Na tâ be-ti-molenge, mä yanga ti aberger so ayeke sara ye na ndoye
“I mä tënë ti ala so afa lege na i, na i yeda na tënë ti yanga ti ala.”—AHÉBREU 13:17.
1, 2. Aversê wa afa so Jéhovah na Jésus ayeke aBerger so ayeke sara ye na ndoye?
JÉHOVAH NZAPA na Molenge ti lo, Jésus Christ, ayeke aberger so ayeke sara ye na ndoye. Esaïe afa kozoni awe, lo tene: “Bâ, Seigneur L’Eternel ayeke ga na ngangu, na fade Lo komande na tïtî Lo. . . . Fade Lo fa ndo ti tengo pere na kundu ti Lo tongana berger, Lo kamata amolenge ti ngasangbaga na tïtî Lo, Lo yô ala na libe ti Lo, na lo fa lege doucement na ala so ayeke na amolenge.”—Esaïe 40:10, 11.
2 Kozo gango tâ tënë ti prophétie so, so andu tënë ti kiringo ti lekengo aye, asi na ngoi so tanga ti aJuif alondo na ngbâa akiri na Juda na ngu 537 kozo ti Christ (2 Chronique 36:22, 23). Prophétie so akiri aga tâ tënë na ngoi so Jésus Christ, so ayeke Cyrus ti Kota Ahon, azi tanga ti ala so a sa yingo na ndo ti ala na “Kota Babylone” na ngu 1919 (Apocalypse 18:2; Esaïe 44:28). Lo yeke “tïtî” Jéhovah so ayeke komande, so ayeke bungbi angasangbaga na ndo oko nga so ayeke fa lege na ala na ndoye. Jésus lo wani atene: “Mbi yeke Nzo Berger, na Mbi hinga angasangbaga ti Mbi, na angasangbaga ti Mbi ahinga Mbi.”—Jean 10:14.
3. Na lege wa Jéhovah afa so ye so a yeke sara na angasangbaga ti lo agbu bê ti lo mingi?
3 Prophétie ti Esaïe 40:10, 11 agboto lê na ndo lege so Jéhovah ayeke fa lege na azo ti lo na nzobe (Psaume 23:1-6). Na ngoi so Jésus ayeke sara kusala ti lo na sese, lo fa nga nzobe na mbage ti adisciple ti lo nga na mbage ti azo kue (Matthieu 11:28-30; Marc 6:34). A so bê ti Jéhovah na Jésus mingi ti bâ so, sân kamene, aberger, wala amokonzi ti azo ti Israël ake ti bâ lege ti azo ni na ala gi ti wara ye na mbage ti kundu ni (Ezéchiel 34:2-10; Matthieu 23:3, 4, 15). Jéhovah amû zendo, lo tene: “Fade Mbi sö kundu ti Mbi, na fade ala yeke ye so azo agbu mbeni pëpe; na fade Mbi fâ ngbanga na popo ti angasangbaga na angasangbaga. Fade Mbi zia Berger oko na ndo ala; na fade Lo mû kobe na ala, même Boi ti Mbi David, fade Lo fa ndo ti tengo pere na ala, na fade Lo ga Berger ti ala.” (Ezéchiel 34:22, 23). Na ngoi ti nda ni so, Jésus Christ, so ayeke David ti Kota Ahon, ayeke “Berger oko” so Jéhovah azia na ndo ti awakua ti lo kue na sese, ala so a sa yingo na ndo ti ala nga na “ambeni ngasangbaga”.—Jean 10:16.
Azo so Jéhovah amû ala tongana amatabisi na kongregation
4, 5. (a) Pendere matabisi wa Jéhovah amû na azo ti lo na sese? (b) Matabisi wa Jésus amû na kongregation ti lo?
4 Na ziango Jésus Christ tongana “Berger oko” na ndo ti awakua ti lo na sese, Jéhovah amû mbeni pendere matabisi na kongregation ti aChrétien. Prophétie ti Esaïe 55:4 afa kozoni awe tënë ti Mokonzi so ayeke na yayu, so a yeke mû ande lo tongana matabisi na azo. Versê ni atene: “Bâ, Mbi mû Lo ti ga témoin ti azo, Zo ti fa lege, na Zo ti komande azo [ti amara nde nde, NW ].” A-Chrétien so a sa yingo na ndo ti ala nga na “ambeni ngasangbaga” alondo na yâ ti amara nde nde kue, akete mara nde nde kue, azo nde nde kue nga na ayanga nde nde kue (Apocalypse 5:9, 10; 7:9). Ala ga mbeni bungbi oko, wala ‘kundu oko’ so a yeke wara azo ti yâ ni na ndo sese kue, na so ayeke na gbe ti fango lege ti ‘Berger oko’, Jésus Christ.
