Internet: zia e hinga agbanda ni!​—Mbage 1

¹ Awakua ti Jéhovah ayeke na nzoni songo na popo ti ala. Ala ye ti fa na mba ye so asi na ala na yâ fango tënë, na ala yeke na ngia ti mä asango ti ambeni Témoin ti Jéhovah nga asango na ndo kusala ti fango tënë na ndo lê sese kue. Ala ye nga ti hinga tënë na ndo kota kpale wala mbeni ye ti ngangu so asi na aita ti ala; na ala ye ti hinga wala ala lingbi ti mû maboko. Bingo bê so afa so sewa ti aita aduti beoko na a fa so e ndoye biani tere na popo ti e.​—Jean 13:34, 35.

² Laso, e yeke hinga hio ye so asi na ndo sese mobimba. Fonono na singa-le ayeke fa tâ peko ti aye so ayeke si na anzene nzene mbage ni na azo ti sese kue. Téléphone amû nga lege ti sara lisoro hio na azo ti ndo kue. Na mbeni fini ye abâ gigi na lege ti singa: a yeke Internet so amû ndo kue.​—Bâ Réveillez-vous! ti 22 juillet 1997.

³ So a sigigi na téléphone, lege azi ti sara tënë hio na ambeni zo na ndo sese kue. Ye oko, atâa téléphone asara nzoni ye mingi, a lingbi e sara hange na lege so e yeke sara kusala na ni. Lo lingbi ti mû lege ti ga nduru na azo so ayeke nzoni pëpe wala ti sara akusala so ayeke na lege ni pëpe, nga ti pika singa mingi ahunda nginza mingi. Legeoko nga, télévizion nga na fonono amû lege na zo ti manda aye mingi. Me ye ti vundu ni ayeke so, na popo ti akuasinga-le, mingi ni a ndu aye ti pitan, na zo ayeke buba ngoi na bango ni. Ndara ahunda na e ti soro nzoni ye so e yeke bâ na limon na e yeke mä na fonono.

⁴ Internet amû lege na zo ti sara tënë na azo kutu mingi na ndo sese na a hunda nginza mingi pëpe. A zi nga lege na azo ti wara asango mingi (Réveillez-vous! ti 8 janvier 1998). Ye oko, sarango kusala na Internet na ndara pëpe alingbi ti zia mbeni zo na yâ ti kota kpale na lege ti yingo nga a lingbi ti pusu lo ti sara ambeni sioni ye. Tongana nyen?

⁵ Azo mingi ayeke gi bê ti ala tongana ala bâ so a yeke ngangu pëpe ti wara asango na ndo kode ti leke angombe, atâa abombe. Amokonzi ti akota ndokua adema tere teti ngoi so azo ti ala ayeke buba na ndo ti Internet. Ambeti ti e asara tënë mingi na ndo ti atâ sioni ye so azo ayeke wara na ndo ti Internet, so alingbi ti buba dutingo ti ala na lege ti yingo. Ando ti sango mingi na yâ ti Internet ayeke na ambeti so andu sarango ngangu wala ye ti pitan, ambeti so ayeke biani nde na vorongo ti aChrétien (Ps. 119:37). Na ndo aye so, mbeni ye ayeke dä so ayeke sara sioni na zo yeke yeke sân ti tene lo hinga. Na a lingbi aTémoin ti Jéhovah asara hange na ni mingi. Ye ni so ayeke nyen?

⁶ Mo yeke tisa ande mbeni wande na yâ da ti mo kozoni si mo hinga tënë na ndo ti lo? Ka tongana lege ti hinga tënë nzoni na ndo ti zo ni so ayeke dä pëpe? Fade mo yeke zia wande so ti duti gi lo oko na amolenge ti mo? A yeke biani lege so Internet amû ti sara la.

⁷ Zo alingbi ti tokua mbeti na lege ti Internet na azo so lo hinga ala pëpe na lo wara nga ti ala. A yeke nga tongaso tongana lo yeke “sara lisoro” na lege ti masini na mbeni bungbi ti azo so ayeke pika patara na popo ti ala. Peut-être ambeni zo ni atene ala yeke aTémoin ti Jéhovah, me fani mingi a yeke tâ tënë pëpe. Mbeni zo alingbi ti tene ni de pendere andâ a yeke tongaso pëpe. Wala mbeni zo alingbi ti tene ni yeke wali andâ lo yeke koli.

⁸ Mbeni zo alingbi ti tokua na mo asango na ndo mbeni ye so asi wala na ndo ambeni tënë ti mabe ti e. Mo nga mo mû sango so mo tokua ni na ambeni zo, na ala nga kue amû ni atokua ni na ambeni zo nde. Fani mingi e lingbi ti hinga pëpe wala sango ni so ayeke tâ tënë wala pëpe, na ngoi na ngoi a yeke tënë ti wataka. Ambeni tënë alingbi ti mû lege ti kangbi abango ndo ti a-apostat.​—2 aThes. 2:1-3.

⁹ Ndali ti kpale so, tongana mo sara kusala na Internet, hunda tere ti mo na atene so, mo tene: ‘Ngbanga ti nyen mbi yeke sara kusala na ni? Lege so mbi yeke sara na kusala alingbi ti sara sioni na mbi na lege ti yingo? Ye alingbi ti si so mbi sara sioni na azo na lege ti yingo?’

¹⁰ A lingbi ti haka sarango kusala na Internet na mbeni tambela so zo asara ni na mbeni fini kodoro. Gbâ ti afini ye ayeke dä ti bango ni na ti mango ni. Mara ti tambela tongaso ahunda na mo zo ti sara ye nzoni nga na hange. Biani, a yeke tâ kota ye ti gi ti hinga ye mingi na ndo ti Internet tongana mo ye ti gue dä, ndo so mo lingbi ti wara gbâ ti asango dä.