Zia si tënë ti tâ vorongo agbu bê ti mo ngangu
“Akobe ti fango ni ayeke mingi, me azo ti kua ni ayeke mingi pëpe.”—MAT. 9:37.
1. Zo so ayeke na mbeni ye ti sarango ni si l’heure ahon lo awe, lo yeke sara ye tongana nyen?
TONGANA mo yeke gue ti bâ mbeni zo ngbanga ti mbeni kpengba tënë na l’heure ahon mo awe, mo yeke sara ye tongana nyen? Mo yeke tambela hio hio. Tâ tënë, tongana mo yeke na mbeni kua so a lingbi mo sara ni si l’heure ahon awe, mo yeke sara ye gi na loro loro. Bê ti mo ayeke pika na mo yeke sara ye hio hio.
2. Kusala wa la a lingbi atâ Chrétien asara ni laso hio ahon atanga ni kue?
2 Ti atâ Chrétien laso, kusala ti fango nzoni tënë ti Royaume na ti sarango si azo na popo ti amara kue aga adisciple la ayeke kusala so a hunda ti sara ni hio ahon tanga ti akusala kue (Mat. 24:14; 28:19, 20). Disciple Marc afa peko ti yanga ti Jésus so atene a lingbi a sara kusala ni so “kozoni si”, so ti tene kozoni si nda ni aga (Marc 13:10). A yeke tongaso la a lingbi a sara kusala ni. Jésus atene: “Akobe ti fango ni ayeke mingi, me azo ti kua ni ayeke mingi pëpe.” Akobe ti fango ni ayeke ku ti ala ka pëpe; a lingbi a fâ ni kozoni si ngoi ti fango ni ahunzi.—Mat. 9:37.
3. Teti so a lingbi a fa tënë hio, nyen la mingi ti aita asara nyen?
3 Teti so kusala ti fango tënë ayeke kota ye mingi na lê ti e, a hunda ti tene e sara kue ti sara ye mingi ndali ni. Ye so ahunda ngoi ti e, ngangu ti e nga ti tene e bi bê ti e na ni. Ye ti nzoni ni ayeke so aita mingi ayeke sara ni. Ambeni agi ti duti na aye mingi na yâ ti fini ti ala pëpe ti mû lege na ala ti sara kusala ti ngoi kue. Ala ga apionnier, amissionnaire wala ala sara kusala na Béthel. Ala yeke na aye mingi ti sara. Ala dö aye mingi ala zia nga ala yeke tingbi na akpale mingi. Me, Jéhovah ayeke iri tënë nzoni mingi na ndo ti ala. Ye so ala sara amû ngia na e mingi. (Diko Luc 18:28-30.) Ambeni so alingbi pëpe ti mû kusala ti ngoi kue, ala yeke mû ngoi mingi ti sara kusala so ayeke sö fini, so ahunda nga ti mû maboko na amolenge ti e ti sö fini.—Deut. 6:6, 7.
4. Ngbanga ti nyen ambeni zo alingbi ti duti mbeni pëpe na bibe ti sarango ye hio?
4 Tongana ti so e bâ, zo ayeke sara ka ye hio tongana lo bâ so ngbonga so a zia na lo ti sara na ye ni angbâ mingi pëpe wala aga nduru ti hunzi. Aye mingi na yâ ti Bible nga aye mingi so asi na yâ ti mbaï afa polele so e yeke na alango ti nda ni (Mat. 24:3, 33; 2 Tim. 3:1-5). Me zo oko ahinga mbilimbili pëpe lawa la nda ni ayeke si. Na ngoi so Jésus ayeke fa lani anzene nzene ye na ndo ti “fä” so ayeke mû lege ti hinga “ngoi so aye ti ngoi so ayeke gue ti hunzi”, lo tene tënë so: “Na ndo ti tënë ti lango ni so nga na ngbonga ni so, zo oko ahinga ni pëpe, atâa a-ange so ayeke na yayu, wala Molenge ni ahinga ni pëpe, me gi Babâ ni.” (Mat. 24:36). Ye so asara si ambeni zo alingbi ti bâ so a yeke ngangu ti tene ngu na ngu ala ngbâ ti duti na bibe ti sarango ye hio, mbilimbili tongana a sara angu mingi awe si ala yeke sara ye hio (aProv. 13:12). Mo nga kue na ambeni ngoi ye tongaso asi na mo? Nyen la alingbi ti mû maboko na e ti ngbâ ti duti na bibe ti sarango ye hio na yâ ti kusala so Jéhovah na Jésus Christ aye ti tene e sara ni laso?
