Beku ti londongo ti akuâ: tënë so andu mo tongana nyen?

“Mo lungula maboko ti Mo, na Mo mû ye alingbi na nzara ti ye kue so ayeke na fini.”​—PSAUME 145:16.

NA MBENI ndapelele, Christopher (so lo yeke na ngu gumbaya) na yaya ti lo ti koli, na aita ti mama ti ala ti koli na ti wali na amolenge ti ala use, ala kue afa tënë da na da na gbata ti Manchester, na Angleterre. Réveillez-vous! afa ye so asi lani. “Na peko ti midi ni, ala kue ague ti bâ mbeni ndo ti hungo tele na gbata ti Blackpool, ndulu na yanga ti mbeni ngu-ingo. Ala 6 kue ayeke na popo ti azo 12 so akui na yâ ndao ti lege, so aturugu ti lapolice ahiri ni ‘tâ sioni ndao.’ ”

² Na bï so aga kozoni na kpale so, sewa ni ague na Mandango Buku ti Kongregation. Bungbi ni aduti lani na ndo tënë ti kuâ. Babâ ti Christopher atene: “Christopher ayeke lakue mbeni molenge so ayeke gbu li mingi. Na bï ni so, lo sala tënë polele na ndo fini sese nga na beku ti lo ti kekereke. Na tongana lisoro ni angbâ ti gue, mo ye ti bâ, Christopher atene: ‘Nzoni ti dutingo Témoin ti Jéhovah ayeke so atâa kota vundu so e wara tongana mbeni zo akui, e hinga biani so e yeke kiri ande ti bâ tele mbeni lâ.’ Zo oko pëpe na popo ti e ahinga lani pëpe so atënë so ayeke duti mbeni ye so e yeke dabe na ni lakue.”a

³ Ngu mingi kozoni, na ngu 1940, Franz, mbeni Témoin ti Autriche, ahinga so a yeke dë go ti lo ndali ti so lo ngbâ be-ta-zo na Jéhovah. Na ndo so a kanga lo dä na Berlin, Franz asû mbeti so na mama ti lo: “Na lege ti ye so mbi hinga, tongana mbi deba yanga fade [ti ga turugu], andâ mbi sala mbeni siokpari so alingbi na kuâ. Ye so ayeke duti fade sioni mingi na lê ti mbi. Mbi lingbi fade pëpe ti duti na beku ti zingo na kuâ. . . . Me ti fadeso, Mama nga na aita ti mbi ti koli na ti wali kue, laso a tene na mbi so a fâ ngbanga ti kuâ na li ti mbi, na a yeke fâ mbi kekereke na ndapelele. Zia mbito asala i pëpe. Mbi yeke wara ngangu na mbage ti Nzapa, oko ngangu so atâ Chrétien kue ti angoi so ahon awara ni lakue. . . . Tongana ala ngbâ be-ta-zo juska na kuâ, e yeke wara ande tele na londongo ti akuâ. . . . Mbeni lâ e yeke wara tele.”b

⁴ Ti Christopher nga na Franz, beku ti londongo ti akuâ aye ti tene ye mingi. A yeke tâ ye na lê ti ala. Tondo ti ala ayeke tâ mbeni ye so andu bê! Ti kono singila ti bê ti e na mbage ti Jéhovah na ti kpengba beku ti e na yâ tënë ti londongo ti akuâ, zia e bâ ngbanga ti nyen londongo ti akuâ ayeke duti ande dä nga lege so tënë ti londongo ti akuâ alingbi ti ndu e oko oko.

