“L’éternel oko” abungbi azo ti sewa ti lo

‘Mbi voro yanga na ala ti bata beoko ti yingo.’​—AÉPH. 4:1, 3.

MO YEKE KIRI TËNË TONGANA NYEN?

Ndani so Nzapa ayeke bâ lege ti aye ti lo ayeke ti sara nyen?

Tongana nyen la e yeke “bata beoko ti yingo”?

Nyen la ayeke mû maboko na e ti “sara nzoni na mba”?

1, 2. Nyen la Jéhovah aleke ti sara teti sese nga na azo?

TONGANA mo mä tënë sewa, mo yeke pensé na nyen? Mo yeke pensé na yengo tere nga na ngia? Mo yeke pensé na sarango kua maboko na maboko na azo ti sewa ti mo ti wara mbeni ye so ala zia na gbele ala? Wala mo yeke pensé na mbeni nzoni ndo so amû lege na mo ti maï, ti manda ye nga ti fa apensé ti mo? Peut-être mo yeke pensé na aye so tongana mo yeke na yâ ti mbeni nzoni sewa. Jéhovah la azia gere ti sewa na sese (aÉph. 3:14, 15). Ye so Jéhovah aleke lani ti sara ayeke ti tene acréature ti lo ti yayu na ti sese aga mbeni sewa oko tongaso si ala duti nzoni, ala zia bê na ndo ti mba nga ala duti beoko.

² Na pekoni so Adam na Ève asara siokpari, azo ayeke mbage ti sewa ti Nzapa mbeni pëpe. Me ye so achangé pëpe yâ ti ye so Nzapa aleke ti sara. Lo yeke sara si sese so aga Paradis asi singo na ahale ti Adam na Ève (Gen. 1:28; És. 45:18). Lo leke aye kue ti sara si ye so lo leke lani ti sara so aga tâ tënë. A sara tënë ti mbeni oko ti aye ni so na yâ ti mbeti ti aÉphésien so mama-tene ni ayeke dutingo beoko. E yeke sara tënë fadeso na ndo ti ambeni versê ti buku so nga e yeke bâ tongana nyen e lingbi ti sara ye ague oko na ye so Jéhovah aleke ti sara so ayeke ti tene acréature ti lo kue aduti beoko.

BANGO LEGE TI AYE

3. Tënë ti bango lege ti aye so a sara tënë ni na aÉphésien 1:10 ayeke nyen? Kozo mbage ni ato nda ni lawa?

³ Moïse atene lani na azo ti Israël lo tene: “L’Éternel Nzapa ti e ayeke L’Éternel oko!” (Deut. 6:4). Akusala ti Jéhovah ague oko na ye so lo leke ti sara. Ni la, “tongana ngoi ni so a soro awe alingbi kue”, Nzapa ato nda ti ‘bâ lege ti aye ti lo’, so ti tene ti leke ti tene a-ange na azo aduti beoko. (Diko aÉphésien 1:8-10.) Tënë ti bango lege ti aye ni so andu aye use. Kozoni, Nzapa ayeke leke aChrétien so a soro ala ti gue ti wara fini na yayu; kâ ala yeke ngbâ ti sara kusala na gbe ti komandema ti Jésus Christ. Ye so ato nda ni na Pentecôte ti ngu 33, na ngoi so Jéhovah ato nda ti bungbi azo so ayeke komande ande legeoko na Christ na yayu (Kus. 2:1-4). Na lege ti sandaga ti Christ, Nzapa adiko aChrétien so a soro ala ti gue na yayu azo ti mbilimbili ti wara fini. Ala hinga so a mû ala tongana “amolenge ti Nzapa.”​—aRom. 3:23, 24; 5:1; 8:15-17.

4, 5. Use mbage ti aye ti Nzapa so lo yeke bâ lege ni ayeke nyen?

