Zingongo ti Jésus azi lege ti fini ti lakue lakue na azo!

ZINGONGO ti Jésus na kuâ ayeke mbeni senge ye so abâ gi azo ti ândö me a bâ e laso pëpe? Bazengele Paul afa so ayeke mbeni senge ye pëpe tongana lo tene: “A zingo Christ na kuâ awe, na lo yeke kozo li ni ti azo so akui. Teti so kuâ aga na lege ti koli oko, zingongo ti akuâ aga nga na lege ti koli oko. Legeoko tongana ti so na yâ ti Adam ala kue akui, tongaso nga na yâ ti Christ ala kue ayeke wara fini.”​—1 aCorinthien 15:20-22.

Jésus azingo na kuâ na lango 16 ti nze so a iri ni Nisan ti ngu 33 ti ngoi ti e. Na lango ni so ajuif ayeke ga ka na akozo li ti kobe ti yaka ti ala na sandaga na Jéhovah na temple ti Jérusalem. Tongana lo iri Jésus kozo li ti ye, Paul aye ti tene so a yeke zingo nga ambeni zo na kuâ na peko ti lo.

Atënë so Paul atene na pekoni afa aye so zingongo ti Jésus na kuâ ayeke ga na ni na azo, lo tene : “Teti so kuâ aga na lege ti koli oko, zingongo ti akuâ aga nga na lege ti koli oko.” A yeke ndali ti Adam si e wara siokpari ni la e kue e yeke kui so. Me na mungo fini ti lo so alingbi kue na sandaga, Jésus azi lege na azo ti sigigi na gbe ti ngbâa ti siokpari nga na kui, na lege ti so lo zingo na kuâ. Na aRomain 6:23, bazengele Paul afa pekoni pendere mingi, na nduru tënë, lo tene: “Teti futa ti peko ti siokpari ayeke kuâ, me matabisi so Nzapa amû ayeke fini ti lakue lakue na lege ti Christ Jésus Seigneur ti e.”

Jésus wani afa nzoni so kuâ ti lo nga zingongo ti lo na kuâ ayeke ga na ni na e. Lo sara tënë na ndo ti lo wani, lo tene: “A lingbi a yä Molenge ti zo na nduzu nga, si zo kue so amä na bê na lo alingbi ti wara fini ti lakue lakue. Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.”​—Jean 3:14-16.

Tara ti bâ mbeni gigi ti lakue lakue so pasi, songo tere wala vundu ayeke dä pëpe! (Apocalypse 21:3, 4). So tâ pendere gigi si ayeke ku e! Mbeni wandara asara tënë na ndo ni, lo tene: “So adû ti kuâ adabe ti e so fini ti zo ayeke ninga ape, zingongo ti azo na kuâ afa biani nga so kuâ ayeke gi teti kete ngoi.” Tâ tënë, zingongo ti Jésus na kuâ amû lege na azo ti wara fini ti lakue lakue!