Sala Nzoni na Zia Azo Agonda Mo!

¹ “Ala yeke azo so ayeke kpö, na ade mbi ba so lâ oko pepe na mbage ti ambeni zo nde.” “A yeke ye ti mungo ngia ti yamba azo so.” So ayeke tapande ti apendere tene mingi ti azo so aba e na peko ti akota bungbi ti district ti ngu so ahon. Atene so agboto lê na ndo nzo iri so e yeke na ni tongana mbeni bungbi. (aProv. 27:2; 1 aCor. 4:9) Na nda ni, atene ti sepela so ague na Jéhovah. (Mat. 5:16) Mbeni pendere lege nde ti sepela Nzapa ayeke fadeso na gbele e na Kota Bungbi ti District ti ngu so “Awafango Tene ti Nzapa.”

² Ngu oko oko e yeke wara adango bê ti nzobe na ndo mbilimbili tambela so a lingbi e duti na ni na kota bungbi. Ngbanga ti nyen? Ngbanga ti so na ngoi so bango ndo, yungo bongo, nga na salango ye ti sese so angbâ lakue ti kiri na peko, e ke ti mu pekoni. E ye pepe si a buba nzo iri so e yeke na ni. (aEph. 2:2; 4:17) Zia e bata na li agbotongo mê so ge.

³ E sala nzoni: na ando ti lango ti e: Tongana e lango na ndo ti aita wala na ndo ti azo so asala nzala ti tene ni, zia e sala ye alingbi na andia ti ala, na lingo pepe na yâ chambre ti ala so a leke ni pepe teti e. Zia e ba si amolenge ti e agbu nda ti awango-tene so na ala sala ye alingbi na ni.

⁴ Bê ti azo adö tongana ala ba apendere ti e asala ye na yekiango ndo na amä yanga. (aEph. 6:1, 2) Ababâ na mama, i ba lege ti amolenge ti i si ala buba pepe nzoni dutingo ti ambeni zo nde. A lingbi e kue e kpe ti kanga ayanga-da na ngangu wala ti sala akota bruit, mbilimbili tongana l’heure ahon na lakui.

⁵ E sala nzoni: na ndo ti Kota Bungbi: A ba so ambeni ita ake ti sala kusala maboko na maboko na azo so aga na kota bungbi ni, na même ala sala tene na ala na lege so alingbi na mbeni Chrétien pepe. Teti so ala bata pepe awango-tene ti aita na teti so ndia amu lege pepe ti tene akutukutu aluti na ndo ni so, lapolisi agbu akutukutu ti ambeni ita. Biani, bibe ti mbi kozoni si afa pepe mbeni zo tongana mbeni wasalango nzoni, nga a mu gonda pepe na Jéhovah Nzapa. Tongaso, zia e sala ye na ndoye, na be-nze-pepe, nga e sala kusala maboko na maboko na aita.​—aGal. 5:22, 23, 25.

⁶ Na ndo ti kota bungbi ni, a ba ambeni ita-koli na aita-wali na mungo loro nga na pusungo azo ti wara “anzoni” ndo ti duti. A wa e ti ga gi na mbeni kete kobe. Salango tongaso aga na aye ti nzoni mingi. Ti te kobe kete ayeke mu ande maboko na e ti lango pepe na ngoi ti bungbi na peko ti hungo tele. Ye oko, fani mingi, tengo kobe mingi na midi asala si zo alango. E yeke wara nga ngoi mingi ti sala lisoro na aita ti e ti koli na ti wali teti so e yeke na bezoin pepe ti gi bê ti e ti zi na ti leke gbâ ti akungba ti tongo kobe nga na mara ti akobe nde nde.

⁷ E sala nzoni: na lege ti yungo bongo ti e nga na lekengo kua-li ti e: Na peko ti mbeni oko ti akota bungbi ti district ti ngu so ahon, wayinda ti mbeni mbeti-sango ti mbeni kota gbata asû na mbeti: “Ye so apika bê ti mbi mingi ahon ayeke salango ye ti aTémoin ti Jéhovah. So tâ ye ti mungo ngia ti ba azo mingi asala ye na nengo tele nga na yekiango ndo. Asewa ngbangbo mingi so ayü bongo nzoni so aduti fä ti azo mingi mingi ti amara nde nde na ti akete mara nde nde alï yeke na yâ lando ni. Salango ye ti ala ayeke nde mingi na ti tanga ti azo so alï na yâ lando ni. Biani, aTémoin ayeke nde mingi na azo mingi. Asioni salango ye ti azo tongana ala yeke na ndo oko aga mbeni ye so a yeke ba ni lakue. . . . Biani, a yeke ye ti mungo ngia ti ba aTémoin ti Jéhovah.” Zia e mu lege lâ oko pepe na yungo bongo ti e nga na kode ti salango kua-li ti e wala tambela ti e ti sala si pendere dutingo ti kota bungbi na lege ti yingo akiri na peko.​—aPhil. 1:10; 1 Tim. 2:9, 10.

⁸ E sala nzoni: na ngoi ti batême: Azo so aye ti wara batême aye ti ne ngoi so mingi. Fade yungo bongo ti batême so ayeke na lege ni ayeke fa so i yekia mingi dutingo nzoni-kue ti ngoi ni. A yeke duti nzoni ahon teti azo so amu li ni na yâ mandango Bible ti kiri ti ba na awamandango ye ti ala “Atene so Azo Ahunda” na yâ La Tour de Garde ti kozo lango ti avril ngu 1995 kozoni si ala gue na kota bungbi ni.

⁹ Salango ye ti e na lege ni nga tambela ti e so alingbi na ye so Nzapa ahunda asala tene ti témoin ti atene ti mabe ti e ti Chrétien na asala si a yeke duti ngangu pepe na azo ti be-ti-mbilimbili ti yeda na tâ tene. Tongaso, zia e ‘ngbâ ti sala nzoni’ na zia azo asepela e na ngoi so e gue na Kota Bungbi ti District “Awafango Tene ti Nzapa.”​—aRom. 13:3.