E Duti Lakue na Nzoni Tambela so Amu Gloire na Nzapa
1 Na ndo kue so e yeke dä, tambela ti e na yungo bongo ti e ayeke sala tene ti témoin na ndo e nga na ndo Nzapa so e yeke voro. Me ye so ayeke polele ahon na ngoi ti akota bungbingo tele ti azo ti Nzapa so na angoi ni, azo ayeke ba e. Tongana e yeke na nzoni salango ye, iri ti Jéhovah ayeke wara gonda. (1 Pi. 2:12) Nde na so, asalango ye so alingbi na ni pepe wala asalango ye na gbungo li pepe ti ambeni zo alingbi ti ga na zonga na ndo iri ti Nzapa nga na ndo azo ti lo. (Zo-ti. 9:18b) Teti e hinga so azo so angoro e ayeke fâ ngbanga na ndo bungbi ti e nga na Nzapa so e voro na lege ti tambela ti e, a lingbi e bata nzoni mbilimbili ti “sala ye kue teti gloire ti Nzapa.”—1 aCor. 10:31.
2 Mbeni nzoni tambela na hôtel: Mingi ni, salango ye na lege ni, salango ye nzoni na dutingo na saleté pepe ti aTémoin ti Jéhovah ayeke pika bê ti awakua ti a-hôtel nzoni mingi. Mbeni koli afa tene so na ndo ambeni sewa ti aTémoin so alango na yâ hôtel ti lo: “Amolenge ti aTémoin ti Jéhovah ayeke amolenge so a bata ala nzoni mingi ahon, so mbi de ti ba lâ oko pepe! Ala yeke yü bongo pendere mingi, ala yeke kpe mbito ti zo, ala yeke yekia zo na ala yeke na apendere salango ye; nga, ala ga na akpale oko pepe. I lingbi biani na gonda teti amolenge ti i. E wara ngia mingi ti yamba ala na ndo ti e.” Tongana azo so ayeke na tele ti e asala tene na bê ti ala tongaso, a fa so ala ba ndoye na yekiango ndo so ayeke na popo ti awakua ti Nzapa.
3 Na mbeni mbage nga, ambeni tene so alondo na azo ti kua ti ambeni hôtel nde afa so e yeke wara kpale lakue teti ambeni zo so ayeke tambela na lege ti ndara oko pepe wala so ayeke sala ye ahon ndo ni na aye ti a-hôtel. Salango tongaso ayeke ga na akpale, na atene ti kasango ndo so alingbi fade ti duti dä pepe. Ambeni mveni ti hôtel ayeke dema teti so ambeni molenge na ambeni pendere ayeke sala aye kirikiri na ayeke dekongo, wala ababâ na mama ti ala azia ala gi ala oko ndulu na piscine wala na ambeni ndokua nde ti salango ngia.
4 Mingi ti a-hôtel afa polele ambeni ndia so a hunda na azo so alango na yâ a-hôtel ni ti sala ye alingbi na ni. Ambeni ita ague nde na andia so na salango ye pepe alingbi na dutingo kpö ti ando ni wala na tongo kobe na yâ akubu. Ambeni wabango lege ti hôtel atene na Société so ti to kobe, tongana a gbanzi ti sala tongaso, ayeke mbeni lingu ti bubango yâ ti hôtel so a ba ni fani mingi. Na mbeni mbage, ye ayeke si so ambeni ye abuba na yâ ti akubu, me na mbeni mbage nga, fungo ti ndo ni so ayeke hon hio pepe akanga lege ti loué kubu ni teti alango mingi, même ayenga mingi. E yeke gi ande ti to kobe pepe na yâ ti akubu tongana a hunda mbilimbili pepe ti sala tongaso.
5 A lingbi e sala tâ ngangu ti sala kusala maboko na maboko na ye kue na amveni ti hôtel. Biani, e ye pepe ti sala si ye so aga na zonga na ndo azo ti Jéhovah. A lingbi e so e yeke aChrétien e sala ye na lege ni na yâ ye kue. A lingbi e hon pepe na ambeni bongo ti yâ ti da ni wala ambeni ye nde ti “dabe” na hôtel ni; salango tongaso ayeke duti biani nzi; na ngoi so e yeke hunda ti wara kubu wala so e yeke sû ambeti teti gango ti e, a lingbi e fa pepe mbeni wungo ti azo so ayeke lango na yâ kubu ni so ayeke nde na tâ wungo ti ala.
6 Mbeni yungo bongo so alingbi na kota bungbi: Atä ndo so e yeke dä, a lingbi e ba ni tongana mbeni kota Da ti Royaume na ngoi so assemblée ni ayeke tambela. A lingbi e yü bongo so alingbi tongana ti so e yeke gue na abungbi ti kongrégation ti e. Atä na ngoi ti abungbi ni wala na pekoni, a lingbi aita-koli legeoko na aita-wali akpe ti yü abongo so ayeke na lege ni pepe wala so agboto lê ti azo mingi ahon, so afa na gigi bibe ti sese so na so a yeke kanga lege ande na azo so ayeke ba e ti ba so e yeke nde na mbeni lege so ayeke nzoni. A lingbi aita-wali abata si mara ti a-jupe so ala yü na yongo ti a-jupe ni, wala ti bongo ti ala kue aduti na lege ni. (1 Tim. 2:9, 10) Atä e yeke na assemblée, na hôtel, na ndo ti tengo kobe wala tongana e gue ti vo aye, a lingbi e fa na gigi na ngoi kue so e yeke awakua ti Nzapa so aga na ye oko pepe ti pikango gere.—2 aCor. 6:3.
7 Fade batême ayeke duti na samedi na ndapelele. La Tour de Garde ti kozo lango ti avril 1995, lembeti 30 afa salango ye so a lingbi e duti na ni na ngoi ni so. Lo tene a lingbi “e ba batême na nene ni. A yeke pepe ngoi ti de akongo, ti sala matanga wala ti sungba na kota ngia. Me a yeke nga pepe ngoi ti duti gi kpö wala ti sala mawa.” A yeke duti na lege ni pepe ti tene ala so ayeke wara batême, akoli wala awali, ayü abongo ti sukulango ngu so afa tele ti ala na gigi mingi wala so a gbu tele ti ala ngangu mingi. Tongaso, a lingbi azo kue asala si a ba batême ti aChrétien na nene ni nga na ngia.
8 Pierre adabe e na ‘mara ti azo wa alingbi e duti na tambela ti nzoni-kue nga na akusala ti dutingo ndulu na Nzapa.’ (2 Pi. 3:11) Na ngoi ti akota bungbi ti district “Awasalango Ye Alingbi na Tene ti Nzapa,” zia e bata si atene ti e na asalango ye ti e amu maboko na ala so ayeke ba e na nzoni bibe ti hinga na ti voro Kota Nzapa ti e so alingbi na gonda kue nga na gloire kue.—1aCor. 14:24, 25.