Mû tapande ti aprophète: Amos
1. Ngbanga ti nyen tapande ti Amos alingbi ti duti mbeni ye so a kpengba e?
1 A si na mo lâ oko awe ti pensé so mo lingbi pëpe ti fa tënë ngbanga ti so mo bâ so mo yeke gi mbeni senge zo? Tongana a yeke tongaso, tapande ti Amos alingbi ti mû ngangu na mo. Lo yeke lani berger nga zo ti fango yaka, ye oko Jéhovah amû ngangu na lo ti fa mbeni kpengba tokua (Amos 1:1; 7:14, 15). Legeoko nga, Jéhovah ayeke sara kusala laso na azo so ayeke na tâ be-ti-molenge (1 aCor. 1:27-29). Tongana nyen tapande ti Amos alingbi ti mû maboko na e na fango tënë?
2. Ngbanga ti nyen e lingbi ti gbu ngangu tongana a kanga lege na e ti fa tënë?
2 Luti ngangu na gbele kangango lege: Na ngoi so Amatsia mbeni prêtre so ayeke voro molenge ti bagara na yâ ti royaume ti banga ti akete mara bale-oko ti Israël, a mä Amos na tenengo prophétie, na bango ni, lo yeke tene lani: ‘Kiri na ndo so mo londo dä! Zia e kpô! E yeke nga na nzapa ti e!’ (Amos 7:12, 13). Amatsia aba yâ ti atënë ti prophète ni na ngoi so lo yeke hunda na Gbia Jéroboam ti kanga lege na Amos ti sara kua ti lo (Amos 7:7-11). Me Amos asara lani mbeto pëpe. Laso, ambeni mokonzi-nzapa ayeke hunda na azo ti poroso ti mû maboko na ala ti sara ngangu na awakua ti Jéhovah. Ye oko, Jéhovah adë bê ti e so ye ti bira so azo asara ti ke e na ni alingbi ti sara ye na e pëpe.—És. 54:17.
3. Atokua use wa e yeke fa ni laso?
3 Fa tokua ti fango ngbanga ti Nzapa nga na aye ti nzoni so ayeke ga: Atâa so Amos asara tënë ti prophétie ti fango ngbanga na ndo ti akete mara bale-oko ti royaume ti Israël, lo hunzi buku ti Bible so iri ti lo ayeke na ndo ni na lege ti zendo so Jéhovah amû ti kiri ti leke kodro ti Israël so afuti giriri nga ti mû na ala gbâ ti aye ti nzoni (Amos 9:13-15). E nga kue laso e yeke fa tënë ti “lango ti ngbanga” ti Nzapa so ayeke ga, me so a yeke gi mbage ti “nzoni tënë ti royaume” so a lingbi e fa ni (2 Pi. 3:7; Mat. 24:14). Jéhovah ayeke futi ande azo ti sioni na ngoi ti Harmaguédon na lo yeke sara si sese aga paradis.—Ps. 37:34.
4. Nyen la amû maboko na e ti hinga so e lingbi ti sara ye so bê ti Jéhovah aye?
4 Ti fa tënë ti Royaume na yâ ti dunia so asi singo na azo ti kangango lege, a yeke zia mungo tere ti e na Jéhovah nga sarango ye so bê ti lo aye na yâ ti tara (Jean 15:19). Me, e hinga so Jéhovah ayeke ngbâ lakue ti mû na e ye so e yeke na bezoin ni ti sara ye so bê ti lo aye, tongana ti so lo sara lani na Amos.—2 aCor. 3:5.