Kota bungbi ti district ti aTémoin ti Jéhovah ti ngu 2008
1. (a) Ngbanga ti nyen wango ti Paul na aChrétien Hébreu abâ e laso mingi? (Diko aHébreu 10:24, 25). (b) Ye wa so ayeke ga ayeke zi lege na e ti sara ye alingbi na wango ti Paul so?
1 Bazengele Paul awa aChrétien Hébreu ti bungbi tere na ti wa tere ti ala “mingi ahon” teti so ala bâ so lâ ni ayeke nduru (aHéb. 10:24, 25). Aye mingi angbâ ti fa so “lâ ni” so Paul asara tënë ni ayeke fadeso nduru mingi! Tongaso, e yeke gi alege ti bungbi na aita ti e ti wara fango ye ti yingo so alingbi ti fa lege na e na “lâ ti nda ni” so aye ayeke ga gi ngangu (2 Tim. 3:1). Mara ti alege tongaso ayeke duti ande na akota bungbi ti district ti ngu 2008 so ayeke ga.
2. (a) Ngbanga ti nyen a yeke kota ye ti gue na alango kue ti kota bungbi ni? (b) Tongana nyen e lingbi ti to nda ti leke tere ti e ti gue na bungbi ni?
2 Gue na alango ni kue: E wa mo ti gue na alango ota ti bungbi ni kue. Tongana “e zia ti bungbi pëpe,” fade kota kobe ti yingo so a mû ayeke hon e pëpe (aHéb. 10:25). To nda ti leke tere ti mo. Sara tënë ni hio na kota zo ti kusala ti mo tongaso lo lingbi ti leke aye ndali ni. Tongana amolenge ti mo ayeke sara ekole na ngoi ti kota bungbi so a tisa mo dä, sara tënë ni na awafango mbeti ti ala. Fa na ala so kota bungbi ni ayeke ye so mo yeke sara lakue teti Nzapa ti mo. Hinga so fade Jéhovah ayeke iri tënë nzoni na ndo ti ngangu so mo yeke sara ti zia akusala ti Royaume na kozo ndo.—Mat. 6:33.
3. Na alege wa e lingbi ti fa so e bi bê na ambeni zo?
3 Mû maboko na ambeni zo ti gue: Paul ahunda nga na aita ti lo ti ‘bi bê ti ala na ambeni zo na popo ti ala’. (aHéb. 10:24). Na yâ ti bungbi ti mo ti mandango buku, ambeni ita ayeke dä so ayeke na bezoin ti mungo maboko ti tene ala gue na kota bungbi ni? Mo lingbi ti mû maboko na awamandango Bible ti mo ti gue na kota bungbi ni legeoko na mo, même gi lango oko senge? Tongana mo tene na asewa ti mo so ayeke Témoin ti Jéhovah pëpe so mo yeke gue na kota bungbi ni, tisa ala ti ga legeoko na mo. Ngangu so mo sara na ndoye ti tisa ala alingbi ti ga na aye ti nzoni.
4. Tongana nyen ti wara asango teti alango ti kota bungbi ti district nga na ando so ayeke sara abungbi ni dä?
4 Lege ti wara asango: Ngu na ngu, azo ayeke pika singa na biröo ti filiale ti hunda lawa nga na ndo wa si a yeke sara akota bungbi. Mingi ti airingo ndo so ayeke ti aita so awara asango na ndo ni awe. Kozo ti pika singa na filiale, e hunda mo kozoni ti bâ Tour ti Ba Ndo ti 1 mars 2008 (na français). Na ndo ni, a tokua mbeti na akongregation kue ti fa na ala lango nga na ndo so a tisa ala ti sara kota bungbi ti ala dä. Tongana mbeti so asi, a lingbi a diko ni na bungbi ti kusala ti peko, na pekoni a zia ni na tableau juska kota bungbi ni ahunzi.
5. Ye wa e lingbi ti sara tongana e yeke na bezoin ti asango na ndo ti mbeni kota bungbi nde na ti so a tisa kongregation ti e dä?
