Ngbanga ti Nyen E Ngbâ Lakue ti Fa Tënë?
1 A sala kusala ti fango tënë ti Royaume na yâ kodoro ti mo a ninga awe? (Mat. 24:14) Tongana a yeke tongaso, mo lingbi ti bâ so a fa tënë na yâ territoire ti kongregation alingbi awe. Fadeso, tongana mo yeke fa tënë, peut-être azo mingi so mo tingbi na ala asala nzala ti tokua ti Royaume ni pëpe. Atâa aye so kue, bâ ye so azo kue ahinga na ndo atâ disciple ti Jésus na lembeti 141 ti buku Prophétie ti Isaïe II: “Na ambeni ndo, aye ti peko ti kusala ti ala alingbi ti duti ye senge tongana a haka ni na wungo ti kua na ngangu so ala yeke mû ti sala ni. Ye oko, ala gbu ngangu.” Me ngbanga ti nyen e ngbâ lakue ti fa tënë?
2 E Dabe E na Jérémie: Ngbango be-ta-zo ti e lakue na yâ kusala ti fango tënë alingbi pëpe ti luti na ndo wala azo adengi mê ti mä e wala pëpe. Jérémie afa tënë lani teti angu 40 na yâ territoire oko, atâa so azo mingi pëpe adengi mê ti mä lo nga azo mingi ake tokua ti lo. Ngbanga ti nyen Jérémie agbu ngangu lani? Ngbanga ti so lo yeke sala mbeni kua so Nzapa ahunda na lo ti sala, nga hingango ye ti lo na ndo ye so ayeke gue ti si ande apusu lo ti sala tënë ni na gigi.—Jér. 1:17; 20:9.
3 Dutingo ti e ayeke nga tongaso. Jésus ‘akomande e ti fa tënë na azo, na ti sala tënë ti témoin, so Lo yeke Zo so Nzapa ahiri Lo na gigi ti ga Juge ti azo so ayeke na fini na ti awakinda.’ (Kus. 10:42) Tokua so e yeke fa ayeke mbeni tënë ti fini na ti kui teti azo so amä ni. Fade fango ngbanga na ndo azo aluti na ndo kiringo tënë ti ala na nzo tënë. Teti a yeke tongaso, kungba ti e ayeke ti sala ye mbilimbili tongana ti so a hunda na e ti sala. Atâa tongana azo ake ti dengi mê ti mä e, salango ye tongaso ayeke mû lege na e ti fa kota ndoye ti e na mbage ti ala, nga mungo tele ti e kue na kusala ti Jéhovah na ngbango lakue ti sala ye so a lingbi e sala. Ye oko, tënë ni angbâ gi ge pëpe.
4 E Yeke Wara Nzoni Ye: Salango ye so bê ti Nzapa aye, atâa kiringo tënë ti azo na yâ territoire, ayeke mû na e siriri ti bibe, bê so anzere, nga na ngia so e lingbi pëpe ti wara ni na mbeni lege nde. (Ps. 40:9 [Ps. 40:8, NW]) Fini ti e ayeke duti biani na nda ni. Mungo mbage ti e mingi ahon na yâ kusala ni ayeke sala si bê ti e na abibe ti e abata lê mingi ahon na ndo beku nga na ngia ti duti na ndo fini sese ti Nzapa. Ti bi bê lakue na ndo azendo ti Bible so ayeke maï dutingo ti e na lege ti yingo, na a yeke kpengba songo ti e na Jéhovah.
5 Même tongana e bâ pëpe aye ti peko ti kusala ti fango tënë ti e fade fade, peut-être e lu lê ti tâ tënë na yâ bê ti mbeni zo na a yeke ko ande na ngoi so Jéhovah adiko. (Jean 6:44; 1 aCor. 3:6) Zo oko pëpe na popo ti e ahinga azo oke ayeke ga ande ti manda ye na ndo Royaume na lege ti angangu so awakua ti Jéhovah ayeke sala, atâa na mbeni ndo oko wala na ndo ti sese kue.
6 Na ngangu mingi ahon ti kozoni, a lingbi e bata wango-tene ti Jésus: “I sala hange, i lango pëpe, teti i hinga pëpe lawa si ngoi so a diko ayeke si. Me tënë so mbi tene na i, mbi tene na azo kue: I bata nzoni.” (Marc 13:33, 37 NW) Ni la, na ngoi so, zia e kue e ngbâ lakue ti fa nzo tënë ti Royaume, ti sala si bê ti Jéhovah aduti na ngia tongana e mû mbage ti e na salango si tâ kota iri ti lo aga nzoni-kue.