Diable Ye Mingi Ahon Gi Tene ti Atoro

“Na yâ Fini Testament kue a yeke wara tene ti mbeni kota bira na popo ti a-ange ti Nzapa na ti ye so ayeke nzoni, na mbage oko, nga na ti aye so ayeke sioni so Satan ayeke na li ni, na mbeni mbage nde. Ye so ayeke pepe gi tene ti ambeni wasungo Bible oko oko, me a yeke bibe ti ala kue. . . . Tongaso, tene ti témoin ti Fini Testament ayeke polele. Satan ayeke mbeni tâ ye ti sioni mingi, so ake lakue Nzapa nga na azo ti Nzapa.”​—“Fini Bakari ti Bible” (Angl.).

TONGASO, ngbanga ti nyen azo mingi so atene ala yeke ti lege ti vorongo ti aChrétien, na so atene ala mä na bê na Bible, ake bibe so mbeni tâ Zabolo ayeke dä? Ti tâ tene ni, a yeke ngbanga ti so ala yeda pepe so Bible ayeke Tene ti Nzapa. (Jérémie 8:9) Ala tene so asenda-ndara ti amara so angoro ala asala ngangu na ndo ti awasungo Bible na ala fa na lege ni pepe tâ tene so alondo na Nzapa. Na tapande, Hans Küng, wandara ti lege ti vorongo ti aCatholique, asû na mbeti: “Atene ti pande na ndo Satan so ayeke na gbâ ti ayingo sioni . . . alondo na yâ atene ti pande ti Babylone alï na yâ kozo lege ti vorongo ti aJuif si na pekoni a kiri a lï na yâ Fini Testament.”​—On Being a Christian.

Me Bible ayeke pepe gi tene ti azo; a yeke biani Tene ti Nzapa so a sû na gbe ti yingo ti lo. Ni la, e yeke sala ye na ndara tongana e ba na nene ni mingi ye so a tene na ndo ti Zabolo.​—2 Timothée 3:14-17; 2 Pierre 1:20, 21.

Bibe ti Jésus Ayeke La ni Tongana Nyen?

Jésus Christ amä na bê la ni so Zabolo ayeke dä biani. A yeke pepe mbeni ye ti sioni na yâ Jésus mveni si atara lo giriri. A yeke la ni mbeni tâ zo la si atara lo, so na pekoni Jésus ahiri lo “mokonzi ti sese so.” (Jean 14:30; Matthieu 4:1-11) Lo mä nga na bê so ambeni yingo nde amu mbage ti Satan na yâ asioni ye so lo leke ti sala. Jésus asava azo so ‘yingo sioni ayeke na yâ ala.’ (Matthieu 12:22-28) Même mbeti so atene Nzapa ayeke dä pepe A Rationalist Encyclopædia afa nda ti ye so tongana lo tene: “Lege so Jésus so ayeke na yâ a-Évangile ayeda na tene ti mabe na ayingo sioni aduti lakue mbeni tênë ti pikango gere teti awandara ti alege ti vorongo.” Tongana Jésus asala tene ti Zabolo na ti ayingo sioni ti lo, lo fa pepe gi peko ti atene ti atoro so alondo na yâ atene ti pande ti Babylone. Lo hinga so ala yeke dä biani.

E manda ye mingi na ndo ti Zabolo tongana e ba mbilimbili atene so Jésus atene na awafango ye ti alege ti vorongo ti ngoi ti lo: “I yeke ti babâ ti i diable, na i ye ti sala ye so babâ ti i aye. Lo yeke wafango zo giriri kozoni, na lo duti na tene-biani pepe, teti tene-biani ayeke na yâ lo pepe. Tongana lo tene mvene, lo sala tene ti lo mveni, teti lo yeke wamvene na babâ ti mvene.”​—Jean 8:44.

Na lege ti tene so, Zabolo, iri so aye ti tene “wazonga,” ayeke la ni “wamvene na babâ ti mvene.” Lo yeke la ni kozo créature ti Nzapa so atene mvene na ndo Lo, na lo sala ni giriri kâ na yâ yaka ti Eden. Jéhovah atene la ni so akozo babâ na mama ti e ayeke “kui biani” tongana ala te lê ti keke ti hinga nzoni na sioni. Na lege ti yanga ti mbeni ngbo, Satan atene so atene ni ayeke tâ tene pepe. (Genèse 2:17; 3:4) Na lege ni, a hiri lo “ngbo ti giriri, lo so a di iri ti lo Diable na Satan.”​—Apocalypse 12:9, NW.