Gbu li nzoni na ndo ti Jésus, tapande ti e
5. Na alege wa Jésus afa so lo yeke na bibe ti sarango ye hio na yâ ti kusala ti Nzapa?
5 Na popo ti azo kue so ayeke na bibe ti sarango ye hio na yâ ti kusala ti Nzapa, tapande ti Jésus Christ la ayeke nzoni ahon ti atanga ni kue. Mbeni raison so ndali ni lo sara ye hio ayeke so lo yeke lani na aye mingi ti sara gi na yâ ti ngu ota na ndambo. Jésus asara ye mingi ndali ti tâ vorongo ahon tanga ti azo kue. Lo sara si azo ahinga iri ti Babâ ti lo nga na ye so Babâ ti lo aleke ti sara, lo fa nzoni tënë ti Royaume. Lo fa so akota zo ti bungbi ti vorongo ayeke sara ye gi ti handa na lê ti azo nga ala yeke fa atënë ti wataka. Nga lo mû mbage ti komande ti Jéhovah même juska na kuâ. Na ando kue so lo gue dä, lo mû tere ti lo kue ti fa ye na azo, ti mû maboko na ala nga ti zi kobela na tere ti ala (Mat. 9:35). Lâ oko mbeni zo ade ti sara ye mingi tongana ti so Jésus asara gi na yâ ti kete ngoi so pëpe. Jésus asara lani kua ngangu.—Jean 18:37.
6. Nyen la agbu lani bê ti Jésus mingi nyen?
6 Nyen la apusu lani Jésus ti sara kusala ti lo ti fango tënë na ngangu ti lo kue? Na lege ti prophétie ti Daniel, Jésus ahinga ngoi so lo yeke na ni ti sara na kusala ti lo ti lingbi na kapa ti Jéhovah. Tongana ti so prophétie ni afa, kusala ti lo ayeke hunzi “na ndambo ti yenga” wala na peko ti ngu ota na ndambo (Dan. 9:27, FD). Kete na pekoni so lo lï tongana Gbia na Jérusalem na popo ti mars na mai ti ngu 33, Jésus atene: “Ngbonga ni asi awe ti tene Molenge ti zo awara gloire.” (Jean 12:23). Atâa so Jésus ahinga lani so lo ga nduru awe ti kui, a yeke pëpe ni la si apusu lo ti sara kusala ngangu. Me ye so agbu bê ti lo ayeke ti gbu alege kue ti sara ye so bê ti Babâ ti lo aye nga ti ndoye amba ti lo azo. Ndoye so apusu lo ti bungbi adisciple, ti fa ye na ala nga ti tokua ala ti gue ti fa tënë. Lo sara tongaso ndali ti so ala la yeke ngbâ ti sara kusala so lo to nda ni so nga ala yeke sara ande ni même mingi ahon ti so lo sara.—Diko Jean 14:12.
7, 8. Tongana Jésus azi aye ti sioni na yâ ti temple, ye so asara nyen na ndo ti adisciple ti lo? Ngbanga ti nyen Jésus asara ye tongaso?
7 Mbeni ye so Jésus asara lani na Pâque ti ngu 30 na tongo nda ti kusala ti lo afa polele so lo yapu ti sara ye. Jésus na adisciple ti lo aga na Jérusalem na ala bâ na yâ ti temple “azo so ayeke kä abagara, angasangbaga, akolokoto nga na azo ti changengo nginza so ayeke duti na ndo ti angende ti ala.” Nyen la Jésus asara, nga ye so lo sara asara nyen na ndo ti adisciple ti lo?—Diko Jean 2:13-17.