Suma na ndo azo so alondo ti wara fini na sese

⁵ Na yâ ti mbeni suma so andu aye so ayeke si ande na ngoi ti Komandema ti Ngu Saki Oko ti Christ Jésus, bazengele Jean abâ azo so alondo ti wara fini na sese. Lo tene: “Mbi bâ awakinda, akete zo na akota zo . . . Kota ngu ti ingo azia na gigi awakinda so ayeke na yâ ni; na Kui na [Hadès, NW ] azia na gigi awakinda so ayeke na yâ ala.” (Apocalypse 20:12, 13). Atâa dutingo ti ala ayeke so wa, “akete zo” wala “akota zo,” a yeke zingo ande azo kue so ayeke tongana angbâa na yâ ti Hadès, wala Shéol, so ayeke dû ti kuâ. Ala so akui na yâ ti ngu ayeke kiri ande na fini na ngoi ni kâ. Pendere londongo ti akuâ so ayeke mbage ti aye so Jéhovah aleke na bê ti lo ti sala.

⁶ Ngu saki oko ti komandema ti Christ ayeke to nda ni na kangango Satan nga na bingo lo na yâ ti kota dû so alï mingi. Na ngoi ti komandema so, Satan ayeke handa oko pëpe ala kue so azingo na kuâ wala so asö kuâ na yâ kota ye ti vundu, ndali ti so lo yeke ande na ngangu ti sala mbeni ye pëpe (Apocalypse 20:1-3). Peut-être na lê ti mo, ngu saki oko akpa mbeni ye so aninga mingi, me na lê ti Jéhovah a yeke “tongana lâ oko.”​—2 Pierre 3:8.

⁷ Suma ni afa nga so Komandema ti Ngu Saki Oko ti Christ ayeke duti ande ngoi ti fango ngbanga. Bazengele Jean asû na mbeti. “Mbi bâ awakinda, akete zo na akota zo, ala yeke luti na gbele trône so; na a lungula mbeti nde nde, na a lungula mbeni mbeti so ayeke mbeti ti iri ti azo so ayeke na fini. Na A fâ ngbanga ti awakinda na lege ti ye so a sala na mbeti nde nde so, alingbi na kusala ti ala. . . . Na A fâ ngbanga ti ala oko oko kue alingbi na kusala ti ala.” (Apocalypse 20:12, 13). Bâ so a yeke fâ pëpe ngbanga ti zo ni ndali ti aye so lo sala wala lo sala pëpe kozoni si lo kui (aRomain 6:7). Nde na so, a sala tënë ti “mbeti nde nde” so a yeke zi ni ande na ngoi ni kâ. A lingbi na salango ye ti mbeni zo na peko ti so lo manda aye so ayeke na yâ ti ambeti nde nde so si a yeke bâ wala lo lingbi ti tene a sû iri ti lo na “mbeti ti iri ti azo so ayeke na fini.”

Londongo ti “wara fini” wala ti “wara ngbanga”

⁸ Na yâ ti mbeni kozo suma so Jean abâ, a fa Jésus tongana zo so ayeke na “clé ti kui na clé ti [Hadès, NW ]”, wala dû ti kuâ (Apocalypse 1:18). Lo yeke sala kua tongana zo so Jéhovah azia lo “Mokonzi so amû fini,” so a mû yanga na lo ti fâ ngbanga ti “azo so ayeke na fini na ti awakinda”. (Kusala 3:15; 2 Timothée 4:1). Lo yeke sala ni tongana nyen? Na zingongo ala so alango na yâ kuâ. Jésus atene na gbâ ti azo so lo fa tënë na ala: “Zia bê ti i adö pëpe, tënë ti ye so; teti l’heure ayeke ga so azo kue so ayeke na dukua, fade ala mä yanga ti Lo, na ala sigigi.” Na pekoni lo kiri lo tene: “Ala so asala nzoni, fade ala londo ti wara fini, na ala so asala sioni, fade ala londo ti wara ngbanga.” (Jean 5:28-30). Tongaso, ye nyen ayeke ku akoli na awali be-ta-zo so akui ngbele ye giriri?

