“A yeke nzoni ala bâ wala dutingo ti ala ayeke tongana nyen”
“So aye so kue ayeke ga tongana ngu so, a yeke nzoni ala bâ wala dutingo ti ala ayeke tongana nyen na lege ti sarango ye so ayeke nzoni-kue nga na akusala so afa so ala gbu tënë ti Nzapa ngangu.”—2 PI. 3:11.
1. Ngbanga ti nyen use mbeti so Pierre asû na aChrétien ti ngoi ti lo ayeke lani mbeni wango so asi tâ na ngoi ni?
NA NGOI so bazengele Pierre asû lani use mbeti ti lo na congrégation ti aChrétien, a sara ye ti ngangu mingi na aChrétien ni awe, me ye so asara si ala kiri na peko pëpe na yâ ti kusala ti ala nga akanga lege na ala pëpe ti tene wungo ti ala ague na li ni. Tongaso, Zabolo asara kusala na mbeni kode nde, kode so ândö asara kusala nzoni mingi. Tongana ti so Pierre afa ni, Satan atara ti sara si azo ti Nzapa aga sioni na lege ti awafango ye ti wataka so “lê ti ala asi singo na nzara ti gingo wali nde” nga “ala yeke na mbeni bê so a fa lege na ni ti sara bê ti ye.” (2 Pi. 2:1-3, 14; Jude 4). Ni la, use mbeti ti Pierre so ayeke mbeni wango so lo mû na bê ti lo kue ti pusu zo ti ngbâ be-ta-zo na Nzapa.
2. Chapitre ota ti use mbeti ti Pierre aluti mingi na ndo ti nyen? Ahundango tënë wa a lingbi e hunda na tere ti e?
2 Pierre atene: “Na ngoi so mbi ngbâ na yâ ti tabernacle so, mbi bâ so a yeke nzoni ti zingo ala na lege ti atënë ti dango bê so, teti mbi hinga so mbi ga nduru ti zi tabernacle ti mbi ni awe . . . Tongaso mbi yeke sara ngangu kue ti tene na peko ti hongo ti mbi, ala wani awara lege ti dabe ti ala na aye so.” (2 Pi. 1:13-15). Biani, Pierre ahinga so lo ga nduru ti kui awe, me lo ye si azo adabe ti ala na awango so asi tâ na ngoi ni. Awango so ayeke laso na yâ ti Bible na e kue e lingbi ti diko ni. Chapitre ota ti use mbeti ti Pierre ayeke nzoni mingi teti e, teti a luti mingi na ndo ti “alango ti nda ni” ti aye ti ngoi ti laso nga na futingo ti ayayu na sese na lege ti fä (2 Pi. 3:3, 7, 10). Wango wa Pierre aye ti mû na e? Tongana nyen sarango ye alingbi na wango ti lo so ayeke mû maboko na e ti nzere na lê ti Jéhovah?
3, 4. (a) Tënë wa la Pierre atene? Wango wa la lo mû? (b) Aye ota wa e yeke gue ti bâ?
3 Na pekoni so Pierre afa so dunia ti Satan ayeke ga tongana ngu si agirisa, lo tene: “A yeke nzoni ala bâ wala dutingo ti ala ayeke tongana nyen na lege ti sarango ye so ayeke nzoni-kue nga na akusala so afa so ala gbu tënë ti Nzapa ngangu.” (2 Pi. 3:11, 12). Pierre ahinga so gi azo so asara ye so bê ti Jéhovah aye nga ayeke na asarango ye so anzere na lê ti Nzapa si ayeke sö kuâ na “lâ ti futango kula” so ayeke ga (És. 61:2). Ni la, bazengele ni akiri atene: “Tongaso, aita so mbi ndoye ala mingi, so ala hinga ye so kozo awe, ala sara hange si girisango lege ti azo ni [awafango ye ti wataka] so akpe ndia pëpe ague na ala yongoro pëpe si ala tï, atâa so ala wani ala luti fade ngangu.”—2 Pi. 3:17.
