Bâ na nene ni aye ti mosoro ti bungbi ti Nzapa
1 Na ngoi so lo yeke leke lani aye ti tene aleke ambeni mbage ti temple ni so abuba, gbia Josias agonda lani azo ti kua ni, lo tene: ‘A lingbi a hunda ala pëpe tënë ti nginza so a mû na ala, teti ala sala kusala na lege ni.’ (2 aGbia 22:3-7) Akoli so abâ lani na nene ni aye ti yingo so a zia ni nde, na ala fa ni polele na gigi na lege so ala sala kusala na aye ti mosoro kue so a zia na tïtî ala. Laso, tongana e yeke mû mbage na kusala ti nzoni-kue ti fango nzo tënë ti Nzapa, a yeke nzoni e fa nga so e yeke sala kusala na lege ni na aye ti mosoro so a mû na e.
2 Na yâ kusala ti fango tënë: Bê ti kiri singila so e yeke na ni teti tokua ti fini so ayeke na yâ ti ambeti ti e, nga girisango pëpe kota nginza so a yeke mû ti sala na ni apusu e ti bâ ambeti so na nene ni. A lingbi e kangbi ambeti ti e kirikiri pëpe na azo so asala pëpe nzara ti tokua so ayeke na yâ ti Bible. Tongana mbeni zo asala nzara ti nzo tënë mingi pëpe, e lingbi peut-être ti mû na lo mbeni tract ahon ti mû na lo mbeni mbeti nde.
3 Tongana ambeti angbâ na tîtï mo, kangbi ni na mbeni lege so afa biani so mo bâ ni na nene ni. Kpe ti zia ni na aplace so azo ayeke dä mingi, ti kangbi ni gi tongaso. Ti buba ni senge senge pëpe, diko wungo ti ambeti so angbâ na mo na da kozoni ti wara ambeni. Tongana anuméro ti périodique ayeke ngbâ ka lakue na tîtï mo, pensé ti kiri na wungo ti commande ti mo na gbe ni.
4 Ambeti teti e mveni: A lingbi e sala gi commande ti ambeti so e yeke biani na bezoin ni. Na tapande, tongana e ye ti sala commande ti Bible so yanga ni aza zango, Bible de référence, nga na ambeni kota mbeti tongana Concordance, Index, avolume ti buku Étude perspicace, na buku Les Témoins de Jéhovah, a yeke nzoni e hunda gbâ ni gi senge senge pëpe. A yeke futa kota nginza mingi ti sala ni.
5 Mo yeke sala kue ti sû iri nga na adresse ti mo na ndo ambeti ti mo mveni? Salango tongaso ayeke mû maboko ti kiri mbeni pëpe ti hunda ambeni mbeti so agirisa. Tongana mo girisa mbeti ti bia, Bible wala mbeni mbeti ti manda, peut-être mo yeke wara ni ande na popo ti aye so agirisa na awara ni na Da ti Royaume wala na place ti assemblée.—Luc 15:8, 9.
6 Zie e sala ngangu kue ti sala kusala na ambeti ti e na lege ti ndara. So a yeke mbeni lege ti fa na gigi so e yeke sala kusala na lege ni na akungba so Jéhovah amû na e.—Luc 16:10.