Fini kapa ti kota bungbi ti circonscription

Jéhovah alingbi ti tene a mû na lo gloire. Tongana nyen e lingbi ti sara ni? Nyen la asara si a yeke ngangu na ambeni zo ti mû gloire na Jéhovah? Anzoni ye wa azo so amû gloire na Jéhovah ayeke wara? Kapa ti kota bungbi ti circonscription ti ngu ti kusala 2008 ayeke kiri tënë pendere mingi na ahundango tënë so. Li ti tënë ni ayeke “Sara ye kue teti gloire ti Nzapa.” (1 aCor. 10:31). Bâ aye so ayeke ku e na alango use ti kota matanga ti yingo so ayeke ga.

Fade surveillant ti district ayeke sara tënë na ndo adiskur “Ngbanga ti nyen ti mû gloire na Nzapa” nga “Duti tapande ti sarango ye alingbi na ye so Nzapa ahunda”. Lo yeke mû ande kota diskur “Azo wa si ayeke mû gloire na Nzapa?” nga na tanga ti diskur ni “E bungbi oko ti mû gloire na Nzapa na ndo sese kue”. Lo yeke mû nga li ni na Ekole ti Kusala ti aChrétien. Fade surveillant ti circonscription ayeke sara diskur na ndo akota li ti tënë “Wara ngia mingi na fango na gigi gloire ti Nzapa”, “Bingo bê na ndo aye so atia circonscription”, nga “I ngbâ ti ‘kpengba na lege ti tene-biani’ ” so alondo na tënë ti 2 Pierre 1:12. Na ndo ni, e yeke manda ande tongana nyen “Kusala ti pionnier amû gloire na Nzapa”. Li ti tënë ti kozo ti apendere diskur use na ambage nde nde so ayeke “E mû gloire na Nzapa na yâ fini ti e kue”, ayeke fa ande nda ti nene tënë ti Nzapa so ayeke na 1 aCorinthien 10:31. Use ni so ayeke “E sara kusala ti Jéhovah ti sepela lo”, ayeke sara tënë na ndo ambage nde nde ti kusala so e yeke sara na Nzapa. E yeke wara nga ande nduru tënë na ndo Tour ti Ba Ndo nga lisoro na ndo versê ti lango ti dimanche. Batême alingbi nga ande ti duti dä.

Mingi ti azo ake ti hinga Nzapa. Bê ti azo mingi ayeke na ndo apialo ti azo ahon ti tene ala gbu li na ndo gloire ti Jéhovah (Jean 5:44). Me e hinga na bê ti e kue nene ti mû ngoi ti gbu li na ndo lege ti “Sara ye kue teti gloire ti Nzapa”. Leke ti gue na kota bungbi so na ti wara nzoni na yâ akapa osio ni kue.