5 Na pekoni, Jésus amû mbeni pendere matabisi na kongregation ti lo so ayeke na sese. Lo mû akoli so ayeke be-ta-zo, so legeoko tongana Jéhovah na Jésus, ayeke bâ lege ti kundu ni na nzobe. Na yâ ti lettre so bazengele Paul atokua na aChrétien ti Ephèse, lo sara tënë na ndo ti matabisi so, so a mû na ndoye. Lo tene: “Tongana lo gue na nduzu, Lo gue na angbâa so Lo gbu ala awe, na lo mû azo tongana amatabisi . . . Lo mû ambeni tongana abazengele, ambeni tongana aprophète, ambeni tongana awafango nzo tënë, ambeni tongana aberger na awafango ye, si ala kiri na azo ti be-vulu na nzoni lege, si ala sara na azo, si tere ti Christ akpengba.”—aEphésien 4:8, 11, 12, NW.
6. Tongana nyen Apocalypse 1:16, 20 asara tënë ti asurveillant so a sa yingo na ndo ti ala so ayeke lani na yâ ti abungbi ti a-ancien? A lingbi nga ti tene nyen na ndo ti a-ancien so a soro ala, so ayeke ti ambeni ngasangbaga?
6 Azo so, so ‘a mû ala tongana amatabisi’, ayeke asurveillant wala a-ancien so Jéhovah na Molenge ti lo asoro ala na lege ti yingo vulu ti fa lege na angasangbaga ni na nzobe (Kusala 20:28, 29). Na tongo nda ni, asurveillant so kue ayeke akoli Chrétien so a sa yingo na ndo ti ala. Apocalypse 1:16, 20 asara tënë ti ala so ayeke sara kusala na yâ ti abungbi ti a-ancien tongana “atongoro” wala “a-ange” so ayeke na yâ ti maboko ti Christ ti koti. Ye so aye ti tene so lo yeke fa lege na ala. Ye oko, na ngoi ti nda ni so, teti so wungo ti a-ancien so a sa yingo na ndo ti ala so ayeke na sese ayeke kiri kiringo na gbe ni, mingi ti a-ancien ti akongregation ayeke ti ambeni ngasangbaga. Teti so a yeke ala so asara kusala na iri ti Wabatango Bungbi la asoro a-ancien so na gbe ti fango lege ti yingo vulu, a lingbi ti tene so a-ancien so nga ayeke na yâ maboko ti koti ti Nzo Berger, Jésus Christ (wala ala yeke na gbe ti fango lege ti lo) (Esaïe 61:5, 6). Ndali ti so a-ancien so ayeke na yâ ti akongregation ayeke mä yanga ti Christ, Li ti kongregation, ala lingbi biani ti tene e na ala e sara kusala maboko na maboko.—aColossien 1:18.
Mä yanga ti a-ancien na yeda na tënë ti ala
7. Wango wa bazengele Paul amû na ndo bango ndo ti e na mbage ti asurveillant?
7 Aberger ti e so ayeke na yayu, Jéhovah Nzapa nga na Jésus Christ, aku na mbage ti e ti mä yanga ti a-ancien na ti yeda na tënë ti ala, teti so a mû na ala akungba na yâ ti kongregation (1 Pierre 5:5). Yingo ti Nzapa apusu bazengele Paul ti sû tënë so: “I dabe i na ala so afa lege na i, ala so afa tënë ti Nzapa na i giriri; i bi bê ti i na nda ti lege ti ala [wala “ye so aga na peko ti sarango ye ti ala,” NW ], na i sara tongana ala sara na lege ti mabe. I mä tënë ti ala so afa lege na i, na i yeda na tënë ti yanga ti ala, teti ala yeke sara sinziri ti âme ti i, tongana azo so a yeke ngbanga ti ala ti kiri tënë mbeni lâ. Zia ala sara so na tâ ngia, na vundu pëpe, teti tënë ti vundu so asara nzoni na i pëpe.”—aHébreu 13:7, 17.
