Mo “yapu ti sara anzoni kusala”?

1, 2. Kota pasa wa aTémoin ti Jéhovah ayeke na ni? Mo bâ ti mo ni tongana nyen?

TONGANA a mû palata na ambeni zo ndali ti mbeni kpengba ye so ala sara, ala yeke bâ ni tongana mbeni kota ye ti gonda. Na tapande, ambeni zo awara kota palata ndali ti so ala sara kue si azo so amä tere pëpe akiri amä tere. Me ti duti mbeni lembe so Nzapa atokua lo ti mû maboko na azo ti lë nzoni songo na Wasarango ala ayeke mbeni kota ye ti gonda mingi!

² E aTémoin ti Jéhovah e yeke na kota pasa so. Na gbe ti fango lege ti Nzapa na ti Christ, e yeke voro azo ti tene “ala kiri ala sara songo na Nzapa.” (2 aCor. 5:20). Jéhovah ayeke sara kusala na e ti ga na azo na mbage ti lo. Ye so la amû maboko na azo kutu mingi na yâ ti akodoro ahon 235 ti duti na nzoni songo na Nzapa nga ti duti na beku ti wara fini ti lakue lakue (Tite 2:11). Na bê ti e kue, e yeke tisa “zo so aye, [ti] nyon ngu so amû fini na zo, [ti] nyon ni senge senge.” (Apoc. 22:17). Teti so e ye pendere kua so mingi nga e yeke sara ni na bê ti e kue, a yeke na lege ni so a tene so e yeke azo so “[a]yapu ti sara anzoni kusala.” (Tite 2:14). Zia e bâ tongana nyen la tongana e yapu ti sara anzoni kusala, a yeke mû maboko na e ti ga na azo na mbage ti Jéhovah. Mbeni lege ni ayeke fango tënë.

MÛ TAPANDE TI JÉHOVAH NA JÉSUS SO AYAPU NA KUA

3. Tënë so atene Jéhovah ‘asara ye na lege ti nzara ti bê ti Lo’ afa nyen na e?

³ Ésaïe 9:6 asara tënë ti ye so komandema ti Molenge ti Nzapa ayeke sara ande, a tene so fade Jéhovah ti aturugu “asara ye so na lege ti nzara ti bê ti Lo.” Tënë so afa so Babâ ti e ti yayu abi bê ti lo mingi na ndo ti salut ti azo. Tapande ti Jéhovah so ayapu na kua afa biani so kua ti fango tënë ti Royaume so Nzapa amû na e so ayeke mbeni kua so a lingbi e sara ni na bê ti e kue, na ngia nga na nzara ni. Tongana e yeke na kota nzara ti mû maboko na azo ti hinga Nzapa, e yeke fa so e mû tapande ti Jéhovah so ayapu na kua. Teti so e yeke sara kua maboko na maboko na Nzapa, e oko oko e yeke sara ngangu ti bi tere ti e kue na yâ ti kua ti fango nzoni tënë alingbi na dutingo ti e?​—1 aCor. 3:9.

4. Na lege wa Jésus azia tapande ti zo so ayapu na fango tënë nga angbâ dä?

⁴ Bâ nga tapande ti Jésus so ayapu na kua. Lo yeke mbeni tapande so alingbi kue ti zo so ayapu na fango tënë nga angbâ dä. Atâa so lo tingbi na angangu kangango lege, lo ngbâ ti fa tënë na nzara ni juska na kuâ (Jean 18:36, 37). Na ngoi so lango ti kuâ ti Jésus ayeke pusu nduru nduru, lo kiri lo sara ngangu mingi ti mû maboko na azo ti hinga Jéhovah.

