“I gi lege lakue ti sala nzoni”
1 Fini ti Chrétien aye ti tene ‘ti gi lakue ti sala nzoni na mbage ti azo kue.’ (1 aThes. 5:15). Tongana e gue na assemblée ti e ti district, alege mingi ayeke dä ti tene e sala ye ti nzoni na azo. Na ngoi ni so, azo mingi ayeke bâ e, na azo kue so aga ndulu na e ayeke bâ e na nzoni lê wala pëpe, gi na lege so e sala na ye na mbage ti ala. Ti bata nzoni iri ti aTémoin ti Jéhovah, a lingbi asalango ye ti e afa na gigi so e “yekia azo kue.” (1 Pi. 2:17). Ye so andu nga ti ‘ti bi bê pëpe gi na ndo aye ti e mveni, me ti bi bê na ndo ye ti ambeni zo nga.’ (aPhil. 2:4). Zia e bâ tongana nyen tënë ni andu ndokua so abâ lege ti da ti lango na ngoi ti kota bungbi.
2 Mo pensé awe ti gi mbeni ndo ti lango dä na ngoi ti assemblée? Ambeni sewa ayeke tene so place angbâ mingi, na ala yeke hunda ande mbeni tongana ala si na place ti assemblée na jeudi wala vendredi na ndaperere. So ayeke na lege ni pëpe. Ti mo so mo gue ande ti lango na da ti ambeni zo wala ndo ti lango teti gbâ ti azo, bâ, ambeni dango bê ayeke ge: (1) Sû na lege ni Demande ti place ti lango hio tongana mo wara ni. (2) A lingbi wungo ti azo so mo ga na ala ahon pëpe so mo sû na ndo Demande ni. (3) Même tongana ndo ti lango ni alingbi pëpe na ti mo na kodoro, a yeke nzoni mo fa bê ti kiri singila teti ye so a mû na mo. Mo lingbi ti mû mbeni kete nginza na azo so ayamba mo ti futa na ngu wala na kuran, na so ayeke bibe ti kiringo merci. (4) Tongana mbeni kpale asi na ndo ti lango ni, gue hio mo bâ ndokua ti biröo ti Kota Bungbi ni. (5) Tongana ndokua ti biröo azia mo na mbeni place, so ndo ti lango ti aita-koli ayeke nde, na ti aita-wali ayeke nga nde, a yeke nzoni e kue e yeda na ye so a leke. Tongana mo yeke lango na hôtel, e hunda mo ti girisa pëpe atënë so ge: (1 )Duti na be-nze-pepe na yekia azo kue so asala kua na yâ hôtel ni. (2) Sala ye alingbi na andia ti hôtel na ndo salango kusala na aye kue so ayeke na yâ da ni. (3) Bata amolenge nzoni. Zia e kue e sala ngangu ti yekia droit ti ambeni zo, na ti tomba lakue peko ti ye so ayeke nzoni atâa tongana e lango na hôtel wala na da ti ambeni zo.
3 Fa na amolenge lege ti sala nzoni: Na ambeni ngoi, amolenge so a zia gi ala oko kota zo ayeke na tele ti ala pëpe na yâ ti ahôtel, wala na mbeni ndo ti lango nde aga na akpale (aProv. 29:15). Ambeni kpale ni ayeke si na ngoi so ababâ na mama ayeke na kua mingi ti sala, na ala zia amolenge ti ala gi ala oko na yâ chambre, wala na mbeni ndo nde na yâ hôtel ni. Azo so ayeke bâ lege ti hôtel ni wala mveni ti dä so ayamba agene ni ayeke kanga lege na ambeni molenge ti sala ambeni ye teti amolenge ni ayeke ga na wuluwulu ahon ndo ni. Amolenge tongaso ayeke kanga lege na ambeni gene, atâa aTémoin wala pëpe, ti duti nzoni. Tongana mo lango na da ti ambeni ita wala ti azo so asala nzala ti tâ tënë, a lingbi mo yeda na fango lege ti ala. Lï pëpe na chambre ti ala, wala na ndo so a mû lege na mo pëpe ti lï dä. E hunda mo ti sala kue ti tene amolenge ti mo agbu nda ti awango so, na asala ye alingbi na ni.
4 Ababâ na mama, kozoni si ngoi ti assemblée alingbi, a yeke nzoni ti mû mbeni ngoi ti kiri ti fa na amolenge ti i tambela ti Chrétien, so a lingbi ala fa na gigi na ngoi kue nga na ndo kue (aEph. 6:4). Na tapande, fa na ala so tâ ndoye ti Chrétien “asala kirikiri pëpe, agi ye ti lo mveni pëpe, aso fade pëpe.” (1 aCor. 13:5). Ababâ na mama alingbi ti fa ye so na ziango nzoni tapande teti amolenge ni. Amolenge, i lingbi ti sala nzoni ye na mango yanga ti ababâ na mama ti i, na bango na nene ni aye ti zo so ayamba i, nga na yekiango azo so ayeke ndulu na i (aCol. 3:20). Tongana e kue e sala ngangu ti sala nzoni na azo kue, e yeke “sepela nzo tënë ti Nzapa Sauveur ti e na yâ ye kue.”—Tite 2:10.
5 Tongana e yeke na nzoni tambela, a yeke pëpe gi ambeni zo si ayeke sala nzoni tënë ni, me même ala so ayeke kasa e ka ndali ti ambeni senge senge ye ayeke bâ ni nga. Atâa tongana e yeke tambela na lege, e yeke na ndo ti tengo kobe, wala tongana e mû angoi kue so lege azi ti fa tënë, atâa ye wa e sala na ngoi ti kota bungbi ni wala na yâ kodoro ni, a lingbi tënë nga asalango ye ti e afa na gigi so e ye ti gi lege ti sala ye ti nzoni.
[Encadré na lembeti 4]
Dabe na ye so:
■ Sû na ngoi, nga na lege ni Demande ti ndo ti lango.
■ A lingbi wungo ti azo so mo ga na ala ahon pëpe so a fa na yâ Demande ni.
■ Sala kusala maboko na maboko na ndokua ti biröo ti Kota Bungbi ni.
■ Yekia azo kue so asala kua na yâ ti hôtel ni wala zo so ayamba mo.