8 Ye so Jésus asara nga tënë so lo tene na lango ni so adabe ti adisciple ti lo na mbeni tënë ti prophétie so David asû na yâ ti mbeni Psaume. Prophétie ni atene: “Nzara ti da ti Mo ate mbi awe.” (Ps. 69:10). Ngbanga ti nyen atënë ti Psaume so aga na li ti ala? Ngbanga ti so ti sara mara ti ye tongaso ayeke ziango fini ti lo na lê ti kuâ la. Azo so ayeke bâ ndo na ndo ti temple ni, so ti tene aprêtre, ascribe nga na ambeni, ala kue ayeke na peko ti sioni kusala ti dengo buze so a yeke sara na yâ ti temple ni. So Jésus asigigi na nda ti akota zo ti bungbi ti vorongo so, lo ga wato ti ala. Tongana adisciple ti Jésus abâ ye so lo sara, ala hinga so ‘tënë ti da ti Nzapa agbu bê ti lo ngangu’ so ti tene tënë ti tâ vorongo agbu bê ti lo mingi. Ti sara ye na nzara ni aye ti tene nyen? A yeke nde na sarango ye hio?
Kangbi so ayeke na popo ti sarango ye hio na sarango ye na nzara ni
9. Zo so asara kusala na nzara ni ayeke sara ni tongana nyen?
9 Tongana mbeni zo asara ngangu ti sara mbeni kusala, e yeke tene so lo sara kusala ni na bê ti lo kue nga na ngia. Jésus asara lani kusala ti lo nga tongaso. A yeke na lege ni so adisciple ti lo adabe ti ala na tënë ti David na ngoi so ala bâ ye so lo sara na yâ ti temple. Me nyen la apusu lani Jésus ti sara ye na nzara ni tongaso?
10. Mbupa so a kiri pekoni na “nzara” na yâ ti Bible, a ye ti tene nyen?
10 Mbupa so a kiri pekoni na “nzara” na yâ ti Psaume ti David ayeke mbeni mbupa ti Hébreu so mingi ni a kiri pekoni na “mbanda” na yâ ti ambeni versê. Na yâ ti ambeni versê ti Bible ti Fini Dunia a kiri pekoni na mbeni tënë so aye ti sara tënë ti mungo tere kue gi na mbeni zo oko. Mbeni bakari ti Bible atene: “Mingi ni a sara kusala na ni ti sara tënë ti songo ti mariage . . . Legeoko tongana ti so mbeni zo so asara mariage awe aye si koli ti lo wala wali ti lo amû tere ti lo kue gi na lo oko, Nzapa ayeke na droit ti tene azo ti lo amû tere ti ala kue gi na lo oko na lo ye si ala sara ni.” (Marc 12:28-30; Luc 4:8). Mbeni zo alingbi ti ye mingi mbeni ngia ti awanguru na lo sara nzara ni ngangu, me mbupa “nzara” na yâ ti Bible andu aye mingi ahon so. Nzara so David ayeke na ni lani ayeke mbeni mbanda so apusu lo ti zia pëpe si mbeni ye amû place ti Jéhovah wala ti ga na zonga na ndo ti iri ti Jéhovah. A yeke mara ti nzara so la ayeke pusu mbeni zo ti kanga lege si a buba pëpe iri ti mbeni zo nga ayeke pusu lo ti zi zonga so a bi na ndo ti iri ti zo ni so.
11. Nyen la apusu lani Jésus ti sara ye na nzara ni?
11 A yeke na lege ni so adisciple ti Jésus atingbi atënë ti David na ye so ala bâ Jésus na sarango ni na yâ ti temple. A yeke pëpe ngbanga ti so ngoi so angbâ lani na Jésus ti sara kusala ti lo ayeke mingi pëpe la asara si lo sara ye na ngangu ti lo kue. Me a yeke ndali ti so iri ti Babâ ti lo nga na tâ vorongo agbu bê ti lo ngangu wala lo sara mbanda ni. Tongana lo bâ zonga so a bi na ndo ti iri ti Nzapa, lo sara ye na ngangu ti lo kue ti zi zonga ni so. Na ngoi so lo bâ azo so ye ti ala ayeke dä pëpe so amokonzi-nzapa ayeke sara pasi na ala nga ayeke wara go na ndo ti ala, nzara so lo yeke na ni apusu lo ti dë bê ti ala nga ti sigigi na nda ti amokonzi-nzapa ni so.—Mat. 9:36; 23:2, 4, 27, 28, 33.
