Jéhovah azi lê ti mbi

TËNË TI PATRICE OYEKA

E yeke na peko ti bekombite, na lango ni so ayeke tongana tanga ti alango ni kue. Mbi yeke gi mbi oko, lê ti mbi abuba, nga mbi yeke gi na yâ ti mawa. Go ti radio ayeke toto gi yeke yeke. Mbi bâ so a yeke nzoni mbi fâ tere ti mbi. Tongaso, mbi tuku mbeni sioni yorö na yâ ti mbeni verre ti ngu, na mbi zia ni na ndo ti table na devant ti mbi. Mbi leke na li ti mbi ti sukula ngu kozoni na ti yü bongo pendere si na pekoni awe mbi nyon sioni yorö so. Me ngbanga ti nyen si mbi ye lani ti fâ tere ti mbi so? Na a sara tongana nyen la si laso mbi ngbâ na fini ti fa peko ti ye so asi na mbi so?

A DÜ mbi na lango 2 ti février ti ngu 1958, na Kasaï ti mbage ti Tö ti kodoro ti Congo Kinshasa. Babâ ti mbi akui tongana mbi yeke lani na ngu gumbaya. Yaya ti mbi ti koli la abata mbi juska mbi kono.

Tongana mbi hunzi ekole awe, mbi sara kua na yâ ti mbeni yaka ti bängâ. Mbeni lâ, na ndapre, so ayeke na ngu 1989, mbi yeke sû mbeti na yâ ti bureau ti mbi. Mo ye ti bâ! ndo avuko pitipiti na tere ti mbi kue. Mbi pensé ti mbi lani mbi tene wâ la afâ so, me mbi yeke mä toto ti groupe, na ndapre la, me bï ape. Bê ti mbi afâ ngangu, teti mbi ga ti bâ so mbi yeke bâ ye oko ape, même mbeti so ayeke na gbe ti lê ti mbi so.

Hio, mbi iri mbeni koli so ayeke sara kua na gbe ti mbi ti gue na mbi na docteur ti ndokua ti e. Me docteur ni so atene na mbi ti gue ti bâ kota docteur ti gbata ni so. Tongana lo bâ so mbeni ye na yâ ti mboma ti lê ti mbi la asuru na so a yeke kete ye la ape, lo tokua mbi na Kinshasa.

Na Kinshasa

Na Kinshasa kâ, mbi bâ gbâ ti adocteur ti lê, me kue gbä. Mbi sara lango 43 na hôpital, na pekoni adocteur ni atene na mbi so ti lê ti mbi awe, mbi yeke bâ ndo encore ape. Afami ti mbi ague na mbi na a-eglize nde nde ti tene a sambela na ndo ti mbi si lê ti mbi azi, me ye oko ape.

Na ndani, mbi zia lege ti gi ti tene lê ti mbi akiri azi. Ye kue na yâ ti dunia ti mbi afuti awe. Mbi yeke bâ ndo ape, a zi mbi na kua, wali ti mbi nga kue ake mbi. Lo ro akungba ti e kue lo hon na ni. Kamene asara mbi même ti sigigi na gigi wala ti gue ti duti na tere ti amba ti mbi. Mbi duti gi mbi oko na yâ ti da. Mbi ye si zo aga na tere ti mbi ape, nga na bê ti mbi, mbi kpa zo encore ape.

Fani use mbi gi ti fâ tere ti mbi. Lege use ni la mbi fa na tongo nda ni so. Me mbeni kete molenge ti yâ ti sewa ti mbi la azi mbi na yâ ni. Lo ga lo mû kopo ni so, lo tuku ni, andâ mbi ngbâ ti sukula ngu lani. Lo hinga ape so yorö ayeke na yâ ni. Me merci so lo nyon ni ape. Mbi gi kopo ni gbä mbi wara ape. Tongaso mbi fa na afami ti mbi ndani so mbi yeke gi ni fade, nga mbi fa na ala ye so mbi ye fade ti sara.

Mbi kiri singila mingi na Nzapa nga na sewa ti mbi so lê ti ala ayeke gi na ndo ti mbi, a sara si mbi zia lege ti gi ti fâ tere ti mbi ni.