⁹ Tongana abe-ta-zo ti giriri so azingo ande na kuâ, fade fade ala yeke hinga so azendo so ala zia bê ti ala na ndo ni ândö si aga fadeso tâ tënë awe. Ala yeke duti ande na kota nzara ti hinga zo so ayeke Hale ti wali ti Nzapa so a sala tënë ti lo na yâ kozo prophétie ti Bible na Genèse 3:15. So kota ngia si ala yeke duti ande na ni ti mä so Jésus, Messie so a mû zendo ti lo, aduti be-ta-zo juska na kuâ, na tongaso lo mû fini ti lo tongana mbeni sandaga ti kota ngele! (Matthieu 20:28). Ala so ayeke yamba abe-ta-zo so akiri na fini ayeke wara ande kota ngia ti mû maboko na ala ti hinga so futango kota ngele so ayeke mbeni lege so Jéhovah afa be-nzoni nga na nzobe ti lo so e lingbi na ni pëpe. Tongana azo so azingo na kuâ abâ ande aye so Royaume ti Nzapa ayeke sala ti tene ye so Jéhovah aleke lani na bê ti lo ti sala ndali ti sese aga tâ tënë, kite ayeke dä pëpe so bê ti ala ayeke pusu ala ti sepela Jéhovah mingi mingi. Fade ala yeke wara lege ti mû bê ti ala kue na Babâ ti ala ti yayu so lo yeke na ndoye nga na Molenge ti lo. Zo oko oko kue so ayeke duti na fini na ngoi ni kâ ayeke wara ngia ti mû mbage ti lo na kota kusala ti fango ye na gbâ ti azo so alondo na yâ dû ti kuâ si akiri na fini. Fade azo so nga ayeke na bezoin ti yeda na kota ngele so Nzapa afuta.

¹⁰ Tongana Abraham azingo ande na kuâ, lo yeke wara dengo bê ti duti biani na gbe ti komandema ti “kodoro” so lani lo yeke ku ni kungo (aHébreu 11:10). So kota nzerengo tele si be-ta-zo Job ayeke duti na ni ande ti mä so lege so lo duti na fini akpengba ambeni wakua ti Jéhovah so awara atara so andu be-biani ti ala! Fade Daniel ayeke duti na kota nzara ti hinga ye na ndo gango tâ tënë ti aprophétie so yingo vulu ti Nzapa apusu lo ti sû ni na mbeti!

¹¹ Biani, azo kue so ayeke wara fini na yâ fini sese ti mbilimbili, atâa na lege ti londongo ti akuâ wala na songo kuâ na yâ kota ye ti vundu, fade ala yeke duti na aye mingi ti manda na ndo ye so Jéhovah aye ti sala ndali ti sese nga na azo. Beku ti duti na fini nga ti sepela Jéhovah teti lakue lakue ayeke sala ande si kapa ti fango ye na ngoi ti Ngu Saki Oko ayeke duti tâ ye ti kota ngia. Ye oko, kota ye ni na ngoi ni kâ ayeke duti ande ye so e oko oko e yeke sala tongana e manda aye so ayeke na yâ ti ambeti so ayeke duti dä. Fade e yeke sala ye alingbi na ye so e manda? Fade e yeke gbu li na ndo ti akota tënë ni nga e yeke sala ye alingbi na ni si a mû maboko na e ti ke ndangba tara so Satan ayeke ga na ni ti gue na e yongoro na tâ tënë?

¹² Ambeni ye so e lingbi ti girisa ni pëpe ayeke adeba nzoni so ayeke ga ande na peko ti so a sala kusala na aye ti nzoni ti kota ngele ti sandaga ti Christ. Ala so akiri na fini na lege ti londongo ti akuâ, ambeni mbage ti tele ti ala alingbi mbeni pëpe ti buba tongana ti so e yeke bâ laso (Esaïe 33:24). Nzoni seni nga na beku ti dutingo na seni so alingbi kue ayeke mû ande lege na azo so ayeke na fini sese ti mû mbage ti ala kue na yâ kusala ti fango lege so ague na fini na gbâ ti azo so azingo na kuâ. Fade ala yeke mû nga mbage ti ala na kota kua so ade a sala mara ni lâ oko pëpe: lekengo sese kue ti ga paradis si Jéhovah awara gonda.

