Duti tapande na lege ti salango anzoni ye

1. Ngbanga ti nyen a yeke nzoni e bi bê mbilimbili na ndo salango ye ti e na ngoi ti kota bungbi ti district?

¹ Tongana e wara tele ti e gbâ ni na ngoi ti akota bungbi ti district, azo ayeke bâ mbilimbili salango ye ti e, nga lege so e yeke sala ye na mbage ti azo. Tongaso, a yeke nzoni e oko oko kue e sala mbilimbili hange na wango ti Bible ti ‘sala ye na lege ni; ti sala tongaso na yâ ye kue. Ti duti tapande na lege ti salango anzoni ye’. (Tite 2:6, 7, Fini Mbuki, 2001). A hunda ti sala ngangu mingi ti ‘gi ye teti e mveni pëpe, me ti gi ye teti ambeni zo nga.’ (aPhil. 2:4). Zia e bâ ambeni lege so na yâ ni e lingbi ti sala kusala na wango so na ngoi ti Kota Bungbi ti District so ayeke ga, so kota li ti tënë ni ayeke “Mû gloire na Nzapa”.

2. Ye nyen a yeke nzoni e bata na li ti e tongana a ndu atënë ti ando ti lango?

² Ando ti lango: Ala so aleke ti lango na da ti ambeni zo, na yâ ti ambeni ndo ti lango wala na yâ ti ahôtel, ayeke na mbeni nzoni lege so azi na ala ti fa na gigi anzoni kusala. Ti sala tongaso, bâ awango so: Sû na lege ni mbeti “Demande de chambre” na mo mû ni na secrétaire. Ga gi na wungo ti azo so mo fa ni na yâ mbeti ni. Mo lingbi ti mû mbeni kete nginza na zo so ayamba mo ti futa na ngu wala na kuran. Tongana mbeni ndao asi na ndo so mo lango dä, sala tënë ni hio na ndokua so abâ tënë ti tambelango ti assemblée ni. Na dutingo na be-nze-pepe nga na salango kusala maboko na maboko na azo kue so asala kua na yâ hôtel ni nga na ndokua so abâ tënë ti tambelango ti assemblée, fade e yeke fa na gigi lengo ti yingo ti Nzapa, na e yeke duti tapande na lege ti salango anzoni ye.​—aGal. 5:22, 23.

3, 4. Tongana nyen amolenge alingbi ti sepela Jéhovah, na kungba wa ababâ na mama ayeke na ni?

³ Ababâ na mama na amolenge: Na yâ ti mbeni sese so nzoni salango ye amanke amaseka mingi, amolenge ti e ayeke nde mingi, na mara ti ye tongaso ayeke sepela Jéhovah nga na bungbi ti lo. Ye oko, ngoi na ngoi, akpale ayeke si na peko ti so a bâ ndo nzoni pëpe na ndo ti amolenge (aProv. 29:15). A yeke nzoni ababâ na mama azia amolenge ti ala gi tongaso pëpe na yâ hôtel, andu nga ndo ti tingo ngu, da ti ambeni zo wala ndo ti kota bungbi.

⁴ Kozoni ti tene ngoi ti kota bungbi ni alingbi, ambeni babâ na mama abâ so a yeke ye ti mungo maboko ti kiri ti bâ na amolenge ti ala nzoni lege ti salango ye so a ku na mbage ti ala (aEph. 6:4). Ala yeke mû maboko na amolenge ni ti hinga so tâ ndoye ti Chrétien “asala kirikiri pëpe” wala “agi ye ti lo mveni pëpe”. (1 aCor. 13:5). Kota bungbi ti district ayeke mbeni ngoi so a zia nde ti tene Jéhovah afa ye na e, na amolenge nga na akota zo alingbi ti fa na gigi yekiango ndo teti lekengo ye so na lege ti salango ye ti ala na ngoi ti kota bungbi nga na mbeni ndo nde.​—Es. 54:13.

5. Ngangu wa nzoni tambela ti e ayeke sala na ndo ambeni zo?

⁵ Nzoni tambela ti e alingbi ti sala ye mingi ti kanga lege na sioni bibe so azo ayeke na ni na mbage ti e, nga ti gboto azo na mbage ti tâ vorongo (Mat. 5:16; 1 Pi. 2:12). Zia si azo kue so e tingbi na ala na ngoi ti kota bungbi ti district awara mbeni nzoni tënë ti témoin na lege ti salango ye ti e nga na lege so e yeke sala ye na mbage ti ala. Na lege so, fade e yeke ‘ga tapande ti anzoni kusala’ na e yeke mû gloire na Jéhovah.​—Tite 2:7.

6. Ngbanga ti nyen a yeke kota ye mingi teti e ti sala ye na saleté pëpe na ti leke tele ti e pendere na lege ni?

⁶ Sala ye na lege ni nga na saleté pëpe: A yeke nzoni lekengo tele ti e afa na gigi akpengba-ndia ti Nzapa ti e so asala ye na lege ni, nga so ayeke na saleté pëpe (1 aCor. 14:33; 2 aCor. 7:1). A yeke nzoni tele ti e mveni, kuali ti e na anzene ti maboko na ti gere ti e aduti na saleté pëpe, na a yeke nzoni lekengo tele ti e pendere aduti na lege ni. Laso, lekengo tele kirikiri amû ndo kue. Ye oko, a yeke pëpe ngbanga ti so mbeni walombe ti limon wala ti ngia ti wanguru ayü bongo kirikiri si mbeni Chrétien nga kue ayeke sala tongaso. Tongana e mû peko ti yungo bongo ti azo, a lingbi ti duti ngangu na azo ti bâ kangbi so ayeke na popo ti ala so asala na tâ Nzapa na ala so asala na lo pëpe.​—Mal. 3:18.

