Bata bibe ti salango ye hio!
1 Jésus ahinga lani so ngoi so a mû na lo ti sala kua ti Babâ ti lo na sese ayeke gi kete (Jean 9:4). Tongaso, lo sala kusala ti lo na hingango so a lingbi lo sala ye hio, na lo fa na adisciple ti lo ti sala legeoko tongaso nga (Luc 4:42-44; 8:1; 10:2-4). Aye ti mitele so asala si zo aduti nzoni ayeke lani pëpe ye so aga na kozo ndo na yâ fini ti lo (Mat. 8:20). Ni la, lo lingbi lani ti hunzi kusala so Jéhovah amû na lo ti sala.—Jean 17:4.
2 Gi kete ngoi: Ngoi so a mû ti fa na nzo tënë “na [ndo] sese . . . kue” ayeke nga gi kete (Mat. 24:14). Aprophétie ti Bible afa so e lï mingi na yâ lâ ti nda ni. Na yâ ngoi kete, fade ‘azo so ahinga Nzapa pëpe, na ala so ake ti mä Tene-nzoni ti Seigneur ti e Jésus ayeke wara ngbanga na a yeke futi ala lakue lakue.’ (2 aThes. 1:6-9). Ngbanga ni ayeke ga ande gi hio tongaso na mbeni lege so apika bê (Luc 21:34, 35; 1 aThes. 5:2, 3). Azo ayeke na bezoin ti hinga kota kpale so ala yeke na yâ ni. A yeke kungba ti e ti mû maboko na ala ti gi be-nzoni ti Jéhovah na yâ ngoi so angbâ.—Soph. 2:2, 3.
3 E sala ye kue so e lingbi ti sala: Na hingango so “lâ ade mingi pëpe,” awakua ti Nzapa azia na kozo ndo kusala ti fango tënë (1 aCor. 7:29-31; Mat. 6:33). Ti mû mbage ti ala mingi na fango tënë, ambeni ake na bê ti ala mveni alege so azi na ala ti wara nginza wala ti gi aye teti ala mveni (Marc 10:29, 30). Ambeni angbâ ti “wu na kusala ti Seigneur” atâa so atara angbâ gi ngbango (1 aCor. 15:58). Mingi ayeke fa nzo tënë teti angu mingi fadeso awe na ala yengi pëpe (aHéb. 10:23). Jéhovah amû na nene ni mingi mara ti asacrifice kue tongaso, so a sala ni ti mû maboko na kusala ti Royaume.—aHéb. 6:10.
4 Ti zia si fini ti e aluti na ndo vorongo Jéhovah, so ti tene nga na ndo kua ti fango tënë, ayeke mû maboko na e ti bata na li ti e lâ ti Jéhovah so aga ndulu. A yeke bata e si sese ti Satan agboto lê ti e pëpe yongoro na a yeke kpengba desizion ti e ti ngbâ ti bata mbeni tambela so ayeke nzoni-kue (2 Pi. 3:11-14). Biani, salango kusala ti e ti fango tënë na bibe ti salango ye hio alingbi ti sö fini ti e nga na ti ala so amä e.—1 Tim. 4:16.