5. Na lege wa Jésus asara ye alingbi na toli ti lo ti keke ti figue?

⁵ Na tapande, na nze ti septembre wala octobre ti ngu 32, Jésus amû toli ti mbeni koli so na yâ ti yaka ti vigne ti lo lo yeke na mbeni keke ti figue so alë pëpe na yâ ti ngu ota. Lo hunda na zo ti sarango kua ti vigne ni ti dë keke ni na sese, me zo ti kua ni ahunda ti tene lo mû ngoi na ni ti zi dû na gere ni na ti tuku puru ti nyama dä. (Diko Luc 13:6-9.) Gi mbeni kete wungo ti azo la aga lani adisciple ti Jésus. Me tongana ti so Jésus afa ni na yâ ti toli ti zo ti sarango kua ti vigne, lo mû kete ngoi so angbâ na lo, nze omene tongaso, ti fa tënë ngangu na Judée nga na Pérée. Alango kete kozoni na kuâ ti Jésus, lo toto ndali ti so amba ti lo aJuif amä lo me ala “ye ti sara ye alingbi na ni pëpe”.​—Mat. 13:15; Luc 19:41.

6. Ngbanga ti nyen a yeke nzoni e bi tere ti e mingi na fango tënë?

⁶ Teti so alango ti nda ni aga nduru ti hunzi awe, a yeke kota ye ti tene e bi tere ti e mingi na yâ ti kua ti fango tënë. (Diko Daniel 2:41-45.) So kota pasa si e yeke na ni ti duti aTémoin ti Jéhovah! Na ndo ti sese kue gi e la e lingbi ti mû na azo tâ beku na ndo ti akpale ti dunia. Ade ti ninga pëpe, mbeni wali so asû mbeti-sango atene so zo alingbi pëpe ti kiri tënë na hundango ndo so atene: “Ngbanga ti nyen aye ti sioni ayeke si na anzoni zo?” E aChrétien la e yeke na pasa ti fa akiringo tënë ti Bible na mara ti ahundango ndo so na azo kue so aye ti mä ni nga a yeke ye so a lingbi e sara ni. E yeke na araison kue ti zia si “yingo aduti tongana wâ na yâ ti tere ti [e]” na ngoi so e yeke sara kua so Nzapa amû na e (aRom. 12:11). Na lege ti mungo maboko ti Nzapa, tongana e yapu na fango nzoni tënë, e yeke mû maboko na azo ti hinga Jéhovah nga ti ndoye lo.

BIBE TI SACRIFICE AMÛ GONDA NA JÉHOVAH

7, 8. Na lege wa bibe ti sacrifice ayeke mû gonda na Jéhovah?

⁷ Tongana ti so aye so asi na bazengele Paul afa, fango tënë alingbi ti sara si “e lango pëpe” na abï nga na ambeni ngoi “e te kobe pëpe.” (2 aCor. 6:5). Atënë so afa pendere mingi bibe ti sacrifice nga adabe ti e na apionnier so azia kua ti fango tënë na kozo ndo na yâ ti fini ti ala atâa so ala yeke sara ambeni ye ti wara nginza ti bâ lege ti abezoin ti ala. Gbu nga li na ndo ti amissionnaire so ayeke sara kua ngangu ti mû maboko na azo na kodoro wande (aPhil. 2:17). Gbu nga li na ndo ti a-ancien so ayeke kanga nzara na yâ ti ala wala ayeke fâ lango na lê ti ala ti sara kua ngangu ti bâ lege ti angasangbaga ti Jéhovah. E yeke nga na aita ti e so aga mbakoro awe nga na ala so ayeke na kpale ti seni so ayeke sara ngangu ti gue na abungbi nga ayeke fa tënë. Tongana e pensé na ndo ti awakua ti Nzapa kue so asara asacrifice so, bê ti e asi na ngia. Aye so kue ayeke sara ngangu na ndo ti lege so azo ayeke bâ na kua ti e ti fango tënë.

⁸ Na yâ ti mbeni lettre so mbeni koli so ayeke Témoin pëpe atokua na mbeni mbeti-sango (Boston Target) na Royaume-Uni, lo tene: “Azo ayeke zia bê ti ala na ndo ti abungbi ti nzapa mingi ape . . . Nyen la akota zo ti a-eglize ayeke sara na yâ ti lango oko oko? Ala yeke sigigi pëpe ti gue ti wara azo tongana ti so Christ asara lani . . . Oko bungbi ti Nzapa so na bango ni ayeke bi bê na azo ayeke aTémoin ti Jéhovah. Ala yeke sigigi ti gue ti wara azo nga na bê ti ala kue ala yeke fa tâ tënë na azo.” Na yâ ti dunia so azo mingi ayeke gi gi ye teti ala wani, ti duti na bibe ti sacrifice ayeke mû gonda mingi na Jéhovah Nzapa.​—aRom. 12:1.