7. Tongana nyen e lingbi ti sala kue ti tene lekengo tele ti e ayeke gue ande legeoko na wango so a wara na mbeti 1 Timothée 2:9, 10?

⁷ Bongo so alingbi na awakua Chrétien: Tongana bazengele Paul ayeke sû lani mbeti na Timothée so ayeke surveillant, lo ‘wa awali ti yü bongo so ayeke na lege ni; bongo so afa nengo tele ti ala, . . . a yeke nzoni awali afa so ala yeke pendere na lege ti salango anzoni ye; ye so awali so akpe mbito ti Nzapa alingbi ti sala.’ (1 Tim. 2:9, 10, FM 01). A lingbi e bâ tele ti e nzoni ti sala kue si bongo ti e alingbi kue. Zia si bongo ni aduti na lege ni, na saleté pëpe, na ayeke nzoni, pëpe bongo so agboto lê ti zo ngangu wala so alingbi ti zingo anzara ti mitele na bê ti mbeni zo.​—1 Pi. 3:3.

8, 9. Agbotongo mê wa a yeke nzoni aChrétien so ayeke koli wala wali abata ni?

⁸ Paul agboto nga lani mê na ndo salango ye ahon ndo ni na yâ ‘lekengo kuali na kode ahon ndo ni; na yungo aye ti lor wala alenge; na yungo bongo ti kota nginza.’ (1 Tim. 2:9, FM 01). Dutingo na katikati na ndo yungo ye ti mê, ye ti go, na ye ti maboko nga ziango aye ti pendere na ndo ti lê ayeke mbeni lege ti ndara so awali so ayeke Chrétien alingbi ti mû.​—aProv. 11:2.

⁹ Wango so Paul amû na awali so ayeke Chrétien andu nga akoli so ayeke Chrétien. A yeke nzoni aita-koli akpe ti yü bongo so afa na gigi bibe ti sese so (1 Jean 2:16). Na tapande, na ambeni ndo, yungo kota yâ ti bongo, nga na abongo so ayo ahon maboko wala gere ti zo, asi singo. Ye oko, amara ti yungo bongo tongaso alingbi pëpe na mbeni wakua ti Nzapa.

10. Ngbanga ti nyen a yeke nzoni ti duti na sioni oko pëpe na ndo yungo bongo nga na lekengo tele ti e pendere tongana e yeke gue na kota bungbi, e yeke kiri wala e yeke na ndo ti kota bungbi, nga na peko ti abungbi ti lango oko oko?

¹⁰ Na ngoi ti gbotongo gere: Tongana ala yeke gue na kota bungbi, aita-koli na aita-wali mingi ayeke zia mbeni pendere tapande na ndo yungo bongo nga na lekengo tele pendere. Ye oko, atondo afa so ambeni ita asala hange pëpe na yungo bongo ti ala na ngoi ti guengo na kota bungbi, na ngoi ti kiringo ni wala tongana ala yeke gboto gere. Biani, yungo bongo nga na lekengo tele ti e pendere, atâa na ngoi ti kota bungbi wala na ambeni ngoi nde, ayeke sala ngangu na ndo lege so ambeni zo ayeke bâ na awakua ti Nzapa. Teti so e yeke yü badge ti e, a yeke nzoni yungo bongo ti e akpa lakue ti awakua Chrétien. Fani mingi, salango ye tongaso ayeke pusu ambeni zo ti gonda e na ayeke zi lege na e ti fa tënë.​—1 aCor. 10:31-33.

11. Ngangu wa nzoni yungo bongo nga na lekengo tele ti e pendere alingbi ti sala na ndo ambeni zo?

¹¹ Legeoko tongana ngia so asala si lê ti e aduti pendere, yungo bongo na lekengo tele pendere so alingbi ayeke ne tokua so e yeke fa nga bungbi so e yô iri ni. Bê ti ambeni zo so ayeke bâ e na ngoi ti Kota Bungbi ti District “Mû gloire na Nzapa” ti ngu so alingbi ti pusu ala ti hunda ngbanga ti nyen e yeke nde, na ti tene na nda ni: “Fade e gue na mo, teti e mä [na e bâ] so Nzapa ayeke na i.” (Zach. 8:23). Zia e oko oko kue e fa na gigi kota kpengo mbito ti Jéhovah na lege ti yungo bongo nga na lekengo tele ti e pendere.

[Kete tënë na lembeti 4]

Bâ azo na nene ni

▪ Duti na be-nze-pepe na ngoi so mo yeke sala molongo ti sû ambeti na yâ hôtel wala na ngoi so mo ye ti kiri

▪ Zia amolenge ti mo gi tongaso pëpe

[Kete tënë na lembeti 7]

Lekengo tele so ane zo

▪ Na guengo ni

▪ Na ngoi ti kota bungbi

▪ Na ngoi ti gbotongo gere