⁴ Use ni, Nzapa ayeke leke azo so ayeke duti ande na yâ ti Paradis na ndo ti sese na gbe ti Royaume ti Messie. “Azo mingi mingi” ayeke duti akozo zo so ayeke wara fini na yâ ti Paradis (Apoc. 7:9, 13-17; 21:1-5). Na pekoni, na ngoi ti Komandema ti Ngu Saki Oko ti Christ, a yeke zingo ande na kuâ azo ngbundangbu mingi ti wara fini legeoko na azo mingi mingi na ndo ti sese (Apoc. 20:12, 13). Tara ti bâ gbâ ti alege so ayeke zi na e ti tene e fa so e yeke beoko! Azo mingi mingi na azo so a zingo ala na kuâ la ayeke duti “aye so ayeke na sese”. Na hunzingo ti ngu saki oko ni a yeke tara ande ala ti nda ni. Azo kue so ayeke be-ta-zo ayeke ga ande “amolenge ti Nzapa” so ayeke na ndo ti sese.​—aRom. 8:21; Apoc. 20:7, 8.

⁵ Laso, Jéhovah ayeke leke aChrétien so a soro ala ti gue na yayu ti wara fini na yayu nga ambeni ngasangbaga ti wara fini na yâ ti Paradis na ndo ti sese. Me tongana nyen la e oko oko kue e lingbi ti sara kusala maboko na maboko na Nzapa na yâ ti aye so?

“BATA BEOKO TI YINGO”

6. Aversê wa afa so a lingbi aChrétien abungbi ndo oko?

⁶ Bible afa so a lingbi aChrétien abungbi ndo oko (1 aCor. 14:23; aHéb. 10:24, 25). Me ti duti beoko, a lingbi e sara ye mingi ahon gi ti duti ndo oko, tongana ti so azo ayeke duti ndo oko na gara wala na ndo ti pikango ndembo. E yeke duti beoko tongana e sara ye alingbi na ye so Jéhovah afa na e nga e zia si yingo vulu ti Nzapa amû maboko na e ti ga nzoni ahon ti kozo.

7. Tongana nyen la e lingbi ti “bata beoko ti yingo”?

⁷ Na lege ti sandaga ti Jésus, Jéhovah adiko aChrétien so a soro ala ti gue na yayu azo ti mbilimbili tongana amolenge ti lo nga azo so ayeke ti ambeni ngasangbaga tongana akamarade ti lo. Atâa so kue, na ngoi kue so e ngbâ na fini na yâ ti dunia so, tënë ayeke londo na popo ti e na amba ti e (aRom. 5:9; Jacq. 2:23). A yeke ndali ni la Bible awa e ti hinga ti ‘kanga bê na amba’ ti e. Me nyen la a lingbi e sara ti duti beoko na aita ti e? A lingbi e manda ti “sara ye lakue na tâ be-ti-molenge nga na ngangu pëpe”. Paul awa nga e ti sara ngangu ti ‘bata beoko ti yingo na yâ ti kamba ti siriri so abungbi e oko.’ (Diko aÉphésien 4:1-3.) Ti sara ye alingbi na wango so ahunda ti tene e woko tere ti e na gbe ti ngangu ti yingo ti Nzapa nga ti yeda ti tene yingo ni asara si e lë lengo ni. Lengo ti yingo ni ayeke mû maboko na e ti leke tënë na popo ti e na amba ti e. A yeke sara si e duti beoko. Me akusala ti mitele ayeke ga na kangbi.

8. Na lege wa akusala ti mitele aga na kangbi?

⁸ Bâ tongana nyen “akusala ti mitele” ayeke ga na kangbi. (Diko aGalate 5:19-21.) Lango-sioni ayeke kangbi zo na Jéhovah nga na congrégation. Gingo koli wala wali nde ayeke ga na kota vundu na yâ ti sewa nga alingbi ti kangbi amolenge na babâ wala mama ti ala; a lingbi nga ti sara si mbeni zo akangbi na koli wala wali ti lo so asara ye ti sioni ni pëpe. Sioni ye asara si a yeke ngangu ti duti beoko na Nzapa nga na azo so aye zo ni. Tongana mo ye ti mû ambeni ye use ti collé ni na tere ti mba, a lingbi saleté aduti na lê ti aye ni use kue pëpe tongaso si a gbu tere. Sarango sioni ye na kamene pëpe afa so zo ake vîi ti sara ye alingbi na andia ti Nzapa so ayeke mbilimbili. Tanga ti akusala ti mitele ayeke kangbi yâ ti azo nga ayeke kangbi ala na Nzapa. Asarango ye tongaso ague tâ nde na sarango ye ti tere ti Jéhovah.

