Atënë so i hunda
◼ Kpale wa ayeke dä tongana e sara kusala na Internet ti sara lisoro na mbeni zo so e hinga lo pëpe?
A sara ambeni place na ndo Internet ti mû lege na azo ti wara tere na ti sara lisoro. Na ndo Internet, mingi ti aplace so amû lege na azo ti zia ambeni aye ti ala dä na ti fa atënë na ndo ala mveni, so alingbi ti duti afoto wala ambeni sango na ndo ti ala. Azo so abâ asango so alingbi ti gi ti wara azo ni. Amaseka aye mara ti aplace na ndo Internet tongaso mingi, na ambeni maseka na yâ ti kongregation asara kusala na ni ti sara lisoro na ambeni zo so atene ala yeke aTémoin ti Jéhovah.
A yeke ngangu pëpe na lege ti Internet ti wara mbeni zo so ahonde na e tënë na ndo ti lo, dutingo ti lo na lege ti yingo, wala abibe ti lo (Ps. 26:4). Mbeni zo so atene ni yeke Témoin ti Jéhovah alingbi ti duti biani mbeni zo so ayeke ni pëpe, wala mbeni zo so bungbi abi lo na gigi, wala même mbeni ngangu apostat (aGal. 2:4). A bâ so akota zo mingi asara kusala na Internet ti gi ti sara pitan na akete molenge.
Même tongana e hinga biani so azo so e yeke sara lisoro na ala ayeke na nzoni iri na yâ ti kongregation, alisoro na alege tongaso alingbi ti gue ayo na ti ndu ambeni tënë so ayeke nzoni pëpe. Ye ni ayeke tongaso ngbanga ti so mingi ni azo ayeke na kamene pëpe ti azo so ala tingbi tere na ala lê na lê pëpe. Amaseka ni alingbi nga ti tene so tënë ni abâ gi ala, na ala bâ so tënë kue so ala tene fade azo ayeke hinga ye dä oko pëpe, atâa ayeke ababâ na amama ti ala wala a-ancien. Mawa ni ayeke so amaseka mingi na yâ ti asewa ti aChrétien atï na yâ ti gbanda ni, na ala tï na yâ ti sioni yanga (aEph. 5:3, 4; aCol. 3:8). Ambeni azia afoto ti ala so a zingo nzara ti tere, wala ala zia ambeni iri na ndo ti ala so andu tënë ti koli na wali, wala ala lingbi ti bâ alimon ti amozoko na ndo ti Internet na lege ti ordinateur ti ala.
Na lege ti aye so e londo ti bâ ge, a lingbi ababâ na amama abi lê na ndo ye so amolenge ti ala ayeke sara na ordinateur (aProv. 29:15). A yeke duti nzoni pëpe ti tisa na da ti e mbeni zo so e hinga lê ti lo pëpe wala ti zia lo gi lo oko na tere ti amolenge ti e. Legeoko nga, a yeke sioni mingi teti e wala teti amolenge ti e ti sara kamarade na azo so e hinga lê ti ala pëpe na lege ti Internet même tongana azo ni atene ala yeke aTémoin.—aProv. 22:3.