Gigi akiri anzere na mbi

Na mbeni dimanche ti ngu 1992, mbi yeke na yanga-da na mbi yeke nyon manga. Mo ye ti bâ, aTémoin ti Jéhovah use afa tënë da na da asi na yanga-da ti mbi. Teti so ala bâ so mbi yeke bâ ndo pëpe, ala diko na mbi Ésaïe 35:5, so atene: “Na lâ ni kâ, fade lê ti awaziba alungula, na mê ti awambongi alungula nga.” Tere ti mbi anzere sioni na mango atënë so. Nde na atënë so mbi mä na a-eglize so mbi gue dä, aTémoin ni atene pëpe so ala ga ti sara miracle ti zi lê ti mbi. Me ala tene na mbi so tongana mbi gi ti hinga Nzapa, lo lingbi ti sara si, na yâ ti fini dunia so lo mû zendo ni, lê ti mbi akiri azi (Jean 17:3). Gi na lê ni lê ni mbi yeda ti tene ala manda Bible na mbi na yâ ti buku Mo lingbi ti douti la koue la koue na paradis na ndo sesse. Mbi gue nga na abungbi ti ala kue na mbi zia lege ti ambeni ye na yâ ti fini ti mbi. Mbi zia lege ti nyongo manga.

Me, teti so mbi yeke bâ ndo ape, mbi gue na li ni hio hio na lege ti yingo ape. Tongaso mbi gue na mbeni ndo so a yeke bâ lege ti awaziba dä ti manda ti diko na ti sû Braille, so ayeke kode ti sungo mbeti ti awaziba. Mandango Braille ni amû lege na mbi ti mû mbage na afango ye so e yeke wara na Da ti Royaume ndali ti fango tënë. Kete na pekoni, mbi to nda ti fa tënë, na mbi komanse ti kiri ti mä nzerengo ti gigi. Mbi sara effort juska mbi wara batême na lango 7 ti mai, ngu 1994.

Tongana ndoye ti mbi na mbage ti Jéhovah nga na mbage ti amba ti mbi azo ayeke kono, nzara ti tene mbi fa tënë mingi asara mbi nga. Tongaso, na 1 décembre 1995, mbi ga pionnier permanent, so ti tene mbi yeke fa tënë teti l’heure mingi, na mbi ngbâ dä. Mbi wara nga pasa ti ga ancien na yâ ti congrégation ti mbi depuis février ti ngu 2004. Ngoi na ngoi ambeni congrégation ti ndo so mbi yeke dä ayeke hunda mbi ti tene mbi gue mbi mû diskur na ala kâ. Apendere ye so kue asara si mbi yeke na ngia mingi nga afa na mbi so ye oko alingbi pëpe ti kanga lege na e ti sara na Jéhovah Nzapa, atâa a yeke kangango lê.

Jéhovah amû na mbi mbeni lê

Tongana ti so mbi tene fade, wali ti mbi ake mbi lani ngbanga ti so lê ti mbi abuba. Me Jéhovah azia mbi tongaso ape, lo mû na mbi mbeni lê. Lê ni so ayeke Anny Mavambu. Atâa kpale ti lê ti mbi ni, lo yeda ti ga wali ti mbi. Lakue lo yeke na tere ti mbi na fango tënë teti lo nga kue lo yeke pionnier permanent tongana mbi. Lo yeke diko na mbi ambeti ndali ti adiskur ti mbi si mbi sû ni na Braille. Mbi kiri singila mingi na Jéhovah ndali ti so lo mû mara ti wali so na mbi. Mbi bâ so atënë ti aProverbe 19:14 so ayeke mvene ape, a tene: “Da na mosoro ayeke ye ti héritier so ababâ amû, me [Jéhovah] amû wali ti ndara na zo.”

Jéhovah asara nga tufa na ndo ti mbi na Anny na lege so e dü amolenge use, koli na wali. Mbi yeke ku kungo lango so mbi yeke bâ lê ti ala na yâ ti Paradis! Mbeni ye ti nzoni so Jéhovah asara na e ayeke so yaya ti mbi ti koli so na nzoni bê ti lo ayeda na e ti ngbâ na yâ ti gbagba ti lo amanda nga Bible na lo ga Témoin ti Jéhovah. E kue e yeke na yâ ti congrégation oko.

Atâa so lê ti mbi akanga, mbi ye gi ti sara na Jéhovah mingi ngbanga ti so lo sara nzoni na mbi mingi (Malachie 3:10). Lâ na lâ mbi yeke sambela ti tene Royaume ti lo aga azi apasi kue na ndo ti sese. Depuis so mbi hinga Jéhovah, mbi lingbi biani ti tene so ‘tënë nzoni ti Jéhovah asara si zo awara mosoro, na Lo zia vundu dä pëpe.’​—aProverbe 10:22.

[Foto na lembeti 15]

Mbi la ge na mungo diskur; sewa ti mbi nga na yaya ti mbi