“Ga témoin ti Tene-nzoni”
1. Nzoni tënë wa e yeke na ni ti fa na azo?
1 Na yâ ti sese so, so ayeke ngangu ti wara nzoni tënë dä, e yeke na matabisi ti “ga témoin ti Tene-nzoni ti grâce ti Nzapa.” (Kus. 20:24). Ye so ahunda ti tene azo ahinga so na yâ ti kete ngoi, fade “lâ ti nda ni” ayeke zia place na fini sese ti mbilimbili ti Jéhovah, so na yâ ni fade “kozo ye ni ahon awe.” (2 Tim. 3:1-5; Apoc. 21:4). Na ngoi ni so, fade kobela aduti dä mbeni pëpe (Es. 33:24). Azo so akui, fade ala yeke sigigi na yâ ti dû ti kuâ ti kiri ti duti na popo ti afami na akamarade ti ala (Jean 5:28, 29). Sese kue ayeke ga ande mbeni pendere paradis (Es. 65:21-23). So ayeke gi ambeni nzoni ye so e yeke na ni ti fa na azo!
2. Ngbanga ti nyen ngoi ti Dango bê na kui ti Seigneur ayeke mbeni pendere ngoi ti fa nzo tënë?
2 Nze ti mars, avril na ti mai ayeke duti ande pendere ngoi ti fa na azo mara ti nzoni tënë tongaso. Na yâ ti anze so, na ambage mingi ti sese, lê ti nduzu ayeke pendere na lâ akui hio pëpe; ye so ayeke mû lege ti ninga na fango tënë. Na ndo ni, ye so ayeke kota mingi na yâ ti ngu ni ayeke Dango bê na kui ti Seigneur, so a yeke sara ni na ndo ti sese kue na samedi lango 22 ti nze ti mars na peko ti lindango ti lâ. Ti ndembe so, a yeke ngoi ti leke tere ti sigigi mingi na fango tënë.
3. Na yâ ti sewa, ye wa ayeke mû ande maboko na e ti fa tënë mingi?
3 Kusala ti pionnier auxiliaire: Mo lingbi ti leke yâ ti kapa ti mo ti mû kusala ti pionnier auxiliaire teti nze oko, use wala anze ni ota kue? Sara lisoro na ndo ti tënë so na ngoi ti mandango ye ti sewa ti peko. Na mango tere nzoni, zo oko wala azo mingi ti yâ ti sewa ni alingbi ti mû kusala ti pionnier auxiliaire (aProv. 15:22). Sambela na ndo ti tënë so, na bâ tongana nyen Jéhovah ayeke iri tënë nzoni na ndo ti ngangu ti mo (aProv. 16:3). Tongana zo oko na yâ ti sewa ni alingbi ti mû kusala ti pionnier auxiliaire pëpe, azo ti sewa ni kue alingbi ti zia na gbele ala ti fa tënë mingi na aita so awara lege ti ga pionnier auxiliaire.
4. Tongana e yeke sara kua ti nginza, e yeke leke yâ ti kapa ti e tongana nyen ti mû kusala ti pionnier auxiliaire?
4 Tongana mo yeke sara kua ti nginza, ti leke mbeni nzoni kapa alingbi ti mû lege na mo ti sara kusala ti pionnier auxiliaire. Peut-être mo lingbi ti mû mbage ti ngoi ti wungo tere ti mo ti fa na tënë. Wala mo lingbi ti wara mbeni territoire ti mo mveni nduru na ndo so mo lango dä wala na place ti kua ti mo si mo lingbi ti fa tënë ngbonga oko kozo ti gue na kua wala na peko ti kua. Mo lingbi nga ti zi ambeni kusala so ayeke kota ye pëpe na ti kiri na ni na mbeni nze nde si mo wara lege ti fa tënë mingi na anda-yenga. Ambeni amû lango oko wala use ti wungo tere si ala lingbi ti fa tënë.
5. Tongana nyen mo lingbi ti mû maboko na ambakoro wala ala so ayeke na kpale ti seni ti mû kusala ti pionnier auxiliaire?
