Hundango ndo

◼ Nyen la ayeke mû lege na e ti zia ambeti ti e na zo wala ti zia pëpe?

Kozo ye ni ayeke ti bâ wala tënë ni agbu bê ti zo ni. Tongana e bâ so tënë ni agbu bê ti lo, e lingbi ti zia na lo Tour ti Ba Ndo na Réveillez-vous, mbeni brochure, mbeni buku wala mbeni mbeti nde so e yeke fa na tënë. E yeke sara nga gi tongaso même atâa lo yeke na kete offrande wala lo yeke na ni pëpe ti mû ndali ti kusala ti fango tënë so e yeke sara na yâ ti dunia kue (Job 34:19; Apoc. 22:17). Na mbage, ambeti ti e ayeke aye so ayeke kota na lê ti e mingi. Azo so abâ ni na nene ni pëpe, e zia ni na ala pëpe.​—Mat. 7:6.

Zo ni ayeke fa so tënë ni agbu bê ti lo tongana nyen? Tongana lo yeke na nzara ti sara lisoro na e, a yeke mbeni ye so afa so tënë ni agbu bê ti lo. Lo yeke fa nga ni tongana lo yeke dengi mê ti mä e na ngoi so e yeke sara tënë, lo yeke kiri tënë na ahundango ndo ti e nga lo yeke fa tënë ti bê ti lo na ndo ti atënë ni. Tongana lo yeke bâ versê ni legeoko na e na yâ ti Bible na ngoi so e yeke diko ni afa so lo ne Mbeti ti Nzapa. Mingi ni, ti hunda na zo ni wala lo yeke diko mbeti so e yeke mû na lo ayeke mû maboko na e mingi. A yeke nzoni awafango tënë asara ye na ndara ti bâ wala tënë ni agbu bê ti zo ni. Na tapande, tongana e yeke fa tënë na ndo ti lege, a yeke duti nzoni pëpe ti mû apériodique, abrochure wala abuku kirikiri na azo kue so ahon. Tongana e hinga pëpe lege ti hinga wala tënë ni anzere na mbeni zo, a yeke nzoni ti mû na lo gi mbeni mbeti ti tisango ndo wala mbeni tract.

Legeoko nga, a yeke nzoni wungo ti ambeti so mbeni wafango tënë ayeke mû ti fa na tënë aduti ye so lo yeke na bezoin ni ndali ti fango tënë, me pëpe ndali ti a-offrande so lo yeke mû. A-offrande so e yeke mû ka ndali ti ambeti ayeke ti vo ambeti ni vongo pëpe me ayeke ti mû maboko na ambage nde nde kue ti kusala ti e ti fango tënë na ndo ti sese mobimba. Atâa e yeke na nginza mingi wala mingi pëpe, e yeke fa so e kiri singila na mungo nginza so e leke na bê ti e ti mû ndali ti kua ti Royaume, me pëpe gi nginza so e yeke na ye ti sarango na ni pëpe si e yeke mû (Marc 12:41-44; 2 aCor. 9:7). Bê ti kiri singila ayeke pusu nga e ti mû gi ambeti so e yeke na bezoin ni, si e buba pëpe a-offrande so a mû ndali ti ambeti.

[Encadré na lembeti 2]

A yeke nzoni awafango tënë asara ye na ndara ti bâ wala tënë ni agbu bê ti zo ni