga na ala so ayeke na ngangu na ndo azo amû gloire na Nzapa pëpe, azo wa ayeke sala ni biani? Ti kiri tënë na hundango tënë so, a lingbi e bâ ye so Bible atene. Teti biani, Nzapa la ayeke na droit ti fa lege so azo ayeke mû gloire na lo, nga lo lu akpengba-ndia na yâ Tënë ti lo, Bible (Esaïe 42:8). Zia e bâ aye ota so zo alingbi ti sala ti mû gloire na Nzapa. Na yâ tapande oko oko, e yeke gi ti hinga azo wa si ayeke sala ni biani.

¹⁷ Kozoni, e lingbi ti mû gloire na Nzapa na gondango iri ti lo. Na lege ti tënë so Jéhovah atene lani na Jésus, gondango iri ti lo ayeke mbeni kota mbage ti ye so bê ti lo aye. Lango kete kozoni na kuâ ti lo, Jésus asambela: “Babâ, mû gloire na iri ti Mo!” Na pekoni mbeni go akiri tënë: “Mbi mû gloire na iri ti Mbi awe, na fade Mbi kiri Mbi mû gloire na ni.” (Jean 12:28). Go so asala tënë ayeke biani ti Jéhovah lo mveni. Na lege ti kiringo tënë ti lo, a yeke polele so mungo gloire na iri ti Jéhovah ayeke kota ye mingi na lê ti lo. Tongaso, azo wa laso ayeke mû gloire na Jéhovah na fango iri ti lo na azo nga na gondango ni na ndo sese kue? A yeke aTémoin ti Jéhovah; na ala yeke sala ni na yâ ti akodoro 235!​—Psaume 86:11, 12.

¹⁸ Use ni, e lingbi ti mû gloire na Nzapa na fango tâ tënë na ndo lo. Jésus atene so atâ wavorongo Nzapa ayeke “sambela Lo . . . na tene-biani.” (Jean 4:24). Tongana nyen e lingbi ti hinga azo so ayeke voro Nzapa na “tene-biani” wala tâ tënë? A lingbi ala ke atënë so azo amä na bê na ni, so ayeke na yâ ti Bible pëpe na so ayeke fa Nzapa nga na ye so lo ye na lege ni pëpe. Nde na so, a lingbi ala fa atâ tënë ti Tënë ti Nzapa so ayeke nzoni-kue, so andu aye tongana: Jéhovah ayeke Nzapa Ti Nduzu Ahon Kue, nga gloire ti dutingo ti lo so alingbi gi na lo oko (Psaume 83:19); Jésus ayeke Molenge ti Nzapa so Lo zia lo Gbia ti Royaume ti Messie (1 aCorinthien 15:27, 28); Royaume ti Nzapa ayeke sala ande si iri ti Jéhovah aga nzoni-kue, nga ayeke sala si ye so bê ti lo aye na mbage ti sese nga na azo aga tâ tënë (Matthieu 6:9, 10); a lingbi a fa nzo tënë ti Royaume ni so na sese kue (Matthieu 24:14). A hon ngu 100 awe, gi mbeni bungbi ti azo so ayeke be-ta-zo si ayeke fa atâ tënë ti ngele ngangu so: aTémoin ti Jéhovah.

¹⁹ Ota ni, e lingbi ti mû gloire na Nzapa na salango ye alingbi na akpengba-ndia ti lo. Bazengele Pierre asû na mbeti: “I tambela mbilimbili na popo ti aGentil, si tongana ala sala tënë ti ke i tongana azo ti sala sioni, ala lingbi mû gloire na Nzapa, na lâ ni so Lo ga ti bâ ala, teti ala bâ nzo kusala ti i awe.” (1 Pierre 2:12). Salango ye ti mbeni Chrétien ague oko na aye so lo mä na bê dä. Tongana azo abâ so a yeke ndali ti mabe ti lo si lo yeke na nzoni salango ye, so ayeke mû gloire na Nzapa.

