Mu Gonda na Jéhovah na Lege ti Anzo Kusala
1 Tongana mbeni ngangu pupu ti ngu awara mo na lege, so tâ ye ti dengo bê ti wara ndo ti bata tele! Tongana da ni ayeke na wâ na a yeke nzoni nga tongana azo ti ndo ni ayamba zo na lege ni, mo yeke na ngia ti ngbâ na ndo so. Kusala ti fango tene ti Royaume ayeke gue na azo na mara ti ndo ti batango tele tongaso yongoro na bungbi ti aye ti Satan. Tambela ti e ti lâ oko oko alingbi ti mu maboko na azo ti ba tongana nyen nzoni ndo so ayeke ye ti gboto zo? Biani, teti Jésus atene so fade azo ‘aba nzo kusala ti e, na ala mu gloire na Babâ ti e so ayeke na yayu.’—Mat. 5:16.
2 E lingbi ti tambela tongana nyen si akusala ti e agboto azo na mbage ti Jéhovah nga na bungbi ti lo? Na ziango si atene ti Jésus so afa pekoni na Luc 6:31 nga na 10:27 aleke fini ti e lâ oko oko. Fade ye so ayeke pusu e ti bi bê na lege ti ndoye na ndo amba ti e azo, ye so azia kangbi na popo ti e na sese so adë dengo nga so azo ni abi bê na mba ti ala pepe.
3 Mbeni ita-wali na ndo mbeni mangboko aba mbeni maseka wali so tambelango ti mangboko ni asala si tele ti lo aso mingi na lo lingbi bata kete molenge ti lo pepe. Ita-wali ni ahunda na lo ti bata molenge ni. Tongana wali ni ahunda tongana nyen lo lingbi ti kiri singila na lo teti ye so lo sala, ita-wali ni atene: ‘Mbi gbu gere ti mo, mä aTémoin ti Jéhovah na ngoi ti peko so ala yeke ga na da ti mo.’ Wali ni asala tongaso, na fadeso lo na koli ti lo ayeke aTémoin. Biani anzo kusala andu la ni mingi salango ye ti ala na gbele tokua ti Royaume.
4 A ndu fini ti e kue: Tambela ti e na yâ vaka ti e, na place ti kua wala na ekole, nga na yâ ti angoi ti gbotongo tele asala si azo aleke tene na bê ti ala na ndo e nga na ndo lege ti vorongo ti e. Tongaso, a lingbi e hunda tele ti e mveni: ‘Azo ayeke ba mbi nga na sewa ti mbi tongana nyen? Azo so ayeke ndulu na mbi aba so da ti mbi nga na gbagba ni ayeke na saleté pepe nga abata ni nzoni? Afon e na ndo ti kusala wala na ekole aba e tongana azo so ayeke ga lakue na l’heure na ayeke sala ye na bê kue? Fade azo ayeke ba so yungo bongo ti e nga na kode ti sala na kuali ti e ayeke nzoni nga na lege ni?’ Anzo kusala ti e alingbi ti sala si vorongo Jéhovah anzere mingi ahon na lê ti azo.
5 Pierre agboto mê so fade a yeke he aChrétien na ngia. (1 Pi. 4:4) A lingbi e hinga biani so tambela ti e asala si azo asala sioni tene na ndo ti e pepe. (1 Pi. 2:12) Tongana akusala ti e ti lâ oko oko amu gonda na Nzapa so e voro, biani e yeke duti ande tongana alampe so azia na nduzu, na so ayeke gboto azo na mbage ti ndo ti bata tele so Jéhovah aleke.—Mat. 5:14-16.