¹³ Tongana a zi Satan na yâ kota dû so alï mingi ti tene lo ga na tara ti nda ni, lo yeke kiri ande ti handa azo. Na lege ti Apocalypse 20:7-9, “amara”, wala abungbi ti azo, so Satan ‘ahanda’ ala si ala tï na gbe ti sioni ngangu ti lo ayeke wara futingo: ‘Fade wâ asigigi na yayu, a zu na sese, na a hunzi ala.’ Ti ala so azingo na kuâ na ngoi ti Komandema ti Ngu Saki Oko, futingo so aye ti tene so ala londo ti wara ngbanga. Nde na so, ala so azingo si ala bata be-biani ti ala ayeke wara ande matabisi so ayeke fini ti lakue lakue. Biani, londongo ti ala na kuâ ayeke duti ande ‘londongo ti wara fini’.​—Jean 5:29.

¹⁴ Tongana nyen beku ti londongo ti akuâ ayeke dë bê ti e même fadeso? Ye wa a lingbi e sala ti hinga biani so e yeke wara ande aye ti nzoni kekereke?

Aye so e lingbi ti manda fadeso

¹⁵ Peut-être mbeni zo ti mo akui ade ti ninga pëpe na mo yeke gi ti hon ndo ti kota gbiango ye so kuâ ti lo aga na ni. Beku ti londongo ti akuâ ayeke mû maboko na mo ti wara siriri ti bê nga na ngangu so azo so ahinga tâ tënë pëpe ayeke na ni pëpe. Paul amû dengo bê so na azo ti Thessalonique: “E ye i hinga, aita, tënë ti azo so alango awe, si vundu asala i pëpe tongana atanga ni so ayeke na beku pëpe.” (1 aThessalonicien 4:13). Mo yeke bâ tele ti mo na yâ fini sese, na mo yeke bâ azo so ayeke zingo na kuâ? Tongana a yeke tongaso, wara dengo bê fadeso na lege ti beku so mo yeke na ni ti kiri ti wara tele na afami ti mo so akui.

¹⁶ Ndali ti akpale ti mitele so kengo yanga ti Adam aga na ni, peut-être na ndembe so mo yeke bâ pasi na kobela. Zia pëpe si vundu ti kobela so asala si mo girisa pendere beku so mo mveni mo yeke zingo na kuâ, mo yeke kiri ti wara mbeni seni so ayeke tâ nzoni mingi nga na ngangu ti mitele na yâ fini sese. Na pekoni, tongana mo zi lê ti mo na mo bâ azo so ayeke yamba mo na ngia ti fa na mo kota ngia ti ala ti bâ so mo zingo, biani, mo yeke kiri ande singila na Nzapa ndali ti nzobe ti lo.

¹⁷ Ti ku na ngoi ni so, bâ aye ti manda use so e lingbi ti bata na li. Oko ayeke nene ti tene e sala na Jéhovah fade fadeso na âme ti e kue. Na mungo tapande ti Maître ti e, Christ Jésus, gbanzingo ye na tele ti e afa ndoye ti e teti Jéhovah nga teti amba ti e. Tongana kengo ndo wala salango ngangu asala si e girisa kua ti e wala liberté ti e, e leke na bê ti e ti luti ngangu na yâ mabe atâa atara wa e tingbi na ni. Awato alingbi peut-être ti tene so ala ye ti fâ e, me beku ti londongo ti akuâ ayeke dë bê ti e nga ayeke kpengba e ti ngbâ be-ta-zo na Jéhovah nga na Royaume ti lo. Biani, wâ ti e na yâ kusala ti fango tënë ti Royaume nga na ti salango adisciple amû na e beku ti wara adeba nzoni ti lakue lakue so Jéhovah abata ni na azo ti mbilimbili.

