E gi yâ ti “aye ti Nzapa so nda ni alï mingi”
“Yingo ayeke gi yâ ti aye kue, même aye ti Nzapa so nda ni alï mingi.”—1 ACORINTHIEN 2:10, MN.
1. Ambeni tâ tënë ti Bible asara si afini zo so ayeke manda Bible ayeke na ngia. A yeke aye wa?
MINGI ti e na yâ ti kongregation alingbi ti dabe ti ala na ngia so ala wara tongana ala to nda ti manda tâ tënë. E hinga lani ngbanga ti nyen iri ti Jéhovah ayeke kota ye, ngbanga ti nyen lo zia lege na pasi ti ngbâ, ngbanga ti nyen ambeni zo ayeke gue na yayu nga ye so ayeke ku ande tanga ti azo ti sese so angbâ be-ta-zo. Peut-être e yeke diko lani Bible kozo na ngoi so, me aye so kue ahonde na lê ti e, legeoko tongana ti so a honde na lê ti mingi ti azo. E yeke lani tongana mbeni zo so ato nda ti mbeni tambela na kota ndapre. Kozoni, lo lingbi pëpe ti bâ aye nzoni ngbanga ti so ndo angbâ ti vuko. Me tongana lâ ato nda ti sigigi, lo to nda ti bâ aye nzoni ahon ti kozo. Na tongana a si na kota lâ, lo lingbi ti bâ apendere ye so angoro lo, même aye so ayo na lo. Legeoko nga, tongana mbeni zo ato nda ni lani ti mû maboko na e ti gbu nda ti Mbeti ti Nzapa, e to nda ti bâ kozo mbage ti “aye ti Nzapa so nda ni alï mingi.”—1 aCorinthien 2:8-10, MN.
2. Ngbanga ti nyen ngia so e yeke wara na mandango Mbeti ti Nzapa alingbi ti hunzi lâ oko pëpe?
2 A lingbi e hinga gi kete mbage ti tâ tënë ti Bible na e ngbâ gi ge awe? Tënë “aye ti Nzapa so nda ni alï mingi” andu aye tongana hingango ndara ti Nzapa so Yingo Vulu afa ni na aChrétien me ahonde ni na ambeni zo (1 aCorinthien 2:7). Ndara ti Nzapa amû lege na e biani ti manda aye so ayeke hunzi ka pëpe, na ye so amû ngia na e! E yeke hinga ande lâ oko pëpe ye oko oko kue na ndo ndara ti Nzapa. Ngia so e wara na ngoi so e to nda ti manda akozo fango ye ti Bible alingbi ti ngbâ lakue tongana e ngbâ lakue ti gi yâ ti “aye ti Nzapa so nda ni alï mingi.”
3. Ngbanga ti nyen a lingbi e hinga nzoni mingi aye so apusu e ti mä na bê?
3 Ngbanga ti nyen e yeke na bezoin ti gbu nda ti ‘aye so nda ni alï mingi’ so? Ti gbu nda ti aye so e mä na bê dä na ti hinga nga ngbanga ti nyen e sara ni ayeke sara si e mä na bê ahon ti kozo na e zia bê ti e na aye so e mä na bê na ni ahon ti kozo. Mbeti ti Nzapa awa e ti sara kusala na hingango ndo ti e si e “lingbi hinga ye so Nzapa aye, ye so ayeke nzoni, ye so alingbi na lê ti Lo, na ye so alingbi kue.” (aRomain 12:1, 2). Ti hinga ngbanga ti nyen Jéhovah ahunda na e ti duti na fini alingbi na mbeni mbilimbili ye so lo fa ayeke kiri ti mû ngangu na e ti ngbâ ti mä yanga ti lo. Ni la, ti hinga ‘aye so alï mingi’ alingbi ti mû na e ngangu ti ke aye so apusu e ti ke ndia na alingbi ti pusu e ti duti “na nzara ti sara nzo kusala.”—Tite 2:14.
