Tënë ti Jéhovah ayeke na fini
Akota tënë ti mbeti ti Jacques na ti ambeti ti Pierre
NDURU na ngu 30 na peko ti Pentecôte ti ngu 33, disciple Jacques, so mama ti lo na Jésus ayeke oko, asû lettre na “amara bale-oko na ndo ni use” ti Israël ti yingo (Jacq. 1:1). Ye so lo zia na gbele lo ayeke ti wa ala ti kpengba na yâ ti mabe nga ti gbu ngangu na yâ ti akpale. Lo wa ala nga ti bâ lege ti aye so ayeke tambela lani nzoni pëpe na yâ ti kongregation.
Ngoi kete kozoni ti tene Togbia Néron ti Rome ato nda ti sara ye ti ngangu na aChrétien na ngu 64, bazengele Pierre atokua kozo lettre ti lo na aChrétien, lo wa ala ti kpengba na yâ ti mabe. Na yâ ti use lettre ni so Pierre atokua kete na peko ti kozoni so, lo wa amba ti lo aChrétien ti dengi mê na atënë ti Nzapa nga lo wa ala na ndo ti gango ti lâ ti Jéhovah. Biani, e lingbi ti wara aye ti nzoni tongana e dengi mê na atënë ti yâ ti lettre ti Jacques na ti Pierre.—aHéb. 4:12.
NZAPA AMÛ NDARA NA AZO SO ‘AHUNDA NI NA MABE’
Jacques atene so “ngia ayeke na zo so agbu ngangu na yâ ye so atara lo, teti tongana A tara lo A bâ lo lingbi, fade lo wara couronne ti fini ti lakue lakue”. Azo so angbâ ti “hunda na mabe,” Jéhovah ayeke mû na ala ndara so ala yeke na bezoin ni ti gbu ngangu na yâ ti atara.—Jacq. 1:5-8, 12.
Aita so “aga amaître”, wala awafango ye na yâ ti kongregation ayeke nga na bezoin ti mabe na ti ndara. Na pekoni so Jacques atene so menga ayeke “kete membre” so alingbi ti sara ‘si tere kue aga sioni,’ lo wa aChrétien ti kpe asarango ye ti azo so ahinga Nzapa pëpe, so alingbi ti sara si ala buba songo ti ala na Nzapa. Lo fa nga aye so a yeke nzoni mbeni Chrétien so ayeke na kobela na lege ti yingo asara ti wara seni.—Jacq. 3:1, 5, 6; 5:14, 15.
Akiringo tënë na atënë na ndo ti Bible:
2:13—Na lege wa “be-nzoni ahon ngbanga na tënë”? Tongana ngoi asi ti tene zo akiri tënë na Nzapa ndali ti aye so lo sara, Nzapa ayeke bâ be-nzoni so e sara na azo nga lo yeke pardone e na lege ti fini ti Molenge ti lo so lo mû na sandaga ti zi e (aRom. 14:12). Ti hinga ni ayeke sara biani si e gi lakue ti sara be-nzoni na azo.
5:20—“Zo so akiri zo ti siokpari na lege ni,” lo sö âme ti zo wa na lê ti kuâ? Tongana mbeni zo asara aye ti sioni na lo changé bê ti lo pëpe, a sara si lo kui na lege ti yingo na a lingbi ande ti futi lo biani biani. Me tongana mbeni Chrétien asara si zo ni achangé, a yeke tongana ti so lo sö âme ti zo ni na lê ti kuâ. Zo so amû maboko na zo ti sioni ti changé asara nga si ‘siokpari mingi so zo ni asara ahonde.’
Aye ti manda teti e:
1:14, 15. Gbungo li na ndo ti asioni ye alingbi ti gue na zo ti sara siokpari. Ni la, a lingbi e kpe ti gbu li na ndo ti asioni ye. Me, a lingbi e ngbâ ti “bi bê” ti e na aye so ayeke kpengba zo na e zia bê ti e dä.—aPhil. 4:8.
2:8, 9. Ti “yekia zo teti lê ti lo” ague nde na “kota ndia” ti ndoye. Ni la, atâ Chrétien ayeke ye zo teti lê ti lo pëpe.
2:14-26. ‘A sö e na lege ti mabe’, me ‘pëpe na lege ti akusala’ so Ndia ti Moïse ahunda wala na lege ti akua so aChrétien ayeke sara. Ti tene gi na yanga so e yeke na mabe alingbi pëpe (aÉph. 2:8, 9; Jean 3:16). A lingbi mabe apusu e ti sara ye so bê ti Nzapa aye.
3:13-17. “Ndara so alondo na nduzu” ayeke biani kota mingi ahon ndara so ‘ayeke ti sese, ti mitele senge, na ti zabolo.’ A yeke nzoni e ngbâ lakue ti ‘gi ndara legeoko tongana zo agi mosoro so ahonde’.—aProv. 2:1-5.
