E zia si a tingbi e nzoni na ndo oko
1 Fani oke bê ti mo adö na bango pendere kode so a sala na tele ti zo? (Ps. 139:14). Membre ti tele oko oko asala kusala maboko na maboko na ambeni mbage ti tele nde. Mbeti ti Nzapa ahaka kongregation ti aChrétien na mbeni tele so ayeke tambela nzoni. Na gbe ti Christ, Beli ni, ‘a tingbi amembre ti kongregation nzoni, na a leke ala ti sala kusala maboko na maboko na lege ti akutu kue so asala ye so a yeke na bezoin ni’. (aEph. 4:16a). Na lege so, Jéhovah alingbi ti sala kusala na awakua ti lo so ayeke beoko ti sala apendere ye.
2 Azo ti kongregation ti kozo siècle asala kusala “na beoko” na bingo bê na aye ti yingo na ti mitele so amanke ambeni na popo ti ala (Kus. 2:44-47). Na lege ti mungo maboko ti Jéhovah, nga na dutingo beoko, ala hon ndo ti asioni kangango lege (Kus. 4:24-31). Ala fa tokua ti Royaume na ndo kue so ala gue dä, na salango si nzo tënë amû ambage kue ti sese so a hinga na ngoi ni kâ (aCol. 1:23). Na ngoi ti fadeso, kongregation ti aChrétien asala nga a-oko ye tongaso, me so akono mingi ahon ti kozo, na dutingo beoko. Aye wa ayeke mû maboko ti sala ye gi oko tongaso?
3 Fango ye ti Nzapa abungbi e na ndo oko: Na ndo sese kue, vorongo ti e asala si e duti beoko. Tongana nyen? E yeda na lege so lê abâ, so Jéhovah ayeke sala na kusala ti mû kobe ti yingo “na l’heure ni so alingbi.” (Mat. 24:45). E yeke bâ nga na nene ni ‘azo so ayeke tongana amatabisi’ so Lo mû ala ti fa ye na yâ kongregation. Tongana e yeda na tâ be-ti-molenge na aye so Jéhovah aleke ti mû na e kobe ti yingo, ye so e hinga na ndo Mbeti ti Nzapa ayeke kono, na ayeke zingo na yâ e nzara ti mû tapande ti Jésus tongana adisciple ti lo. A lingbi e ngbâ lakue ti manda Tënë ti Nzapa, na salango ngangu kue ti “ga oko na yâ mabe”. (aEph. 4:8, 11-13). Mo yeke diko Bible lâ oko oko ti sala si dutingo beoko ti mo na lege ti yingo amaï?
4 Bungbingo na aChrétien asala si e duti beoko: Ndoye apusu e ti duti na nzoni songo na aita ti e na ngoi ti abungbi ti Chrétien. Na ngoi ti abungbi so, e yeke “bi bê ti e na ambeni zo na popo ti e”. (aHéb. 10:24, 25). A hunda pëpe ti bâ aita ti e gi na lê senge tongaso, me ti gi biani ti hinga ala nzoni, na bango ala tongana ti so Jéhovah ayeke bâ ala: ala yeke ye ti ngele mingi na lê ti lo (Ag. 2:7). Tongana e yeke mä lege so ala yeke fa mabe ti ala na gigi, ndoye ti e na mbage ti ala ayeke kono, nga dutingo beoko ti e ayeke kpengba. Aita ahinga mo tongana mbeni zo so ayeke ga lakue na abungbi ti kongregation?
5 Afon e na ya fango tënë: Fango nzo tënë na tele ti aita ti e ayeke bungbi e ti sala ye so bê ti Jéhovah aye. Bazengele Paul ayekia ‘afon lo na yâ kusala ti Royaume ti Nzapa’. (aCol. 4:11). Salango lisoro na ndo aye so asi, nga mungo maboko na popo ti e na yâ fango tënë ayeke mû lege na e ti sala kusala ti e ti Chrétien, na ti kpengba dutingo beoko ti e.—aCol. 3:14.
6 Yingo vulu nga abungbi e: Tongana e sala ngangu ti sala ye so bê ti Jéhovah aye, lo yeke mû na e yingo ti lo. A yeke mû maboko na e ti hon ndo ti akpale, na ti duti place oko na yâ beoko (Ps. 133:1). A yeke pusu e ‘ti duti na beoko ti yingo na yâ kamba ti siriri so akanga e oko.’ (aEph. 4:3). Zo oko oko na popo ti e so alë alengo ti yingo na yâ salango ye ti lo na mbage ti aita, lo lingbi ti maï beoko so ayeke na popo ti azo ti Nzapa.—aGal. 5:22, 23.
7 Salango kusala beoko na gbe ti mungo li ni ti Christ asala si ‘tele ni mveni amaï na akpengba na yâ ndoye.’ (aEph. 4:16b). Na ndo ni, a yeke mû gloire na Jéhovah, ‘Nzapa so amû siriri’.—aRom. 16:20.