Ti gbu nda ti Bible: Mbeni pendere ye so azi na mo

MO YEKE wara na yâ ti Bible akpengba tâ tënë so alondo na Nzapa. Bible afa ngbanga ti nyen e yeke na fini, ngbanga ti nyen e yeke bâ pasi nga ye so ayeke ku e azo. A fa na e tongana nyen ti wara tâ ngia, ti wara atâ kamarade nga ye so e lingbi ti sara ti hon ndo ti akpale. Mingi ahon so, a mû lege na e ti manda ye na ndo Wasarango e na Babâ ti e ti yayu, Jéhovah. Mara ti hingango ye tongaso aga na e nzerengo tere na a sara si e hinga ye so e yeke sara na yâ ti gigi ti e.

Na yâ ti Bible, a haka warango hingango ye ti Nzapa na tengo kobe. Jésus atene lani: “Fade zo angbâ na fini gi na lege ti mapa pëpe, me na lege ti tënë kue so asigigi na yanga ti Nzapa.” (Matthieu 4:4; aHébreu 5:12-14). Legeoko tongana ti so ti te anzoni kobe lakue lakue ayeke sara si e ngbâ na fini, ti diko Tënë ti Nzapa lakue lakue ayeke mû lege na e ti wara fini ti lakue lakue so Nzapa aze na e.

A nzere na e ti te ye ndali ti so Jéhovah asara e tongaso nga tongana e te ye, a yeke ngbanga ti so e yeke na kota bezoin ni. Ye oko, e yeke nga na mbeni kota bezoin so a lingbi e bi bê dä tongana e ye ti duti na ngia. Jésus atene lani: “Ngia ayeke na azo so ahinga ye ti yingo amanke ala.” (Matthieu 5:3). Zo alingbi ti wara ngia tongana lo kaï nzara ti lo na lege ti yingo na lege ti gbungo nda ti Tënë ti Nzapa.

A yeke tâ tënë so ambeni zo abâ so a yeke ngangu ti gbu nda ti Bible. Na tapande, peut-être a yeke hunda ti tene mbeni zo amû maboko na mo ti gbu nda ti ambeni versê na ndo angobo ti sarango ye wala akode ti sarango tënë so ayeke nde na ti mo. Nga, a wara na yâ Bible aprophétie so a sû atënë ni na lege ti fä, so a lingbi ti gbu nda ni gi na bango ambeni versê nde na ndo ti oko tënë ni (Daniel 7:1-7; Apocalypse 13:1, 2). Atâa a yeke tongaso, mo lingbi ti gbu nda ti Bible. Tongana nyen mo lingbi ti hinga biani so mo lingbi ti sara ni?

Mbeni pendere ye so azi na azo kue

Bible ayeke Tënë ti Nzapa. A yeke na yâ ni si Nzapa afa na e ye so bê ti lo aye. Nzapa alingbi biani ti mû na e mbeni buku so zo alingbi ti gbu nda ni pëpe wala so gi azo so ayeke na kota hingango ye si alingbi ti gbu nda ni? Oko pëpe. Jéhovah alingbi pëpe ti sara ye tongaso. Christ Jésus atene lani: “Babâ nyen na popo ti i, tongana molenge ti lo ahunda susu, fade lo mû na lo ngbo na place ti susu ni? Wala tongana lo hunda para, lo mû na lo palakongo? Tongaso, tongana i so i yeke sioni, i hinga lege ti mû matabisi ti nzoni na amolenge ti i, fade Babâ ti i na yayu aye mingi ahon pëpe ti mû Yingo Vulu na ala so ahunda Lo?” (Luc 11:11-13). Ni la, a lingbi mo hinga biani so mo lingbi ti gbu nda ti Bible na tongana mo hunda Nzapa na bê ti mo kue ti mû maboko na mo, lo yeke mû na mo maboko so alingbi ti tene mo gbu nda ti Tënë ti lo. Biani, même amolenge alingbi ti gbu nda ti afango ye ti Bible!​—2 Timothée 3:15.

Atâa so a hunda ti tene e sara ngangu tongana e ye ti gbu nda ti Bible, ti sara tongaso ayeke kpengba e na ayeke mû wâ na e. Na peko ti so lo zingo na kuâ, Jésus asi lani na ambeni disciple ti lo use na lo sara tënë na ala na ndo ti aprophétie. Tondo ti Luc atene: “Na Lo komanse na Moïse na aProphète kue, Lo fa na ala nda ti tënë ni na ndo kue so Mbeti ti Nzapa asara tënë ti Lo.” Ye ti pekoni ayeke so wa? Na lakui ni, tongana adisciple ni ayeke gbu li ti ala na ndo ye so ala mä, ala tene na popo ti ala: “Tongana Lo yeke sara tënë na e na lege kâ, na tongana Lo yeke fa na e tënë ti Mbeti ti Nzapa, bê ti e ayeke tongana wâ pëpe?” (Luc 24:13-32). Ti gbu nda ti Tënë ti Nzapa asara si tere ti ala anzere ndali ti so a kpengba mabe ti ala na yâ ti azendo ti Nzapa na a sara si ala bâ kekereke ti ala na mbeto pëpe.

Ahon ti duti mbeni ye so ayeke ne zo nengo, ti gbu nda ti Tënë ti Nzapa ayeke mbeni ye so anzere na a ga na ye ti nzoni na zo tongana tengo mbeni pendere kobe. A lingbi mo sara nyen ti gbu nda ti Bible tongaso? Article ti peko afa tongana nyen ti wara ngia “ti hinga Nzapa” nzoni.​—aProverbe 2:1-5.

[Foto na lembeti 4]

Tongana babâ ti ndoye, Jéhovah amû na e yingo vulu ti lo ti gbu nda ti Bible