Zabolo atene mvene na ndo ti keke ti hinga nzoni na sioni. Lo dë gaba so gbanzingo ala ti te lê ti keke so ayeke na lege ni pepe; a yeke salango ye ahon ndo ni na ngangu ti komande. Lo tene so Adam na Ève alingbi ti “ga tongana Nzapa,” na fango na ala mveni ye so ayeke nzoni na sioni. Satan aye ti tene so teti ala yeke na ngangu ti soro ye so bê ti ala mveni aye, a lingbi ala mveni afa ye so ala ye na yâ ye kue. (Genèse 3:1-5) Bingo tene so na li ti mbilimbili ti lege ti komande ti Nzapa asala si akota tene aba gigi. Tongaso Jéhovah azia ngoi ti tene a leke akota tene so. Ye so aye ti tene so a mu lege na Satan ti ngbâ ti duti na fini teti mbeni ngoi. Ngoi so a mu na lo ayeke kpe fadeso na loro ti si na nda ni. (Apocalypse 12:12) Ye oko, lo ngbâ lakue ti gboto azo yongoro na Nzapa na lege ti amvene na amayele, na salango kusala na azo tongana a-scribe nga na aFarizien ti ngoi ti Jésus ti kangbi afango ye ti lo na ndo kue.​—Matthieu 23:13, 15.

Jésus atene nga so Zabolo ayeke “wafango zo giriri kozoni” na so “lo duti na tene-biani pepe.” Ye so aye ti tene pepe so Jéhovah aleke Zabolo tongana mbeni “wafango zo.” Bible afa pepe so a leke Zabolo ti duti mbeni mara ti sioni nyama so a zia lo mokonzi ti mbeni ndo ti wâ na ti pasi teti azo kue so ake Nzapa, nga, lo fa pepe so mbeni ndo tongaso ayeke dä biani. Bible afa so akinda ayeke na dukua, ndo so azo kue ague dä, pepe na mbeni ndo ti wâ wala ndo ti duti ti Satan.​—Kusala 2:25-27; Apocalypse 20:13, 14.

Giriri Zabolo ayeke ‘na yâ tâ tene.’ Lo yeke la ni oko ti sewa ti Jéhovah so ayeke na yayu tongana mbeni molenge ti Nzapa, ange so ayeke mbilimbili-kue. Me lo “duti na tene-biani” pepe. Lo ye gi alege nga na akpengba-ndia ti lo mveni so aluti na ndo ti mvene. Tongo nda ti lo, “giriri kozoni,” ayeke pepe na ngoi so a leke lo tongana mbeni ange so ayeke molenge ti Nzapa, me na ngoi so lo ke yanga ti Jéhovah na bê kue na lo tene mvene na Adam na Ève. Zabolo ayeke tongana azo so alondo ti ke yanga ti Jéhovah na ngoi ti Moïse. Na ndo ti ala, e diko: “Ala futi lege ti ala mveni, ala yeke amolenge ti Lo pepe, ngbanga ti sioye ti ala.” (Deutéronome 32:5) A lingbi ti tene oko ye so na ndo Satan. Lo ga “wafango zo” tongana lo londo ti ke yanga na lo ga zo so kuâ ti Adam na Ève, biani, ti azo kue, ayeke na li ti lo.​—aRomain 5:12.

A-ange so Ake Yanga

Ambeni ange amu peko ti Satan na yâ kengo yanga ti lo. (Luc 11:14, 15) A-ange so ‘azia ndo ti duti ti ala mveni’ na ala yü tele ti azo ti tene ala bungbi na “amolenge-wali ti azo” na ngoi ti Noé. (Jude 6; Genèse 6:1-4; 1 Pierre 3:19, 20) “Tiers oko ti atongoro ti yayu,” wala mbeni kete wungo ti a-ange, amu lege so.​—Apocalypse 12:4.

Apocalypse, buku so asala tene na lege ti afä mingi, afa Zabolo tongana mbeni “kota bengba ngbo.” (Apocalypse 12:3) Ngbanga ti nyen? A yeke pepe ngbanga ti so lo yeke biani na mbeni tele so ayeke sioni nga pendere oko pepe. Biani, e hinga pepe mara ti tele wa azo ti yingo ayeke na ni, me a lingbi ti tene so Satan ayeke nde pepe na tanga ti a-ange na yâ ye so. Ye oko, “kota bengba ngbo” alingbi biani na fango peko ti bibe ti Satan so ayeke ndulu ti te ye kue na lege ti lo, ti mu mbito, so ayeke na ngangu, na so afuti ye.