4. Mandango Bible andu aye wa?
4 Ti gbu nda ti aye so nda ni alï mingi ahunda ti manda ye. Ye oko, mandango ye ayeke legeoko pëpe na senge dikongo mbeti. A ndu hasango yâ ti atënë nzoni ti bâ tongana nyen a lingbi na ye so e hinga awe (2 Timothée 1:13). A ndu gingo ti hinga nda ti aye so a tene. A yeke nzoni mbeni mandango Bible andu gbungo li na ndo lege so e lingbi ti sara kusala na ye so e manda ti mû anzoni desizion na ti mû maboko na ambeni zo. Nga, teti so “Mbeti ti Nzapa alondo na yanga ti Nzapa,” a lingbi mandango ye ti e ni andu “tënë kue so asigigi na yanga ti Nzapa.” (2 Timothée 3:16, 17; Matthieu 4:4). Mandango Bible alingbi biani ti duti mbeni ngangu ye! Me a lingbi nga ti duti mbeni nzerengo ye, nga gbungo nda ti “aye ti Nzapa so nda ni alï mingi” ayeke ngangu mingi pëpe.
Jéhovah amû maboko na azo ti tâ be-ti-molenge ti gbu nda ti ye
5. Azo wa alingbi ti gbu nda ti “aye ti Nzapa so nda ni alï mingi”?
5 Atâa tongana mo hinga mbeti lani mingi pëpe na ekole na mo yeke manda ka ye mingi pëpe, tene pëpe so mo lingbi pëpe ti gbu nda ti “aye ti Nzapa so nda ni alï mingi.” Na ngoi ti kusala ti Jésus na ndo ti sese, Jéhovah afa na azo ye so Lo leke ti sara. Lo fa ni pëpe na azo ti ndara wala na azo so ahinga ye mingi, me lo fa ni na asenge zo so ahinga mbeti pëpe, so ayeke na tâ be-ti-molenge ti yeda ti tene awakua ti Nzapa afa ye na ala. Ala yeke lani tongana akete molenge na tere ti azo so amanda mbeti mingi na ekole (Matthieu 11:25; Kusala 4:13). Bazengele Paul asara tënë so na mbeti na aita ti lo na ndo ti “aye so Nzapa aleke teti ala so andoye lo”,lo tene: “A yeke na e si Nzapa afa aye so na lege ti yingo ti lo, teti yingo ayeke gi yâ ti aye kue, même aye ti Nzapa so nda ni alï mingi.”—1 aCorinthien 2:9, 10, MN.
6. Mbeti ti 1 aCorinthien 2:10 aye ti tene nyen?
6 Tongana nyen yingo ti Nzapa ayeke gi “yâ ti aye kue, même aye ti Nzapa so nda ni alï mingi”? Ahon ti fa nda ti tâ tënë na Chrétien oko oko, Jéhovah ayeke mû yingo ti lo ti fa lege na bungbi ti lo. Bungbi ti Jéhovah ayeke fa nda ti Bible na awakua ti lo so aduti beoko (Kusala 20:28; aEphésien 4:3-6). Na ndo ti sese kue, akongregation kue ayeke gi na oko kapa ti mandango Bible. Na peko ti angu mingi, awakua ti Jéhovah amanda gbâ ti aye nde nde so Bible afa. Yingo vulu ayeke sara kusala na lege ti kongregation ti mû maboko na azo ti duti na bango ndo so alingbi si ala gbu nda ti “aye ti Nzapa so nda ni alï mingi.”—Kusala 5:32.
“Aye ti Nzapa so nda ni alï mingi” andu nyen?
7. Ngbanga ti nyen azo mingi agbu pëpe nda ti “aye ti Nzapa so nda ni alï mingi”?
7 Zia e tene pëpe so ‘aye so nda ni alï mingi’ ayeke gi aye so akpengba mingi. “Aye ti Nzapa so nda ni alï mingi” ahonde na lê ti mingi ti azo, pëpe ngbanga ti so a yeke ngangu ti wara ndara ti Nzapa, me a yeke ngbanga ti so Satan ayeke handa azo ti ke ti tene Jéhovah amû maboko na ala na lege ti bungbi ti Lo.—2 aCorinthien 4:3, 4.
8. Na yâ ota chapitre ti mbeti ti Paul na aEphésien, lo sara tënë ti aye wa so nda ni alï mingi?
8 Ota chapitre ti mbeti ti Paul na aEphésien afa so “aye ti Nzapa so nda ni alï mingi” andu gbâ ti atâ tënë so mingi ti awakua ti Jéhovah agbu nda ni nzoni mingi. A yeke aye tongana hingango Hale so a mû zendo ti lo, sorongo ambeni zo na popo ti azo ti sese ti gue na yayu nga na Royaume ti Messie. Paul atene: “A fa tënë so na amolenge ti azo ti awagame ti giriri pëpe, tongana so A fa fadeso na abazengele na aprophète ti Lo ti nzoni-kue na lege ti Yingo; so atene, aGentil ayeke afon héritier, afon membre ti Tere, na afon e na zendo na yâ Christ Jésus.” Paul atene so a mû na lo kusala ti “sara si azo kue abâ ye so ayeke kusala ti tënë ti ndagigi so a honde na yâ Nzapa na ngoi kue giriri”.—aEphésien 3:5-9.