9. Atënë wa e lingbi ti hunda tere ti e na ni ti bâ wala e yeke “sara ngangu ti bata beoko ti yingo”?

⁹ Tongaso, a lingbi e oko oko e hunda tere ti e: ‘Na lege wa mbi yeke sara kue ‘ti bata beoko ti yingo na yâ ti kamba ti siriri so abungbi e oko’? Mbi yeke sara ye tongana nyen tongana akpale alondo? Mbi yeke gi ti sara tënë ni na gbâ ti akamarade ti mbi ti tene ala mû mbage ti mbi? Mbi yeke ku ti tene a-ancien la aleke kpale ni na mbi ahon ti tene mbi wani mbi sara ngangu ti kiri ti duti na siriri na zo ni? Tongana mbi hinga so mbeni zo ayeke na tënë na mbi, mbi yeke kpe lo kpengo tongaso si e sara lisoro na ndo ti tënë ni ape?’ Tongana e sara mbeni oko ti aye so, e fa so e sara ye ague oko na ye so Jéhovah aleke ti sara ti bungbi azo kue tongana mbeni sewa oko so ayeke na gbe ti komandema ti Christ la?

10, 11. (a) Ngbanga ti nyen a yeke kota ye ti duti na siriri na aita ti e? (b) Nyen la e lingbi ti sara ti ngbâ ti duti na siriri nga ti wara tënë nzoni ti Jéhovah?

¹⁰ Jésus atene: “Tongaso, tongana mo yeke ga na matabisi ti mo na gbele gbalaka, na kâ mo dabe ti mo so ita ti mo ayeke na mbeni tënë na tere ti mo, zia matabisi ti mo kâ na gbele gbalaka ni na mo gue. Leke tënë na ita ti mo kozoni, na pekoni tongana mo kiri awe, mû matabisi ti mo ni. Duti nduru ti leke tënë hio.” Jacques atene so “a yeke lu ngongoa ti lengo ti ye so ayeke mbilimbili na yâ ti siriri ndali ti ala so ayeke sara si siriri amaï.” (Jacq. 3:17, 18). Ni la, e lingbi pëpe ti ngbâ ti duti na nzoni tambela tongana siriri ayeke dä pëpe.

¹¹ Na tapande, na yâ ti ambeni kodoro so bira ayeke lani dä, tongana a kangbi yâ ti sese ni ota, mbage ni oko azo alingbi ti fâ yaka dä pëpe ndali ti alê ti ngombe so a lu na yâ ti sese ni. Tongana mbeni lê ti ngombe asungba na mbeni ndo so azo ayeke fâ yaka dä, azo ni ayeke dö ndo ni azia nga a yeke ngangu na azo ti wara kua na yâ ti akete kodoro wala ti wara kobe na yâ ti agbata. Legeoko nga, a yeke duti ngangu na e ti ngbâ ti maï sarango ye ti e ti aChrétien tongana sarango ye ti tere ti e asara si a yeke ngangu na e ti duti na siriri na aita ti e. Ye so asara si e yeke tongana alê ti ngombe so a lu ni na yâ ti sese. Me, tongana e yeke nduru ti pardone amba ti e nga e sara ye ti nzoni na ala, e kue e yeke duti na siriri nga e yeke wara tënë nzoni ti Jéhovah.

12. Na lege wa a-ancien ayeke mû maboko na e ti duti beoko?

¹² Akoli so ayeke “tongana amatabisi” ayeke mû nga maboko na e ti “ga oko na yâ ti mabe”. (aÉph. 4:8, 13). Ye so aye ti tene so a-ancien ayeke mû maboko na congrégation ti ngbâ beoko. Ala yeke mû maboko na e ti duti na sarango ye ti aChrétien ahon ti kozo na ngoi so e na ala e yeke sara kua so Jéhovah amû na e nga na ngoi so ala mû na e wango na yâ ti Bible (aÉph. 4:22-24). Na ngoi so a-ancien amû wango na mo, dabe ti mo so Jéhovah la asara kusala na ala ti leke mo ti duti na fini na yâ ti fini dunia. Nga, ala a-ancien, ala bâ si lege so ala yeke mû wango na aita afa so ala ye ti mû maboko na aita ni.​—aGal. 6:1.

