Harmaguédon ayeke nyen biani?

‘Asioni yingo ague ti wara agbia ti dunia kue ti bungbi ala na ndo so a iri ni na yanga ti hébro atene Harmagedon.’​—APOCALYPSE 16:14, 16, Fini Mbuki, 2001.

HARMAGUÉDON, wala “Harmagedon”, ayeke iri ti mbeni ndo. Me ti bâ ni nzoni, a wara lâ oko pëpe mbeni ndo so ayeke na mara ti iri tongaso na ndo ti sese.

Ka ngbanga ti nyen a yeke sara kusala mingi na tënë “Harmaguédon” ti fa na mbeni ye so asi, ye tongana bira? Harmaguédon aye ti tene nyen biani?

A bungbi ala na ndo so a iri ni Harmaguédon

Na yanga ti Hébreu ti giriri so a sû na Bible, tënë Har–Maguédon aye mbilimbili ti tene “Hoto ti Meguiddo.” Atâa so mbeni ndo tongaso so a iri ni Harmaguédon ayeke dä pëpe, ti ndo so a iri ni Meguiddo a yeke ti lo dä. Ndo ni so ayeke na mbeni kota croisement na mbage ti banga-do ti mbeni kodoro so amolenge ti Israël ti giriri ayeke lango lani dä. Na ngoi ni kâ, azo atiri akota bira nduru na ndo so mingi, na a sara si iri “Meguiddo” aga mbeni iri so aye ti sara tënë ti bira.a

Ye oko, tâ nda ti Meguiddo aye pëpe ti sara tënë ti mara ti abira so a tiri na ndo ni kâ, me ndani so azo ni atiri abira ni so. Meguiddo ayeke lani na yâ ti Sese ti Zendo so Jéhovah Nzapa amû ni na amolenge ti Israël (Exode 33:1; Josué 12:7, 21). Lo tene lani na ala so tongana awato aga ti tiri na ala, ni yeke tiri na tere ti ala, azo ti Israël ni (Deutéronome 6:18, 19). Na tapande, a yeke lani na Meguiddo si Jéhovah, na lege ti ye ti kpene, atiri na tere ti amolenge ti Israël na ngoi so aturugu ti Jabin, gbia ti Canaan, aga ti tiri na ala, so Sisera si ayeke na li ti ala.​—aJuge 4:14-16.

Tongaso, tënë “Harmaguédon” ayeke mbeni tënë so aye ti fa mbeni kota ye na lege ti fä. A ye ti sara tënë ti mbeni ye so asi me pëpe ti mbeni ndo na ndo ti sese. A ye ti sara tënë ti mbeni bira so angangu use si ayeke tingbi tere dä.

Na mbeti ti Apocalypse a sara tënë ti mbeni prophétie so afa so na yâ ti kete ngoi Satan na asioni yingo ti lo ayeke pusu ande angorogbia ti azo ti bungbi aturugu ti ala na mbeni ndo na lege ti fä, ala yeke sara mvene ti ga ti tiri bira na azo ti Nzapa na ti mingo kusala ti lo. Bira ni so ayeke fâ ande azo kutu mingi na ngoi so Nzapa ayeke kinda awato so.​—Apocalypse 19:11-18.

Ndali ti nyen si Nzapa, lo so Bible afa lo tongana Nzapa ‘ti be-nzoni, lo so ngonzo agbu lo fade pëpe nga lo so nzobe ti lo ayeke kota mingi,’ ayeke sara si gbâ ti azo tongaso ayeke kui? (Néhémie 9:17). Ti hinga ndani, a lingbi e kiri tënë na ahundango ndo ota so ge si: (1) Zo wa la ayeke zi li ti bira ni, zo wa? (2) Ngbanga ti nyen Nzapa ayeke lï na yâ ti bira ni? (3) Kota changement wa bira ni so ayeke ga ande na ni na ndo ti sese nga na azo na yâ ti angoi so ayeke ga na pekoni?

1. ZO WA LA AYEKE ZI LI TI BIRA NI, ZO WA?

Nzapa la ayeke zi li ti bira ti Harmaguédon pëpe. Me lo yeke bata ti lo ande anzoni zo si awato so alondo na bira na tere ti ala aneka ala pëpe. Awato ni so ayeke “agbia ti sese kue so azo ayeke dä,” so ti tene akota zo ti kodoro. Ala yeke ga ti tiri na anzoni zo so ndali ti nyen? Ndali ti so Satan ayeke pusu ande angorogbia nga na aturugu ti ala kue ti tiri na azo so ayeke voro Jéhovah Nzapa.​—Apocalypse 16:13, 14; 19:17, 18.