8. Ye wa Paul atisa e ti “bi bê” ti e dä? A yeke nzoni ti duti na bibe wa na ngoi so e yeke manga yanga?
8 Bâ so Paul atisa e ti “bi bê” ti e, wala ti bâ ye ti peko ti sarango ye ti a-ancien so ayeke be-ta-zo nga ti mû tapande ti mabe ti ala. Na ndo ni, lo wa e ti mä yanga ti akoli so a soro ala, na ti yeda na fango lege ti ala. Mbeni wagingo nda ti Bible, Richard France, atene so tënë ti ngbene yanga ti Grec so a kiri pekoni na “mä tënë”, wala ti mä yanga ayeke pëpe “tënë so a yeke sara ka kusala na ni ti sara tënë ti mango yanga, me tënë so aye ti tene ‘ti yeda na ye so a fa na mo’. Na tënë so aye ti fa so zo ayeke yeda na bê kue ti tene a fa lege na lo.” E yeke mä yanga ti a-ancien ngbanga ti so Mbeti ti Nzapa ahunda na e ti sara tongaso, nga ngbanga ti so e yeda na bê kue so aye so andu Royaume nga na nzoni duti ti e agbu bê ti ala. Biani, e yeke duti na ngia tongana e yeda na bê kue na fango lege ti ala.
9. Ngbanga ti nyen a yeke kota ye ti tene e “yeda na tënë” ti a-ancien atâa so e yeke mä yanga ti ala?
9 Ye oko, e yeke sara tongana nyen tongana e bâ ti e so mbeni ye so a-ancien afa na e ti sara ayeke na lege ni kue pëpe? A yeke ge la a hunda ti mä yanga ti ala. A yeke ngangu pëpe ti mä yanga tongana mbeni ye ayeke polele nga e yeda na ni. Me, e yeke fa so e mä biani yanga ti a-ancien tongana e yeda ti sara ye ni même tongana e wani e hinga pëpe ngbanga ti nyen a hunda na e ti sara ni. Pierre, so na pekoni aga mbeni bazengele, afa mara ti mango yanga tongaso.—Luc 5:4, 5.
Araison osio ti sara kusala maboko na maboko na a-ancien
10, 11. Na lege wa a-ancien “afa tënë ti Nzapa” na amba ti ala aChrétien na ngoi ti akozo Chrétien nga laso?
10 Na aHébreu 13:7, 17, so e bâ ni fade, bazengele Paul amû araison osio so afa ngbanga ti nyen a yeke na lege ni ti tene e mä yanga ti a-ancien nga e yeda na tënë ti ala. Kozo raison ni ayeke so ala ‘fa tënë ti Nzapa na e’. Girisa pëpe so Jésus amû ‘azo so ayeke tongana amatabisi’ na kongregation ti tene ala “kiri na azo ti be-vulu na nzoni lege”. (aEphésien 4:11, 12). Na lege ti akoli so, so ayeke be-ta-zo na so ayeke sara kusala na gbe ti fango lege ti Jésus, lo sara si bango ndo nga na sarango ye ti akozo Chrétien akiri aga nzoni. Nga, Nzapa amû yingo ti lo na ambeni ti akoli so ti sû alettre na akongregation. Jésus asara kusala na a-ancien so yingo ti Nzapa asoro ala ti fa lege na akozo Chrétien nga ti kpengba ala.—1 aCorinthien 16:15-18; 2 Timothée 2:2; Tite 1:5.
11 Laso, Jésus ayeke fa lege na e na lege ti “ngbâa be-ta-zo na ti ndara”, so Wabatango Bungbi nga na a-ancien so a soro ala ayeke sara kusala na iri ti lo (Matthieu 24:45, NW ). Ndali ti so e ne “Mokonzi Ti aBerger”, Jésus Christ, e yeke yeda na wango ti Paul so atene: “A lingbi azo ayä iri ti ala mingi mingi, na ala so asara kusala na yâ Tënë ni, na ala yeke fa nda ti tënë, zia azo ayä iri ti ala ahon.”—1 Pierre 5:4; 1 aThessalonicien 5:12; 1 Timothée 5:17.