9. Ngbanga ti nyen a yeke ye ti gonda ti gbu nda ti “aye ti Nzapa so nda ni alï mingi”?
9 Paul akiri afa so ye so Nzapa aye ayeke ti tene azo ti yingo “na yayu alingbi hinga fadeso, na lege ti Eglize, ndara nde nde ti Nzapa.” (aEphésien 3:10). A-ange ayeke wara nzoni na lege so ala yeke bâ nga ala yeke gbu nda ti ndara so Jéhovah ayeke sara na kusala na yâ ti songo ti lo na kongregation ti aChrétien. So ye ti gonda teti e ti gbu nda ti aye so a-ange asara nzara ni! (1 Pierre 1:10-12). Na pekoni Paul atene so a lingbi e sara ngangu ti e kue si e “lingbi hinga legeoko na azo kue ti be-vulu” mabe ti aChrétien ; so ti tene “ye so ayeke kota ti lê ni, yongo ni, yongo ni na nduzu, na yongo ni na gbe ti sese”. (aEphésien 3:11, 18). Zia e bâ fadeso ambeni ye so nda ni alï mingi so peut-être ade e bâ ni kozo pëpe.
Atapande ti aye so nda ni alï mingi
10, 11. Tongana ti so Mbeti ti Nzapa afa, lawa la Jésus aga kozo mbage ti “hale” ti “wali” ti Nzapa so ayeke na yayu?
10 E hinga so Jésus ayeke kozo mbage ti “hale” ti “wali” ti Nzapa so ayeke na yayu, so Genèse 3:15 asara tënë ni. Ti gbu nda ti ye so nzoni ahon ti kozo, e lingbi ti hunda tere ti e na atënë so: ‘Lawa si Jésus aga Hale so a mû zendo ni? A yeke kozo ti tene lo ga na sese tongana zo? A yeke na ngoi ti dungo lo? A yeke na ngoi ti batême ti lo wala a yeke na ngoi so a zingo lo na kuâ?’
11 Nzapa atene lani so mbage ti bungbi ti lo so ayeke na yayu, so a sara tënë ni na yâ ti prophétie tongana “wali” ti lo, ayeke sigigi na mbeni hale so ayeke neka ande li ti ngbo ni. Me angu mingi mingi ahon na pekoni, na wali ti Nzapa adü mbeni hale oko pëpe so alingbi ti futi Satan na akusala ti lo. Ni la, prophétie ti Esaïe airi lo “ngombo,” wala wali so adü pëpe. Esaïe atene nga so “yingo ti lo ayeke na vundu”. (Esaïe 54:1, 5, 6). Na nda ni a dü Jésus na Bethléhem. Me a yeke gi na peko ti batême ti Jésus, na ngoi so yingo vulu asara si lo ga molenge ti Nzapa ti yingo, si Jéhovah atene: “So ayeke Molenge ti Mbi.” (Matthieu 3:17; Jean 3:3). Kozo mbage ti “hale” ti wali ni afa tere ti lo na gigi awe. Na pekoni, a sa yingo nga na ndo ti adisciple ti Jésus, na yingo vulu asara si ala ga amolenge ti Nzapa. “Wali” ti Jéhovah, so teti ngu mingi abâ tere ti lo tongana mbeni wali so ‘adü molenge pëpe’, alingbi fadeso ti “sara bia,” wala ti dekongo na ngia.—Esaïe 54:1; aGalate 3:29.
12, 13. Aversê wa afa so aChrétien kue so a sa yingo na ndo ti ala na ndo ti sese abungbi aga “ngbâa be-ta-zo na ti ndara”?
12 Mbeni use tapande ti aye so nda ni alï mingi, so a fa ni na e, andu ye so Nzapa aleke ti soro azo 144 000 na popo ti azo na sese (Apocalypse 14:1, 4). E yeda na tënë so a fa a tene aita kue so a sa yingo na ndo ti ala, so ayeke na fini na sese na ngoi nde nde, abungbi aga “ngbâa be-ta-zo na ti ndara” so Jésus atene lo yeke mû “kobe” na azo ti kua ti ni (Matthieu 24:45, MN ). Aversê wa afa so atënë so ayeke na lege ni? Jésus ayeke sara gi tënë ti mbeni Chrétien so ayeke kpengba aita ti lo na kobe ti yingo?