5 Tongana mo yeke gue na mbeni kota bungbi nde na ti so a tisa kongregation ti mo dä, mo lingbi ti wara asango teti ndo ti lango na tokuango mbeti na ndokua so abâ tënë ti lekengo kota bungbi. Secrétaire ti kongregation alingbi ti hunda ndo na mbeni membre ti komite ti kota bungbi so a tisa kongregation ti mo dä ti wara adresse ti lo. Tongaso, ti tene komite ti kota bungbi ni akiri tënë na mo, a lingbi mo zia na tere ti mbeti ti mo ni mbeni enveloppe so iri ti mo na adresse ti kongregation ti mo ayeke na ndo ni. Tongana a yeke sara akota bungbi mingi na yâ ti gbata ni, fa lango nga na iri ti kota bungbi so mo yeke gue ande dä (na tapande Sango 1, Bangui, 19-21 décembre 2008).
6. Ambeni tënë wa so abâ ndo ti lango a lingbi e girisa pëpe?
6 Ambeni tënë nde teti ndo ti lango: Tongana mbeni wafango tënë aye si a mû maboko na lo ti wara ndo ti lango, fade Komite ti kusala ti kongregation ti lo ayeke bâ wala lo lingbi ti zia tënë ti lo ni na lê ti mbeti Demande de chambre pour cas particuliers. Kozo ti tokua mbeti ni na Ndokua ti ndo ti lango ti kota bungbi ni, a lingbi a diko atënë so ayeke na yâ ti mbeti ni.
7. Tongana nyen ti sara kusala maboko na maboko na aye so a leke teti ando ti lango? (Bâ encadré “Tënë teti ando ti lango.”)
7 Batango ndo ti lango: Tongana bezoin ni ayeke na kodoro ti mo, fade a yeke zia na lê ti mbeti na tableau ti kongregation iri ti ahôtel ngoi mingi kozoni na lango ti kota bungbi ni. Kozo si mo mû yanga ti tene a bata na mo ndo ti lango na hôtel, kiri mo bâ “Tënë teti ando ti lango” nga “Lege ti hunda na ti bata ndo ti lango na hôtel”. A hon ti yeda ti futa mbeni hôtel so ngere ti lo ayeke na nduzu so a fa na lê ti mbeti wala ti iri ndo na mbeni hôtel so a yeke na lê ti mbeti ni pëpe, a yeke nzoni mo ku kongregation awara mbeni fini sango na ndo ti ahôtel teti kota bungbi ti mo.
8. (a) Na alege wa e lingbi ti mû gloire na Jéhovah tongana e gue na kota bungbi ti e? (b) Ndali ti nzoni tambela ti aita ti e, atënë wa awakua ti hôtel atene?
8 Anzoni kusala: Mango komandema so Jéhovah amû ti tene e bungbi ti voro lo ayeke sara si ‘e ga nzoni’. Me ye so ayeke kota mingi ayeke so, a yeke zi lege na e ti mû gloire na iri ti Jéhovah (Es. 48:17). Azo mingi abâ nzoni kusala ti e na ngoi ti akota bungbi ti district awe, na ambeni na popo ti ala afa tënë ti bê ti ala na ndo ni (1 Tim. 5:25). Na mbeni gbata so a yeke sara akota bungbi ti e dä teti angu mingi fadeso awe, ndombe ti mbeni hôtel atene: “Azo mingi na yâ ti kodoro ni ayeke sara tënë ti aTémoin ti Jéhovah nga tënë ti nzoni ye so kota bungbi ayeke sara na ndo ti e. E bâ tongana nyen azo ti ala ayeke sukula ndo ti tango ndembo ti gbata ni, na e bâ nga ala na lungulango zende na ando ti ziango kutukutu. A nzere na e mingi ti bâ ala na tere ti e na ngoi ti buru! E yeke na beku so fade e yeke ngbâ ti sara songo na ala na yâ ti angu so ayeke ga.” Na peko ti so lo fa akpale so ala wara na mbeni bungbi ti azo ti sarango angia ti ndara, ndombe ti mbeni hôtel asara tënë ti bibe ti mango tere nga na be-nze-pepe so aita afa na ngoi so ala lango na hôtel. Lo tene: “E ye si aclient ti e aduti tongana aTémoin ti Jéhovah!” Sarango ye ti aita ti e so aga na anzoni tënë tongaso nga na ambeni mara ni mingi; atënë tongaso azia ngia biani na bê ti Nzapa ti e, Jéhovah!
