Zia e bata ngangu ti e teti fango tënë
1 Ngbene ye na ngu 1992, ngu oko oko, aTémoin ti Jéhovah ayeke mû angbonga ahon ngbundangbu oko ti fa tënë ti Royaume na ndo ti sese kue nga ti sara adisciple. So tâ ngia si e yeke na ni ti mû mbage kete na yâ ti pendere gango tâ tënë ti ye so!—Mat. 28:19, 20.
2 Biani, singila na gonda kue ague na Jéhovah, lo so amû maboko na e na yâ ti kusala ti e na “lâ ti ye ti ngangu” so (2 Tim. 3:1). Ye wa a ku na mbage ti e tongana e ye ti ngbâ ti bi tere ti e kue na yâ ti kota kusala so?
3 Ye so ayeke na gunda ni: Kota ndoye ti e na mbage ti Nzapa nga na ti amba ti e, legeoko nga na nzara ti sara ye alingbi na mungo tere ti e na lo si apuse e ti sara kusala ti Royaume (Mat. 22:37-39; 1 Jean 5:3). Ndoye apusu e ti gbanzi ambeni ye na tere ti e si amû lege na e ti mû mbage mingi na yâ ti kusala ti fango tënë.—Luc 9:23.
4 E sara kue ti bata ngangu ti e: Wato ti e Zabolo ayeke sara kue ti tene ngangu ti e na yâ ti fango tënë akiri na peko. Azo ti territoire ti e so asara nzara ti tënë ni pëpe, angia so sese so ayeke zia na gbele e, akpale ti lâ oko oko nga seni ti e so ayeke kiri na peko, a yeke aye so kue si Zabolo asara kusala na ni ti sara si e nze.
5 Tongaso, a lingbi e sara kue ti bata lakue ngangu ti e. A yeke kota ye ti maï ‘kozo ndoye ti e.’ So aye ti tene ti diko Bible lakue na ti gbu li na ndo ni, ti ngbâ lakue ti wara aye ti nzoni na lege ti aye kue so Jéhovah amû na e na lege ti “ngbâa be-ta-zo na ti ndara” ti kpengba mabe ti e.—Apoc. 2:4; Mat. 24:45, MN; Ps. 119:97.
6 Tongana ti so aprophétie ti Bible afa polele, lâ ti Jéhovah ti futi azo so ake lo ayeke ga na loro (2 Pi. 2:3; 3:10). Na batango ye so polele na li ti e, zia e sara kue ti bata wâ wala ngangu ti e teti kusala, ti mû mbage mingi na yâ ti fango tënë ti Royaume nga na yâ ti kusala ti sarango adisciple so angbâ ti tambela na ndembe so na ndo ti sese kue!