13 Nzapa atene lani na mara ti Israël, lo tene: “I yeke atémoin ti Mbi, boi ti Mbi so Mbi iri lo.” (Esaïe 43:10). Me na lango 11 ti Nisan ti ngu 33, Jésus atene na amokonzi ti Israël so Nzapa ake ti tene mara ti ala angbâ ti duti wakua ti lo. Lo tene: ‘Fade A lungula royaume ti Nzapa na tïtî i, na A mû na mbeni mara so alë lê ni.’ Jésus atene na gbâ ti azo so abungbi, lo tene: “Bâ, [a] zia da ti i na i awe!” (Matthieu 21:43; 23:38). Na ngoi so azo ti da ti Israël ayeke wakua ti Jéhovah, ala duti lani be-ta-zo pëpe na ala sara ye na ndara pëpe (Esaïe 29:13, 14). Na pekoni gi na oko lango ni so, Jésus ahunda atene: “Zo wa biani ayeke ngbâa be-ta-zo na ti ndara?” Ge lo ye ti tene biani tënë so: ‘Mara wa so ayeke sara ye na ndara ayeke mû ande place ti Israël ti duti ngbâa ti Nzapa so ayeke be-ta-zo?’ Bazengele Pierre akiri tënë na hundango tënë so tongana lo sara tënë so na kongregation ti aChrétien so a sa yingo na ndo ti ala. Lo tene: ‘I yeke mara ti nzoni-kue, azo ti Lo mveni.’ (1 Pierre 1:4; 2:9). Mara na lege ti yingo, “Israël ti Nzapa”, aga lani fini ngbâa ti Jéhovah (aGalate 6:16). Gi legeoko tongana ti so azo ti Israël ti giriri abungbi lani aga “boi” oko, aChrétien kue so a sa yingo na ndo ti ala, so ayeke na ndo ti sese na mbeni ngoi, abungbi nga aga “ngbâa be-ta-zo na ti ndara”. So mbeni ye ti gonda teti e ti wara “kobe” na tïtî ngbâa ti Nzapa!
Mandango ye e mveni alingbi ti duti mbeni nzerengo ye
14. Ngbanga ti nyen mandango Bible, pëpe senge dikongo mbeti, ayeke ga na ngia?
14 Tongana e wara lege ti gbu nda ti aversê fini fini, e yeke na ngia ngbanga ti so a mû lege na e ti kpengba mabe ti e. Ni la mandango Bible, pëpe gi senge dikongo mbeti, alingbi ti ga na mara ti ngia tongaso. Ni la, tongana mo yeke diko ambeti ti e, hunda tere ti mo na atënë so: ‘Na lege wa ye so a fa nda ni ge ague oko na ye so mbi gbu nda ni kozo na ndo tënë so? Ambeni versê nde wala ambeni tënë nde wa mbi lingbi ti sara kusala na ni ti kiri ti mû ngangu na atënë so a yeke tene na yâ ti article so?’ Tongana a hunda na mo ti kiri ti gi nda ti aye, sû na ndo ti mbeti tënë so mo ye ti wara kiringo tënë na ni, na zia ni tongana ye so mo yeke manda ande ye na ndo ni.
15. Mandango aye wa alingbi ti ga na mo ngia? Aye so alingbi ti ga na mo ye ti nzoni lakue tongana nyen?
15 Aye wa mo lingbi ti manda si a ga na mo ngia ndali ti so mo manda afini ye? E lingbi ti kono hingango ye ti e na gingo yâ ti ambele nde nde so Nzapa ate na azo teti nzoni ti azo kue. Mo lingbi ti kpengba mabe ti mo na mandango aprophétie na ndo ti Jésus Christ wala na mandango ambeti ti prophétie so ayeke na yâ ti Bible, so a fa nda ti aversê ni oko na oko. Ye so ayeke kpengba nga mabe ti e ayeke ti kiri ti manda mbaï ti aTémoin ti Jéhovah ti laso na lege ti buku Les Témoins de Jéhovah: Prédicateurs du Royaume de Dieu, tongana a yeke na yanga ti kodoro so mo hinga.a Ti kiri ti bâ “Atënë so azo ahunda,” so asigigi na yâ ti angbene Tour ti Ba Ndo, ayeke mû lege na mo biani ti gbu nda ti ambeni versê fini fini. Bâ mbilimbili tongana nyen a fa nda ti aversê ti si na tënë so a fa na yâ ti ambeti ni. Ye so ayeke mû ande maboko na mo ti sara kusala na hingango ndo ti mo nga ti bâ popo ti aye nzoni ahon ti kozo (aHébreu 5:14). Tongana mo yeke manda ye ni, sû atënë ti mo na yâ ti Bible ti mo wani wala na ndo ti mbeni mbeti nde si ye so mo manda angbâ ti sara nzoni na mo lakue nga na azo so mo lingbi ti mû maboko na ala.
