Kota Bungbi ti Circonscription: Fini Kapa Ni
Mbeni fango nda ti mbito ayeke “kota kpengo mbito, mbilimbili ti Nzapa.” Ye so afa peko ti mbito so ayeke na lege ni, so a sala tene ni na yâ Mbeti ti Nzapa tongana “tongo nda ti ndara.” (Ps. 111:10, NW) Nde na so, mbeni mara nde ti mbito akomande sese ti Satan so angoro e. Tongana nyen e lingbi ti kpe sioni bibe so na ngoi so e yeke lë mbeni kota kpengo mbito ti Jéhovah? Fini kapa ti kota bungbi ti circonscription teti ngu ti kusala ti ngu 2002 asala tene na ndo hundango tene so. Kota li ti tene ni ayeke “I Kpe Mbito ti Nzapa na I Mu Gloire na Lo.” (Apoc. 14:7, NW) Fade e yeke hinga tongana nyen kpengo mbito ti Nzapa aga na ye ti nzoni na e nga na bungbi ti lo na alege mingi.
Atä so kpengo mbito alingbi ti ndu gingo bê wala salango ye na wâ mbeni pepe nga kiringo na peko na gbele aye ti ngangu, Bible atene: “Ngia ayeke na azo kue so akpe mbito ti L’Eternel.” (Ps. 128:1) Fade kapa ti kota bungbi ni ayeke fa na e tongana nyen e lingbi ti luti nzoni na gbele akpale ti ngbâ na yâ tâ vorongo. Fade e yeke ba tongana nyen ti mu maboko na afini zo ti lë mara ti kpengo mbito tongaso ti Nzapa, so ayeke na lege ni, so fade ayeke pusu ala ti ye ti sala na lo na bê, na âme, na bibe, nga na ngangu ti ala kue. (Marc 12:30) Kozo lango ni ayeke hunzi na lege ti diskur ti surveillant ti district “Ga Ndulu Mingi na Azo so Mo Ndoye Ala.” Lo yeke fa ande tongana nyen e lingbi ti sala lakue hange na ngangu ti Zabolo ti gue na e yongoro na Jéhovah, sewa ti e, nga na aita ti e aChrétien.
“Kpe Mbito ti Jéhovah, Pepe ti Azo” ayeke kota li ti tene ti diskur na mbage osio na lango use ni. Fade a yeke fa ngbanga ti nyen na tongana nyen a lingbi e hon ndo ti mbito kue so akanga lege na e ti sala kusala ti e ti fango tene kue wala ti bata be-biani ti e na nzoni yingo-ti-hinga na ekole nga na ndo ti kusala. Kota diskur “Kpe Mbito ti Nzapa na Bata Akomandema ti Lo” aluti na ndo ti molongo ti aye so asi, so a sala tene ni na Apocalypse chapitre 14. Fade kota bungbi ti circonscription ni ayeke hunzi na lege ti mbeni fango lege so akpengba zo ti “Ngbâ ti Tambela na yâ Kpengo Mbito ti Jéhovah.”
Ekole ti Kusala ti Théocratie, tapande ti Bungbi ti Kusala, diskur ti batême, na ndulu tene ti Tour ti Ba Ndo ayeke ambeni mbage ti kapa ni so mo ye ande pepe ti manke ni. Tisa awamandango Bible ti mo ti gue na mo. A lingbi zo kue so aye ti wara batême asala tene ni hio na lege kue so azi na surveillant-président. E kue e ye ti fa na gigi kpengo mbito ti Jéhovah so ayeke na lege ni nga ti mu gloire na lo na gango na mbage kue ti kapa so ayeke nde!