Zia si tënë ti tâ vorongo agbu bê ti mo
12, 13. Nyen la laso akota zo ti aEglize asara na ndo ti (a) iri ti Nzapa? (b) Royaume ti Nzapa?
12 Laso, sarango ye ti azo so atene ala yeke voro nzapa ague oko na ti azo ti ngoi ti Jésus na ayeke même sioni mingi ahon ti ngoi ni kâ. Na tapande, dabe ti mo so kozo ye so Jésus afa na adisciple ti lo ti sambela ndali ni andu iri ti Nzapa. Lo tene: “Zia a sara si iri ti mo aga nzoni-kue.” (Mat. 6:9). Lâ oko e bâ awe amokonzi-nzapa, mbilimbili ala so atene ala yeke aChrétien, afa iri ti Nzapa na azo ti ala wala ala fa na ala ti gonda ni wala ti sara si aga nzoni-kue? Ye so ala sara ayeke so ala sara si azo ahinga Nzapa nzoni pëpe na lege ti afango ye ti wataka; afango ye tongana tënë ti Nzapa Babâ, Nzapa Molenge, na Nzapa Yingo vulu, tënë ti âme so ayeke kui pëpe nga na ti enfer ti wâ. Afango ye so asara si azo ahinga li ti ala na sarango ye ti Nzapa pëpe nga ala bâ lo tongana zo so ayeke tâ sioni mingi nga so aye mingi ti sara sana na zo. Ala yeke na sioni tambela nga ala sara ye ti handa gi na lê ti azo, aye so abi zonga na ndo ti iri ti Nzapa. (Diko aRomain 2:21-24.) Ala sara kue ti tene azo ahinga iri ti Nzapa pëpe na même ala zi ni na yâ ti aBible ti ala. Na sarango tongaso, ala kanga lege na azo ti ga nduru na Nzapa na ti lë kpengba songo na lo.—Jacq. 4:7, 8.
13 Jésus afa nga na adisciple ti lo ti sambela ndali ti Royaume ti Nzapa. Lo tene: “Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.” (Mat. 6:10). Atâa so akota zo ti aEglize ayeke tene ka peko ti sambela so, ala wa azo ti ala ti mû maboko na aye ti poroso nga na abungbi so azo azia na sese. Na ndo ni, ala ne pëpe azo so ayeke sara ngangu kue ti fa tënë ti Royaume. Ye so asara si mingi ti azo so atene ala yeke aChrétien ayeke sara lisoro pëpe na ndo ti Royaume ti Nzapa nga ala mä na bê na ni pëpe.
14. Na lege wa akota zo ti aEglize awoko yâ ti afango ye ti Bible?
14 Jésus atene na Nzapa na yâ ti sambela lo tene: “Tënë ti mo ayeke tâ tënë.” (Jean 17:17). Nga kozoni si lo kiri na yayu, Jésus asara tënë ti ziango mbeni “ngbâa be-ta-zo so ayeke sara ye na ndara” ti mû kobe ti yingo na azo ti lo (Mat. 24:45). Atâa so ala tene ala la ayeke fa ye na azo na ndo ti Bible, akota zo ti aEglize so ayeke sara biani kusala so Maître ti ala amû na ala? Oko pëpe. Ala yeke tene so aye so ayeke na yâ ti Bible ayeke atâ ye pëpe me ayeke atënë ti tere. Ahon ti tene ala mû kobe ti yingo na azo ti ala, ti dë bê ti ala nga ti zi lê ti ala, akota zo ti aEglize ayeke fa gi atënë ti ndara ti azo na azo ti ala ti tene anzere na mê ti azo ni. Na ndo ni, ala woko yâ ti andia ti Nzapa na ndo ti nzoni sarango ye ti tene anzere na azo ti ala.—2 Tim. 4:3, 4.