Mû maboko na amaseka ti hinga nzerengo ti mandango Bible
16. Na lege wa mo lingbi ti mû maboko na amaseka ti hinga nzerengo ti mandango Bible?
16 Ababâ na amama alingbi ti sara ye mingi ti kono nzara ti amolenge ti ala teti aye ti yingo. Tene pëpe so a yeke ngangu na amaseka ti gbu nda ti aye so nda ni alï mingi. Tongana mo hunda na amaseka ti gi nda ti ambeni ye kozo na mandango Bible na sewa, mo lingbi ti hunda na ala ti fa tënë ti bê ti ala na ndo ti ye so ala manda. A lingbi ti zia na yâ ti mandango ye na sewa tarango tere ti mû maboko na amaseka ti manda tongana nyen ala lingbi ti fa so ye so ala mä na bê dä ayeke na lege ni, nga ti fa so ye so a fa na ala ayeke tâ tënë. Nga, mo lingbi ti sara kusala na brochure “Voyez le bon pays”b ti fa ando so Bible asara tënë ni nga ti zi nda ti ambage ti Bible so sewa ni ayeke diko yenga oko oko.
17. Ngbanga ti nyen a lingbi e sara ye ahon ndo ni pëpe na ndo mandango Bible e mveni?
17 Mandango Bible e mveni alingbi ti duti mbeni nzerengo ye nga alingbi ti kpengba mabe ti e. Me sara hange si a kanga lege pëpe na mo ti leke abungbi ti kongregation. Abungbi ayeke nga ambeni ye so Jéhovah amû ti fa ye na e na lege ti “ngbâa be-ta-zo na ti ndara”. Ye oko, gingo nda ti aye na ndo ni alingbi ti sara si yâ ti akiringo tënë ti mo na abungbi ane. A lingbi ti duti na ngoi ti Mandango Buku ti Kongregation wala na ngoi ti angbongboro tënë ti Bible na Ekole ti Kusala ti aChrétien.
18. Ngbanga ti nyen ngangu so a hunda ti manda na “aye ti Nzapa so nda ni alï mingi” alingbi na ni?
18 Mandango Mbeti ti Nzapa ngangu alingbi ti mû maboko na mo ti ga nduru na Jéhovah. Ti fa kota ti mara ti mandango ye tongaso, Bible atene: “Ndara ayeke ye ti bata zo legeoko tongana nginza ayeke ye ti bata zo, me hingango ye ayeke nzoni, teti ndara abata fini ti zo so ayeke na ni.” (Zo-ti-fa-tene 7:12). Ni la, ngangu so a hunda ti kono hingango ye ti mo na ndo ti aye ti yingo alingbi na ni. Bible amû zendo so na azo so angbâ ti gi ni, atene: “Fade mo wara lege ti hinga Nzapa.”—aProverbe 2:4, 5.
[Akete tënë na gbe ni]
a So aTémoin ti Jéhovah asigigi na ni.
b So aTémoin ti Jéhovah asigigi na ni.
Mo lingbi ti fa nda ni?
• “Aye ti Nzapa so nda ni alï mingi” ayeke nyen?
• Ngbanga ti nyen a lingbi e kaï lâ oko pëpe ti manda aye so nda ni alï mingi?
• Ngbanga ti nyen aChrétien kue alingbi ti wara ngia ti gbungo nda ti “aye ti Nzapa so nda ni alï mingi”?
• Na lege wa mo lingbi ti wara nzoni mingi na lege ti “aye ti Nzapa so nda ni alï mingi”?
[Foto na lembeti 28]
Lawa la Jésus aga Hale ti zendo ni?
[Foto na lembeti 31]
Ababâ na amama alingbi ti mû na amolenge ti ala aye ti gi nda ni kozo na mandango ye na sewa