Teti so laso azo ayeke luti mingi na ndo ti liberté ti zo ti sara tënë na ti voro Nzapa ti bê ti lo, na li ti azo a yeke ngangu ande ti tene angorogbia akanga lege na abungbi ti vorongo Nzapa wala ayeke futi ni kue kue kue. Me ti bâ ni nzoni, mara ti ye tongaso asi na yâ ti angoi ti e awe, na angorogbia ayeke na bibe ti sarango ni encore.b Ye oko, kota kangbi ayeke na popo ti ye so angorogbia asara ândö na ti so ala ye ti sara na Harmaguédon. Kozoni, bira ni so ayeke mû ndo ti sese kue. Use ni, Jéhovah Nzapa ayeke londo nga ti tiri bira ni, na ti so ni so a yeke duti ande ngangu mingi ahon ati so lo tiri ândö (Jérémie 25:32, 33). Na yâ ti Bible, bira so ayeke “bira ti kota lango ti Nzapa, Lo ti ngangu ahon kue.”

2. NGBANGA TI NYEN NZAPA AYEKE LÏ ANDE NA YÂ TI BIRA NI?

Jéhovah afa na azo so avoro lo ti ye siriri na ti ndoye awato ti ala (Michée 4:1-3; Matthieu 5:43, 44; 26:52). A yeke sara ande si tongana awato alondo na tere ti ala, ala yeke mû ngombe ti bata na tere ti ala ape. Me tongana Nzapa amû mbage ti azo ti lo ape, mbeni oko ti ala ayeke ngbâ ape, nga iri ti lo, Jéhovah, ayeke wara zonga. Nga, tongana awato ni ahunzi na azo ti Jéhovah, a yeke fa so lo ye azo ti lo ni ape, lo bata ala ape wala lo yeke na ngangu ape. Me mara ti ye tongaso ayeke si lâ oko ape!​—Psaume 37:28, 29.

Nzapa aye ti futi zo oko ape, ni la lo yeke gboto mê ti e na ndo ti ye so lo leke ti sara (2 Pierre 3:9). Lo sara si na yâ ti Bible a bata ambeni mbaï so na lege ni lo yeke dabe ti azo kue na aye so asi ândö, so tongana awato aga ti tiri na azo ti lo, lo yeke kanga maboko pëpe (2 aGbia 19:35). Bible afa nga so ande tongana Satan na angorogbia so ayeke sara kua na gbe ti lo nga na aturugu ti ala kue aga ti tiri na azo ti Nzapa, Jéhovah ayeke kiri ti londo na tere ti ala ti bata azo ti lo ni. A yeke ye so Bible atene ândö giriri la, so fade Jéhovah ayeke futi azo ti sioni (aProverbe 2:21, 22; 2 aThessalonicien 1:6-9). Na ngoi ni kâ ande, awato ni so ayeke hinga biani so ala yeke tiri na Lo ti Ngangu Ahon Kue la.​—Ézéchiel 38:21-23.

3. CHANGEMENT WA BIRA NI SO AYEKE GA ANDE NA NI NA YÂ TI ANGOI SO AYEKE GA NA PEKONI?

Bira ti Harmaguédon ayeke sö fini ti azo kutu mingi. A yeke zi lege na mbeni ngoi ti siriri na ndo ti sese.​—Apocalypse 21:3, 4.

Mbeti ti Apocalypse asara tënë ti “azo mingi mingi,” so a lingbi ti diko wungo ti ala pëpe na so ayeke sö kuâ ande na bira so (Apocalypse 7:9, 14). Nzapa ayeke fa ande na ala ye so a lingbi ala sara ti kiri na paradis na ndo ti sese tongana ti so lo leke na ngoi ti Adam.

Lawa si awato ayeke londo na tere ti azo ti Nzapa? E hinga ni?

[Akete tënë na gbe ni]

[Foto na lembeti 6]

Giriri, Jéhovah Nzapa atiri na tere ti azo ti lo

[Foto na lembeti 7]

Jéhovah ayeke kiri ti mû mbage ti azo ti lo, na bira ti Harmaguédon