4 Teti so Pierre ayeke lani na popo ti azo so “[a]hinga ye so kozo awe,” lo hinga so na alango ti nda ni, a lingbi aChrétien asara hange si ala ngbâ lakue ti duti be-ta-zo. Angu mingi na pekoni, bazengele Jean afa ndani polele. Lo bâ kozoni awe na lege ti suma so a tomba Satan na yayu na lo ga na “kota ngonzo” na tere ti “ala so ayeke bata acommandement ti Nzapa nga so ayeke na kusala ti fango tënë na ndo ti Jésus.” (Apoc. 12:9, 12, 17). Awakua ti Nzapa so a soro ala ti gue na yayu na so ayeke be-ta-zo nga na “ambeni ngasangbaga” so ayeke be-ta-zo ayeke sö ande benda (Jean 10:16). Ka ti e oko oko ayeke tongana nyen? E yeke ngbâ ande be-ta-zo? Tongana e ye ti ngbâ be-ta-zo, ayeke nzoni e sara kue ti (1) duti na asarango ye so Nzapa aye, (2) ti ngbâ lakue ti duti na saleté pëpe na yâ ti sarango ye ti e nga na lege ti yingo na (3) ti duti na nzoni bango ndo na ndo ti atara. Zia e bâ aye so oko na oko.
Gi ti duti na asarango ye so Nzapa aye
5, 6. Asarango ye wa a lingbi e sara kue ti duti na ni? Ngbanga ti nyen sarango ni ahunda ti ‘sara ngangu kue’?
5 Na tongo nda ti use mbeti ti Pierre, lo tene: “Na sarango ngangu kue ti sara ye alingbi na aye so, ala zia sarango ye so ayeke nzoni mingi na ndo ti mabe ti ala; ala zia hingango ye na ndo ti sarango ye so ayeke nzoni mingi; ala zia kangango nzara ti bê na ndo ti hingango ye; ala zia gbungo ngangu na ndo ti kangango nzara ti bê; ala zia gbungo tënë ti Nzapa ngangu na ndo ti gbungo ngangu; ala zia yengo tere ti aita na ndo ti gbungo tënë ti Nzapa ngangu nga ala zia ndoye na ndo ti yengo tere ti aita. Tongana aye so ayeke na ala na ayeke mingi mingi, fade a yeke kanga lege na ala ti duti gi senge senge nga a yeke mû lege na ala ti lë lengo tongana a ndu tënë ti tâ hingango ye na ndo ti Seigneur ti e Jésus Christ.”—2 Pi. 1:5-8.
6 Tâ tënë, a lingbi e ‘sara ngangu kue’ ti sara akusala so ayeke mû maboko na e ti duti na asarango ye so Nzapa aye. Na tapande, a lingbi e sara ngangu ti gue na abungbi kue, ti diko Bible lâ oko oko nga ti bata nzoni kapa ti mandango ye e wani. A lingbi nga e sara ngangu si e bata mbeni nzoni kapa ti Mandango tënë ti Nzapa na sewa so a yeke sara ni lakue, so a nzere nga so aga na ye ti nzoni na azo kue. Me tongana e sara aye so lakue, a yeke duti ngangu mbeni pëpe na e, mbilimbili tongana e wara aye ti nzoni na pekoni.
7, 8. (a) Ambeni zo atene nyen na ndo ti Mandango tënë ti Nzapa na sewa? (b) Aye ti nzoni wa mo wara na lege ti mandango ye ti mo na sewa?
7 Na ndo ti Mandango tënë ti Nzapa na sewa, mbeni ita-wali atene: “Mandango tënë ti Nzapa na sewa amû lege na e ti manda ye na ndo ti gbâ ti aye.” Mbeni ita-wali nde atene: “Ti tâ tënë ni, mbi ye lani pëpe ti tene bungbi ti mandango buku ahunzi. A yeke bungbi so mbi ye lani mingi. Me ti fadeso, so e yeke manda tënë ti Nzapa na sewa, mbi ga ti bâ so Jéhovah ahinga ye so e yeke na bezoin ni nga na ngoi wa e yeke na bezoin ni.” Mbeni babâ ti sewa atene: “Mandango tënë ti Nzapa na sewa amû maboko na e ngangu mingi. Ti manda mbeni ye so alingbi na abezoin ti mbi na wali ti mbi ayeke tâ kota ye mingi! E use kue e bâ so e yeke lë lengo ti yingo mingi ahon ti kozo nga e wara ngia mingi na fango tënë.” Mbeni babâ ti sewa nde atene: “Amolenge ayeke gi nda ti aye ala wani nga ala yeke manda ye mingi na ala yeke na ngia ti sara ni. Mandango tënë ti Nzapa na sewa asara si e hinga na bê ti e kue so Jéhovah ahinga agingo bê ti e na lo yeke kiri tënë na asambela ti e.” Mo nga kue, mo yeke na a-oko bibe so na ndo ti pendere ye so Nzapa amû na e so?