¹⁸ Use ye ti manda ni andu lege so e yeke luti na gbele atara so mitele ti e so ayeke mbilimbili-kue pëpe aga na ni. Hingango ye ti e na ndo beku ti londongo ti akuâ nga na singila so e yeke fa ndali ti nzobe ti Jéhovah so e lingbi na ni pëpe ayeke mû maboko na e ti leke na bê ti e ti luti ngangu na yâ mabe. Bazengele Jean amû gbotongo mê so: “I ndoye sese so pëpe, wala ye so ayeke na sese so. Tongana mbeni zo andoye sese so, ndoye ti Babâ ayeke na yâ lo pëpe; teti ye kue so ayeke na sese so, nzara ti mitele, nzara ti lê, na fandara ti fini, alondo na Babâ pëpe, me a londo na sese so. Na sese so ayeke hon, na nzara ni kue, me zo so asala ye so Nzapa aye, lo duti lakue lakue.” (1 Jean 2:15-17). Sese aye ti handa e na akungba ti lo, me tongana e haka aye so na “tâ fini”, fade nzara ti aye ti sese ayeke sala e mingi pëpe (1 Timothée 6:17-19). Na tongana e tingbi na tara so andu ye ti pitan, e yeke luti tongana koli. E hinga so peut-être e lingbi ti kui kozoni na Harmaguédon. Me tongana e ngbâ na yâ ti mbeni salango ye so Jéhovah ake, peut-être lo yeke zia e na popo ti ala so ayeke na beku oko pëpe ti zingo na kuâ.

¹⁹ Na ahon kue, a lingbi e girisa lâ oko pëpe kota matabisi so ayeke ti zia ngia na bê ti Jéhovah fadeso nga teti lakue lakue (aProverbe 27:11). Dutingo ti e be-ta-zo ngbii asi na kuâ wala ngbango lakue ti bata be-biani ti e juska na nda ti aye ti sioni ti ngoi ti e ayeke fa na Jéhovah mbage wa e mû na ndo tënë ti kota yanga-ti-komande ti lo na yâ dunia kue. So ye ti ngia si dutingo na ndo sese so aga paradis (atâa na lege ti songo kuâ na kota ye ti vundu wala na lege ti miracle so ayeke londongo ti akuâ) ayeke duti ande na ngoi ni kâ!

Kaïngo anzara ti bê ti e

²⁰ Lisoro ti e na ndo tënë ti londongo ti akuâ akiri tënë pëpe na ahundango tënë kue so e yeke na ni. Nyen si Jéhovah ayeke leke ande ndali ti ala so asala mariage awe si ala ga ti kui? (Luc 20:34, 35). Londongo ti akuâ ni ayeke si gi na ndo so azo ni akui dä? Azo ni ayeke kiri ande na fini ndulu na ndo so afami ti ala ayeke dä? Gbâ ti ahundango tënë na ndo lekengo aye ndali ti ala so ayeke zingo na kuâ angbâ. Ye oko, a lingbi e bata na li atënë ti Jérémie so: “L’Eternel asala nzoni na ala so aku Lo, na âme so agi Lo. A yeke nzoni zo aduti kpô, na lo ku salut ti L’Eternel.” (Toto ti Jérémie 3:25, 26). Na ngoi so Jéhovah adiko, a yeke kiri ande tënë na ahundango tënë ti e kue. Ngbanga ti nyen e lingbi ti hinga ye so na bê kue?

²¹ Gbu li kete na ndo atënë ti wasungo psaume so yingo vulu apusu lo ti he bia so na ndo Jéhovah: “Mo lungula maboko ti Mo, na Mo mû ye alingbi na nzara ti ye kue so ayeke na fini.” (Psaume 145:16). Tongana e yeke kono, anzara ti bê ti e ayeke gbian. Ye so e ye lani ti wara na ngoi so e de kete ayeke pëpe ye so e yeke na nzara ti wara ni laso. Aye so ayeke si na e nga na aye so e yeke ku ayeke sala ngangu na ndo lege so e yeke bâ na fini. Ye oko, na yâ fini sese, atâa anzara ti bê ti e ayeke so wa, fade Jéhovah ayeke kaï ni.

