Lo yeke ti sewa ti Caïphe

Na ambeni ngoi, azo ti gingo aye na gbe ti sese awara ambeni ye so mbeni mbeti so a sara na tere ti aye ni so afa so aye ni ayeke ti mbeni zo so Bible asara tënë ti lo. Na ambeni ngoi nde, ala wara ambeni ye so ayeke ti fami ti mbeni zo so Bible asara tënë ti lo. Na tapande na ngu 2011, awandara ti Israël asara tënë ti mbeni ye so afa so mbeni zo so Bible asara tënë ti lo giriri ayeke dä biani. A yeke mbeni ngbene sanduku ti kûa so a leke ni pendere so asara ngu 2000 awe so a mû gi abio ti mbeni kuâ so afun kue awe si a zia na yâ ni.

A sara mbeti na tere ti sanduku ni atene: “Miriam molenge-wali ti Yeshoua, molenge ti Caïphe, prêtre ti Maazia so ayeke zo ti Beth Imri.” Kota prêtre ti aJuif so ayeke lani na popo ti azo so afâ ngbanga na ndo ti Jésus na afâ lo ayeke Caïphe (Jean 11:48-50). Wasungo mbaï Josèphe Flavius atene kota prêtre so ayeke “Joseph, so a iri lo Caïphe.” Sanduku so ayeke biani ti mbeni fami ti lo. Teti so mbeti so ayeke na tere ti mbeni sanduku so a wara ni kozo afa so sanduku ni ayeke ti kota prêtre ni wani so iri ti lo ayeke “Yehosef bar Caiapha”, wala Joseph molenge ti Caïphe,a Miriam ayeke lani mbeni fami ti Caïphe.

Mbeni buku (Israel Antiquities Authority) afa so a gbû lani sanduku ti abio ti Miriam so na maboko ti ambeni zo so anzi aye na yâ ti mbeni ngbene dû ti kuâ. Agingo nda ti ye na ndo ti sanduku ti abio so nga na mbeti so ayeke na tere ni afa biani so abio so ayeke abio ti Miriam.

Sanduku ti abio so afa nga na e mbeni fini ye. Agroupe ti aprêtre so ayeke changé tere lani na yâ ti temple ti Jérusalem ayeke 24. Sanduku so asara tënë ti Maazia so ayeke ti tanga ti groupe ni (1 Chron. 24:18). Buku ni atene mbeti so a sara na tere ti sanduku ti abio ni afa so “sewa ti Caïphe ayeke lani ti groupe ti Maazia.”

Mbeti so ayeke na tere ti sanduku ni asara nga tënë ti Beth Imri. E lingbi ti fa nda ti tënë so na alege use. Kozo ni ayeke so, Beth Imri ayeke iri ti azo ti sewa ti mbeni prêtre: amolenge ti Immer ti koli (Esdras 2:36, 37; Néh. 7:39-42). Use ni ayeke so, Beth Imri ayeke ndo so a dü Miriam dä wala ndo ti azo ti sewa ti lo kue. Atâa ye ni ayeke tongana nyen, sanduku ti abio ti Miriam afa polele so Bible asara tënë ti azo so ayeke na yâ ti asewa so ayeke lani dä biani.