5 Tongana mo yeke mbakoro, wala mo yeke na mbeni kpale ti seni wala mo yeke na ngangu mingi pëpe, mo lingbi ti mû kusala ti pionnier auxiliaire na fango tënë gi ngoi kete lâ oko oko. Hunda na Jéhovah ti mû na mo ‘kota ngangu [so] alondo na lo’. (2 aCor. 4:7). Mbeni ita-wali so ayeke na ngu 106 awara lege ti mû kusala ti pionnier auxiliaire! Na lege ti mungo maboko ti afami ti lo so ayeke aChretien nga na ti ambeni ita ti kongregation, lo fa tënë da na da, lo sara avizite, lo gue na aita ti sara a-étude ti ala, na lo fa tënë na alege nde nde. Lo sara si azo bale-oko ato nda ti manda Bible. Ita ni atene: “Tongana mbi gbu li ti mbi na ndo ti pasa so mbi wara ti sara kusala tongana pionnier auxiliaire, ngia asi bê ti mbi na mbi kiri singila na Jéhovah, na Molenge ti lo nga na bungbi ti lo so asara ye na ndoye. Mbi ye biani ti tene ‘singila na mo, Jéhovah!’ ”
6. Tongana nyen amaseka so awara batême awe na so angbâ ti gue na ekole alingbi ti mû kusala ti pionnier auxiliaire?
6 Tongana mo yeke mbeni maseka so mo wara batême awe na mo ngbâ ti gue na ekole, mo lingbi nga ti mû kusala ti pionnier auxiliaire. Legeoko tongana azo so asara kua ti nginza, mo lingbi kozoni kue ti mû anda-yenga ti mo ti fa tënë. Ti ambeni lango, mo lingbi peut-être nga ti mû ngbonga oko ti fa tënë na peko ti ekole. Mbeni congé ayeke dä so mo lingbi ti fa tënë na yâ ni? Tongana mo ye ti mû kusala ti pionnier auxiliaire, sara lisoro na ndo ni na babâ na mama ti mo.
7. Ye wa a-ancien alingbi ti sara ti zia nzara ti fango tënë na yâ ti aita na ngoi ti Dango bê na kui ti Seigneur?
7 Mû na aita nzara ni: A-ancien alingbi ti sara ye mingi si kongregation aduti na nzara ti fa tënë mingi na lege ti tapande ti ala (1 Pi. 5:2, 3). Ala lingbi ti leke ambeni bungbi ti fango tënë na ndo ni teti ala so aye ti sigigi na fango tënë hio na ndapre, na peko ti ekole wala na peko ti kua. Teti anze so ayeke anze ti kota kusala, fade surveillant ti kusala asoro aita so alingbi ti mû li ni na ngoi ti abungbi ti fango tënë, na lo bâ wala aterritoire na ambeti ayeke mingi ti fa na tënë.
8. E manda nyen na ndo ti ye so asi na yâ ti mbeni kongregation?
8 Na yâ ti mbeni kongregation, a-ancien ato nda ti wa aita ti mû kusala ti pionnier auxiliaire anze mingi kozoni. Yenga oko oko ala fa na kongregation wungo ti awafango tënë so a yeda na ala ti ga pionnier auxiliaire. Ye so amû lege na ala so aye ti mû mbage ti ala mingi na fango tënë ti hinga so ala yeke wara aita mingi ti fa tënë na ala. A leke lani si ambeni bungbi ti fango tënë aduti hio na ndapre nga na lakui. Ye ti pekoni ayeke so, awafango tënë 53 amû kusala ti pionnier na avril, so ayeke nduru na ndambo ti kongregation ni!
9. Ngbanga ti nyen ngoi ti Dango bê na kui ti Seigneur ayeke mbeni nzoni ngoi teti ala so alingbi awe ti to nda ti fa nzo tënë?
