Fa na azo yanga ti kodoro so ayeke nzoni-kue
1 Atâa so ala londo na popo ti ‘amara kue, akete mara, azo nde nde, na ayanga nde nde’, aTémoin ti Jéhovah ayeke mbeni mara so aduti beoko, mbeni tâ bungbi ti aita na ndo sese mobimba (Apoc. 7:9). Na yâ ti mbeni sese so akangbi laso, salango ye tongaso ayeke ye ti dongo bê. A lingbi ti duti tongaso tongana nyen? Ngbanga ti so ‘a mû na e lege ti tene yanga ti kodoro so ayeke nzoni-kue’.—Soph. 3:9.
2 Anzoni ye ni: Yanga ti kodoro so ayeke nzoni-kue ayeke nyen? A yeke mbilimbili gbungo nda ti tâ tënë so ayeke na yâ Bible, na ndo Jéhovah nga na ndo aye so lo leke ti sala. A ndu mbilimbili tâ tënë na ndo Royaume ti Nzapa. Tongana ti so Jésus afa lani kozo, a yeke kangbi tâ tënë so na lege ti “ngbâa be-ta-zo na ti ndara”, mbeni lege so lê abâ, si azo “ti yanga nde nde kue ti amara” aga na yâ tâ tënë.—Mat. 24:45, NW; Zach. 8:23.
3 Tongana azo ayeke manda yanga ti kodoro so ayeke nzoni-kue, ye so ayeke pusu ala ti sala si dutingo ti ala ague legeoko na andia ti Jéhovah. Ala yeke manda ti “duti na bibe oko na tënë oko.” (1 aCor. 1:10). Fango ye ti Nzapa asala nga si ala tambela mbilimbili, ala tene tâ tënë so ayeke nzoni-kue, mbilimbili tongana ala yeke fa nzo tënë na azo (Tite 2:7, 8; aHéb. 13:15). Mara ti agbiango ye tongaso ayeke mû gonda na Jéhovah.
4 Na tapande, mbeni koli so mbeni wafango tënë afa na lo nzo tënë ayeke na gbâ ti ahundango tënë. Lo wara akiringo tënë na ahundango tënë ti lo kue na yâ Bible. Ye so lo mä apusu lo ti komanse ti manda Bible fani use na yâ yenga oko, na ti gue na abungbi. Bê ti lo adö na lege so aita ayamba lo na wâ na Da ti Royaume, atâa so mara ti azo mingi so aga na bungbi ni ayeke nde nde. Na yâ ti kete ngoi, lo na wali ti lo agbian aye na yâ fini ti ala na amû batême. Ngbele ye kâ, lo mû maboko awe na azo ndulu na 40, so na popo ni ambeni zo ti sewa ti lo, ti sala na Jéhovah. Atâa so mbeni mbage ti tele ti lo abuba, lo mû kua ti pionnier ade ti ninga pëpe.
5 Fango ye na ambeni zo: Aye so asi na dunia mobimba apusu azo ti tâ be-ti-molenge ti kiri ti bâ nzoni bibe nga na fini ti ala. Na tapande ti Jésus, a yeke nzoni e duti na nzara ti mû maboko na ala. Ye so azi lege ti mû maboko na azo ti tâ-be-ti-molenge ti manda yanga ti kodoro so ayeke nzoni-kue, ayeke ti sala afini vizite nga na a-étude nzoni.
6 Mbeni kode so alë lengo ti mû maboko na azo so ayeke na kua mingi ti sala, ayeke ti sala na ala étude so ayo mingi pëpe na yanga da ti ala (km 5/02 l. 1). Mo tara ni awe? Tongana mo yeke leke tele ti gue ti sala mbeni fini vizite, soro na yâ ti supplément ti Kusala ti Royaume ti janvier 2002, mbeni fango ye so alingbi na azo ni. A leke mingi ti afango ye so ayeke na yâ supplément ni ti to nda ti mbeni lisoro na yâ brochure Ahunda wala buku Hingango Ye. Tara peko ti fango ye ni si mo lingbi ti to nda ni yeke na akozo tënë, nga na pekoni ti sala lisoro na ndo oko ti aparagraphe. Soro mbeni versê oko wala use ti diko ni, so agboto ni na yâ ti paragraphe ni na sala lisoro na ndo ni; nga, hunda mbeni tënë ti hunzi na lisoro ni. Ye so ayeke mû ande lege na mo ti sala lisoro na ndo paragraphe so mo leke ti sala tënë na ndo ni na vizite ti peko.
7 Awakua ti Jéhovah awara adeba nzoni mingi na lege ti mandango yanga ti kodoro so ayeke nzoni-kue. Zia e mû maboko na azo na bê ti e kue ti mû mbage ti ala na e ti ‘di iri ti Jéhovah’ na ti ‘sala na lo maboko na maboko.’—Soph. 3:9.