Gi ti maï nzara ti azo na ziango na ala apériodique lakue
1. Nyen la e lingbi ti sala ti maï nzara ti azo so ayeke mû ka apériodique ti e lakue?
1 Mingi ti azo so e yeke wara ala na fango tënë ayeke yamba e nzoni, nga ala yeke na ngia ti wara ambeti ti e. Ye oko, ala yeke ndulu ti yeda ti manda Bible pëpe. Mbeni lege ti maï nzara ti ala ayeke ti zia apériodique na ala lakue. Tongana mo zia périodique na mbeni zo, a yeke nzoni ti sû na mbeti iri ti lo, adresse ti lo, lango ti kiringo ti bâ lo, iri ti périodique so mo zia na lo, versê ti Bible so mo sala lisoro na ndo ni nga na ye kue so mo bâ so afa na gigi so zo ni asala nzara ti tënë ni. Tongana afini numéro ti apériodique asi, gi ambeni tënë ti yâ ni so alingbi ti nzere na azo so mo yeke zia ka ni na ala. Na pekoni, gboto lê ti ala na ndo ni na ngoi so mo yeke gue ti sala vizite na ala (1 aCor. 9:19-23). Tongana ngoi ayeke hon, ambeni ye so ala diko ni na yâ ti ambeti ti e alingbi ti zingo nzara ti ala na a pusu ala ti gi ti hinga ye mingi na ndo ni.
2. Ngbanga ti nyen a lingbi azo agi Jéhovah hio laso? Na aye wa e lingbi ti sala ti mû maboko na ala?
2 Ye oko, e hinga so azo mingi ayeke ga ande awakua ti Jéhovah gi na dikongo apériodique ala mveni pëpe. Teti so a lingbi azo asala ye laso hio ti gi Jéhovah, aye wa e lingbi ti sala ti mû maboko na ala? (Soph. 2:2, 3; Apoc. 14:6, 7). E lingbi ti maï nzara ti ala na fango na ala aversê ti Bible so e soro ni nzoni na ngoi kue so e yeke gue ti zia apériodique na ala.
3. (a) Tongana nyen e lingbi ti leke ambeni molongo ti aversê ti sala alisoro na ndo ni? (b) Atënë wa agbu bê ti azo ti territoire ti mo mingi?
3 Sala lisoro na ndo mbeni versê oko: Gbu li ti mo na ndo ti azo so mo yeke zia ka apériodique na ala. Leke ambeni molongo ti aversê so mo lingbi ti sala lisoro dä, na so alingbi na bezoin ti zo oko oko kue so mo yeke gue ti bâ ala (aPhil. 2:4). Na tapande, mo tingbi na mbeni zo so agirisa, ade ti ninga mingi pëpe, mbeni sewa ti lo so lo ndoye lo mingi. Tongana a yeke tongaso, mo lingbi ti kiri fani mingi ti bâ zo ni ti sala lisoro na lo na ndo ti ye so Bible atene na ndo ti azo so akui awe nga na beku ti londongo ti akuâ. Sala kusala na atënë so ayeke na yâ ti buku Comment raisonner na gbe ti li ti tënë “Mort” na “Résurrection” ti leke tele ti mo ti sala lisoro na ndo mbeni versê ti Bible. Mo lingbi nga ti sala tënë na ndo ti aye so ague oko na ni. Aye tongana kobela, gango mbakoro nga na kuâ so ayeke hunzi ande biaku. Kota ye ni ayeke ti wara mbeni tënë so agbu bê ti zo ni, nga yeke yeke, fa na lo ye so Bible atene na ndo tënë ni.
4. Ngbanga ti nyen a yeke kota ye ti fa nda ti ye nzoni na ngoi so e yeke sala kusala na aversê? Na e lingbi ti sala ni tongana nyen?
4 Fa nda ti ye nzoni: Atâa so a yeke lakue nzoni ti sala si lisoro ni aduti ndulu nga akpengba pëpe, a hunda ti sala ye mingi ahon ti diko gi versê na mbeni zo. Satan avuko lê ti azo na ndo tâ tënë (2 aCor. 4:3, 4). Même azo so ayeke diko ka Bible ayeke na bezoin ti tene a mû maboko na ala si ala gbu nda ni nzoni (Kus. 8:30, 31). Tongaso, mû ngoi ti fa nda ti aversê ni na nga ti mû atapande si ala lingbi ti gbu nda ni nzoni. Sala ni tongana ti so mo yeke sala ka na adevoir ti mo na ngoi ti Ekole ti Kusala ti aChrétien (Kus 17:3). Sala si zo ni abâ biani so Tënë ti Nzapa alingbi ti mû maboko na lo na yâ fini ti lo.
5. Tongana nyen si mbeni zo so ayeke mû ka apériodique lakue alingbi ti to nda ti manda Bible?
5 Tongana ye so zo ni ayeke manda anzere na lo, yeke yeke, kono yâ ti lisoro ni na dikongo versê use wala ota tongaso na ngoi ti avizite ni oko oko kue. Gi lege ti fa brochure Ahunda wala buku Hingango Ye. Na salango tongaso, mbeni zo so ayeke mû ka apériodique lakue alingbi ti to nda ti manda Bible.