Zabolo ayeke dä biani?

MO TENE ti mo nyen na ndo Zabolo? Mo bâ lo tongana mbeni tâ zo so ayeke pusu azo ti sala aye ti sioni? Wala lo yeke gi sioni so ayeke na yâ tele ti zo? A lingbi e sala mbito ti lo? Wala e bâ lo tongana mbeni tënë ti tere senge? Tënë “zabolo” aye ti sala tënë ti mbeni ngangu so ayeke buba ye na yâ ti dunia na so azo ahinga li ti ala na ni pëpe? Tënë ni ayeke gi fä ti sioni salango ye so ayeke na yâ ti azo, tongana ti so ambeni wandara ti abungbi ti vorongo nzapa ti laso ayeke tene?

Tongana a hunda na azo Zabolo ayeke zo wa, bê ti e adö pëpe tongana akiringo tënë ti ala ague nde nde. Tongana mbeni zo ayeke sala ye lakue na mayele ti honde tele ti lo, a yeke ngangu mingi ti hinga nda ti lo, mbilimbili tongana lo ye lakue ti honde tele ti lo na peko ti mbeni ye. Mbeti ti Nzapa afa so Zabolo ayeke mara ti zo tongaso. Tongana Bible asala tënë ti lo tongana Satan, lo tene: “Satan mveni agbian tele ti lo si azo abâ lo tongana ange ti lumière.” (2 aCorinthien 11:14). Atâa so lo yeke sioni mingi, Zabolo asala tele ti lo tongana zo ti nzoni ti handa na azo. Tongana lo wara lege ti sala si azo atene so lo yeke dä pëpe, ye so akiri anzere mingi na lo.

Tongaso, ti mbilimbili ni, Zabolo ayeke zo wa? Lo bâ gigi lawa nga tongana nyen? Lo sala ngangu wa na ndo ti azo laso? Mbeni ye ayeke dä so e lingbi ti sala ti ke ngangu ti lo so? Mbeti ti Nzapa afa tâ tënë na ndo ti Zabolo ti londo na lâ ni so lo bâ gigi nga a kiri tënë mbilimbili na ahundango tënë so.

[Foto na lembeti 3]

A yeke ngangu mingi ti hinga nda ti mbeni zo so lakue ayeke honde tele ti lo na peko ti mbeni ye