“SARA NZONI NA MBA”

13. Nyen la ayeke si tongana e sara ye pëpe alingbi na wango so ayeke na aÉphésien 4:25-32?

¹³ A-Éphésien 4:25-29 afa ambeni mbilimbili sarango ye so a lingbi e kpe ni. A yeke aye tongana tenengo mvene, sarango ngonzo ahon ndo ni wala dutingo zo ti goigoi, nga tenengo afungo tënë ahon ti tene atënë so ayeke nzoni nga so akpengba zo. Tongana mbeni zo asara ye pëpe alingbi na wango so, lo yeke mû vundu na yingo vulu ti Nzapa ndali ti so yingo vulu ayeke mbeni ngangu so asara si azo aduti beoko (aÉph. 4:30). Ti duti na siriri nga na beoko, a yeke nga kota ye ti sara ye alingbi na wango so Paul amû na pekoni. Lo tene: “Ala zi batango zo na bê, songo bê, ngonzo, dengo kongo na ndo ti zo na zonga, ala zia ni yongoro kâ, ala zi nga asioni ye kue. Me ala sara nzoni na mba, ala bâ mawa ti zo mingi, ala pardone mba na popo ti ala na bê ti ala kue legeoko tongana ti so Nzapa nga apardone ala na bê ti lo kue na lege ti Christ.”​—aÉph. 4:31, 32.

14. (a) Ngbanga ti nyen Paul awa e ti “sara nzoni na mba”? (b) Nyen la ayeke mû maboko na e ti sara nzoni na zo?

¹⁴ Paul awa e ti “sara nzoni na mba” ndali ti so peut-être na ambeni ngoi e sara nzoni na azo pëpe na a lingbi e sara ngangu ti kiri ti sara nzoni mingi. A lingbi e manda ti pensé so atënë ti bê ti amba ti e ayeke kota mingi ahon ti e (aPhil. 2:4). Na ambeni ngoi e ye peut-être ti tene mbeni tënë so ayeke sara si amba ti e ahe ngia wala ti bâ so e hinga ye mingi. Me tongana a yeke nzoni pëpe, a lingbi e tënë ni pëpe. Tongana e gbu li ti e kozoni si e sara tënë, a yeke mû maboko na e ti “sara nzoni na mba”.

MANDA TI NDOYE ZO NGA TI NE ZO NA YÂ TI SEWA

15. Tongana nyen la aÉphésien 5:28 amû maboko na akoli ti hinga lege so a lingbi ala mû tapande ti Christ?

¹⁵ Bible ahaka songo so ayeke na popo ti Christ na congrégation na songo so ayeke na popo ti mbeni koli na wali ti lo. Tapande ti Christ amû maboko na koli ti hinga so a lingbi lo fa lege na wali ti lo, lo ndoye wali ni nga lo bâ lege ti lo nzoni. Tapande ti Christ amû nga maboko na wali ti hinga so a lingbi lo woko tere ti lo na gbe ti koli ti lo (aÉph. 5:22-33). Tongana Paul atene: “A yeke tongaso si a lingbi akoli andoye awali ti ala tongana tere ti ala wani”, lo ye ti sara tënë ti nyen? (aÉph. 5:28). Atënë so lo tene kozo na tënë so afa lege so “Christ nga andoye congrégation na lo kä tere ti lo na kuâ ndali ti congrégation ni, . . . lo sukula ni na ngu na lege ti tënë ti Nzapa”. Tongaso, a yeke ti koli ti mû maboko na zo oko oko ti yâ ti sewa ti lo ti duti na nzoni songo na Jéhovah. Na sarango tongaso, lo yeke sara ye alingbi na ye so Jéhovah aleke ti sara so ayeke ti bungbi azo kue tongana sewa oko na gbe ti Christ.

