Atënë so azo ahunda

Jésus aye lani ti tene nyen tongana lo tene so ngbâa ti lo so ayeke be-ta-zo ayeke na “ndara”?

Jésus ahunda tënë so: “Zo nyen ayeke [“ngbâa be-ta-zo na ti ndara,” MN ]? so mveni ti lo azia lo na ndo azo ti da ti lo ti kangbi kobe na ala na l’heure ni so alingbi.” (Matthieu 24:45). “Ngbâa” so ayeke mû “kobe” ti yingo na azo ayeke kongregation ti aChrétien so a sa yingo na ndo ti ala. Ngbanga ti nyen Jésus atene so ala yeke na ndara?a

Aye so Jésus wani afa alingbi ti mû maboko na e ti gbu nda ti ye so lo ye ti tene tongana lo sara kusala na tënë “ndara.” Na tapande, na ngoi so Jésus ayeke sara tënë ti ‘ngbâa be-ta-zo na ti ndara’, lo tene mbeni toli na ndo ti amachia bale-oko so ayeke ku gango ti koli so aye ti mû wali. Amachia so adabe ti e na aChrétien so a sa yingo na ndo ti ala, so kozoni na ngu 1914 ayeke ku na ngia gango ti koli so aye ti mû wali, na koli ni so ayeke Jésus Christ. Na popo ti amachia bale-oko so, oku ayeke na mafuta mingi pëpe ndali ti lampe ti ala na ngoi ti gango ti koli ni. Na tongaso, ala lingbi pëpe ti gue na matanga ti mariage ni. Ambeni machia ni oku asara ye na ndara. Mafuta so ala mû alingbi, na tongaso lumière ti ala angbâ ti za na ngoi so koli ni aga, nga a mû lege na ala ti gue na matanga ti mariage ni.​—Matthieu 25:10-12.

Na ngoi so Jésus amû mbata ti Gbia na ngu 1914, aChrétien mingi so a sa yingo na ndo ti ala ayeke ku lani kungo ti gue na tere ti lo hio na yayu. Ye oko, gbâ ti kusala ti sara na sese ge ayeke lani dä, na ambeni na popo ti ala ade ti leke tere ti ala pëpe ti sara ni. Legeoko tongana amachia so asara ye na ndara pëpe, ambeni ti aChrétien so asara mbeni ye kozoni pëpe ti kpengba na lege ti yingo, na tongaso ala yeke lani nduru pëpe ti ngbâ ti sara si lumière ti ala angbâ ti za. Ye oko, mingi ti ala asara ye na ndara na ala bâ ndo ayo, na a sara si ala kpengba na lege ti yingo. Tongana ala bâ so kota kusala ayeke ku ala, na ngia ala bi tere ti ala na yâ ti kusala ni. Na sarango tongaso, ala fa so ala yeke ngbâa so ayeke be-ta-zo na so ayeke sara ye na ndara.

Zia e bâ nga lege so Jésus asara kusala na tënë “ndara” na Matthieu 7:24. Jésus atene: “Zo so amä tënë so Mbi tene, na lo bata, fade a bâ lo tongana zo ti ndara so asara da ti lo na ndo tênë.” Zo so ayeke na ndara asara da ti lo akpengba ti tene kota pupu na ngu-nzapa akungbi ni pëpe. Nde na so, zo so ayeke na ndara pëpe asara da ti lo na ndo ti mbutu, na da ti lo akungbi. Tongaso, mbeni disciple ti Jésus so ayeke sara ye na ndara ayeke lo so abâ ndo ayo ti bâ asioni ye so mungo peko ti ndara ti azo alingbi ti ga na ni. Lo yeke bâ popo ti aye nzoni nga na pekoni lo yeke mû anzoni desizion. Ye so ayeke sara si mabe ti lo, asarango ye ti lo nga na afango ye ti lo aluti gi na ndo ti ye so Jésus afa. A yeke oko ye so ‘ngbâa be-ta-zo na ti ndara’ ayeke sara la.

Bâ nga lege so a sara kusala na tënë “ndara” na yâ ti gbâ ti aversê ti Mbeti ti Nzapa so a sû na yanga ti Hébreu. Na tapande, Pharaon azia lani Joseph ti bâ ndo na ndo ti akobe ti Egypte. Ye so ayeke mbeni mbage ti ye so Jéhovah aleke lani ti mû kobe na azo ti lo. Ngbanga ti nyen a soro lani Joseph? Pharaon atene na Joseph atene: ‘Zo oko ayeke na ndara tongana mo pëpe.’ (Genèse 41:33-39; 45:5). Legeoko nga, Bible atene so Abigaïl “ayeke na ndara mingi”. Abigaïl amû lani kobe na David so Jéhovah asa mafuta na li ti lo ti ga gbia nga na akoli so amû peko ti lo (1 Samuel 25:3, 11, 18). A lingbi ti tene so Joseph na Abigaïl ayeke azo so asara ye na ndara ndali ti so ala hinga ye so bê ti Nzapa aye nga ala bâ ndo ayo na ala mû anzoni desizion.

Ni la, tongana Jésus ayeke tene lani so ngbâa so ayeke be-ta-zo ayeke na ndara, lo ye ti fa so ala so ayeke sara kusala na iri ti ngbâa so ayeke bâ popo ti aye nzoni, ala yeke bâ ndo ayo nga ala yeke mû anzoni desizion. Na ala yeke sara aye so ndali ti so mabe ti ala, asarango ye ti ala nga na afango ye ti ala aluti gi na ndo ti Mbeti ti Nzapa so ayeke tâ tënë.

[Kete tënë na gbe ni]