Mandango tënë ti Nzapa na sewa ayeke sö fini!

BÂ TONGANA NYEN so “bira ti kota lango ti Nzapa, Lo ti ngangu ahon kue” ayeke mû mbeto ande mingi na zo! (Apoc. 16:14). Na lege ti tënë ti fä so apika bê, prophète Michée atene: “Fade ahoto awoko . . . , na popo-hoto a suru, ala ga tongana cire so awoko na tere ti wâ na tongana ngu so alondo na ndo ti hoto asua.” (Mi. 1:4). Aye ti ngangu wa ayeke si ande na azo so asara na Jéhovah pëpe? Bible atene: “Na lâ ni kâ, fade kuâ ti azo so L’Éternel afâ ala ayeke na mbage oko ti sese juska na mbeni mbage ni.”​—Jér. 25:33.

Na bango agbotongo mê so, a yeke nzoni amokonzi ti sewa (so mingi ni abata amolenge ti ala gi ala oko) ahunda tere ti ala na ndo ti amolenge ti ala so aga kota awe: ‘Fade ala yeke sö kuâ ande na Harmaguédon la?’ Bible adë bê ti ala so, tongana ala yeke na nzoni songo na Jéhovah, fade ala yeke sö kuâ.​—Mat. 24:21.

Nene ti warango ngoi ti manda tënë ti Nzapa na sewa

Mo so mo yeke babâ wala mama, gi ti bâ wala mo sara ye kue so mo lingbi ti sara ti bata amolenge ti mo “na lege ti sengo ndo nga na awango ti gbotongo mê so alondo na Jéhovah.” (aÉph. 6:4). Mandango Bible na amolenge ti mo ayeke kota ye mingi. E ye si amolenge ti e aga tongana aChrétien ti Philippe, so Paul agonda ala teti so a gbu ala gbungo na ngangu pëpe ti mä yanga ti Jéhovah. Lo tene: “Aita so mbi ndoye ala mingi, so ala yeke mä yanga lakue, gi pëpe tongana mbi yeke na tere ti ala, me nga fadeso ala yeke nduru mingi ahon ti kozo ti mä yanga tongana mbi yeke dä pëpe, ala ngbâ ti sara kua ndali ti salut ti ala wani juska a ga nzoni; ala sara ni tongana azo so ayeke na mbeto nga so tere ti ala adö.”​—aPhil. 2:12.

Amolenge ti mo ayeke sara ye alingbi na andia ti Jéhovah na ngoi so ala yeke gi ala oko? Ka tongana ala yeke na ekole? Tongana nyen mo lingbi ti mû maboko na amolenge ti mo ti yeda so ndara so ayeke na yâ ti ndia ti Jéhovah alingbi ti fa lege na ala même tongana mo yeke dä pëpe?

Mandango tënë ti Nzapa na sewa alingbi ti mû maboko mingi na amolenge ti mo ti kpengba mabe ti ala na ndo ti tënë so. Tongaso, zia e bâ akota ye ota so alingbi ti sara si mandango Bible na sewa ti mo amaï nzoni.

Sara ni lakue

Bible afa so amolenge ti Nzapa so ayeke a-ange ayeke ga na gbele ti Nzapa na ngoi so a fa (Job 1:6). Sara nga tongaso na amolenge ti mo. Fa mbeni lango na mbeni ngbonga teti Mandango tënë ti Nzapa na lakui na sewa ti mo na mo manke ni pëpe. Na ndo ni, zia mbeni lango nde na tere ni, si tongana ye akanga lege na ala, ala lingbi ti sara ni na place ni.

Tongana anze ayeke hon, manda ye ni gi ngoi na ngoi pëpe. Girisa pëpe so amolenge ti mo ayeke akozo zo so a lingbi mo manda Bible na ala. Satan aye si ala ga kobe ti tengo ti lo (1 Pi. 5:8). Tongana mo mû lakui ti Mandango tënë ti Nzapa so ti bâ na limon wala ti sara na ambeni ye nde, fade Satan ayeke hon mo na ngangu.​—aÉph. 5:15, 16; 6:12; aPhil. 1:10.

