Gboto lê na ndo “lumière ti sese so”

1. Kota lumière wa Tënë ti Nzapa asara tënë ni kozoni? Nzoni ngoi wa amû lege na e ti gboto lê mbilimbili na ndo ni?

¹ Na lege ti prophète Esaïe, Jéhovah afa kozoni tënë so: “Azo so atambela na yâ bingo, ala bâ kota lumière; ala so aduti na sese ti bingo ti kui giriri, lumière asu na ndo ala awe.” (Es. 9:1). Azo abâ lani zango ti “kota lumière” so na lege ti akusala ti Molenge ti Nzapa mveni, Jésus Christ. Akua so lo sara lani na ngoi so lo de na sese nga na adeba nzoni so aga na peko ti mungo tere ti lo na sandaga azi azo so ayeke na yâ ti bingo na lege ti yingo si ala duti nzoni. Na yâ ti bingo ti laso, azo ayeke na bezoin ti mara ti lumière so. Lâ ti dabe na Kobe ti Seigneur ayeke mbeni nzoni ngoi so amû lege na e ti gboto lê na ndo “Lumière ti sese so”. (Jean 8:12). Na ngu so ahon, azo kutu mingi afa so ala yeke kamême na mabe tongana ala ga ti bungbi legeoko na e ti sara ye alingbi na yanga so Jésus amû ni: “I sara so ti dabe i na Mbi.” (Luc 22:19). Teti so Mémorial ti ngu so ayeke pusu nduru, nyen la e lingbi ti sara ti gboto lê ti azo na ndo ti kota lumière so Jéhovah asara si a za na ndo sese?​—aPhil. 2:15.

2. Tongana nyen si e lingbi ti kono bê ti kiri singila teti sandaga ti Jésus? Ti sara tongaso ayeke sara ngangu wa na ndo ti e?

² Kono bê ti kiri singila: Ngoi ti Mémorial ayeke tâ nzoni ngoi ti gbu li na ndo kota ndoye so Jéhovah na Jésus afa na lege ti sandaga so a mû teti e azo (Jean 3:16; 2 aCor. 5:14, 15). Tongana e sara tongaso, kite ayeke pëpe so e yeke kono bê ti kiri singila ti e teti kota lango so. A yeke nzoni e azo ti Nzapa kue e bata mbeni ngoi ti diko na ti gbu li na ndo aye so a leke nde teti dikongo Bible na ngoi ti Mémorial, so a zia ni na yâ Gingo nda ti Tënë ti Nzapa lâ oko oko. Tongana e gbu li na ndo apendere sarango ye ti Jéhovah, so asigigi pendere mingi na lege ti ye so lo mû ti zi e, a sara si e pika kate ti e ndali ti so lo yeke Nzapa ti e. Tongana zo oko oko na popo ti e amû ngoi ti gbu li na ndo ye so sandaga ti Jésus aye ti tene teti lo, fade ndoye ti e kue na mbage ti Nzapa na molenge ti lo ayeke kono nga a yeke pusu e ti mû tere ti e kue ti sara ye so Nzapa aye.​—aGal. 2:20.

3. Tongana nyen si e lingbi ti fa bê ti kiri singila ti e teti Mémorial?

³ Tongana e kono bê ti kiri singila teti ye so Jéhovah amû ti sö e, fade ngia ti e na ngoi ti Mémorial so ayeke sara ngangu mingi ande na ndo ti awamandango Bible, avizite ti e, afami ti e, azo ti tere ti da ti e, amba ti e ti ekole wala ti place ti kua na ambeni zo nde so e tisa ala na kota lango so (Luc 6:45). Tongaso, sara kue ti tisa azo so, na ti mû na ala ambeti ti tisango ndo ti dabe ala na lango ni. Ti tene ala girisa mbeni zo pëpe, aita mingi abâ so a yeke nzoni ti bata iri ti azo so ala yeke tisa ka ala lakue na lê ti mbeni mbeti na ti zia lakue na ndo ni iri ti afini zo. Ti leke ye tongaso nga ti sara kue ti tisa azo kue so asara nzara ni ti ga ayeke mbeni nzoni lege ti fa bê ti kiri singila na mbage ti Jéhovah “teti Matabisi ti Lo so zo alingbi fa nda ni kue pëpe!”​—2 aCor. 9:15.

4. Nyen la ayeke mû maboko na e ti kono yâ ti kusala ti e na nze ti mars nga na avril?

⁴ Kono yâ ti kusala ti mo: Mo lingbi ti kono yâ ti kusala ti mo na nze ti mars na avril so? Biani, Nzapa ayeke iri deba nzoni na ndo mo tongana mo gi alege kue ti fa na azo “lumière ti Tene-nzoni ti gloire ti Christ”. Jéhovah so ayeke na gonda ti zingo nda ti aye na lege ti yingo atene: “Fade lumière asu na bingo.” (2 aCor. 4:4-6). Tongana a hunda ti leke ambeni bungbi ti fango tënë na ambeni ngoi nde nga na ambeni place nde, fade a-ancien ayeke sara ni. A-ancien alingbi ti mû li ni na yâ ye so a leke si ala na aita afa tënë a ninga. Ye so alingbi ti ndu fango tënë na ndo ti lege hio na ndapre, wala na ando ti dengo buze nga na lege ti téléphone na peko ti midi wala na lakui. Ti mû maboko na mo ti kono yâ ti kusala ti mo, zia na gbele mo wungo ti ngbonga so mo lingbi ti si dä na sara kue ti wara ni. Ti mingi ti aita, ti mû na Jéhovah ye ti ala ti nzoni kue andu mungo kua ti pionnier auxiliaire.​—aCol. 3:23, 24.