²⁰ Laso, azo wa ayeke mû gloire na Nzapa na lege ti nzoni salango ye? Bâ kete, azo ti yâ ti bungbi ti vorongo wa mingi ti angorogbia ayeke gonda dutingo ti ala na siriri, salango ye ti ala tongana atâ molenge ti kodoro so ayeke bata ndia nga ayeke futa aye so a hunda na ala? (aRomain 13:1, 3, 6, 7). Na ndo sese kue, azo wa a hinga ala ndali ti beoko so ala yeke na ni na popo ti ala, beoko so tënë ti mara, ti kodoro nga na ti kete mara ayeke dä pëpe? (Psaume 133:1; Kusala 10:34, 35). Bungbi wa a hinga ni na ndo sese kue ngbanga ti kusala ti fango Bible na azo so ayeke pusu ala ti kpe ndia, ti bâ nene ti nzoni salango ye na yâ sewa nga na asalango ye so Bible ahunda? Gi mbeni bungbi oko si salango ye ti lo alingbi na aye so afa ge nga na ambeni nde: aTémoin ti Jéhovah!

Mo yeke mû gloire na Nzapa?

²¹ A lingbi zo oko oko ahunda tele ti lo: ‘Mbi mveni mbi yeke mû gloire na Jéhovah?’ Na lege ti Psaume 148, mingi ti aye so Nzapa aleke ayeke mû gloire na lo. A-ange, aye so ayeke na lê ti nduzu, sese na anyama so ayeke na ndo ni, ala kue ayeke mû gloire na Jéhovah (versê 1-10). A yeke ye ti vundu mingi so laso mingi ti azo ayeke mû gloire na Nzapa pëpe! Tongana salango ye ti mo ayeke mû gloire na Nzapa, mo yeke bungbi oko na tanga ti aye so Jéhovah aleke ti mû gloire na lo (versê 11-13). So ayeke gi nzoni ye so mo lingbi ti sala na gigi ti mo la.

²² Na mungo gloire na Nzapa, mo yeke wara aye ti nzoni mingi. Tongana mo fa na gigi mabe na yâ kota ngele ti sandaga ti Christ, mo yeke kiri ti duti na songo na Nzapa, mo yeke wara siriri, nga mo yeke duti na songo na Babâ ti mo ti yayu. Songo so ayeke ga na mo ye ti nzoni mingi (aRomain 5:10). Tongana mo yeke gi anda ti tënë so alingbi ti pusu mo ti mû gloire na Nzapa, mo yeke ga zo so ayeke bâ aye na nzoni lê, zo so ayeke kiri singila mingi ahon ti kozo (Jérémie 31:12). Nga, lege azi na mo ti mû maboko na azo ti duti na mbeni gigi so ayeke na ngia nga so anzere. Ye so ayeke sala si mo mveni mo yeke na ngia mingi (Kusala 20:35). Zia mo duti na popo ti azo so aleke biani na bê ti ala ti mû gloire na Nzapa laso nga teti lakue lakue!

[Akete tënë na gbe ni]

Mo dabe mo na ni?

• Tongana a bungbi ala kue oko, ngbanga ti nyen a lingbi ti tene so awasenda-ye amû maboko na azo pëpe ti mû gloire na Nzapa?

• Na alege use wa a-église akanga lege na azo ti mû gloire na Nzapa?

• Na alege wa e lingbi ti mû gloire na Nzapa?

• Ngbanga ti nyen a lingbi mo mveni mo gi ti hinga wala mo yeke mû gloire na Jéhovah biani?

[Ahundango tënë ti manda na ye]

1, 2. (a) Atapande wa afa so azo ayeke haka peko ti aye so Nzapa aleke ti sigigi na aye? (b) Hundango tënë wa alondo, na kiringo tënë ni ayeke so wa?

3, 4. Tënë ti yanga ti Hébreu so a kiri pekoni na “gloire” aye ti tene nyen? Na a ye ti fa nyen tongana a ndu Jéhovah?