Sara si a lingbi na bezoin ti sewa ni

A lingbi Mandango tënë ti Nzapa na sewa na lakui aduti tongana senge mandango mbeti pëpe. Mo lingbi ti sara tongana nyen si mandango ye ni andu bezoin ti sewa ni? Na ambeni ngoi, soro atënë so ague oko na ye so ayeke si na molenge ti mo na yâ ti alango wala na yâ ti ayenga so ayeke ga. Na tapande, mo lingbi ti yôro na yâ ti mandango ye ni tarango tere na ndo ti mbeni kode ti fango tënë. Amolenge aye mingi ti sara ye so ala hinga ni nzoni. Ti tara tere na ndo ti atënë ni nga ti pensé na lege so ala lingbi ti hon ndo ti atënë ti kangango lege na lisoro, fade a yeke mû maboko na ala ti sara mbeto pëpe na ngoi so ala yeke bi tere ti ala na alege nde nde ti kusala ti fango tënë ti Royaume.​—2 Tim. 2:15.

Mo lingbi ti mû maboko na amolenge ti mo na tarango tere legeoko na ala na ndo ti ngangu so akamarade ti ala alingbi ti sara na ndo ti ala. Chapitre 15 ti buku Les jeunes s’interrogent ​— Réponses pratiques, mbage 2 alingbi ti duti tongana gere ti mbeni lisoro na sewa. Mbage so atene “Contre la pression du groupe” so ayeke na lembeti 132 na 133 amû ambeni tënë na amû lege nga na molenge ti mo ti sara tënë ti bê lo. Mbeni tënë so ayeke na gbe ti lembeti 133 awa amaseka ti tara tere ti ala na ndo ti tënë ni na babâ ti ala, mama ti ala wala mbeni kamarade so ayeke biazo. Ngoi na ngoi, ngbanga ti nyen ti sara si atarango tere tongaso aga mbage ti Mandango tënë ti Nzapa na lakui na sewa ti mo pëpe?

Mandango tënë ti Nzapa na sewa ayeke mbeni nzoni ngoi so ababâ na amama alingbi ti mû ti gboto lê ti amolenge ti ala na ndo ti nzoni ti ziango aye ti yingo na gbele ala. Na ndo ti tënë so, buku Les jeunes s’interrogent, mbage 2 ayeke na apendere sango na yâ ti chapitre 38, so li ti tënë ni ayeke “Que vais-je faire de ma vie?” Tongana ala yeke sara lisoro na ndo ti chapitre so, mû maboko na molenge ti mo ti bâ so a yeke na lege ti ndara ti mû fini ti lo ti sara na Jéhovah. Lu na yâ ti bê ti molenge ti mo nzara ti ga pionnier, ti sara kua na Béthel, ti gue na Ekole ti Formation Ministérielle wala ti sara ambeni kusala nde ti ngoi kue.

A yeke nzoni e girisa pëpe so ambeni babâ na mama so aye nzoni ti molenge ti ala ayeke luti mingi na ndo ti ye so ala ye molenge ni asara, na ala girisa ti gonda lo teti anzoni ye so lo yeke sara fadeso. Biani, a yeke sioni pëpe ti wa amolenge ti mo ti sara anzoni kua tongana kusala ti Béthel na ti missionnaire. Ye oko, na sarango tongaso, sara hange ti son bê ti molenge ti mo na ye so mo yeke ku na mbage ti lo, so a lingbi ti sara si bê ti lo awoko (aCol. 3:21). Dabe ti mo lakue so a lingbi molenge ti mo aye Jéhovah na bê ti lo wani, me pëpe mo la mo pusu lo ti sara ni (Mat. 22:37). Tongaso, gi alege kue ti gonda molenge ti mo teti ye ti nzoni so lo yeke sara ahon ti luti gi na ndo ti ye so lo sara pëpe. Fa na lo nene ti aye kue so Jéhovah asara awe. Na pekoni zia molenge ti mo afa singila ti bê ti lo teti nzobe ti Jéhovah.

Sara si mandango ye ni anzere

Ota ye so ayeke kota na yâ ti maïngo ti Mandango tënë ti Nzapa na sewa na lakui ayeke ti sara si mandango ye ni anzere na azo kue. Mo lingbi ti sara ni tongana nyen? Peut-être ngoi na ngoi ala lingbi ti mä mbeni drame wala ti bâ mbeni limon so aTémoin ti Jéhovah asigigi na ni na ala sara lisoro na ndo ni. Ala lingbi ti diko mbeni mbage ti Bible so mo kangbi yâ ni na zo oko oko ti sewa ni.