9. Nyen la ayeke pusu e ti ngbâ ti yapu ti sara anzoni kusala na fango tënë?

⁹ Me nyen la e lingbi ti sara tongana e bâ so e yapu na fango tënë tongana ti kozo pëpe? A yeke nzoni e gbu li na ndo ti anzoni ye kue so ayeke ga na peko ti kua so Jéhovah amû na e. (Diko aRomain 10:13-15.) Azo ayeke wara salut gi tongana ala iri ndo na Jéhovah na iri ti lo na mabe. Me tongana e fa tënë na ala pëpe, ala lingbi pëpe ti sara ni. Tongana e hinga ni tongaso, a yeke pusu e ti ngbâ ti yapu ti sara anzoni kusala nga e yeke sara ngangu ti fa nzoni tënë ti Royaume.

NZONI TAMBELA AYEKE GA NA AZO NA MBAGE TI NZAPA

10. Ngbanga ti nyen e lingbi ti tene so nzoni tambela ti e ayeke ga na azo na mbage ti Jéhovah?

¹⁰ Atâa so a yeke kota ye ti yapu na fango tënë, gi ni oko alingbi pëpe ti ga na azo na mbage ti Nzapa. Mbeni use nzoni kusala so ayeke ga na azo na mbage ti Nzapa ayeke nzoni tambela ti e ti aChrétien. Paul afa nene ti tene e duti na nzoni tambela na ngoi so lo tene: “E yeke sara kue ti ga pëpe mbeni ye so asara si bê ti zo ason, si a kasa kusala ti e pëpe.” (2 aCor. 6:3). Anzoni tënë ti yanga ti e nga na nzoni tambela ti e ayeke sara pendere ti fango ye ti Nzapa nga alingbi ti sara si azo aga avoro Jéhovah (Tite 2:10). Fani mingi azo ayeke yeda na tâ tënë tongana ala bâ so e mû tapande ti Christ.

11. Ngbanga ti nyen a yeke nzoni e sambela na e gbu li na ndo ti ye so tambela ti e ayeke sara na ndo ti azo?

¹¹ Nzoni tambela ti e ayeke pusu azo ti gi ti hinga tâ tënë, legeoko nga sioni tambela ti e ayeke sara si azo ayeke ye pëpe ti gi ti hinga Jéhovah. Ni la, atâa na place ti kua, na yanga-da, wala na ekole, e yeke kpe ti sara mbeni ye so asara si azo akasa e wala kusala ti e. Tongana e ngbâ na yâ ti siokpari na mbana, akpale so e yeke wara na pekoni ayeke duti ngangu mingi (aHéb. 10:26, 27). A yeke nzoni bibe so apusu e ti sambela na ti gbu li ti e na ndo ti aye so e yeke sara na ye so tambela ti e ayeke sara na ndo ti azo. Na ngoi so sarango ye ti azo ti dunia so ayeke ga gi sioni sioni, a yeke ngangu pëpe ti “bâ . . . lo so asara kusala ti Nzapa nde na lo so asara kusala ti Lo pëpe nde.” (Mal. 3:18). Biani, nzoni tambela ti e ti aChrétien ayeke mû maboko na azo ti lë songo na Nzapa.

12-14. Tongana nyen la gbungo ngangu ti e na yâ ti atara ayeke sara ngangu na ndo ti lege so azo ayeke bâ na kusala ti e ti fango tënë? Fa mbeni tapande ni.