8 Zia si mbeni kete ye abuba yâ ti kapa ti mandango ye na sewa pëpe! Mbeni koli na wali ti lo atene: “Na yâ ti ayenga osio so ahon, na mardi oko oko na bi, mbeni ye ayeke si na yâ ti sewa ti e so aye ti kanga lege na e ti manda ye, me e zia pëpe si akanga lege na ni.” Biani, na ambeni ngoi peut-être a lingbi mo changé yâ ti kapa ti mo. Me, sara kue ti manke mandango ye ti mo na sewa pëpe, même teti yenga oko pëpe!
9. Jéhovah akpengba Jérémie tongana nyen? Nyen la e lingbi ti manda na lege ti tapande ti lo?
9 Prophète Jérémie ayeke mbeni nzoni tapande ndali ti e. Lo yeke lani na bezoin ti kobe ti yingo na Jéhovah amû ni na lo. Lo kiri lani singila mingi ndali ni. Kobe ti yingo so la amû lege na lo ti ngbâ ti fa tënë na azo so ayeke lani nduru pëpe ti mä lo. Lo tene: ‘Tënë ti L’Éternel aga tongana wâ so agbi ye na yâ ti bio ti mbi.’ (Jér. 20:8, 9). A mû nga maboko na lo ti gbu ngangu na ngoi ti ngangu so ague ngbii si ahunzi na futingo ti Jérusalem. Laso, e yeke na Bible so a hunzi ti sû ni awe. Tongana e manda ni nzoni na e sara si abibe ti e ague oko na ti Nzapa, legeoko tongana ti Jérémie, e yeke ngbâ ti fa tënë na ngia atâa na yâ ti aye ti ngangu. E yeke ngbâ nga be-ta-zo na yâ ti atara nga e yeke duti na saleté pëpe na yâ ti sarango ye ti e nga na lege ti yingo.—Jacq. 5:10.
Ala duti na ‘saleté na tere ti ala pëpe nga na sioni ye na tere ti ala pëpe’
10, 11. A lingbi e sara ngangu kue ti ngbâ lakue ti duti na ‘saleté na tere ti e pëpe nga ti duti na sioni ye na tere ti e pëpe’, ngbanga ti nyen? Ye so ahunda nga ti sara nyen?
10 E aChrétien, e hinga so e yeke na alango ti nda ni. Ni la, bê ti e adö pëpe so azo ti dunia so aye mingi ti sara aye so Jéhovah ake ni, aye tongana bê ti warango ye, lango-sioni nga na sarango ye ti ngangu na zo. Ti lingbi na Apocalypse 2:13, 14, e lingbi ti fa akode ti Satan na lege so: ‘Tongana a lingbi pëpe ti bi mbeto na yâ ti awakua ti Nzapa, a lingbi ti pusu ala ti sara ye ti sioni.’ Tongaso, a lingbi e bâ na nene ni wango so Pierre amû na ndoye: “Ala sara ngangu kue ti tene na nda ni lo [Nzapa lo] wara ala na saleté na tere ti ala pëpe, na sioni ye na tere ti ala pëpe nga na yâ ti siriri.”—2 Pi. 3:14.
11 Ge, Pierre akiri na ndo ti wango so lo mû kozoni awe tongana lo tene “ala sara ngangu kue”. Biani, Jéhovah, lo so apusu Pierre ti sû atene so, ahinga so a lingbi e sara ngangu si e ngbâ lakue ti duti na ‘saleté na tere ti e pëpe nga si e duti na sioni ye na tere ti e pëpe’ si asioni ye ti dunia ti Satan so alï e pëpe. Ti sara ngangu andu nga ti bata bê ti e si asioni nzara alï dä pëpe. (Diko aProverbe 4:23; Jacques 1:14, 15.) A hunda nga ti dö sese na azo so ahinga lï ti ala pëpe na asarango ye ti e na so ‘angbâ gi ti tene asioni tënë ti e.’—1 Pi. 4:4.
12. Na Luc 11:13, e yeke wara tënë ti dengo bê wa?
12 Teti so e lingbi kue pëpe, a yeke kete ye pëpe ti sara ye so ayeke mbilimbili (aRom. 7:21-25). E lingbi ti sara ni gi tongana e turnê na mbage ti Jéhovah, Lo so na nzoni bê ayeke mû yingo vulu na azo so ahunda ni na lo na bê ti ala kue (Luc 11:13). Na pekoni, yingo vulu ni ayeke pusu e ti duti na asarango ye so Nzapa aye nga asarango ye so ayeke mû maboko na e ti luti na gbele ti atara so e yeke tingbi na ni lâ oko oko. Asarango ye so ayeke mû nga maboko na e ti gbu ngangu na yâ ti akpale so alingbi ti ga ngangu na ngoi so lâ ti Jéhovah ayeke pusu nduru nduru.