12. Na lege wa a-ancien ayeke “sara sinziri ti âme ti [e]”?
12 Use raison so apusu e ti sara kusala maboko na maboko na a-ancien ayeke so “ala yeke sara sinziri ti âme ti [e]”. Tongana ala bâ mbeni ye na yâ ti bango ndo ti e wala sarango ye ti e so alingbi ti sara sioni na e na lege ti yingo, hio ala yeke mû na e wango so e yeke na bezoin ni ti kiri na e na nzoni lege (aGalate 6:1). Tënë ti yanga ti Grec so a kiri pekoni na ‘sarango sinziri’ aye ti tene “ti ke ti lango”. Mbeni wagingo nda ti Bible afa so tënë so “andu lege so lê ti mbeni berger ayeke ngbâ lakue ti kpengba.” Na ndo ti ziango si lê ti ala angbâ ti kpengba na lege ti yingo, a yeke si nga mingi so a-ancien ayeke lango pëpe ndali ti so ala yeke gi bê ti ala na ndo nzoni duti ti e na lege ti yingo. Na ndoye, a-ancien ayeke sara kue ti mû tapande ti Jésus Christ, “Kota Berger ti angasangbaga,” so ayeke bâ lege ti e nzoni. Ni la, a yeke nzoni pëpe ti yeda na bê ti e kue ti sara kusala maboko na maboko na ala?—aHébreu 13:20.
13. A-ancien nga na tanga ti aChrétien kue ayeke kiri ande tënë na zo wa? Nga ala yeke kiri tënë na alege wa?
13 Ota raison so apusu e ti yeda na bê kue ti sara kusala maboko na maboko na a-ancien ayeke ndali ti so ala yeke bâ ndo na ndo ti e “tongana azo so a yeke ngbanga ti ala ti kiri tënë mbeni lâ.” A-ancien adabe ti ala so ala yeke sara kua na gbe ti fango lege ti aBerger so ayeke na yayu, Jéhovah Nzapa nga na Jésus Christ (Ezéchiel 34:22-24). Angasangbaga ni ayeke ti Jéhovah, so “Lo vo na mênë ti [molenge ti lo, Fini Mbuki, 2001].” Tongaso, lo yeke hunda ande tënë na a-ancien na ndo lege so ala yeke sara ye na angasangbaga ti lo, so a hunda ti sara ye na ala na nzobe (Kusala 20:28, 29). Ni la, e kue e yeke kiri ande tënë na Jéhovah ndali ti lege so e yeke sara ye alingbi na fango lege ti lo (aRomain 14:10-12). Ti mä yanga ti a-ancien afa nga so e mä yanga ti Christ, so ayeke Li ti kongregation.—aColossien 2:19.
14. Ye wa alingbi ti sara si a-ancien akiri tënë “na vundu”? Ye ti pekoni ayeke so wa?
14 Paul afa osio raison so apusu e ti mä yanga ti a-ancien na tâ be-ti-molenge. Lo tene: “Zia ala sara so [wala ala kiri tënë na Nzapa] na tâ ngia, na vundu pëpe, teti tënë ti vundu so asara nzoni na i pëpe.” (aHébreu 13:17). A-ancien ayeke na gbâ ti akungba tongana fango ye, fango lege na aita, mungo li ni na fango tënë, batango asewa ti ala nga na bango lege ti akpale so andu kongregation (2 aCorinthien 11:28, 29). Tongana e ke ti sara kusala maboko na maboko na ala, e yeke gi ti zia ambeni kungba na ndo ti so ala yeke na ni. Ye so ayeke sara si ala yeke sara kua ti ala na vundu. Tongana e ke ti sara kusala maboko na maboko na a-ancien, a yeke nzere na Jéhovah pëpe, nga a lingbi ti ga na ye ti sioni na e. Nde na so, tongana e ne a-ancien tongana ti so a hunda, nga e sara kusala maboko na maboko na ala, a yeke sara si ala lingbi ti sara kua ti ala na ngia. Na ye so ayeke sara si aita aduti beoko, na ala fa tënë ti Royaume na ngia.—aRomain 15:5, 6.