9 Mû maboko na ambeni zo ti fa tënë: Tongana afini zo nga na amaseka alingbi awe ti fa tënë, a lingbi ti tisa ala ti fa tënë legeoko na awafango tënë so akpengba awe. Lege tongaso a lingbi ti zi na ala na ngoi ti Dango bê na kui ti Seigneur, ngoi so azo mingi na yâ ti kongregation ayeke fa tënë mingi. Mo yeke na mbeni wamandango Bible so ayeke gue na li ni na so agbian fini ti lo alingbi na akpengba-ndia ti Jéhovah so ayeke mbilimbili? Mo yeke na amolenge so ayeke na nzoni tambela na so ayeke gue na li ni nzoni me so ade ti ga awafango tënë pëpe? Tongana azo tongaso afa so ala ye ti ga awafango tënë so ade ti wara batême pëpe na mo bâ so ala lingbi, sara tënë ni na mbeni oko ti a-ancien. Fade surveillant-président aleke ti tene a-ancien use abâ tënë so na mo legeoko na wamandango ye ni wala na molenge ti mo ni.
10. Ye wa a-ancien alingbi ti sara ti mû maboko na ala so azia ti fa tënë?
10 Anze so ayeke ga alingbi ti duti mbeni pendere ngoi teti ala so azia ti fa tënë ti kiri ti fa tënë legeoko na kongregation. Fade asurveillant ti Mandango Buku ti kongregation na tanga ti a-ancien alingbi ti sara ngangu ti gue ti bâ azo tongaso na ti tisa ala ti fa tënë legeoko na ala. Tongana ala fa tënë pëpe teti angoi mingi, fade a-ancien use asara lisoro na ala ti bâ wala ala lingbi ti fa tënë.
11. Kota fä ti “grâce ti Nzapa” ayeke so wa?
11 Leke tere teti Mémorial: Ye so a mû ti zi na e ayeke kota fä ti “grâce ti Nzapa.” (Kus. 20:24). Ti fa singila ti bê ti ala, azo kutu mingi na ndo ti sese kue ayeke bungbi ande na samedi lango 22 ti nze ti mars na peko ti lindango ti lâ ti dabe ti ala na kui ti Jésus. E ye ti tisa na ti mû maboko na azo ti nzoni bê kue ti ga na kota lango so, so afa tënë ti grâce ti Nzapa wala kota nzoni bê ti lo na mbage ti azo ti sese kue.
12. Azo wa e lingbi ti tisa ala na Dango bê na kui ti Seigneur?
12 Sû na mbeti iri ti azo so mo ye ti tisa ala. Peut-être mo yeke sû na lê ti mbeti ni iri ti afami ti mo, avoizin ti mo, akamarade ti mo ti ekole wala ti place ti kua, ala so mo manda Bible na ala kozo na ala so mo yeke manda na ala na ndembe so, nga azo kue so mo yeke sara vizite lakue na ala. Tongana mbeni zo so mo tisa lo ayeke na ambeni hundango tënë na ndo ti Dango bê na kui ti Seigneur, mo lingbi ti sara kusala na lembeti 206-208 ti buku Bible afa, so andu tënë ti Kobe ti Seigneur. Ye so alingbi même ti zi lege na mo ti to nda ti manda Bible na zo ni, teti a yeke mû lege na mo ti fa na lo buku so e yeke sara na kua ti manda Bible na azo.
13. Tongana nyen Jéhovah airi tënë nzoni na ndo ti awafango tënë use so aleke na bê ti ala ti tisa azo ti ga na Dango bê na kui ti Seigneur?
13 Mbeni ita-wali asû na mbeti iri ti asewa 48 so lo ye ti tisa ala. Ala so lo tisa ala awe lo sû mbeni marque na tere ti iri ti ala nga lango so lo tisa ala. So kota ngia si lo yeke na ni lani tongana azo 26 na popo ti azo so lo tisa ala aga na Dango bê na kui ti Seigneur! Mbeni ita-koli so ayeke na magazin ti lo wani atisa mbeni zo ti kua ti lo so ayeke ândö bua. Koli ni aga, na pekoni lo tene: “Gi na yâ ti ngbonga oko, mbi manda aye mingi na ndo ti Bible ahon ti so mbi manda na yâ ti ngu 30 so mbi sara na Eglize Catholique.” Gi na peko ti Mémorial ni, lo yeda ti manda na yâ ti buku Bible afa.