²² Kota ye so andu zo oko oko na popo ti e fadeso ayeke dutingo be-ta-zo. “Ye so a yeke gi na mbage ti awabatango ye ayeke ti tene mbeni zo afa so lo duti be-ta-zo.” (1 aCorinthien 4:2, NW ). E yeke awabatango pendere nzo tënë ti Royaume ti Nzapa. Salango kue ti fa nzo tënë so na azo kue so e wara ala ayeke mû maboko na e ti ngbâ na ndo lege ti fini. E girisa lâ oko pëpe so “lâ na pasa” ayeke si na e kue (Zo-ti-fa-tene 9:11). Ti kanga lege na mo ti gi bê ahon ndo ni ndali ti gigi so ayeke gbian na ngoi kue, gbu ngangu pendere beku ti londongo ti akuâ. Hinga biani so tongana ye ni akpa mo bâ mo tene mo yeke kui kozo na tongo nda ti Komandema ti Ngu Saki Oko ti Christ, mo lingbi ti wara dengo bê na yâ ye so ayeke ga ande. Na ngoi so Jéhovah afa, mo lingbi ande ti tene mara ti tënë so Job atene lani na Wasalango ye: “Fade Mo iri ndo, na mbi kiri tënë na Mo.” Gonda na Jéhovah so ayeke na kota nzara ti kiri na fini azo kue so ayeke na yâ ti li ti lo!​—Job 14:15.

[Akete tënë na gbe ni]

Mo dabe mo na ni?

• Ye nyen a yeke luti na ndo ni ti fâ ngbanga ti azo na ngoi ti Komandema ti Ngu Saki Oko?

• Ngbanga ti nyen ambeni zo ayeke “londo ti wara fini” na ambeni ayeke “londo ti wara ngbanga”?

• Tongana nyen beku ti londongo ti akuâ ayeke dë bê ti e fadeso?

• Tongana nyen atënë ti Psaume 145:16 ayeke mû maboko na e ti gi bê pëpe ndali ti ahundango tënë ti e so angbâ na ndo londongo ti akuâ?

[Ahundango tënë ti manda na ye]

1-3. Beku wa ambeni zo ayeke na ni teti kekereke? Fa mbeni tapande ni.

4. Fango peko ti ye so asi na Christopher nga na Franz asala nyen na ndo ti mo? Na ye nyen e yeke gue ti bâ?

5, 6. Ye nyen ayeke na yâ ti suma so bazengele Jean afa pekoni na Apocalypse 20:12, 13?

7. Na ngoi ti Komandema ti Ngu Saki Oko ti Christ, a yeke fâ ande ngbanga ti mbeni zo alingbi na nyen?

8. Aye use wa azo so a yeke zingo ala na kuâ alingbi ti wara ni?

9. (a) Gi na peko ti so ala zingo na kuâ, azo mingi ayeke hinga ande nyen? (b) Kota kusala wa ayeke duti ande dä?

10, 11. (a) Komandema ti Ngu Saki Oko ayeke mû lege na azo kue ti sala nyen? (b) Ye so alingbi ti ndu e tongana nyen?

12. Ye nyen ayeke mû ande maboko na zo oko oko ti mû mbage ti lo kue na yâ kusala ti fango ye nga na lekengo sese si a ga paradis?

13, 14. Nda ti zingo Satan na ngoi ti tara ti nda ni ayeke nyen? Na ye wa alingbi ti si na e oko oko na pekoni?

15. Tongana nyen mabe na yâ beku ti londongo ti akuâ alingbi ti duti ye ti mungo maboko fadeso?

16. Atënë ti bê ti mo ayeke duti biani so wa tongana azo so akui ayeke zingo?

17, 18. Akota ye ti manda use wa a lingbi e bata na li?

19. Kota matabisi wa a lingbi e girisa ni pëpe?

20, 21. Ye wa ayeke mû ande maboko na e ti ngbâ be-ta-zo atâa atënë na ndo londongo ti akuâ so ade e hinga ni pëpe? Fa nda ni.

22. Ngbanga ti nyen e yeke na kpengba nda ti tënë ti gonda Jéhovah?

[Afoto na lembeti 21]

Tongana nyen mabe na yâ tënë ti londongo ti akuâ ayeke mû maboko na e fadeso?