E fa so e mä yanga
15. Tongana nyen e lingbi ti fa so e mä yanga ti a-ancien na e yeda na tënë ti ala?
15 Aye mingi ayeke dä so na yâ ni e lingbi ti sara kusala maboko na maboko na a-ancien so a soro ala. Na tapande, ndali ti ambeni ye so achangé na yâ ti territoire, a-ancien alingbi ti leke abungbi ti fango tënë na ambeni lango nde nga na ambeni ngbonga nde na ti so e yeke sara ka ni; na tongaso a lingbi ti hunda na e ti leke yâ ti kapa ti e. E yeke sara kue ti mû maboko na ye so ala leke? Ye so ayeke sara si e lingbi ti wara ambeni deba nzoni so e ku fade ti wara ni pëpe. Surveillant ti kusala aga ti sara vizite na groupe ti e ti Mandango Buku? Zia e leke ti sigigi mingi na fango tënë na yâ ti yenga ni so. A mû na e mbeni devoir na Ekole ti Kusala ti aChrétien? Zia e sara kue ti ga na bungbi na lango ni so na ti sara devoir ti e. Surveillant ti Mandango Buku afa na e so groupe ti e ayeke leke yâ ti Da ti Royaume? Zia e mû maboko mingi na ye so lo leke, alingbi na seni ti e nga na ngangu ti e. Na yâ ti alege so, nga na ambeni nde, e lingbi ti fa so e mä yanga ti akoli so Jéhovah na Molenge ti lo azia ala na ndo ti kundu ni ti bâ lege ni.
16. Tongana mbeni ancien asara ye pëpe tongana ti so a fa, ngbanga ti nyen a yeke pëpe mbeni raison ti tene e ke yanga?
16 Na ambeni ngoi, mbeni ancien alingbi peut-être ti sara ye nde na ti so ngbâa be-ta-zo nga na Wabatango Bungbi ti lo afa. Tongana lo ngbâ lakue ti sara tongaso, lo yeke kiri ande tënë na Jéhovah, “Berger na [zo ti batango, FM 01] âme ti [e].” (1 Pierre 2:25). Me, atâa mbeni ancien asara ye na lege ni pëpe wala lo sara faute, ye so ayeke pëpe mbeni raison ti tene e ke yanga. Jéhovah ayeke iri deba nzoni pëpe na ndo ti azo ti kengo yanga nga lo yeke sara ni pëpe na azo ti kpengba-li.—Nombre 12:1, 2, 9-11.
Jéhovah afuta azo so amû maboko na a-ancien
17. Bango ndo wa ayeke nzoni e duti na ni na ndo ti a-ancien?
17 Jéhovah Nzapa ahinga so azo so lo soro ala ti ga a-ancien ayeke mbilimbili-kue pëpe. Ye oko, lo yeke sara kusala na ala nga, na lege ti yingo ti lo, lo yeke fa lege na azo ti lo na sese. A yeke tâ tënë teti a-ancien nga teti e kue so “kota ngangu” so ahon ti e azo “alondo na Nzapa, a londo na e pëpe.” (2 aCorinthien 4:7). Tongaso, a yeke nzoni e kiri singila na Jéhovah ndali ti ye so lo yeke sara na lege ti a-ancien so ayeke be-ta-zo, nga a yeke nzoni e sara kusala maboko na maboko na ala.
18. Na mango yanga ti a-ancien, e yeke sara nga nyen?
18 A-ancien ayeke sara kue ti tene sarango ye ti ala ague oko na aye so Jéhovah afa na ndo aberger so lo zia ala na ndo ti kundu ni na ngoi ti nda ni so, tongana ti so Jérémie 3:15 atene: “Fade Mbi mû na i aberger so bê ti Mbi aye, fade ala mû na i kobe na lege ti hingango ye na ndara.” Biani, a-ancien so ayeke na popo ti e ayeke sara kusala ti ala ti fango ye nga ti batango angasangbaga ti Jéhovah nzoni. Zia e ngbâ ti kiri singila ndali ti ngangu kusala so ala yeke sara na lege so e yeke sara kusala maboko na maboko na ala, e yeke mä yanga ti ala nga e yeke yeda na tënë ti ala. Na sarango tongaso, e yeke fa so e yeke kiri singila na aberger ti e so ayeke na yayu, Jéhovah Nzapa na Jésus Christ.
Dango bê
• Na lege wa Jéhovah na Jésus Christ afa so ala yeke aBerger so asara ye na ndoye?
• Na ndo mango yanga, ngbanga ti nyen a hunda nga ti yeda na tënë ti a-ancien na bê kue?
• Na alege wa e lingbi ti fa so e yeda na tënë ti a-ancien?
[Foto na lembeti 29]
A-ancien ayeda na fango lege ti Christ
[Afoto na lembeti 31]
Alege ayeke dä mingi ti fa so e mä yanga ti azo so Jéhovah asoro ala tongana aberger