9. Tongana nyen tënë ti Matthieu 4:4 agboto lê na ndo nene ti dengi mê nzoni na mbage oko oko ti kapa ni?
9 Jésus atene so ngbango na fini ti e ague oko na mango “tënë kue so asigigi na yanga ti Nzapa.” (Mat. 4:4). Na akota bungbi ti e ti ngu oko oko, Jéhovah ayeke mû kobe ti yingo “na l’heure ni so alingbi”, so “ngbâa be-ta-zo na ti ndara” aleke ni (Mat. 24:45, MN ). A sara kusala mingi ti leke na ti mû pumba ti yingo so. Zia e fa singila ti bê ti e na Jéhovah so abi bê na e na ndoye na guengo na bungbi so nga na dengingo mê nzoni na mbage oko oko ti kapa ni.
[Encadré na lembeti 4]
Angbonga nia
Vendredi na samedi
7:50 - 15:05
Dimanche
7:50 - 14:10
[Kete tënë na gbe ni]
a Zia ala hinga so kapa ni ayeke to nda ni lakue na ndapre na 7:50 na République Centrafricaine nga na Tchad.
[Encadré na lembeti 5]
Tënë teti ando ti lango:
◼ Bata ndo ti lango na lege ti Internet pëpe, teti e yeke sara kusala na lege so pëpe.
◼ Soro gi na popo ti ahôtel so a zia molongo ti ala na lê ti mbeti.
◼ Yeda pëpe na mbeni ngere so ayeke na nduzu ahon ti so ayeke na lê ti mbeti ni.
◼ Chambre so a bata a lingbi aduti gi na iri ti zo so fade aga ti lango na yâ ni.
◼ Ti sara ye alingbi na ndia ti batango ada si wâ atï dä pëpe, zia si wungo ti akota zo aduti mingi pëpe na yâ ti chambre ni ahon ti so awa ti hôtel ni afa na yâ ti mbeti ni.
◼ Bata kozo ndo so mo soro ti lango dä.—Mat. 5: 37.
◼ Pika singa pëpe na mbeni hôtel so iri ni ayeke pëpe na popo ti ala so ayeke na lê ti mbeti ti hunda wala ala yeke na mbeni ngere ndali ti azo so aga na kota bungbi ti e.
◼ Gi tongana mo pika singa na ahôtel ni KUE awe na mo wara ndo ti lango dä pëpe si mo yeke sara tënë ni na secrétaire ti kongregation ti mo. Fade lo sara tënë ni na Ndokua ti ndo ti lango na lege ti asango so a zia na lê ti mbeti.
◼ Tongana a lingbi a bata na mo ndo ti lango ni mbeni pëpe, sara tënë ni hio. Hunda ti tene a mû na mo mbeni numero ti fa so a yeke bata ni na mo mbeni pëpe.
Lege ti hunda ti bata ndo ti lango na hôtel:
1. Pika singa na ahôtel ni na l’heure ti kua. Bâ anumero so a zia na tere ti iri ti ahôtel so ayeke na lê ti mbeti.
2. Tene na hôtel ni so mo yeke gue ndali ti kota bungbi ti aTémoin ti Jéhovah.
3. Fa na ala mbilimbili lango ti singo ti mo nga na ti hongo ti mo.
4. Tongana place ti lango ayeke pëpe, pika singa na mbeni hôtel nde so ayeke na yâ ti mbeti ni.
5. Hunda ala ti bata na mo chambre, na hunda numéro ni.
6. Futa ni na lege ti carte ti banque, chèque wala mandat na yâ ti lango bale-oko. Tokua nginza ni na maboko ti zo pëpe. Tongana mo futa nginza ni na lege ti chèque wala mandat, sû numero so a mû na mo na lê ni.