14. Kota kapa wa ayeke to nda ni ande na lango 1 ti nze ti mars na ndo ti sese kue?
14 Kangbingo mbeti ni: Ti londo na samedi lango 1 ti si na lango 22 ti nze ti mars, a yeke kangbi na ndo ti sese kue mbeti ti tisango ndo na Dango bê na kui ti Seigneur. E kue e ye ti mû mbage ti e mingi na yâ ti kota kapa ti kangbingo mbeti so. A yeke nzoni ti mû mbeti ni na zo ni wani ahon ti zia ni na yanga-da. Ye oko, tongana territoire ni akono mingi, a-ancien alingbi ti bâ wala a lingbi ti zia mbeti ni (me na lê ti azo kirikiri pëpe) na azo so ayeke na yanga-da pëpe. Na anda-yenga, fade e yeke kangbi nga afini périodique.
15. E lingbi ti tene nyen tongana e yeke kangbi mbeti ti tisango ndo na Dango bê na kui ti Seigneur?
15 Teti so alango so a mû ti kangbi na tisango ndo so ayeke mingi pëpe, a yeke nzoni ti sara tënë gi nduru. Duti na ngia na yâ ti sarango tënë ti mo. Mo lingbi ti tene tongaso: “E ye ti hinga wala mo, wala azo ti da ti mo wala akamarade ti mo awara awe mbeti ti tisango ndo na mbeni kota matanga so ayeke sara na lango 22 ti nze so. Ti mo mbeti ni la. Atanga ti tënë ni kue ayeke na yâ ni.” Zo ni alingbi ti hunda na e tënë, wala lo lingbi ti mû mbeti ni na lo tene so lo yeke ga ande. Sû note tongana tënë ni agbu bê ti zo ni na leke ti kiri ti bâ lo.
16. Ye wa asi so afa nene ti kapa ti tisango azo ti territoire na Dango bê na kui ti Seigneur?
16 Na ngu so ahon, mbeni turugu awara mbeti ti tisango ndo na Dango bê na kui ti Seigneur na yanga-da ti lo. Lo ye ti gue me lo ye ti hunda kozoni kue na kota zo ti lo ti mû lege na lo ti gue. Tongana lo fa mbeti ni na kota zo ni, kota zo ti lo ni aduti kpô na lo tene so baba na mama ti ni ayeke aTémoin ti Jéhovah na ândö ni yeke gue na abungbi lakue legeoko na ala. Kota zo ni ayeda na turugu ni ti gue na Mémorial ni, me lo na lo kue la ague!
17. Tongana nyen e yeke fa so e kamata tongana senge ye pëpe grâce ti Nzapa?
17 Fa singila ti bê ti mo: Teti so Dango bê na kui ti Seigneur ti ngu 2008 aga nduru, zia zo oko oko na popo ti e agbu li na ndo ti kota nzobe so Jéhovah asara na mbage ti e. Bazengele Paul asû na mbeti: “E voro i nga, i kamata grâce ti Nzapa senge pëpe.” (2 aCor. 6:1). Tongana nyen e yeke fa so e kamata grâce ti Nzapa wala kota nzobe ti lo tongana senge ye pëpe? Paul asû na mbeti: “Me na yâ ye kue, e fa na gigi e yeke azo ti kusala ti Nzapa.” (2 aCor. 6:4). Na lege so, e yeke fa singila ti bê ti e ndali ti matabisi so Jéhovah amû na lege ti nzoni tambela ti e nga na fango nzoni tënë na ngangu ti e kue. Ngoi ti Dango bê na kui ti Seigneur so ayeke duti ande mbeni pendere ngoi ti fa tënë mingi, ti ga témoin ti nzoni tënë.
[Encadré na lembeti 3]
Azo wa alingbi ti ga apionnier auxiliaire?
◼ Asewa
◼ Azo so asara kua ti nginza
◼ Azo so ayeke na akpale ti seni na ambakoro
◼ Azo so angbâ ti gue na ekole
[Encadré na lembeti 4]
Na ngoi ti kangbingo ambeti ti tisango ndo na Dango bê na kui ti Seigneur:
◼ Sara tënë nduru nga na ngia
◼ Sû note ti azo so asara nzara ti tënë ni na kiri mo bâ ala
◼ Kangbi apériodique na anda-yenga