5. Tongana nyen mingi ti awasenda-ye ayeke fa nda ti apendere ye so ayeke na yâ ti dunia?

6. Ye nyen ayeke sala si azo mingi ake ti mû na Nzapa gonda so lo lingbi na ni ndali ti so lo yeke Wasalango ye?

7. Ti gue oko na aRomain 1:20, ye nyen a lingbi ti bâ ni polele na yâ ti aye so angoro e, na ngbanga ti nyen?

8. (a) Tongana nyen ayayu so lê abâ afa ngangu nga na ndara ti Nzapa? (b) Ye nyen amû lege ti tene so mbeni ye ayeke na gunda ti dunia kue?

9. Tongana nyen a yeke bâ ndara ti Jéhovah na yâ anyama?

10. Ngbanga ti nyen a yeke na lege ni oko pëpe ti ke ti yeda so mbeni Kota Wasalango ye ayeke dä? Mû mbeni tapande.

11, 12. Tënë so atene Nzapa adiko ye oko oko kozoni si asi aluti na ndo bibe wa so azo ayeke na ni? Na ye nyen afa so tënë ni so amû gloire na Nzapa pëpe?

13. Ngbanga ti nyen a yeke ye ti buba ti tene so Nzapa alingbi pëpe ti ke ti hinga ye so ayeke si kekereke? Mû mbeni tapande.

14. Na lege wa a-église ayeke bi zonga na ndo Nzapa?

15. (a) Tongana a ndu tënë ti abira na popo ti amara, salango ye ti amokonzi-nzapa ayeke so wa? (b) Na ye so asala nyen na ndo azo kutu mingi?

16. Ti hinga azo so ayeke mû gloire na Nzapa biani, ngbanga ti nyen a lingbi e bâ ye so Bible atene?

17. Tongana nyen Jéhovah lo mveni afa so mungo gloire na iri ti lo ayeke kota mbage ti ye so bê ti lo aye? Na azo wa ayeke gonda iri ti Nzapa laso na ndo sese kue?

18. Tongana nyen e lingbi ti hinga azo so ayeke voro Nzapa na “tene-biani”? Nga bungbi wa ayeke fa tâ tënë ti Bible ahon ngu 100 awe?

19, 20. (a) Ngbanga ti nyen nzoni salango ye ti mbeni Chrétien alingbi ti mû gloire na Nzapa? (b) Ahundango tënë wa alingbi ti mû lege na e ti hinga azo so laso ayeke mû gloire na Nzapa na dutingo na nzoni salango ye?

21. Ngbanga ti nyen a lingbi e gi ti bâ wala e mveni e yeke mû gloire na Jéhovah?

22. Na mungo gloire na Jéhovah, aye ti nzoni wa mo yeke wara? Na a lingbi mo leke na bê ti mo ti sala nyen?

[Kete tënë na lembeti 12]

“Nzapa ayeke na mbage ti azo wa?”

Mbeni koli so lo yeke lani na popo ti aturugu ti Zamani na ngoi ti Use Bira so Amû Sese Kue na so na pekoni lo ga Témoin ti Jéhovah adabe ti lo:

“Ye so mbi gi li ti mbi na ni gbä na ngoi ti bira ni . . . ayeke bango amokonzi-nzapa ti ndulu na a-église kue (Catholique, Luthérien, Église Épiscopale nga na ambeni église nde) so ayeke deba nzoni na ndo alapara ti bira na aturugu ni kozoni si ala gue ti fâ azo na anene lê ti ngombe ti ala. Fani mingi mbi yeke hunda tele ti mbi, ‘Nzapa ayeke na mbage ti azo wa?’

“Na ndo ti ceinture so aturugu ti Zamani ayeke yü lani, a sû tënë so dä: Gott mit uns (Nzapa ayeke na e). Me mbi yeke hunda tele ti mbi, ‘Ye nyen alingbi ti sala si Nzapa ayeke pëpe na ambeni turugu ni so ayeke na yâ ti oko église ti e nga ayeke sambela oko Nzapa?’ ”

[Foto na lembeti 10]

Na ndo sese kue, aTémoin ti Jéhovah ayeke mû biani gloire na Nzapa