Fadeso a gbanzi aye mingi na Satan nga na ayingo sioni ti lo. Ala lingbi mbeni pepe ti yü tele ti azo tongana ti so ala sala giriri. Ngoi kete na peko ti so a zia Royaume ti Nzapa so a leke gere ni awe na maboko ti Christ na ngu 1914, a bi ala ndulu na sese.​—Apocalypse 12:7-9.

Zabolo Ayeke Mbeni Ngangu Wato

Atä so kue, Zabolo angbâ lakue mbeni ngangu wato. Lo yeke “tambela tongana bamara so atoto, na lo yeke gi zo so lo lingbi te lo.” (1 Pierre 5:8) Lo yeke pepe mbeni tene ti sioni so alingbi gbu nda ni polele pepe so aduti na yâ mitele ti e so ayeke mbilimbili-kue pepe. Biani, a lingbi e tiri lâ na lâ na abibe ti e ti siokpari. (aRomain 7:18-20) Me tâ tiri ni ayeke “na ala so akomande bingo ti sese so, na ayingo sioni ti yayu.”​—aEphésien 6:12.

Ngangu ti Zabolo amu ndo mingi? Bazengele Jean atene: “Sese kue ayeke na gbe ti [ngangu ti] zo ti sioni.” (1 Jean 5:19, NW) Biani, e ye pepe ti bi bê ti e ahon ndo ni na ndo ti Zabolo wala ti zia si kota mbito teti atene ti atoro asala e. Ye oko, a yeke ye ti ndara ti sala hange na angangu so lo sala ti vuko lê ti e na ndo tâ tene na ti buba dutingo be-biani ti e na Nzapa.​—Job 2:3-5; 2 aCorinthien 4:3, 4.

Zabolo ayeke sala lakue kusala pepe na aye ti ngangu ti tiri bira na azo so aye ti sala ye so bê ti Nzapa aye. Ngoi na ngoi, lo sala tele ti lo tongana “ange ti lumière.” Bazengele Paul agboto mê ti aChrétien na ndo ye ti sioni so tongana lo sû na mbeti: “Me mbito asala mbi, teti peut-être mbeni ye ahanda i legeoko tongana ngbo ahanda Ève giriri na mayele ti lo, tongaso bibe ti i aga kirikiri si i zia Christ.”​—2 aCorinthien 11:3, 14.

Ni la a lingbi e ‘duti na donzi, e sala sinziri, e ke lo na mabe so azia pepe.’ (1 Pierre 5:8, 9; 2 aCorinthien 2:11) A lingbi e kpe ti ndu mbeni ye so ague oko na ye ti atoro so a sala na lingo teti ye so alingbi ti zi lege na Satan ti handa e. (Deutéronome 18:10-12) Duti mbeni wamandango Tene ti Nzapa na bê kue, dabe mo so Jésus Christ asala tene ti Tene ti Nzapa fani mingi tongana Zabolo atara lo. (Matthieu 4:4, 7, 10) Sambela ti wara yingo ti Nzapa. Alengo ti lo alingbi ti mu maboko na mo ti kpe akusala ti mitele, so Satan asala si a maï nzoni. (aGalate 5:16-24) Nga, sambela na bê kue na Jéhovah tongana mo ba so na lege ti mbeni ye Zabolo na ayingo sioni ti lo ayeke sala ngangu na ndo mo.​—aPhilippien 4:6, 7.

A lingbi mo sala kota mbito ti Zabolo pepe. Jéhovah aze tâ batango ndo na ye kue so Satan alingbi ti sala. (Psaume 91:1-4; aProverbe 18:10; Jacques 4:7, 8) Bazengele Paul atene: “I kpengba na yâ Seigneur, na yâ ngangu ti ngangu ti Lo.” Na pekoni mo yeke “wara lege ti luti ngangu na gbele aye ti handa ti Diable.”​—aÉphésien 6:10, 11, NW.

[Foto na lembeti 5]

Jésus ahinga la ni so Diable ayeke tâ zo

[Foto na lembeti 6]

“Sese kue ayeke na gbe ti [ngangu ti] zo ti sioni”

[Lingu ti foto 6]

NASA photo

[Afoto na lembeti 7]

Luti ngangu na gbele Diable na mandango Tene ti Nzapa nga na sambelango lo lakue