Atënë so i hunda

◼ A yeke na lege ni ti zia adresse ti e na ndo ti ambeti so e yeke kangbi na fango tënë?

Na lege ti tampon wala mbeni kete nduru mbeti so ayeke na colle, ambeni wafango tënë azia adresse ti ala na ndo ti apériodique wala atract so ala kangbi na azo. Ala so amû ambeti ni alingbi ti wara tere na wafango tënë ni ti hunda ambeni sango na ndo ni. A yeke na sioni bê pëpe si aita ayeke sara ngangu tongaso ti mû maboko na azo so asara nzara ti tënë ni. Ye oko, a zia adresse ti e so ayeke na ndo ti Internet na peko ti apériodique nga na atract awe. Tongaso, a yeke nzoni ti tene e zia adresse ti e mveni na ndo ti ambeti pëpe.

Tongana mbeni wafango tënë amû na azo ti territoire adresse ti lo wani na ndo ti mbeni nduru mbeti nde, mbilimbili na ngoi ti sarango avizite, so abâ gi lo mveni. A lingbi e mû li ni ti kiri ti bâ azo so asara nzara ti tënë ni ahon ti tene e mû gi lege na ala ti gi ti wara e ti hinga ambeni tënë na ndo ni. Zo ayeke bi bê na tënë ti e mingi gi tongana e sara lisoro na lo lê na lê.