¹² Na yâ ti mbeti ti Paul na aCorinthien, lo fa so lo bâ pasi na yâ ti aye ti vundu, akpale, apika nga na kanga. (Diko 2 aCorinthien 6:4, 5.) Tongana e wara atara na e gbu ngangu dä, a yeke mû maboko na azo so abâ e ti yeda na tâ tënë. Na tapande: Na yâ ti ambeni ngu so ahon, awato agi ti hunzi aTémoin ti Jéhovah na yâ ti mbeni kete kodoro na Angola. Ala gbu aTémoin ti Jéhovah use na ambeni zo 30 so asara nzara ti tâ tënë so ayeke gue na abungbi. Na pekoni azo ti kete kodoro ni abungbi abâ aTémoin ni na ngoi so awato ni ayeke pika lani ala senge senge juska ala wara kä. Ala pika même awali na amolenge kue. Ye so ala ye lani ayeke ti zia mbeto na yâ ti azo tongaso si zo oko amä aTémoin ti Jéhovah pëpe. Me na peko ti pika so a pika na aTémoin ti Jéhovah na lê ti azo kue, azo mingi na yâ ti kete kodoro ni aga na mbage ti aTémoin ni nga ala hunda ti tene ala manda Bible na ala. Ye so asara si kua ti fango tënë angbâ ti gue na li ni, azo mingi ayeda na tâ tënë nga aita awara aye ti nzoni mingi na pekoni.

¹³ Tapande so afa so tongana e hule ngangu na tere ti afango ye ti Bible, a yeke sara ye ti nzoni na ndo ti azo. Pierre na abazengele asara ye na mbeto pëpe. E lingbi ti hunda tere ti e wala azo oke la alë songo na Nzapa ndali ti ye so ala sara so (Kus. 5:17-29). Amba ti e ti ekole, ti place ti kua wala azo ti sewa ti e alingbi ti yeda na tâ tënë tongana ala bâ so e hule ngangu na tere ti ye so ayeke mbilimbili.

¹⁴ Na angoi kue, azo ayeke sara aye ti ngangu na ambeni ita ti e. Na tapande, na Arménie, aita nduru na 40 ayeke na kanga ndali ti so ala ye pëpe ti sara kua ti turugu, nga peut-être a yeke kanga ande gbâ ti ambeni na yâ ti anze so ayeke ga. Na Érythrée, a kanga awakua ti Jéhovah 55, ngu ti ambeni ahon 60. Na Corée ti Mbongo, a kanga aTémoin 700 tongaso ndali ti mabe ti ala. A sara ngu 60 tongaso awe la aita ayeke bâ pasi na yâ ti kodoro so. Zia e sambela ti tene dutingo be-ta-zo ti aita ti e so a sara aye ti ngangu na ala na yâ ti akodoro nde nde amû gonda na Nzapa nga amû maboko na azo so aye mbilimbili ti mû mbage ti tâ vorongo.​—Ps. 76:9-11.

15. Fa tongana nyen sarango ye na lege ni alingbi ti ga na azo na mbage ti tâ tënë.

¹⁵ Sarango ye ti e na lege ni alingbi nga ti ga na azo na mbage ti tâ tënë. (Diko 2 aCorinthien 6:4, 7.) Na tapande, bâ mbeni ye so asi: Na ngoi so mbeni ita-wali aye ti futa ticket ti lo ti bus, mbeni zo so ahinga lo atene na lo so lo yeke na bezoin ti futa ticket ni pëpe ndali ti so ndo so lo gue dä so ayo pëpe. Ita-wali ni atene na lo so a yeke na lege ni ti futa ticket ni, même tongana ndo ni ayeke gi nduru. Na pekoni, kamarade ti lo ni azu na yâ ti bus ni. Zo ti kpengo na bus ni aturnê ahunda ita-wali ni atene, “Mo yeke Témoin ti Jéhovah?” Ita-wali ni atene: “EN. Mo hunda mbi tongaso ngbanga ti nyen?” Zo ti kpengo na bus ni atene: “Mbi mä fade lisoro ti ala na ndo ti futango ticket ti bus so, na mbi hinga so aTémoin ti Jéhovah la ayeke na popo ti azo oko oko so ayeke futa ticket ti ala nga ayeke sara ye na lege ni na yâ ti aye kue.” Anze kete na pekoni, na ngoi ti bungbi, koli so aga na tere ti ita-wali ni na lo tene: “Mo hinga mbi? Mbi la mbi yeke zo ti kpengo na bus so lani asara tënë na mo na ndo ti futango ticket so. Sarango ye ti mo apusu mbi ti komanse ti manda Bible na aTémoin ti Jéhovah.” Sarango ye ti e na lege ni ayeke sara si e ga awakua ti Nzapa so zo alingbi ti zia bê ti lo na e.