16. Nyen la ayeke si tongana ababâ na amama asara kusala so Jéhovah amû na ala?

¹⁶ A lingbi ababâ na amama adabe ti ala so Jéhovah amû na ala kua ti bango lege ti amolenge ti ala nzoni. Mawa ni ayeke so, na yâ ti dunia ti laso, azo mingi “aye amba ti ala zo pëpe”. (2 Tim. 3:1, 3). Ababâ mingi asara sanka ti kua ti ala ti sewa, na amolenge ti ala abâ pasi na pekoni. Me Paul awa ababâ so ayeke aChrétien lo tene: “Ala son bê ti amolenge ti ala pëpe, me ala ngbâ ti bata ala na lege ti sengo ndo nga na awango ti gbotongo mê so alondo na Jéhovah.” (aÉph. 6:4). Sewa ayeke kozo ndo so na yâ ni amolenge ayeke komanse ti manda ti ndoye zo nga tongana nyen ti ne azo so ayeke na komandema. Ababâ na amama so afa aye so na amolenge ti ala asara ye ague oko na ye so Jéhovah aleke ti sara so ayeke ti sara si azo aduti beoko. A yeke nzoni ababâ na amama asara si amolenge ti ala abâ so a ye ala na yâ ti sewa ni. Tongaso, a lingbi ala kanga ndo ti ngonzo ti ala, ala dekongo na li ti amolenge ti ala pëpe nga ala tene pëpe atënë so ason bê ti ala. Tongana ala sara tongaso, ala yeke fa na amolenge ti ala tongana nyen ti ye azo nga ti ne azo so ayeke na komandema. Ye so ayeke leke amolenge ni ti duti na fini na yâ ti fini dunia.

17. A lingbi e sara nyen ti tiri na Zabolo?

¹⁷ A lingbi e hinga so Zabolo, kozo zo so abuba siriri na yâ ti dunia kue, ayeke sara kue ti buba yâ ti ngangu so e yeke sara ti sara ye so bê ti Nzapa aye. Azo mingi na yâ ti dunia ayeke sara tâ gi ye so Zabolo aye tongana ala sara divorce, ala mû tere koli na wali sân ti sara mariage nga ala sara mariage koli na koli wala wali na wali. Me e yeke mû pëpe peko ti asarango ye so azo ayeda na ni laso na yâ ti dunia. E yeke mû tapande ti Christ (aÉph. 4:17-21). Ti dö sese na Zabolo nga na asioni yingo ti lo, a lingbi e “yü aye ti bira kue so alondo na Nzapa”.​—Diko aÉphésien 6:10-13.

“NGBÂ TI TAMBELA NA YÂ TI NDOYE”

18. Ye wa a lingbi e sara ti duti beoko?

¹⁸ A lingbi e duti na ndoye tongana e ye ti duti beoko. E ndoye mingi ‘Seigneur ti e so ayeke oko,’ nga ‘Nzapa ti e so ayeke oko’, nga e ndoye amba ti e mingi. A yeke ndali ni la e yeke sara kue ti bata siriri nga na beoko ti e (aÉph. 4:3-6). Jésus asambela ndali ti ndoye so lo tene: “Mbi hunda ye na mo, gi ndali ti ala so pëpe, me nga ndali ti ala so ayeke mä na bê na mbi na lege ti tënë ti ala, si ala kue alingbi ti duti oko, legeoko tongana ti so mo, Babâ, mo yeke beoko na mbi na mbi yeke beoko na mo, si ala nga alingbi ti duti beoko na e . . . Na mbi sara si ala hinga iri ti mo na fade mbi yeke sara si a hinga ni, tongaso si ndoye so mo ndoye na mbi aduti na popo ti ala nga mbi duti beoko na ala.”​—Jean 17:20, 21, 26.

19. Nyen la mo yeke sara kue ti sara?

¹⁹ Ambeni ye ayeke peut-être na yâ ti sarango ye ti tere ti e so ayeke ngangu ti tene e changé ni, me a yeke nzoni ndoye apusu e ti sambela tongana wasungo psaume so atene: “Sara si mbi duti na bê oko ti kpe mbeto ti iri ti Mo.” (Ps. 86:11). A lingbi e sara kue ti dö sese na Zabolo na ngoi so lo yeke gi ti kangbi e na Babâ ti e so asara ye na ndoye nga na aita ti e. Nga, a lingbi e sara ngangu ti tene na yâ ti sewa, na fango tënë nga na yâ ti congrégation e ‘ga azo so asara ye tongana ti Nzapa, teti e yeke amolenge so lo ndoye e mingi’.​—aÉph. 5:1, 2.

[Foto na lembeti 29]

Lo zia matabisi ti lo na gbele gbalaka, lo gue ti leke tënë na ita ti lo

[Foto na lembeti 31]

Babâ na mama, ala fa na amolenge ti ala lege ti ne azo