Fini lekengo ye teti dango bê na akapa ti akota bungbi
Teti sioni ti sese ti Satan angbâ ti gue gi na li ni, Jéhovah amû ngangu na e ti “ke ye so ake Nzapa, na ti ke nzara ti ye ti sese, si e bata tele ti e, na e sala mbilimbili, na e bata tënë ti Nzapa na ngoi so.” (Tite 2:12). Na popo ti aye so lo leke na lege ti “ngbâ be-ta-zo na ti ndara”, ngu oko oko e yeke na akapa ti kota bungbi ti circonscription nga na ti kota bungbi ti lango oko (Mat. 24:45, NW ). Bâ tongana nyen abungbi so andu aye ti yingo ayeke mû ngangu na e!
Ti mû maboko na e ti girisa pëpe awango so e yeke mä na ti sala ye alingbi na ni, a leke mbeni fini ye teti dango bê na akapa ti a-assemblée so ayeke duti ande na ngu ti kusala 2005. Na lembeti 5 na 6 ti supplément so, a wara a-article so afa kozoni ye so a yeke tene ande kâ, na ahundango tënë ti dango bê teti kapa ti assemblée oko oko. Fade akongregation ayeke bâ tënë so ngoi kete kozoni si ala gue na a-assemblée ti ala nga ngoi kete na pekoni. Fade a yeke sala ni ande tongana nyen?
Yenga oko wala use kozoni si kongregation ague na kota bungbi ti circonscription ni, fade a yeke mû diskur teti penze-ngbonga bale-oko na Bungbi ti Kusala na ndo article “Kota bungbi ti circonscription: fini programme” ti zingo nzara ti e kozoni teti programme ni. Fade wamungo diskur ni ayeke gboto lê nga na ndo ahundango tënë ti dango bê, na lo yeke wa azo kue ti sû note ndali ti lisoro ti dango bê so a yeke sala ni na yâ ti ayenga so ayeke ga na peko ti kota bungbi ni.
Na yâ ti ayenga ti peko ti kota bungbi ni, a yeke mû penze-ngbonga 15 na Bungbi ti Kusala ti kiri ti bâ kozo lango ti programme ni. Na yenga ti pekoni, a yeke mû penze-ngbonga 15 ti kiri ti bâ use lango ti programme ni. Fade a yeke sala lisoro ni na lege ti ahundango tënë ti dango bê so ayeke na yâ ti supplément so. A lingbi lisoro ni aluti na ndo lege ti sala kusala nzoni na atënë ni. A lingbi a-ancien aleke ti tene ambeni mbage ti Bungbi ti Kusala ni aduti ndulu, ti zi wala ti sala ambeni mbage ni na mbeni yenga nde ti tene ngoi alingbi ti sala na alisoro ti dango bê ni.
A yeke mû gi peko ti oko lekengo ye so teti kota bungbi ti lango oko; me a yeke mû ande gi penze-ngbonga 15 ti sala na lisoro ti dango bê na kapa ni kue. Fade e kue e yeke bata supplément so na e yeke sala kua na ni ti wara ye ti nzoni mingi na yâ fango ye so Jéhovah amû.—Es. 48:17, 18.