15. Tongana mo bâ aye kue so akota zo ti aEglize asara na iri ti Nzapa, ye so asara nyen na ndo ti mo?
15 Teti so aye so kue ala sara so ala tene ala sara ni na iri ti Nzapa, ye so asara si bê ti mingi ti azo so aye ye ti nzoni anze, ala mä na bê na Nzapa nga na Bible mbeni pëpe. Ala tï na yâ ti gbanda ti Satan nga na aye ti sioni ti dunia ti lo. Tongana lâ oko oko mo mä wala mo bâ mara ti aye tongaso, ye so ayeke sara nyen na ndo ti mo? Teti so mo yeke wakua ti Jéhovah, tongana mo bâ zonga so a bi na ndo ti iri ti Nzapa, bê ti mo ayeke pusu mo pëpe ti sara kue ti zi zonga so? Tongana mo bâ so a yeke handa azo so bê ti ala ayeke nzoni nga so aye ti hinga Nzapa nga mo bâ so a yeke wara go na ndo ti ala, bê ti mo ayeke pusu mo pëpe ti dë bê ti ala ndali ti pasi so ala ayeke bâ? Na ngoi so Jésus abâ azo ti ngoi ti lo so “a sara pasi na ala nga yâ ti ala akangbi kirikiri tongana angasangbaga so ayeke na berger pëpe”, lo sara gi mawa ti ala pëpe. Lo “to nda ti fa aye mingi na ala.” (Mat. 9:36; Marc 6:34). E yeke na araison kue ti yapu na yâ ti tâ vorongo tongana ti so Jésus ayapu lani na yâ ni.
16, 17. (a) Nyen la a lingbi apusu e ti fa tënë na ngangu ti e kue? (b) Nyen la e yeke bâ na yâ ti article ti peko?
16 Tongana e yapu na yâ ti kusala ti e ti fango tënë, e yeke bâ na nene ni mingi atënë ti Paul so ayeke na 1 Timothée 2:3, 4. (Diko.) A yeke pëpe gi ndali ti so e hinga so e yeke na alango ti nda ni la si e yeke fa tënë na ngangu ti e kue, me a yeke nga ngbanga ti so e hinga so a yeke ye so bê ti Nzapa aye. Lo ye si azo ahinga tâ tënë tongaso si ala nga kue alingbi ti voro lo, ti sara na lo nga ti wara tënë nzoni ti lo. Ye so apusu e ti sara kusala ti fango tënë na ngangu ti e kue ayeke kozoni kue ndali ti so e ye ti mû gonda na iri ti Nzapa nga ti mû maboko na azo ti hinga ye so bê ti lo aye, me ayeke pëpe ngbanga ti so ngoi so angbâ ayeke mingi pëpe. Biani, tënë ti tâ vorongo agbu bê ti e ngangu.—1 Tim. 4:16.
17 E so e yeke awakua ti Jéhovah, e yeke na pasa ti hinga tâ tënë na ndo ti ye so Nzapa aleke ti sara ndali ti azo nga ndali ti sese. Lege azi na e ti mû maboko na azo ti wara ngia nga na nzoni beku teti kekereke. E lingbi ti fa na ala tongana nyen ti sö fini ti ala na ngoi ti futingo so ayeke ga na ndo ti aye ti dunia ti Satan (2 aThes. 1:7-9). Ahon ti tene bê ti e ason wala anze ndali ti so na lê ti e lâ ti Jéhovah angbâ ti yo, a yeke nzoni e duti na ngia so ngoi angbâ ti tene e bi tere ti e kue na yâ ti kusala ti tâ vorongo (Mi. 7:7; Hab. 2:3). Me nyen la ayeke mû maboko na e ti bi tere ti e kue na yâ ti kusala so? A yeke ye so e yeke bâ na yâ ti article ti peko.
Mo lingbi ti fa ndani?
• Nyen la apusu lani Jésus ti sara kusala ti lo ti fango tënë na ngangu ti lo kue?
• Mbupa so a kiri pekoni na “nzara” na yâ ti Bible aye ti tene nyen?
• Ambeni ye so e bâ laso, so alingbi ti pusu e ti yapu na yâ ti tâ vorongo, ayeke so wa?
[Foto na lembeti 16]
Ye so agbu bê ti Jésus mingi ayeke ti sara ye so bê ti Babâ ti lo aye nga ti ndoye azo
[Foto na lembeti 18]
E yeke na araison kue ti sara kusala ti tâ vorongo na ngangu ti e kue