3:18. Lê ti nzo tënë ti Royaume, a yeke ‘lu ni na lege ti siriri teti ala so aleke tënë ti siriri.’ A yeke kota ye ti tene e duti zo so aye siriri; e duti pëpe zo so ayeke sara ye na baba, so aye papa wala so ayeke sara ye kirikiri.
E DUTI NA “MABE SO AZIA PËPE”
Pierre adabe ti amba ti lo aChrétien na ndo ti “beku so ayeke na fini”, so ala yeke na ni ti duti na yayu. Pierre atene na ala: “I yeke mara so Nzapa airi i awe teti Lo mveni, i yeke asacrificateur, agbia, mara ti nzoni-kue.” Na pekoni so Pierre amû ambeni mbilimbili wango na ndo ti tënë ti mango yanga, lo wa aChrétien kue ti ‘bi bê ti ala na tënë oko, ti sara be-nzoni na popo ti ala, ti ndoye tere ti ala tongana aita, ti duti na be-ti-ndoye na be-kota-pepe’.—1 Pi. 1:3, 4; 2:9; 3:8.
So “nda ti [ye ti ngoi ti aJuif] aga nduru” awe, Pierre awa aita ti lo ti ‘bi bê ti ala na lege ni, na ti duti na donzi si ala lingbi sambela.’ Lo tene na ala: “I duti na donzi, i sara sinziri! . . . I ke [Satan] na mabe so azia pëpe.”—1 Pi. 4:7; 5:8, 9.
Akiringo tënë na atënë na ndo ti Bible:
3:20-22—Batême asö e na lege wa? Batême ayeke mbeni ye so a ku na mbage ti azo so agi ti sö fini ti ala. Ye oko, gi batême ni wani alingbi pëpe ti sö e. Biani, a yeke sö e “na lege ti londongo ti Jésus-Christ na popo ti awakinda.” A lingbi zo so aye ti wara batême amä na bê so azo alingbi ti sö fini ti ala gi teti so Jésus akui ndali ti azo, a zingo lo nga lo “yeke na koti ti Nzapa”, ye so asara si lo yeke na ngangu na ndo ti azo so ayeke na fini nga na ala so akui. Tongana mara ti mabe so la apusu mbeni zo ti wara batême, batême ni ague oko na ye so asara si ‘azo miombe asö fini ti ala na yâ arche na lege ti ngu.’
4:6—“Azo so akui awe”, so “a fa Tene-nzoni” na ala, ayeke azo wa? A yeke azo so ‘akui giriri na lege ti kengo-ndia na lege ti siokpari ti ala,’ so ti tene azo so ayeke na songo pëpe na Jéhovah kozoni ti tene ala mä nzo tënë (aÉph. 2:1). Ye oko, na pekoni so ala mä na bê na nzo tënë, ala to nda ti duti na “fini” na lege ti yingo.
Aye ti manda teti e:
1:7. Ti tene e duti na mabe so ngere ni ayeke ngangu, a lingbi a tara ni kozoni awe si. Mara ti kpengba mabe tongaso alingbi biani ti sara si zo ‘awara salut ti âme.’ (aHéb. 10:39). A lingbi e kpe pëpe ti tene a tara mabe ti e.
1:10-12. A-ange ayeke na nzara ti bâ na ti gbu nda ti aye so aprophète ti Nzapa asû ândö na ndo ti kongregation ti aChrétien so a sa yingo na ndo ti ala. Ye oko, aye ni so aga polele gi na ngoi so Jéhovah ato nda ti sara ye na lege ti kongregation so (aÉph. 3:10). A yeke nzoni e mû tapande ti a-ange nga e sara ngangu ti gi “tâ nda ti ye ti Nzapa mveni.”—1 aCor. 2:10.
2:21. Tongana ti Jésus Christ, a yeke nzoni e duti nduru ti bâ pasi, même juska na kuâ ti mû lege na e ti fa so Jéhovah ayeke Kota Gbia ti Dunia Kue.
5:6, 7. Tongana e zia agingo bê ti e kue na tïtî Jéhovah, lo yeke mû maboko na e ti zia aye so andu tâ vorongo na kozo ndo na yâ ti gigi ti e ahon ti gi bê ti e ahon ndo ni na ndo ti ye so alingbi ti si kekereke.—Mat. 6:33, 34.
‘LÂ TI JÉHOVAH AYEKE GA’
Pierre atene: “Tënë so a fa na iri ti Nzapa aga lâ oko pëpe na lege ti ye so zo aye, me azo asara tënë so alondo na Nzapa tongana Yingo Vulu ahon na ala.” Ti dengi mê nzoni na atënë ti prophétie alingbi ti bata e si “amaître ti wataka” nga na ambeni sioni zo nde ahanda e pëpe.—2 Pi. 1:21; 2:1-3.
Pierre amû wango so: “Na lâ ti nda ni, fade azo ti hengo zo aga na tënë ti he.” Me “fade lâ ti [Jéhovah, MN ] aga tongana wanzi”. Ti hunzi na lettre ti lo, Pierre amû pendere wango na aChrétien so ayeke “ku singo ti lâ ti Nzapa”.—2 Pi. 3:3, 10-12.
