Ye so mo lingbi ti sara ti gbu nda ti Bible
1. Hunda wa ti Bible ti mû maboko na mo
Ninfa so ayeke na kodoro ti Italie atene: “Mbi yeke diko lani Bible kozo ti gue ti lango. Mbi sara tongaso ndali ti so mbi bâ so Bible ayeke Mbeti ti Nzapa; nga atâa so mbi ye dikongo mbeti pëpe, mbi ye ti hinga ye so Nzapa atene na yâ ti Bible. Mbi leke ti diko ni kue ahunzi. Na tongo nda ni, mbi bâ so a yeke ngangu pëpe; me na pekoni mbi tï na ndo ti ambage ni so akpengba mingi, na mbi zia lege ni.”
MARA ti ye so asi na Ninfa so asi na mo nga? A yeke ye so asi na azo mingi. Ye oko, tongana ti so e bâ na yâ ti article so ahon, Jéhovah Nzapa so ayeke Wa ti Bible aye si mo gbu nda ni. Me, mo lingbi ti sara nyen ti gbu nda ni? Kozoni kue, hunda Wa ti Bible ni ti mû maboko na mo.
Azo abâ lani abazengele ti Jésus tongana “azo so amanda mbeti pëpe” nga tongana “asenge zo” ndali ti so ala gue pëpe na a-ekole ti aJuif so a yeke manda tënë ti Nzapa dä (Kusala 4:13). Ye oko, Jésus atene na ala so ala lingbi ti gbu nda ti atënë ti Nzapa senge. Na lege wa? Jésus atene: “Wamungo maboko, yingo vulu, so Babâ ayeke tokua ande na iri ti mbi, lo si lo yeke fa ande na ala aye kue.” (Jean 14:26). Nzapa asara kua na yingo vulu so, wala ngangu ti lo so lo sara na kusala, ti sara sese nga na ye kue so ayeke na fini na ndo ni (Genèse 1:2). Lo sara nga kusala na ni ti pusu azo 40 tongaso ti sû abibe ti lo na yâ ti Bible (2 Pierre 1:20, 21). Lo lingbi ti mû oko ngangu ti lo so ti mû maboko na azo so ayeke gi ti gbu nda ti Bible.
Mo lingbi ti sara nyen ti wara yingo vulu ti Nzapa? A lingbi mo hunda ni na mabe. Ti tâ tënë ni, peut-être a lingbi mo ngbâ lakue ti hunda ni. Jésus atene: “Ala ngbâ ti hunda ye, na fade a yeke mû ni na ala. . . . Asinga ala so . . . ala hinga tongana nyen ti mû amatabisi so ayeke nzoni na amolenge ti ala, si fade Babâ so ayeke na yayu ayeke mû yingo vulu na ala so ahunda ni na lo pëpe?” (Luc 11:9, 13). Jéhovah ayeke yeda na bê ti lo kue ti mû yingo vulu na azo so ahunda ni biani na lo. Ngangu so alingbi ti mû maboko na mo ti gbu nda ti atënë so a sû na gbe ti yingo na yâ ti Bible a sara angu mingi mingi awe. Yingo ti Nzapa alingbi nga ti mû na mo ndara so mo yeke na bezoin ni ti sara ye alingbi na akpengba tënë so ayeke na yâ ti Bible.—aHébreu 4:12; Jacques 1:5, 6.
Tongaso, lakue tongana mo yeke diko Bible, sambela Nzapa, na hunda na lo ti mû na mo yingo vulu ti lo ti mû maboko na mo ti gbu nda ti Bible.