A-article ayeke mingi na yâ ti ambeti ti e, Tour ti Ba Ndo na Réveillez-vous!, so alingbi ti mû lege na asewa ti sara lisoro. Na tapande, mo lingbi ti sara kua na tënë so ayeke na lembeti 31 ti Réveillez-vous! so li ti tënë ni ayeke “Que répondriez-vous?” Na yâ ti ambeni Tour ti Ba Ndo, e yeke na mbeni tënë so atene “Pour nos jeunes lecteurs.” Article so ayeke changé tere na article so a sara ni teti amolenge so li ti tënë ni ayeke “Fa ye na amolenge ti mo.”

Tongaso, sara hange si ngoi ti mandango ye na sewa aga pëpe ngoi ti hundango gbâ ti tënë. Na tapande, a hunda ti tene ababâ na amama awa amolenge ti ala ti duti na mbeni cahier so ala yeke sû na yâ ni atënë ti bê ti ala na ndo ti atënë so ala sara lisoro na ndo ni na sewa, na ti fa tongana nyen ala lingbi ti sara ye alingbi na ni. Ye oko, tara ti gbu na ngangu pëpe molenge ti mo ti diko na kota go ye so lo sû. Tongaso pëpe lo lingbi ti sara kamene na lo yeke fa tënë ti bê ti lo pëpe. Hunda na ala ti fa ni na mo pëpe.

Tongana mo ngbâ ti manda tënë ti Nzapa na sewa ti mo lakue, mo sara si mandango ye ni alingbi na bezoin ti ala na anzere na ala, fade Jéhovah ayeke iri tënë nzoni mingi na ndo ti angangu so mo sara. Ngoi ti mandango ye na sewa so mo zia nde ayeke mû lege na mo ti bata si sewa ti mo angbâ ngangu nga na fini na lege ti yingo.

[Kete tënë na lembeti 31]

Gi ti sigigi na afini ye

“Na ngoi so e yeke manda ye na amolenge ti e ti wali, mbi na koli ti mbi e sara lisoro na ndo ti mbeti so e yeke gue ti manda na bungbi, na pekoni e hunda na amolenge ni ti sara dessin so afa na nduru tënë peko ti ye so e manda. Ngoi na ngoi, e yeke haka peko ti ambaï so Bible asara tënë ni wala e tara tere ti e na ndo ti ambeni kode ti fango tënë. E sara kue si mandango ye ni alingbi na ngu ti ala, agbu bê ti ala, akpengba ala na amû ngia na ala.”​—J.M., na sese ti Amerika.

“Ti mû maboko na molenge-koli ti wali so mbi yeke manda Bible na lo ti hinga tongana nyen azo ayeke sara kusala na mbeti so a rulê ni rulengo na ngoi so a sû na Bible, e pete na lê ti kugbe-mbeti buku ti Ésaïe na peko ti so e zi achapitre ni na aversê ni kue. E tingbi alembeti ni na e kanga ni na tere ti mbeni tuyau. Na pekoni molenge ni atara ti sara mara ye so Jésus asara lani na yâ ti synagogue na Nazareth. Tënë so ayeke na Luc 4:16-21 afa so Jésus ‘[a]zi yâ ti mbeti [so a rulê ni rulengo ti Ésaie] na lo wara’ mbage so lo yeke gi (És. 61:1, 2). Ye oko, na ngoi so molenge ni ayeke tara ti sara mara ye so Jésus asara, lo bâ so a yeke ngangu mingi na lo ti wara ndo so Ésaïe 61 ayeke dä na yâ ti yongoro mbeti so a rulê ni rulengo so chapitre na versê ayeke dä pëpe. Bê ti lo apika na kode so Jésus ayeke na ni ti sara kusala na mbeti so a rulê ni rulengo, na lo tene: ‘Jésus ahinga ye mingi!’ ”​—Y.T., na Japon.

[Foto na lembeti 30]

Tarango tere na amolenge ti mo alingbi ti mû maboko na ala ti hon ndo ti ngangu so akamarade ayeke sara na ndo ti ala

[Foto na lembeti 31]

Sara ngangu ti tene Mandango tënë ti Nzapa na sewa na lakui anzere