Mbeti-kapa ti sewa: Étude ti sewa
1 Kota matabisi so i ababâ na mama Chrétien i lingbi ti mû na amolenge ti i ayeke ti yôro yeke yeke na yâ ti ala ndoye so i yeke na ni teti Jéhovah. Tâ ndo ti mû ni na ala ayeke “tongana [i] yeke duti na da ti [i]” ti sala étude ti sewa yenga oko oko (Deut. 6:5-7). Atâa mo na koli wala wali ti mo kue ayeke Chrétien, mo yeke na yâ ti mbeni sewa so akangbi na lege ti vorongo Nzapa wala mo yeke gi mo oko si mo yeke bata amolenge ti mo, na lege ti mbeni mandango ye lakue na sewa mo lingbi ti mû maboko na ala ti ga ndulu na mo nga ndulu na Jéhovah.
2 Étude ti sewa: Kozo ye ti sala ayeke ti zia na sese mbeni étude ti sewa so a yeke sala ni lakue. Tongana mo bâ a yeke ngangu ti wara mbeni lango ti sala ni, a yeke nzoni mo sala lisoro na ndo ni legeoko na sewa (aProv. 15:22). Tongana mo yeke na amolenge so ade kete mingi, mo lingbi ti kangbi yâ ti étude ni ndulu ndulu na yâ ti yenga ni kue. Bâ mbilimbili mbeti-kapa so alingbi nzoni na sewa ti mo. Sû mbilimbili na lê ti mbeti-kapa ti sewa ti mo mbeni ngoi teti étude ti sewa, na leke na bê ti mo ti mû pekoni.
3 Ye wa mo lingbi ti manda ni? Ambeni ayeke leke mbeti so ala yeke gue ande ti manda ni na Bungbi ti Mandango Buku wala na Mandango Tour ti Ba Ndo. Ambeni ayeke manda abuku so andu mbilimbili gi amaseka. Babâ ti mbeni kete molenge ti koli na ti wali atene: “Mbeni ye so asala si étude ti e ni aga mbeni ngoi so anzere na amolenge ni mingi na yâ ti yenga ni, a yeke ndali ti so e yeke haka peko ti azo so ayeke na yâ ti Mbeti ti atene ti Bible tongana ti so a yeke sala drame. Ye so asala si ala gbu nda ti ye ni hio na a sala ngangu mingi na ndo ti ala ahon salango gi gbâ ti aparagraphe.”
4 Sala étude ni yenga oko oko kue: A lingbi a sala étude ni lakue na a lingbi azo ti sewa ni kue aku ni na ngia. Ndali ti ambeni ye so zo aku tele ti lo na ni pëpe na so asi, a lingbi ti ga na ambeni gbiango ye na ndo ti lango nga na ndo ti l’heure ti étude ni. Ambeni ngoi nga alingbi ti si so a hunda ti gbian ye so ala ye ti manda ni. Me a lingbi agbiango ye ni abuba pëpe yâ ti mbeti-kapa ti mandango ye na sewa so a leke ni awe. Mbeni molenge-wali na yâ ti mbeni sewa atene: “Tongana a hunda ti gbian l’heure ti étude ti sewa ni, Papa ayeke sû lakue mbeni mbeti so lo yeke zia ni na ndo ti yanga ti frigo ti fa na e fini l’heure ti étude ni.” Angangu tongaso, so a yeke sala ni ti bata lakue étude ti sewa, alingbi na gonda. Tongana mo ngbâ lakue ti bata amolenge ti mo na ti ‘fa lege na ala na wango ti Jéhovah’, mo yeke fa na gigi ndoye ti mo teti ala nga teti Babâ ti e so ayeke na yayu.—aEph. 6:4.