Zia atara asara si mo kpengba
13. Tongana e tingbi na atara, ye wa ayeke mû maboko na e?
13 So e ngbâ na yâ ti ngbene dunia so, e yeke tingbi lakue na atara nde nde. Me ahon ti tene mo zia si atara ni asara si mo duti na vundu, gi ti bâ ni tongana mbeni lege so azi na mo ti fa so mo ndoye Nzapa, nga ti sara si mabe ti mo na lo nga na yâ ti tënë ti lo akiri akpengba. Disciple Jacques atene: “Aita ti mbi, tongana ala tingbi na mara ti atara nde nde, zia ala bâ ni tongana tâ ye so amû ngia na ala, na hingango so mabe ti ala so a tara ni awe amû lege na ala ti duti na gbungo ngangu.” (Jacq. 1:2-4). Dabe ti mo nga so “Jéhovah ahinga tongana nyen ti zi na yâ ti tara azo so agbu tënë ti lo ngangu”.—2 Pi. 2:9.
14. Na lege wa tapande ti Joseph amû ngangu na mo?
14 Bâ tapande ti Joseph, molenge ti Jacob, so aita ti lo wani akä lo na ngbâa (Gen. 37:23-28; 42:21). Mabe ti Joseph awoko ndali ti ye ti sioni so asi na lo so? Lo sara ngonzo na tere ti Nzapa so azia lege si ye ti sioni so asi na lo? Mbeti ti Nzapa afa tongaso pëpe! Na ndo ni, a yeke tanga ti tara ti Joseph la pëpe. Angoi kete na pekoni, a bi tënë na li ti lo a tene so lo la lo ye ti bungbi na mbeni wali na ngangu nga a bi lo na da ti kanga. Atâa so kue, lo ngbâ lakue ti voro Nzapa (Gen. 39:9-21). Lo zia si atara so akpengba lo na lo wara ye ti nzoni mingi ndali ni.
15. Nyen lâ e lingbi ti manda na lege ti tapande ti Naomi?
15 Tâ tënë, atara alingbi ti mû vundu na e wala même ti sara si e tï na yâ ti kota vundu. Peut-être na ambeni ngoi vundu agbu Joseph. Ye so asi nga na ambeni wakua be-ta-zo ti Nzapa. Bâ tapande ti Naomi, so koli ti lo na amolenge ti lo ti koli use akui. Lo tene: “I iri mbi Naomi pëpe, i iri mbi Vundu; teti Lo Ti Ngangu Ahon Kue asara si mbi wara vundu mingi.” (Ruth 1:20, 21). Ye la ahon ndo ti lo si lo sara tënë tongaso so, a yeke faute ti lo pëpe. Ye oko, tongana ti Joseph, mabe ti lo awoko pëpe nga lo ngbâ lakue ti mä yanga ti Nzapa. Na pekoni, Jéhovah airi tënë nzoni na ndo ti Naomi teti so lo yeke be-ta-zo (Ruth 4:13-17, 22). Na ndo ni, na yâ ti Paradis so ayeke ga, Jéhovah ayeke zi akpale kue so Satan na sioni dunia ti lo aga na ni. “Fade azo adabe ala na kozo ye pëpe, na ala bi bê ti ala dä mbeni pëpe.”—És. 65:17.
16. A yeke nzoni e bâ sambela tongana nyen? Ngbanga ti nyen?
16 Atâa atara wa asi na e, ti hinga so Nzapa andoye e lakue ayeke mû maboko na e ti gbu ngangu. (Diko aRomain 8:35-39.) Atâa so Satan ayeke gi lakue ti sara si e nze, tongana e ngbâ ti “bata bibe” ti e nga e ‘zia lê ti e akpengba ti sambela’, lo yeke sara gbä (1 Pi. 4:7). Jésus atene: “Zia lê ti ala angbâ na zingo ni, ala voro tere ti ala na Nzapa lakue tongaso si ala wara lege ti sigigi na yâ ti aye kue so a fa ni kozo awe ti tene a si, na ti tene ala luti na gbele Molenge ti zo.” (Luc 21:36). Bâ so Jésus asara kusala na tënë ‘voro tere na Nzapa’ so aye ti sara tënë ti mbeni sambela so alondo tâ na gbe ti bê ti zo. Na mungo wango na e ti voro tere ti e na Nzapa, Jésus aye ti fa biani so a yeke ngoi ti tene e bâ na nene ni dutingo ti e na gbele lo nga na Babâ ti lo. Gi azo so sarango ye ti ala ayeke nzoni na lê ti Nzapa si ayeke wara ande lege ti sö kuâ na lâ ti Jéhovah.