Akiringo tënë na atënë na ndo ti Bible:
1:19—“Tongoro Ti Ndapre” ni ayeke zo wa? Lo sigigi lawa? Nyen la amû lege na e ti hinga so lo sigigi awe? “Tongoro Ti Ndapre” ni ayeke Jésus Christ na pekoni so lo ga Gbia ti Royaume ti Nzapa (Apoc. 22:16). Na ngu 1914, Jésus ato nda ti komande tongana Gbia, na ye so ayeke tongo nda ti mbeni fini ngoi. Gbiango tere ti Jésus afa kozoni awe gloire nga na komandema ti lo, na ye so afa so aprophétie ti Nzapa ayeke ga tâ tënë biani. Ti dengi mê na atënë ti yanga ti Nzapa ayeke sara si e gbu nda ti ye nzoni na tongaso e hinga so Tongoro ti Ndapre asigigi awe.
2:4—“Tartare” ayeke nyen? Lawa la a bi lani a-ange so ake yanga na yâ ni? Tartare aye ti sara tënë ti mbeni dutingo so ayeke mo bâ mo tene zo ayeke na da ti kanga; gi acréature ti yingo si a yeke bi ala na yâ ni, me azo pëpe. Acréature ti yingo so ayeke na yâ ni, kota bingo akanga bibe ti ala na ala lingbi pëpe ti hinga aye so Nzapa aleke ti sara so ayeke polele. Nga acréature so ayeke na beku pëpe. Nzapa abi a-ange so ake yanga na yâ ti Tartare na ngoi ti Noé, na ala yeke ngbâ ande na yâ ti dutingo so juska a futi ala.
3:17—Tongana Pierre asara tënë ti ‘hingango ye kozoni,’ lo ye ti tene nyen? Pierre ayeke sara lani tënë ti aye so ayeke si ande, me so yingo ti Nzapa afa kozoni awe na lo na amba ti lo so asû Bible. Teti so akozo Chrétien so ahinga ye kue pëpe na ndo ti ye so ayeke si ande, ala lingbi pëpe ti fa anzene nzene ye kue na ndo ni. Ala hinga gi mbage ti ye so ayeke si ande.
Aye ti manda teti e:
1:2, 5-7. Na ndo ti mungo maboko na e ti “hinga Nzapa na Jésus”, ngangu so e yeke sara na bê kue ti duti na mabe, ti gbu ngangu nga ti mû tere ti e kue na kua ti Nzapa alingbi ti “sara si [e] duti senge pëpe, me [e] lë lengo” alingbi na ye so e hinga.—2 Pi. 1:8.
1:12-15. Ti tene e ngbâ lakue ti “kpengba na lege ti tene-biani”, e yeke lakue na bezoin ti adango bê, na tapande, adango bê so e yeke wara na lege ti abungbi ti kongregation, ti mandango ye ti e wani nga na ti dikongo Bible.
2:2. A lingbi e sara hange si sarango ye ti e abi zongo pëpe na ndo ti Jéhovah nga na bungbi ti lo.—aRom. 2:24.
2:4-9. Tongana e bâ aye so Jéhovah asara ândö, a sara si e hinga biani so lo ‘hinga lege ti zi azo na yâ ye so atara ala, ala so akpe mbeto ti Nzapa, na Lo hinga lege ti bata azo ti kirikiri na gbe ti ngbanga juska na lâ ti fango ngbanga’.
2:10-13. Tongana “agloire”, so ti tene a-ancien asara afaute nga peut-être ala girisa lege na ambeni ngoi, a lingbi e tene asioni tënë pëpe na ndo ti ala.—aHéb. 13:7, 17.
3:2-4, 12. Tongana e dengi mê nzoni na “tënë so aprophète ti nzoni-kue atene giriri, na komandema ti Seigneur na Sauveur”, a yeke mû maboko na e ti hinga so lâ ti Jéhovah aga nduru awe.
3:11-14. Teti so e yeke “ku singo ti lâ ti Nzapa”, a lingbi (1) ‘e ga azo so ayeke nzoni-kue’, so ti tene e duti na sioni pëpe na lege ti mitele, ti bibe, na lege ti asarango ye nga na lege ti yingo; (2) e sara gbâ ti akua so afa so e yeke ‘bata tënë ti Nzapa’, na tapande akua so andu fango tënë ti Royaume nga na sarango si azo aga adisciple; (3) e ngbâ ti duti na anzoni sarango ye nga na ‘sioye pëpe’, so ti tene e sara ye nde na tanga ti azo; (4) e sara ye ti ‘kirikiri pëpe’, so ti tene ye kue so e yeke sara, e yeke sara ni na nzoni bibe; nga (5) e duti ‘na siriri’, wala siriri ayeke na popo ti e na Nzapa, na aita ti e nga na tanga ti azo kue.