E tomba pëpe peko ti ‘aye so ayeke senge senge’
1 Laso, tokuango asango na lege ti Internet ayeke mbeni oko lege ti salango lisoro, so amû ndo kue. A yeke na lege ni ti tene mbeni zo asala kusala na ni ti tokua na sewa ti lo wala na akamarade ti lo aye so asi na lo wala abibe ti lo. Me ‘aye so ayeke senge senge’ wa ayeke dä na ndo salango kusala kirikiri na ni?—aProv. 12:11.
2 Sala hange na e-mail: Ambeni ita abâ so ala yeke duti ndulu mingi na bungbi ti Jéhovah tongana ala yeke wara na lege ti Internet ye so ala hiri ni fini sango. Asango ni alingbi ti ndu aye so asi na aita, aye so ayeke tambela na Béthel, tondo na ndo ambeni kota kpale wala salango ngangu, na andu même asango ti lingo so a fa na ngoi ti a-Ekole ti Kusala ti Royaume. Tele ti ambeni zo ayeke dö dongo ti tokua mara ti asango tongaso, na bibe ti ala ayeke ti tene: “Mbi yeke kozo zo ti fa tënë ni na akamarade ti mbi.”
3 Ngoi na ngoi, a yeke ba yâ ti asango tongaso wala a kono ni mingi. Ambeni sango tongaso afa mbeni tënë ti wataka, peut-être gi ti pika bê ti azo. Fani mingi, ala so tele ti ala ayeke dö dongo ti sigigi na mara ti atënë tongaso ahinga ka nda ti aye ni kue pëpe (aProv. 29:20). Na yâ ti ambeni ye so asi, a kangbi na azo mbeni sango so akpa même ti tene zo amä na bê dä pëpe, gi ti tene azo ahinga mbeni mbaï so anzere. Mara ti atondo so ayeke tâ tënë pëpe wala so a lingbi ti handa zo ayeke legeoko na ‘apande ti wataka’ so amû pëpe na zo lege ti maï dutingo ndulu na Nzapa.—1 Tim. 4:6, 7.
4 Tongana mo tokua na mbeni zo mbeni sango so ayeke na lege ni pëpe, si azo awara vundu wala li ti ala aga kirikiri na pekoni, mo yeke yô mbeni mbage ti kungba ni. Tongana a tene lani na David mbeni tënë so a kono yâ ni, na tenengo so a fa amolenge ti lo kue, lo “suru bongo ti lo” na vundu. Ye oko, ti tâ tënë ni, a yeke gi oko ti amolenge ti lo si akui. A yeke lani ye ti vundu mingi. Me teti so a kiri a kono yâ ti tënë ni, a kono nga vundu ti David (2 Sam. 13:30-33). Biani, e ye pëpe ti sala mbeni ye so alingbi ti handa aita ti e wala ti nze bê ti ala.
5 Lege so Nzapa aleke ti mû na asango: E girisa pëpe so Babâ ti e ti yayu ayeke na “ngbâa be-ta-zo na ti ndara”, lege so lo leke ti mû na asango. “Ngbâa” so ayeke na kungba ti soro sango wa a lingbi afa na azo ti da ti mabe, nga ti soro ‘ngoi’ ti fa ni. A lingbi ti wara kobe ti yingo so gi na lege ti bungbi so Nzapa afa lege na ni. Ti wara asango so a lingbi ti zia bê dä, a lingbi e bi lê lakue na mbage ti ye so Nzapa asoro ti sala na kusala, me pëpe na ndo bungbi ti azo kue so ayeke sala kusala na Internet.—Mat. 24:45.
6 Place ti asango na ndo Internet: E yeke na mbeni ndo, so ayeke na lege ni, teti asango ti e na ndo Internet, so ayeke: www.watchtower.org. Place ti asango so alingbi biani ti tene a sala na kusala ti fa asango na azo kue. A hunda pëpe na mbeni zo, mbeni komite, wala mbeni kongregation ti leke mbeni place ti asango na ndo aTémoin ti Jéhovah na ndo Internet. Ambeni zo amû atënë kue so ayeke na yâ ambeti ti e, ala zia nga na yâ ni atënë kue ti aversê wala ti ambeti so a tokua zo dä, so a fa pëpe atënë ti yâ ni, na ala tokua ni na azo ti wara offrande na pekoni. Ala sala même legeoko tongaso na adiskur ti akota bungbi. Atâa tongana a yeke ti wara mbeni faïda na pekoni wala pëpe, salango copie nga na kangbingo ambeti ti aTémoin ti Jéhovah na lege ti a-ordinateur ayeke dorongo andia so abata ambeti ni. Atâa so ambeni zo alingbi ti bâ ni tongana mungo maboko na aita, a ke ni na kuru go, na a lingbi azo akaï salango ye tongaso biaku.
7 Dutingo na nzoni bango ndo nga na ndara na ngoi so e yeke sala lisoro na lege ti Internet ayeke sala ande si bibe ti e asi singo na “ye ti mosoro ti ngele ngangu so ayeke nzoni.”—aProv. 24:4.