“I Lango Pepe”
1 Na peko ti so lo fa aye ti dongo bê so ayeke si na lâ ti nda ni ti bungbi ti aye ti fadeso, Jésus awa adisciple ti lo ti “lango pepe.” (Marc 13:33, NW) Ngbanga ti nyen a lingbi aChrétien alango pepe? Ngbanga ti so e yeke na yâ ngoi ti sioni ahon ti mbaï kue ti azo. A lingbi e lango pepe na lege ti yingo. Langongo na lege ti yingo aye ande ti tene so e ba tongana ye ti ngele pepe kusala so Jéhovah amu na e na ngoi ti nda ni so. Kusala ni so ayeke so wa?
2 Jéhovah ahunda na awakua ti lo ti fa na ndo lê sese kue nzo tene na ndo Royaume ti lo so ayeke oko beku teti azo. Na lege ti salango kusala ti e maboko na maboko na bungbi ti Nzapa, e yeke fa so e yeke atâ Chrétien so ahinga ngoi so e yeke na yâ ni, nga na nene ti mu maboko na amba ti e ti mä “tene so amu fini ti lakue lakue.” (Jean 6:68) Mungo mbage ti e na wâ na kpengba kusala so ayeke fa so e yeke lango pepe na lege ti yingo.
3 Na kota nzala ti fa tene: A lingbi aTémoin ti Jéhovah so e yeke aduti na nzoni bango ndo na mbage ti kusala ti fango tene. Ndoye teti Nzapa na teti mba ti e ayeke pusu e ti mu mbage na fango tene. (1 aCor. 9:16, 17) Na salango tongaso, e yeke sö ande e mveni nga ala so amä e. (1 Tim. 4:16) E zia na bê ti e ti mu mbage na ni lakue, a lingbi na ngangu ti e, na mungo ngbonga mingi ahon na yâ fango tene ti Royaume ti Nzapa, so ayeke yanga-ti-komande ti nzoni ahon kue so azo alingbi zia beku ti ala dä.
4 Mbeni kpengba ye afa na e nene ti mungo mbage na kusala so hio: kota ye ti vundu ayeke sungba na ngoi so e yeke ngbâ ti sala kusala so. Teti so e hinga pepe lango ni na l’heure ni, a lingbi e lango pepe na e duti ndulu na ngoi kue, na ziango bê ti e na Jéhovah na yâ sambela. (aEph. 6:18) Fango tene angbâ ti gue na li ni, me fade lango ni ayeke ga ande so kota kusala ti fango tene ti mbaï kue ti azo ayeke si ande na nda ni.
5 E bata nzoni komandema ti Jésus so ahunda na e ti “lango pepe.” So ayeke ye ti kota mingi ahon laso. Zia e sala ni, na hingango so ngoi ni ayeke hon hio. Lâ na lâ, e duti na donzi na lege ti yingo nga na wâ na yâ kusala teti Jéhovah. Biani, “a lingbi e bata, e duti na donzi.”—1 aThes. 5:6.