E bi bê ti e legeoko tongana Jésus
1. Bibe wa Jésus afa lani na gigi?
1 Atâa so e bâ lâ oko pëpe Molenge ti Nzapa, na lege ti fini nga na kusala ti lo so a sû na mbeti, fadeso e wara lege biani ti ndoye lo (1 Pi. 1:8). Na salango ye so bê ti Babâ ti lo aye, lo dö kota ndo ti lo na yayu lo zia ni ti ga na sese. Tongana zo ti mitele, lo sala kusala teti azo na bê kue, nga na pekoni lo mû fini ti lo ndali ti azo kue (Mat. 20:28). Tënë ti Nzapa awa e: “I bi bê ti i legeoko tongana Christ abi bê ti Lo giriri.” Tongana nyen e lingbi ti mû tapande ti bibe ti lo ti gbanzi ye na tele?—aPhil. 2:5-8.
2. Kpale wa aChrétien mingi ayeke wara laso, na ye wa alingbi ti mû maboko na ala ti hon ndo ni?
2 Tongana e bâ so ngangu ahunzi: Atâa so Jésus ayeke lani mbilimbili-kue, ngangu ahunzi na lo nga. Mbeni lâ, na ngoi so ‘Lo nze teti Lo tambela mingi’, Jésus afa tënë oko oko kue na mbeni wali ti Samarie (Jean 4:6). Mara kpale tongaso ayeke si nga na aChrétien mingi laso. Na peko ti mbeni yenga ti kua so amû ngangu ti zo kue, a yeke mbeni kpale ti wara ngangu ti fa tënë. Ye oko, tongana e yeke fa tënë lakue, e yeke bâ so kusala ti Chrétien akpengba e na lege ti yingo.—Jean 4:32-34.
3. Tongana nyen e lingbi ti haka peko ti Jésus so ayeke lani ndulu ti fa ye?
3 Na mbeni ngoi nde, Jésus na adisciple ti lo ague na mbeni ndo so zo ayeke dä pëpe ti hu li ti ala kete. Ye oko, azo mingi mingi ahinga ndo ni na ahon kozo na ala ti tingbi ala kâ. Ahon ti tene ngonzo asala lo, Jésus aye “ti sala be-nzoni na ala” na lo to nda ti “fa ye mingi na ala.” (Marc 6:30-34). A hunda ti duti na oko bibe tongaso ti to nda ti manda Bible na azo. A hunda ti sala ngangu lakue na ti duti na tâ ndoye teti azo ni. Tongana fadeso mo yeke manda Bible na zo pëpe, kiri na peko pëpe na yâ ngangu so mo yeke sala ti wara mbeni oko.
4. Tongana nyen kusala ti pionnier auxiliaire alingbi ti mû maboko na e ti bi bê legeoko tongana Christ?
4 Zia aye ti yingo na kozo ndo: Kusala ti pionnier auxiliaire alingbi ti mû maboko na e ti zia lê mingi na ndo akusala ti yingo. Mbeni maseka ita-wali atene: “Mama ti mbeni oko ti akamarade ti mbi awa mbi na kamarade ti mbi ni ti mû kusala ti pionnier auxiliaire legeoko na lo teti nze oko. Mbi yeke biani na ngia so e sala kusala so legeoko na lo. Tele ti mbi anzere ti hinga aita-koli na aita-wali nzoni mingi, na a ninga pëpe ala ga tongana sewa ti mbi. Mbi yeke nga na ngia ti wara alege mingi ti sala tënë na azo na ndo Jéhovah nga ti fa na ala apendere tâ tënë ti Royaume. Aye so kue asala si mbi bâ mbi ga ndulu mingi na Jéhovah nga na bungbi ti lo.”—Ps. 34:9.
5. Ngbanga ti nyen a lingbi e ngbâ ti sala ngangu ti bi bê legeoko tongana Jésus?
5 E kue e yeke na bira so ayeke na popo ti mitele ti e so ayeke mbilimbili-kue pëpe nga na nzara ti e ti nzere na Jéhovah (aRom. 7:21-23). A lingbi e ke bibe ti sese so ayeke ti sala ngangu oko pëpe (Mat. 16:22, 23). Jéhovah alingbi ti mû maboko na e na lege ti yingo vulu ti lo ti sala ye nzoni (aGal. 5:16, 17). Na ngoi so e ngbâ ti ku zingo e ti lï na yâ fini sese ti mbilimbili ti Nzapa, zia e bi bê legeoko tongana Jésus na ziango aye ti Royaume nga na ti ambeni zo kozo na ti e.—Mat. 6:33; aRom. 15:1-3.