DUTI LAKUE NA ASARANGO YE SO AMÛ GONDA NA NZAPA

16. Ngbanga ti nyen asarango ye tongana kangango bê ti ku, ndoye nga na sarango nzoni na zo ayeke ndu bê ti azo? Fa mbeni tapande ti ye so akota zo ti bungbi ti nzapa ti wataka asara.

¹⁶ Tongana e yeke na asarango ye tongana kangango bê ti ku, ndoye nga na sarango nzoni na zo, e yeke sara nga si azo aga na mbage ti Jéhovah. Ambeni zo so abâ e alingbi ti duti na nzara ti gi ti hinga Jéhovah, aye so lo leke na bê ti lo ti sara nga na azo ti lo. Bango ndo ti atâ Chrétien nga na tambela ti ala ayeke tâ nde mingi na ti azo so ayeke gi gi ti handa lê ti azo ti fa na ala so ala yeke bata tënë ti Nzapa. Ambeni kota zo ti abungbi ti vorongo nzapa aga azo ti mosoro na lege so ala yeke mû aye ti azo ti ala na lege ti likisi, ala yeke mû kota mbage ti nginza so ala wara ti vo na ada nga na a-oto so ngere ni ayeke ngangu. Mbeni avo même da so climatiseur ayeke dä ndali ti mbo ti lo. Biani, azo mingi so atene ala yeke adisciple ti Christ ayeke même pëpe na bibe ti “[mungo ye] na azo senge senge.” (Mat. 10:8). Me, legeoko tongana aprêtre ti Israël ti giriri so li ti ala akpengba, ala yeke ‘fa tënë teti futa’ na mingi ti aye so ala fa ayeke na yâ ti Bible pëpe (Mi. 3:11). Mara ti sarango ye ti handango lê ti zo tongaso ayeke mû maboko pëpe na azo ti lë songo na Nzapa.

17, 18. (a) Na lege wa e lingbi ti gonda Jéhovah tongana e yeke na asarango ye ti lo na yâ ti fini ti e? (b) Nyen la apusu mo ti ngbâ lakue ti sara anzoni kusala?

¹⁷ Me, anzoni fango ye ti aChrétien nga na aye ti nzoni so ala sara na azo andu bê ti azo mingi. Na tapande, na ngoi so mbeni ita-koli pionnier ayeke fa lani tënë da na da, lo wara mbeni mbakoro-wali so ayeke womua na mbakoro ni atomba lo. Lo tene so na ngoi so pionnier ni ayeke pika yanga-da, ni luti na ndo ti mbeni ye, ni yeke gi ti zi ampoule ti changé ni. Pionnier ni atene na lo atene: “A yeke nzoni pëpe ti tene mo sara ye so mo oko.” Pionnier ni ague azi ampoule ni, lo zia mbeni na place ni na pekoni lo hon. Na ngoi so molenge ti womua ni ti koli amä tënë ti ye so pionnier ni asara so, a pika bê ti lo mingi na a sara si lo gi peko ti pionnier ni ti kiri singila na lo. Na nda ni, molenge ni ayeda ti manda Bible.

¹⁸ Mo yeke sara kue ti ngbâ ti sara anzoni kusala ngbanga ti nyen? Peut-être ndali ti so mo hinga so tongana e yapu na fango tënë nga e ngbâ ti sara ye so bê ti Nzapa aye, e yeke gonda Jéhovah nga a lingbi ti mû maboko na azo ti wara salut. (Diko 1 aCorinthien 10:31-33.) Kota nzara so e yeke na ni ti fa so e ndoye Nzapa nga na amba ti e la apusu e ti yapu ti sara anzoni kusala na fango tënë nga ti sara ye na mbeni lege so afa so e yeke bata tënë ti Nzapa (Mat. 22:37-39). Tongana e yapu na sarango anzoni kusala, e yeke duti na ngia nga na nzerengo tere laso. Na ndo ni, e yeke ku kungo lango so azo kue ayeke yapu ndali ti tâ vorongo ti gonda Jéhovah, Wasarango e.