5. Tongana nyen si aita mingi ayeke wara nzoni ngbene ye so a kiri na wungo ti angbonga ti pionnier auxiliaire na peko?

⁵ Mo lingbi ti ga pionnier auxiliaire? A sara laso ngu mbasambala awe so a kiri na wungo ti angbonga ti pionnier auxiliaire na peko. Gbiango ye so amû lege na azo mingi ti wara aye ti nzoni so kua so ayeke ga na ni. Mo tara ti sara ni awe? Ambeni ita ayeke mû ka kua ni ngu oko oko. Na yâ ti akongregation mingi, gbâ ti ambeni ita ayeke mä tere na ala yeke mû kua ni legeoko, na mara ti angoi tongaso ayeke ambeni nzoni ngoi teti kongregation ni na yâ ti ngu ni so. Mo lingbi ti leke ye si mo wara ngia na lege ti sarango kua ti pionnier auxiliaire na ngoi ti Mémorial so? Teti so nze ti avril ayeke na anda-yenga oku, a lingbi ti duti mbeni nzoni ngoi ti tene aita amû kua so.

6. A leke anzoni ye wa so anzere na e?

⁶ Surveillant ti circonscription ayeke sara vizite ti kongregation ti mo na nze ti mars wala avril? Mo lingbi ti wara mbeni nzoni ye na lege ni. Tongana ti so a fa lani kozo awe, na yâ ti ngu ti kusala 2006, a yeke tisa azo kue so ayeke mû kua ti pionnier auxiliaire na nze ti vizite ti surveillant ti circonscription ti sara kozo mbage ti bungbi so lo yeke sara ande na apionnier. Kite ayeke dä pëpe so awango so ala yeke mä na ngoi ti bungbi so ayeke kpengba ala na lege ti yingo na ayeke pusu ambeni ti ala ti gi ti ga pionnier permanent. Na ndo ni, e yeke wara ngia ande ti mû maboko na azo na nze ti mars ti ga na yâ ti lumière ti yingo na lege ti fini buku ti mandango Bible, so ayeke Bible afa nyen biani? Leke na bê ti mo ti to nda ti manda Bible na azo na yâ ti fini buku so.

7, 8. (a) Ye wa alingbi ti mû maboko na e ti leke mbeni kapa ti mû kua ti pionnier auxiliaire? (b) Na lege wa ti sara kusala maboko na maboko na yâ ti sewa ayeke nzoni? Tongana nyen sewa ni kue awara nzoni dä?

⁷ Na ngoi so mo yeke bi bê na ndo angbonga 50 so a hunda ni na apionnier auxiliaire, gi ti bâ kapa wa alingbi ti mû lege na mo ti za lumière ti tâ tënë na yâ ti angbonga 12 yenga oko oko. Sara lisoro na ala so awara angbonga so kozoni awe nga na ambeni ita nde. Ye so alingbi ti yapu ala nga ti mû kua ni legeoko na mo. Awafango tënë so awara batême, akangba nga amaseka abâ so tongana zo aleke ye nzoni, a yeke ngangu na lo mingi pëpe ti wara ye so lo zia na gbele lo na yâ ti kusala so, so alingbi na gonda. Sambela ndali ni. Na pekoni, tongana mo bâ so mo lingbi ti mû kua ni, leke kapa ti mo na wara ngia na yâ kua ti pionnier auxiliaire!​—Mal. 3:10.

⁸ Asewa mingi abâ so tongana ala sara kua maboko na maboko, mbeni oko ti ala alingbi kamême ti mû kua so. Mbeni sewa aleke si azo oku kue ti sewa ni so awara batême awe aga pionnier auxiliaire. Amolenge use ti yâ ti sewa ni so ade ti wara batême pëpe aleke nga ti kono yâ ti kusala ti ala. Sewa so awara aye ti nzoni wa dä? Ala sû na mbeti: “Kusala ti e na yâ ti nze ni so anzere na e mingi. A sara si songo ti e akiri akpengba ahon ti kozo. E mû merci na Jéhovah ndali ti akota deba nzoni so!”

9. Tongana nyen e lingbi ti sara si lumière ti e aza na ngoi ti Mémorial so?

⁹ Kusala so e leke ni nde ti sara na nze ti mars na avril so ayeke ga ayeke mû ande na e wâ nga ayeke pusu e nduru mingi na Babâ ti e ti yayu? Ye ni kue aluti gi na ndo ngangu so e yeke sara ti maï ndoye ti e na mbage ti Nzapa na Molenge ti lo nga na lege so e yeke kono yâ ti kusala ti e. Zia e leke na bê kue ti sara ye tongana ti wasungo psaume so ahe na bia: “Fade mbi mû merci mingi na L’Eternel na yanga ti mbi, biani, fade mbi sepela Lo na popo ti azo so asi singo.” (Ps. 109:30). Fade Jéhovah ayeke deba nzoni ande na ndo kusala so e yeke sara na wâ na ngoi ti Mémorial so. Tongaso, zia e sara si kota lumière aza na amû lege na azo so ayeke na yâ bingo ti sigigi na ti wara “Lumière so amû fini.”​—Jean 8:12.