Ngbâ lakue ti sara kusala ti Jéhovah
17. Tongana ndo so mo yeke fa tënë dä ayeke ngangu, tongana nyen mo lingbi ti bâ nzoni na lege ti nzoni tapande ti aprophète ti ândö?
17 Pierre atene: “A yeke nzoni ala bâ wala dutingo ti ala ayeke tongana nyen na lege ti sarango ye so ayeke nzoni-kue nga na akusala so afa so ala gbu tënë ti Nzapa ngangu.” A yeke nzoni atënë so adabe ti e na ndo ti nene ti tene e mû tere ti e ti sara akusala ti Nzapa so ayeke dë bê ti zo wala “akusala so afa so [e] gbu tënë ti Nzapa ngangu.” (2 Pi. 3:11). Na popo ti akusala so, so ayeke kota ahon atanga ni kue ayeke fango nzoni tënë (Mat. 24:14). Tâ tënë, na ambeni ndo fango tënë alingbi ti duti ngangu, peut-être ngbanga ti so azo ayeke sara nzara ti tënë ni pëpe wala ndali ti kangango lege wala ndali ti so azo amû tere ti ala mingi na yâ ti akusala ti ala ti lâ na lâ. Awakua ti Jéhovah ti giriri atingbi nga na a-oko kpale so. Ye oko, ala zia lege ni pëpe, me “lege mingi” ala ngbâ ti fa tokua ti Nzapa. (Diko 2 Chronique 36:15, 16; Jér. 7:24-26.) Nyen la amû maboko lani na ala ti gbu ngangu? Ala yeke na bango ndo ti Nzapa na ndo ti kusala ti ala, me pëpe bango ndo ti dunia so. Nga na lê ti ala, a yeke mbeni ye ti gonda mingi ti tene a di iri ti Nzapa na ndo ti ala.—Jér. 15:16.
18. Na lege wa fango tënë ti Royaume ayeke sara si azo agonda iri ti Nzapa ande?
18 E nga kue, e yeke na pasa ti fa na azo iri ti Jéhovah nga na ye so lo leke ti sara. Gbu li na ndo ti ye so: Fango tënë ti e ayeke sara si awato ti Nzapa alingbi ande pëpe ti tene na lâ ti ngonzo ti lo so ayeke tï na ndo ti ala so a fa ye na ala lâ oko pëpe na ndo ti lo nga na ye so lo leke ti sara. Biani, tongana ti Pharaon ti giriri, ala yeke hinga ande so a yeke Jéhovah la ayeke sara bira na ala so (Ex. 8:1, 20; 14:25). Na oko ngoi ni, Jéhovah ayeke yä iri ti awakua be-ta-zo ti lo na fango polele so ala yeke lani azo so asara kusala na iri ti lo.—Diko Ézéchiel 2:5; 33:33.
19. So Jéhovah ayeke kanga bê ti ku, tongana nyen e lingbi ti fa so e yeke sara kusala nzoni na ngoi ni so?
19 Na ngoi so Pierre ayeke nduru ti hunzi use mbeti ti lo, lo tene na amba ti lo aChrétien, lo tene: “Ala bâ kangango bê ti Seigneur ti e tongana salut.” (2 Pi. 3:15). Biani, na ngoi so Jéhovah ayeke kanga bê ti lo ti ku, zia e ngbâ lakue ti sara kusala nzoni na ngoi ni so. Tongana nyen? Na sarango kue ti duti na asarango ye so Nzapa aye nga na dutingo ‘na saleté na tere ti e pëpe, na sioni ye na tere ti e pëpe’. E yeke sara nga ni na dutingo na nzoni bango ndo na ndo ti atara nga na dutingo na aye mingi ti sara na yâ ti kusala ti Royaume. Na sarango tongaso, e yeke leke tere ti e ti wara aye ti nzoni so ayeke hunzi pëpe so “afini yayu na fini sese” ayeke ga na ni.—2 Pi. 3:13.
Mo dabe ti mo na ni?
• E lingbi ti sara tongana nyen ti gi ti duti na asarango ye so Nzapa aye?
• E lingbi ti sara nyen ti ngbâ lakue ti duti na ‘saleté na tere ti e pëpe nga na sioni na tere ti e pëpe’?
• Tapande ti Joseph na Naomi afa nyen na e?
• Ngbanga ti nyen kusala ti fango tënë ayeke mbeni kota pasa so e wara?
[Foto na lembeti 17]
Nyen la ayeke mû maboko na ala ababâ ti sewa ti gi ti duti na asarango ye so Nzapa aye nga na yâ ti sewa ti ala?
[Afoto na lembeti 19]
Lege so Joseph asara ye na gbele atara afa nyen na e?